|
بلاوي بتحصل في لجنة الامتحان عندنا
السلام عليكم موضوع بسيط جدا عن حجات بتحصل معانا في لجنة الامتحان ممكن تكون ظريفه وممكن تخنق الواحد اول حاجه وانا قاعد المهم صورنا موجوده معاهم في استماره وبيتم مراجعة الطلبه كل لجنه كلام جميل في طالب كان متصور وهو مش مربي لحيته المهم المراقب قاله س: اسمك ج : ........... تاريخ ميلادك ج :............ المهم تأكد ان بياناته صحيحه قاله اللجنه الجايه تيجيني حالق لحيتك المهم الواد قاله ليه رد عليه وقاله من غير ليه تحلقها وخلاص المهم قولت لها ياباشا احنا في لجنة امتحان مش في امن الدوله تخيلوا يرد عليا ويقولي ايه وانت كمان ياحبيبي اسمك وبياناتك ايه رديت عليه قالي طيب اللجنه الجايه تيجي لابس البدله قولت له البس براحتي قالي انت صورتك عندنا ببدله تيجيني ببدله المهم من كتر ما انا مستغرب ضحكت وقولت (عشت ياريس ) قالي ايه قولت له لا ولا حاجه حاجه غريبه جدا جدا اي واحد بيحصل معاه حاجه زي كده ممكن يتفضل يحكيها لنا عشان نعرف ان التعليم في بلدنا .......... |
هههههههههههههه طيب انا هقولك على حاجة حصلت معايا اول يوم يا كريم , انا اسمي الحقيقي شيري هو غريب شوية بس هعمل اية يعني , المهم عمونا الحاج الي بيمضي على الورق بيقولي اية دة هو احنا في النادي هنا !! اية شيري دة , قولتله اسمي شيري راح قايلي يا سلام !! انتي بتهزري في ثانوية عامة !! وهو شكله اصلا معقد نفسيا ومتبهدل جامد قولتله يا مستر والله اسمي شيري ممكن تسيبني بقى عشان عايزة اركز واكمل الامتحان راح قايلي يا سلام هو الموضوع بالساهل وريني رقم جلوسك , قولتله برا في الشنطة , راح نادهلي رئيس اللجنة وعملي مشكلة ومش اقتنع الا اما شاف رقم الجلوس . حاجة شلل اطفال .؟. |
ههههههههههههههههههه
والله فعلا بلاوي بتحصل يلا بقي ربنا يشفي مشكوره علي المرور الجميل يا شيري |
اقتباس:
العفو يا كريم وربنا يشفي ففعلا |
ههههههههههههههههههههههههههههههههههه
ايه ده ربنا معاكم دى ناس معقده وبعدين هو فى حد هيمزح فى الامتحان وهيكتب اسم غير اسمه ولا هيكتب دلعه المهم ربنا يشفى كل مريض |
اقتباس:
هههههههه انا عارفة !! لأ والي يغيظ اكتر انه مش عاجبه الاسم ومعترض . يعني انا اعمل لسيادته اية اغيره مثلا !! ناس عجيبة ويقولي هو في هزار في ثانوية عامة . |
سيبك منه وعلى فكره انت اسمك جميل واكيد انت مش محتاجه تعرفى ده
اكيد انت عارفه |
تبدأ إمتحانات الثانوية العامة الساعة التاسعة والنصف و لو زادت عن كده يكون أحسن
تصوروا إكتشفت إن الامتحانات بقت بتبدأ9،30:mad: شعارهم ( ليه تنفع الطالب ما دام ممكن تضره ) حاجة تخنق كل إمتحان على دا الحال ويقولولنا أى شكوى اتصلوا على الخط ساخن المراقب بعد ربع ساعة يوزع ورق الاجابة ببرود متناهى وينتحايل عليه يجبلنا ورق الاسئلة وناقص نقوم نبوس جزمته وبكل تناكة يقول فى إيه مش كفاية جاينلكو من العباسية ههههه البنت اللى جبتى بتقولى بصوت واطى (( مهو وااااااااااضح )):D ويتكرم الباشا ويدينا ورق الامتحان .. تعب نفسه أوى والساعة 12 إلا خمسة يلم الورق يوم العربى ده كان زى الفل وأنا أصلا بطيئة جداًً مكملتش النحو وكروت النصوص على الآخر وده يشد الورقة منى زعقتله ورحت معيطة .. (( أول مرة أعيط فى لجنة الامتحان )) حسبنا الله ونعم الوكيل |
لا تتعجبي اختي في الله
انها مصر جزاكم الله كل الخير |
صراحه احنا بيوزعو علينا الورق فى الميعاد الساعه 9
