ممكن اعرف مطالب المدرسين فى الاضراب علشان ابقى عارفة انا بطالب بايه بالظبط؟
 

الحصول علي حقوقنا بالكامل
1- الدرجات المالية المتاخرة
2- حافز الاثابة 200% اسوء بباقي موظفقي الدولة
3- حد أدني للأجور للمعلمين لا يقل عن 1500 جنيه
4- اقالة وزير التربية والتعليم وتعيين وزير تربوي

صح النوم;)

خلاص متضربيش
واستني خمس سنين
وقارني وقتها نفسك مع اي زميلة اتعينت معاك في اي وزارة أخرى
وهتشوفي انت فين وهي فين (ماديا واجتماعيا وصحيا و.............)
وقتها هتعرفي الاضراب كان ليه

يا أختاه
انتي مقتنعة بوضعك كمعلمة ومقتنعة إن أقل عامل فى أى شركة ياخد أضعاف راتبك

طيب بالراحة كدة الحوافز دى الوزير بتاعنا ربنا يخليه لإسرائيل خلاها 75 % للمعلم المساعد و50 % للمعلم و25% للمعلم الأول و25 % للمعلم الأول أ وذلك من المرتب الأساسى وهكذا
طيب نروح نشوف المصالح الحكومية التانية بتاخد كام
هاقول مثلاً الكهرباء وهاعمل مقارنة بين معلم 15 سنة خدمة وعامل سنة واحدة خدمة بقول عامل وليس موظف
المدرس أساسى 345 جنيه----------------- ------------------ العامل فى الكهرباء قول مائة جني
المدرس بيقبض 850 جنير مرتب------------------------ -------العامل فى الكهرباء بيقبض 1500جنيه مرتب شهر
المدرس بيقبض 70 جنية حوافز ------------------------------- العامل فى الكهرباءبيقبض 500 حوافز كل أسبوع تقريبا
المدرس بيقبض 1000 جنيه مرة واحدة من النقابة لما يموت-- العامل فى الكهرباء بيقبض 250000 جنيه أيوه مائتان وخمسون ألف
الوزير بتاعنا بيقول إن المدرس بيقبض أعلى مرتبات فى الدولة
النقابة وما أدراك ما النقابة
الدرجات المالية واقفة
وغيرها كتير
عرفتى بقى ليه بنعمل إضراب

يا جماعة باين عليها مش رواها حاجة

ايوه كده فهمتنى
طب هما ليه موقفين درجتنا المالية ده حتى الدنيا بتتغير والاسعار بتعلى انا دلوقتى عرفت لية الناس بتدفع رشاوى علشان تبقى فى الكهربا طب ليه الفرق الكبير بينا وبين بعض فى المرتبات مش احنا كلنا شغالين فى الحكومة طب واية موضوع النقابة دة هو مش احنا كلنا بندفع نفس الاشتراك ولا بتاع الكهربا بيدفع اكتر ؟

لأ ببساطة النقابة السابقة كانت واكلة كل موارد النقابة فى بطنها

ياريت يبقى اسلوب الحوار ارقى من كدة دا احنا مدرسين و بنربى حتى لو كان السوال تافه فانا كتباه علشان اعرف لانى لسة جديدة يااستاذ علاء تعيين السنة دى بسال والمفروض ان مدرس كبير زى حضرتك يوضحلى الصورة مش يتريق ياما ميردش احسن

لو حضرتك مدرسة جديدة أو حتى مواطنة عادية يسعدنا بالتأكيد انك تعرفى أسباب الإضراب عشان تبقى على نور ، و طبعا الأسباب كتيرة ، و منها
اسباب ادارية :
فساد ادارة التعليم على جميع مستوياتها بداية من الوزير المسؤل عن التعليم و هو أكبر خبرته عن التعليم كونه ( عنده اولاد فى المدارس و كان فى يوم من الأيام طالب فيها ) لكن لا يعلم شىء عن مشاكل التلاميذ فى الفصل و لا المعلمين و لا التوجيه و لا المناهج و لا طرق تدريس .... هذا اذا لم نضع فى اعتبارنا انه كان عضو بلجنة السياسات بالحزب الوطنى فى يوم من الايام و لازال يتبع نفس سياساتهم معانا.
ده طبعا غير الفساد اللى اكيد لمستيه فى الادارات و المديريات و المدارس نفسها.
اسباب مالية :
1 -الوضع المالى المتردى للمعلمين فى مصر بالمقارنة بالوظائف الأخرى مثل موظفى البنوك و الكهرباء و البترول ( و بلاش نتكلم على وكيل النيابة اللى اول مرتب ليه خمسة الآف جنيه )... و كأن مجهود المدرس لا يستحق اى قيمة
2 - فيه حافز تم تطبيقه على جميع العاملين بالدولة و هو بديل عن الحد الأدنى للأجور ( حافز 200 % ) بما يحفظ للعامل كرامته باعتباره يتلقى اجر ادمى .... تم استبعاد المعلمين من هذا الحافز و حجة الوزارة ان المعلم بياخد كادر .. و قام الوزير بعمل اكبر حملة دعاية سيئة عن المعلمين و قعد يجمع فى كل ما يتقاضوه ( بالسحتوت ) عشان يثبت للناس ان المعلم اصلا بيحصل على ال 200 % و اكثر كمان ، فضم الحوافز الشهرية على نسبة الكادر و كمان قسم المكافأة على الشهور عشان يوصل للنتيجة العبقرية دى ( نفس اسلوب النظام السابق )
3 - فساد التوزيع المالى لمخصصات الوزارة ، مثلا حضرتك بتتعبى طول السنة فى شغلك مع التلاميذ و فترات الامتحانات و التصحيح عشان تاخدى مكافأة امتحانات 200 يوم ( قبل الخصم ) و موظفين ديوان الوزارة اللى مابيتعبوش زيك بياخدو نفس المكافأة دى بس من 500 الى 900 يوم ( على حسب )
4 - الفروق الكبيرة بين الحد الادنى و الاقصى داخل الوزارة نفسها ، فمثلا المعلم المساعد مرتبه فى حدود 360 جنيه و مستشارى الوزير بيصلوا الى 60 الف و انتى طالعة
اسباب تخص العملية التعليمية :
و دى كمان اسباب كتيرة منها :
1- ضعف و ركاكة المناهج التعليمية و الاهتمام البكم على حساب الكيف
2 - تكدس اعداد الطلاب فى الفصول بما يرهق كل من الطالب و المعلم
3 - وجود قوانين بالتعليم تدفع دفعا الى ظواهر الغش زى قانون نسبة النجاح الاجبارى فى الابتدائى
4 - تعدد جهات الرقابة و التفتيش على المعلم بغير داع و كل جهة تلزمه بقوانين غير الأخرى
5 - غياب القوانين المنظمة للعمل داخل المدرسة و جعلها خاضعة لهوى ادارة المدرسة ، مثلا فيه معلم ياخد ريادة و نشاط و اشراف و غيره لأ ، فيه معلم يبقى امن على البوابة و غيره لأ فيه معلم ياخد حصص زيادة و احتياطى و غيره لأ ...
دى بعض الأسباب اللى ممكن تخلى اى معلم يطالب بالإصلاح للتعليم كله مش لأجل مصالحه الشخصية فقط

شكرا انك وضحتيلى الصورة بالشكل المفصل لانى مش كنت فاهمه واحنا فعلا لازم نعمل اضراب لان ده ظلم بين وفساد وغمط حق لانى الاساسى بتاعى 180 جنية وبسلاطاتة وبابا غنوجة بيبقى 385 جنية وده اقل من اى حد ادنى فى اى مكان