يا ألسنجيه يا مستجدين .. تحت أمركم اسئلوا براحتكم
 

الموضوع ده انا بصراحه عملتوا عشان عارف فى ناس كتيير عاوزه تعرف حاجات كتيير عن كليتنا
وانا كنت تايه زيكوا بالظبط فى الاول ومش فاهم اى حاجه بس الحمد لله الواحد فهم كل حاجه
ولازم نقولكوا الصح من الغلط ومش تقعوا فى الغلط اللى احنا وقعنا فيه ... انا سنه تانيه ألسن
قسم روسى :d اى حد عاوز يسأل اى سؤال تحت امره ..

لو سمحت بس كنت عايز اعرف مستقبل الكلية وهل فى شغل بعد التخرج وبمرتبات مجزية وايه هى اهم اللغات المطلوبة وهل هى احسن ام اقتصاد ام اعلام لانى بصراحة محتار جدااااااااااااااااا

بصى مستقبل الكليه فى مجالات كتييره اووى ليه عندك مترجم مرشد تور ليدر مدرس ده لو ضاقت بيكى اوووى يعنى.. غير كدا مجال اللغات كتييره جدا بس للى يتقنها صح.. بمناسبه الشغل انا حاليا شغال بمرتب كويس فى شرم الشيخ وبعدين انتى عمرك ما تفكرى فى الشغل من دلوقتى ده بتاع ربنا بالنسبه للغات المطلوبه كل اللغات مطلوبه بس كل لغه وليها مجالاتها فى الشغل يعنى .. مثلا عندك الروسى اكتريه شغله فى السياحه شغل الترجمه بتاعه قليل الصينى شغل الترجمه بتاعه جميل اوووى ..بالنسبه للأحسن بقى ده بالنسبه لميولك انتى وشوفى الكليه اللى انتى هتعرفى تأدى فيها اكتر بس بالنسبه لسياسه واقتصاد نصيحه لو هتدخليها لاما تدخليها شعبه أنجلش
او فرنش لاما بلاش لو دخلتيها عربى ولا ليها اى لزمه لكن بالنسبه لاعلام شغلها حلو للبنات
لكن مفضلهاش للشباب

وعلى فكره انا جالى فى التنسيق سياسه واقتصاد وحولت ألسن وربنا معاكى

انا اتوقع انك تقريبا انشاء الله هتلحق ولو ملحقتش عين شمس لقدر الله هتلحق المنيا
اما اتوقع بالنسبه لعلمى هيرفعوا عليهم التنسيق جامد .. لكن ادبى هيبقى كويس

لو سمحت
انا جبت 89 من غير المستوى وانا واخد جغرافيا
وبالمستوى جايب 90
والانجليزى جايب 39 مجموع السنتين والفرنساوى 44
كدا ينفع اخش السن لو التنسيق نزل ولا لازم الدرجات الانجليزى تبقى اكتر من 45

بص ع حسب التنسيق انشاء الله ولو ربنا مش أراد عين شمس ممكن تبقى المنيا وهناك فى المنيا مفيش تنسيق داخلى بتدخل اى قسم انت عاوزه بس لغات محدده بس هى اللى هناك
ومجموع الانجلش عادى اهم حاجه تجيب مجموع الكليه اما مجموع اللغه الاولى والتانيه هما اللى بيأهلوك انك تدخل قسم معين فى اقسام ع حسب درجه الانجلش واقسام ع حسب درجه الفرنش

تمام الكلام انا فى واحده زميلتى السنه اللى فاتت جابت 90.8 وجات عين شمس وبعدين انتى مجموعك معقول انشاء الله يجيب عين شمس

انا جبت 91.2 ادبي و جبت مجموع الالماني 48 و الانجليزي 45.5 و العربي 50 و مجموع اللغات كلها 143.5 كده ينفع الحق السن عين شمس ؟؟و ايه هي شروط القبول في السن عين شمس

السلام عليكم ..
انا جبيت السنة 93.2% وفى الانجليزى 43.5....وفى الفرنسوى 47.5....
وكنت اريد ادخل السن انجليزى وروسى هل ينفع ....
بالنسبة للدراسة فى الكلية هل هم يبدوا مع الطلاب بالبداية
وهل الدراسة سهلة ام صعبة
بالنسبة لالسن المنيا هل الاقسام ملهاش تنسيق داخلى

ولا يهمك يا صديقى المهم نقدر نوصلهم اللى هما عاوزينوا وشكرا ليك انت ..