وبيستلمو الورق على ميعاد التسليم الحمدلله يعنى وربنا يوفق الجميع |
طيب احنا بقي ماشيين معانا بنظام بصراحه
يعني بيسيبوا لنا اللجنه نصف ساعه عشان يمشوا بدري وهي دي مصر |
وعندنا الغش من السنة اللى فاتت شغال الله ينور
كل ده علشان عندنا 6 مدارس خاصة بيمتحنوا معانا والواحد بيستحرم يعمل كده وآخر السنة يلاقى زمايله بالغش جايبين 95 و 96 % ويارتهم بيغشوا من بعض لا بيفتحوا الكتب والملازم و يدوها كوبى بست حتى بينقلوا الفصلة مش بيتخيلوا مثلا إنهم هايتحسبوا على اللجان اللى بيسبوها دى |
سبحان الله يبقى انت اكييد اكيد فى مصر
|
يا جماعة انتم زعلانين من اية !! طيب انتم متخيلين بقى بنت في امتحان العربي تمتحن على الارض .. والله ما بهزر هنا في مدرسة اسمها السادات البنت دخلت اللجنة لقت اسمها مكتوب في الكشف بس مش في ليها ديسك تكتب عليه والمستر بتاعها قالها مش لينا دخل عشان الامتحان كان خلاص دقيقة وهييبدأ وطلبت منه تكلم باباها يجيبلاها كرسي وطربيزة مش وافق .. والخبر دة قريته في الجرنال على فكرة !! بزمتكوا دي بني ادمين دي ... حسبي الله ونعم الوكيل والله . ثانكس اوي ياhend ere ربنا يخليكي دا من زوقك يا قمر |
والله ياشقاوه خلاص الواحد هيتجنن من اللي بيحصل ده
حرااااااااااام والله حسبي الله ونعم الوكيل حسبي الله ونعم الوكيل حسبي الله ونعم الوكيل |
الثانويه العامه حاجه عاديه ياشبابدبس الاعتماد علي النفس مش الدروس والكلام الفاضي
|
احنا بقا بيعملوا كل شويه يجبونا ورق ونمضى كل الامتحان كده تقولوا بمنضى كمبيالات مش عارف ايه نظام ده وفين هو نظام المتطور انا خايف يكون هو ده
|
اقتباس:
ههههههههههه هما بس بيضمنوا نفسهم عشان لما يجوا يحاسبوهم على فلوس الكهربا بتاعت المراوح .. يبقى في دليل انهم مش السبب وان الشعب هو السبب . شعب مبذر !! ماله الحر يعني وحش الحر :D:D:D:D شكلنا هنطلع من البلد دي بالشلل الرعاش :huh: |
هههههههههههههههههههههههه
جااااااااامدة لية يعنى هو انت رايح فرح انا لو منك البس اسود فى اسود |
اقتباس:
من هذااااااااااااااااااااا :o |
والله كل اللى أنا قريته ده إن دل يدل على إن إنتم اللى فرطو فى حقكم من الأول أنا المراقب كان بيدخل علينا اللجنه إن صوته على وزعق لواحد مننا كنا ممكن نرميه من الدور الرابع أنا المره الوحيده اللى مدرس جه يغتت عليا غتت عشان اسمى فى الآخر السادات قعد يقولى دا مش اسمك أنا هعمل أنا معرفش ايه روح بصص له من فوق لتحت ومطلع البطاقع حططها على الدسك وقايله يلا هوينى ولو سمعت نفسك جنبى تانى متلومش الا نفسك وعليها معداش من جنبى تانى |
هههههههههههههه
جامد والله ياسادات خلي بالك انا مش ثانوي عام انا ثانوي صنايع يعني احنا برده متشردين بس ده امتحان مش بنكلم حد في الامتحان بنصبر لاخر يوم ونظبط اي حد بس لقيت الموضوع غريب شويه قولت اعرض عليكم بلاوي من ببلاوي الزمن مشكور ياباشا علي المرور |
انا بأه من سينا
وطبعا المراقبين جايين من بلاد تانيه خالص وال ايه اكل الاستراحه مش عاجبهم يقوم واحد منهم يقول لزميلنا والله الاكل هنا مش ولا بد يعنى لو تقدر تعمل حاجه كده من اللى بنحبها واهو هنفيد بعض هههههههههههههههههههههههههههههههههههههههههههههههههه هههه |
:
اقتباس:
زينا بالذبت و المشكلة ان الحوار ده زاد في امتحان التفاضل و التكامل بتاع 3 :( و رئيس اللجنة حضرتوه مش عجبوا الورق أم قطعوا و خلانا نمضيه تاني :mad: :mad: حاجة تقرف و الله يعني الامتحان مصيبة و نقصين نضيع وقت . انا مكنتش همضي و قلت مينفعش كيده بس المراقب كان طيب قال اه و الله مش هتعرفوا تركزوا كيده .؟...انا حصل معايا موقف من 3 سنين ايام الشقاوة في 1 ثانوي قبل نظام التقسيم المواد علي ترمين و كيده كنا بناخد 15 مادة مرة واحدة المهم انا ذاكرت كله و جيت علي الفلسفة و انا بكرههها و بكره الحفظ هبا دخلت اللجنة و كان معايا ورق مراجعة لقيت العيال شغالة علي الديسك و علي الحيطة الله ينور و انا مكنتش عارف حاجة اومت اديتها علي الحيطة و علي الديسك و ورق في الديسك و الله عملتها مكتبة و جلنا مراقب ::: و اقام قال اه ده انا طبعا مرديتش لقيتوا وش قلب احمر (خفت ليتحول ) و قام زققني و شد الديسك و كل ما يهزو ينزل ورق أم قالي : الله يخربيتك عاملي مكتبة :mad: و قام جبلي استيكة و اعت امسح كل النا كتبته علي الحيطة و مسك القلم بتاعي و اعد يشخبط علي الديسك :D:D انا الحاجة الوحيده الفرحتني ان هو اخد الديسك برة و قال للمشرف غيرهولي رئيس اللجنة قالوا لا :D :D :D ايام ربنا ما يرجعها |
اقتباس:
يعنى عايزنى أقوم ازعق للمراقب دا انا مش بعرف ازعق لواحدة صحبتى اجدع حاجة بعملها اعيط :D ههههههههه بتفكرنى بولد السنة اللى فاتت كان فى اللجنة اللى جنبنا هههههه ضرب مدرس بالحزام و والمدرس ولا عمله حاجة ههههههههههه بس بصراحة صعب عليا المدرس ده اوى كان شكله وحش بيضرب من عيل ادام الفين بنى ادم :( انت كده جرأتنى يا محمد اروح الامتحان بخرزانة وماطوة أرن غزال زيادة فى الاحتياط :D |
انا اختى وهى فى 2 ثانوى و3 ثانوى كانت بتمتحن فى لجنة خاصة علشان هى منتقبة
|
يا معلم يبقي انت اكيد في مصر
بس بيني وبينك احنا عندنا في المدرسة اللجان حلوة عارف ليه؟؟؟؟ لان يا معلم عندنا المديرة بتصرف لكا استاذ شاي و بسكوت طول الامتحانات وطبعا الاستاذ مش ينفع ينكر الجميل و طبعا مش هي اللي بتدفع لا بتلم تبرعات من الطلبه و ماله وانا باعمل اعادة قيد اتقلب مني 35 جنية تبرع بس بيني وبينك جاي بفايده مع اني مش غشيت ولا حاجة بس اكيد في يوم هاتزنق وعموما انا واحد صاحبي كلم الاستاذ عالموبايل في اللحجنة و حلل امتحان التفاضل كله بس مش عرف ينقلة رسمة حساب المثلثات فحلله المسىاله بس سلام |
؟؟؟
اقتباس:
|
اقتباس:
هو احنا بنمتحن ولا بنحارب يا جماعه ... هههههههه بس نفس النظام ده بيحصل عندنا ... وانا كل ما الواد اللى ورايا يخبطنى فى ضهرى عشان اقوله حاجة المراقب يقولى خلى عندك دم وساعد زمايلك .... والله والله قلتله نعم يا روح امك ده انا عاوز حد يساعدنى .... الراجل بصلى وهو مذهول .... و سكت زى الكلب ولا قدر يفتح بقه |
عليكم السلام ورحمه الله وبركاته ازيك ياكريم بص ياصاحبي علشان اقولك المفيد ف البلد دي حقك ضايع ضايع وبالله عليك ياخي اتكلم بواقعيه واسمعني بواقعيه ساعه ما يكون فيه حاجة زي كدا نفض نفض ثم نفض اعمل عبده هريسه اللي مش فاهم حاجة ف اي حاجة لان لو شديت مع شوية الكلاب اللي ماسكين عضمه دول ممكن تتأخر عن امتحانك ففكك ياعم والله شوية كلاب علي الولف الكبير بتاعنا عايزين عضمه ويشبعوا فيها مص كبر دماغك ياكريم بلد عايزه الحرق |
اقتباس:
احنا بقي في الانجلش بدنا نحل علي 9.30علي مالورق جه قلت للمراقب طيب اناهقعد لغايه12.30قالي بقولك ايه روحي مش فاضيينلك محبيتش اتخانق عشان اعرف احل يلا هي دي مصر يا شباب |