بص الانجليزى صعب اووى انك تدخله عمره ما خد من 43.5 قبل كدا وأول مره ياخود قليل
كان فى سنتى انا خد من 45 بس ممكن تدخل بالمجموع ده روسى فرست
بالنسبه للدراسه فى الكليه اللغات الجديده بيبدأ معاك من اول الابجديه زى الروسى كدا
اما اللغات التانيه مش ملزمين انهم يشرحولك البدايات زى الأنجلش الألمانى والايطالى
واللغات عامه اللى انت ممكن خدتها فى ثانوى مش بيبدأوا معاك من الاول بالنسبه للدراسه صعبه
او سهله دى .. تتوقف عليك انت ومدى حبك للغه اللى انت عاوزاها ومزاكرتك وكلوا بالمزاكره بيبقى سهل اهم حاجه تحب اللغه اللى انت داخلها وتحس بيها وعاوز اقولك حاجه كليه ألسن مش سهله خااااااااالص عشان تبقى فاهم عاوزه مزاكره يوم بيومه وحضور غير كدا مش متدخلهاش عشان مش هتستفاد حاجه .....
فى المنيا الاقسام كلها متاحه ليك من غير تنسيق داخلى بس مفيش لغات كتييره هناك
مفيش غير انجلش وفرنش وايطالى والمانى ولغه تانيه مش فاكرها بس هما دول اللى موجودين ... وربنا يوفقك

شكرا على الموضوع الحلو!
اية اخبار السن يابانى و كورى؟من ناحية ملاحظتك او احتكاكك بطلبتها او الدكاترة،و انا اسمع انها بتاخد من مجاميع عالية فالانجليزى، انانقصت نص درجة فى الانجليزى (مجموع السنتين)و قفلت المستوى الرفيع الانجليزى،دا كفاية؟
شكــرا.

أة صح،و هو اللغة التانية بجد بتتكروت؟ انا اعرف ان التركيز عليها اقل بس ممكن نستفيد بيها بعد التخرج حتى لو ماكنتش انجليزى؟

هل انت متاكد ان جامعة المنيا ليس لها تنسيق داخلى ؟

هى ايه افضل اللغات من حيث الشغل؟

كورى ويابانى من افضل الاقسام فى الكليه وعدد الطلاب لا يزيد عن 25 ودى ميزه روعه وتنسيق القسمين يتراوح بين 49 الى 50 أنا عارفه ان السؤال مش موجه ليا بس حبيت افيد :)

انا الصراحه فى قسم انجلش والدكاتره بيشرحو بضمير بس احنا الى مش بنحضر وحكايه انك تستفيد بيها ممممممم مش هتستفيد اوى لان اللغه التانيه مستواها مش عالى للدرجه الى تؤهلك انك تشتغل بيها لازم تنميها بكورسات

امممم حضرتك انا جايبه 88 ألحقها؟؟؟
وعلمى علوم :(

ربنا يخليكى احنا تحت امرك.. وبالنسبه لقسم يابانى وكورى قسمين محترمين جداا وقسم يابانى يعتبر افضل قسم فى الكليه فى نظرى انا.. اولا لانه منفصل عن الكليه كلها بيبقى تحت اشراف السفاره اليابانيه اللى بتبقى يعتبر مشرفه عليه وليه منح دراسيه تكملى دراسه فى اليابان وبعد ما بتخلصى اصلا بتشتغلى ع طول وبيبقى عدده قليل جدا السنه اللى فاتت خد 10 بس وخاد من 49 فى الأنجلش وساعات تنسيقه بيبقى من 50 وقسم كورى بردوا قسم من الاقسام المحترمه والقليله فى العدد وصدقنى عن تجربه كل ما العدد بيبقى اقل كلما ما الاستفاده بتبقى اكتر والكورى واليابانى من احتكاكى بطلبتهم لغتين صعبين وعاوزين مزاكره جامد وبعدين بالنسبه لمجموعك انشاء الله تلحقى كورى او يابانى .. المستوى الرفيع ملهوش اى لزمه فى التنسيق اهم حاجه اللغه الاولى والتانيه

اللغه التانيه بتتكروت من الطالب مش من الدكاتره علشان اكتر من سبب بتبقى محاضرتها فى أخر
اليوم وقليل اووى اللى بيحضرها ده بالنسبه للانجلش الناس بتقولك ده انجليزى بدل ما اقعد لحد الساعه 4 استنى المحاضره لا انا انفض وده انجليزى هبقى ازاكره اخر السنه وتيجى اخر السنه تزاكره وتتنفخ فى الامتحان انشاء الله زى ما حصل معانا السنه اللى فاتت وبعدين اللغه التانيه
عمرها ما بتبقى زى اللغه الاولى طبعا التركيز عليها بيبقى أقل فانت لو عاوز تاخود منى نصيحه
فى اللغه التانيه خود لغه مش بتدرس كلغه اولى فى الكليه وشغلها مطلوب وبجد هتستفيد كتييير فيها زى البولندى والبرتغالى اللغتين دول مطلوبين جدا جدا ومش بيدرسوا لغه اولى فى كليتنا وليهم منح كمان انا فى واحد صاحبى سافر بعد الامتحانات شهر لبولندا يدرس هناك ..
لو دخلت لغه منهم وطورتها بكورسات هتبقى بجد استفادت جامد .. بس المشكله فى ناس بتاخود لغه جديده زيى انا مثلا كنت واخد روسى لغه جديده اول مره اعرف عنها حاجه فلو كنت
خدت لغه تانيه جديده عليا بردوا فى ظل انى الروسى صعب جداا مكنتش هعرف أوفق ما بينهم
عشان كدا اخترت أنجلش وريحت دماغى والانجلش فى شهاده التخرج مطلوب جدا بردوا
الانجلش فى اى حته مهم وضرورى .. وربنا يوفقك

أه متأكد بس مش فيها لغات كتير زى ألسن عين شمس
كل لغه وليها مجالها وعامه اللغات كلها مطلوبه اهم حاجه تتقنها صح انت

بس اولا مجموعك ده يدخلك ألسن انشاء الله لا تقلق ... وبعدين من نظرى حرام عليك مجهودك دورلك ع كليه علميه احسن بمجموعك ده

لا صعب جدااا الصراحه ..

العفو متقولش كدا ده اقل واجب نعملوا معاكوا ... اولا انت لو ادبى يبقى هتدخل الكليه وانت مستريح بمجموعك ده علمى بقى انت وظروفك فى التنسيق ..
اللغات اللى ممكن تبقى متاحه قدامك بمجموعك فى اللغات دى هما روسى تركى عبرى
ألمانى صينى وأقل الاقسام دى عددا هو العبرى ..الروسى والتركى عددهم كبيير مش قليل
والصينى الى حدا ما عدده كويس وبالنسبه للتركى بتدرس معاه فارسى ده اجبارى
ولغه تانيه انت بتختارها اى لغه انت عاوزها بتاخودها لغه تانيه وده بمزاجك انت
وبالنسبه للمواد بتزيد كل مدى بس انت فى اول سنه هتاخود فى الترم الاول حاجات بسيطه
زى استماع ومحادثه ونصوص وعربى ولغه تانيه ... والترم التانى بيزيد عليك مواد تانيه وفى سنه تانيه بتدرس الادب بتاع اللغه اللى انت واخدها وهكذا كل ماده العمليه بتوسع
ملحوظه / اللغه التانيه مش بتمتحنها الا اخر السنه ملهاش امتحان ترم اما باقى المواد كلها
ليها امتحان ترم

يا جماعة انا كنت واخد الماني ف الثانوية العامة لو ان شاء الله لحقت السن ينفع ادخل فرست ايطالي او اسباني او روسي ولا لازم الماني بس

لا مجموعي ف الانجلييزى مش كبير خالص 42.5 هلحق ايه فرست ؟؟؟؟؟ روسي بس

معلش بس انا عايزه اعرف هو لو انا عايزه ادخل قسم اسبانى لازم اكون واخده اسبانى كلغة تانية و الثانوية او لو حبيت اخد فرساوى و المانى لازم اكون خريجة مدرسة فرنساوى يعنى لازم تكون اللغة الأولى بتاعتى فى الثانوية فرنساوى ... كمان لو حبيت اخد صينى و انا جايبه فى تانية فى الأنجلش 24 ممكن ؟؟ شكرا

السلام عليكم
ايه اللغات التى سوف تكون مطلوبه
لو انا اخذت روسى فرست ينفع أ خذ انجليزى لغة ثانية مع العلم انا حاصل على 43.5 فى الانجليزى

ايهما افضل فى الشغل (روسى ولا اسبانى ولا صينى)

علشان تدخل قسم روسي مش محتاج غير لدرجه الانجليزى
ومعلش ممكن توضح السؤال التانى (روسي- صينى -اسبانى) ايهما افضل من حيث ايه ؟؟

اللينك ده خاص باتحاد 2011 ادخله وخد فكره عامه
http://dl.dropbox.com/u/31123736/fli...thadAlsun.html

بالنسبة للدراسة فى كلية السن هل فى ملازم وفى مكاتب تبيع هذه الملازم او مذكرات ولو فى مكاتب اين هى؟


ا رجو الرد على هذا السؤال

فى مكتب فرست امام باب حقوق وفى مول الزعفران ناحيه المترو هتلاقى مكتب السكريه وفى مكتبه اسمها الامل بس نصيحه لو بتفكر فى قسم المانى يبقى تنسي تماما موضوع الملازم ده الا قبل الامتحان لمجرد تاخد فكره

وعليكم السلام
السكند مش ليه شروط بس نصيحه مش تخد سكند انجلش بيجي صعب ومش هتستفاد حاجه بس براحتك

بص الروسي شغله ف مصر سياحه اكتر من الترجمه
الاسباني ترجمه وسياحه
صييني ترجمه بس متوفر

اه الدكاتره بتنزل ملازم وتحطها ف مكتبه فرست قدام حقوق او جمب المدينه الجامعيه بنين او هتلاقيها ف مركز الامل او السكريه ودول ف مول الزعفران وكل حاجه موجوده يعني مش تقلق

السلام عليكم
يا ريت حد يساعدنى ويرد عليا انا هستنى ردكو بجد على نار
انا جبت 21 فى الانجليزى سنة ثانية ثانوى ونفسى ادخل السن قسم يابانى او كورى ومش عارفة اعمل ايه عشان احسن درجة الانجليزى دى يعنى لو شديت على نفسى شوية وجبت فى ثالثة ثانوى 24.5 كده برده هبقة ناقصة 4 درجات ومش هينفع عايزة بقة اسئلكو اذا دخلت مستوى رفيع انجليزى وجبت 9 كده ممكن الحق يابانى او كورى ارجوكو ردو عليا هل المستوى الرفيع لى علاقة بدرجة الانجليزى يعنى ممكن يحسنها وانا اسفة على التطويل بس راعو ظروفى
مع العلم انى جايبة فى الالمانى 48

يا شباب انا جايب فى الانجليش 38 والالمانى 46 ايه الأقسام المتاحة ليا

لو سمحت عندي استفسار .. انا جايب في الانجليزي 46 و اخدت مستوى رفيع انجلش و جبت فيه 8 و مجموعي يعدي التسعين .. هل ممكن الحق السن عين شمس .. و لو ملحقتهاش و لبست في المنيا .. اعمل ايه عشان احول عين شمس ؟

المدينه الجامعيه يا جماعه عامله اييه؟؟ كل حاجه ليها وعليها لو سمحتوا؟

شكرا creative 1 على الرد ومش مشكلة المهم انى عرفت

ايه مجالات عمل كلية السن؟
ايهما افضل كلية السن اما تجارة e

مجالاتها ... مترجم مرشد صحفي مدرس
بصراحه مش عارف انهي الافضل بس كالسن حلوه تجاره انجلش حلوه بردو شوف انتى حابب ايه وادخله