اقتباس:
ههههههههههههه وانتا عايزنا نعمل كدة عشان تتسحب وراقتنا وناخد استمارة 55 اسعاف !! انا ليا سياسة تانية خااااااااااااااااااااااالص مش هو استخف دمه معايا !! طيب انا اسمي شقاوة يعني بعيد عنك معترف بيا في جامعة الاشتغال الخاصة !! ومعايا شهادة في رفع االضغط :D لكن لو عملت معاه الحكاية دي علني انا الي هروح فيها مش هوا :p |
احنا كنا بنثبت المدرسين بالسلاح السنه اللى فاتت فى مدرسه السلام شبرا
|
يا سلام علي الامتحانات وجمالها
اولا المراقبين يوم ما بيكلمونا بيقولولنا "يا جماعة ميصحش كده غشوا بصوت واطي" !! يوم العربي بنتين عراقيتين قاعدين جنبي استلموني يا رحمة ارجوكي وحياة والدك ووالدتك وانا طبعا حاجه من اتنين يا عملة هبله وكأني مش سامعه يا ابصلهم واقولهم وعلامات الأسي علي وشي : بجد يا جماعه انا اسفه مبغشش لحد ما المراقب جالي قالي هو انتي حليتي الامتحان كله قلتله لأ قالي طيب محتاجه حاجه قلتله لأ قالي طيب حليتي النحو قلتله اه قالي طيب وريهولي كده بصيتله بحاجب نص مرفوع وفتحت الورقه بكل سذاجه وطبعا عرفت بعدها انه كان وسيط للغش يوم التفاضل قالوا يا جماعه ظبطوا الديسكات ع مزاجكوا وبتاع صحابي قالولي يا رحمة يا ريت نساعد بعض وبتاع قلتلهم بصوا يا جماعه انا لو سقطت ف الماده دي بسبب اني مغشتش فأكيد علشان ربنا كاتبلي الخير في الدرجات الي هنقصها دي (وقد كان) المهم البنتين قعدوا جنب بعض قدامي ولقيت واحد قاعد ورايا علي طول مصري وجنبي واحد عراقي وما شاء الله طول الامتحان يا انسة .. لو سمحتي .. من فضلك .. السؤال معرفش رقم كام وأساسا امتحان التفاضل مكانش ناقص وانا قاعده عامله فيها مش سامعه حاجه لحد ما لقيت الواد الي ورايا قام عمال يخبط ع ديسكي ويقولي علي فكره يعني لو انتي عارفه حاجه يا ريت تساعدينا ساعتها طفح بيا الكيل وقمت قلت للمراقب بصوت جامد لو سمحت مينفعش كده انا مش عارفه اركز قام المراقب قالهم وبكل برود يا جماعه عيب دي لجنة غشوا بصوت واطي وقام شوية جالي وقالي ع فكره لكل مسأله مفتاح قلتله نعم؟ قالي زمايلك دول ف عرض اي اجابه مش لازم تغششيهم قوليلهم بس مفتاح الحل قلتله يا مستر من فضلك انا مش عارفه احل ربع الامتحان حتي قالي معلش ونصيبك عند ربنا وحوارات هابطه كده وما الي ذلك شوية الواد الي جنبي نقحت معاه يشرب سجاير وانا اساسا مبستحملهاش واصلا هو كان يوم اسود وحوارات الامتحانات دي كتير معايا آخرها مدرس كان بيمسك ورقتي ويمشي يغشش العيال منها اول ما خدتها منه مرضتش اديهالو تاني قامت المراقبه شتمتني وقالت اني بنت مش محترمه ازاي المدرس يقولي هاتي ورقتك واقوله لأ ! بس بأمانة لجنة الانجليزي اول اللجنة مدرس جه قالي انتي لغات قلتله لأ عربي قام قالي ما شاء الله طيب كملي وانا بحل البنات كانوا بيسألوني وهو واقف واعتذرتلهم قام قال للجنة يا جماعه محدش يكلم البنت دي سيبوها تركز اهو مدرس اخيرا نصفني مع انه كان مستغربني لأني كنت والله العظيم الوحيده الي لا حاولت تغش ولا تغشش وقام جه سألني انتي جايبه كام وكده وقعد يدعيلي شوية ربنا يكرمه ع فكره حاجه بايخه اوي حكاية الغش دي لأن اللجنة بتبقي دوشه بجد ودي حاجه فعلا مزعجه بتقلل التركيز أوي وربنا ما يوريكوا الي انا فيه قولوا امين شكرا كركر ع الموضوع |
اللى عايز يسلك فى لجنه امتحان يزعل اللى يكلمه يعنى اللى قعده على الارض كانت قلبت الدنيا وكاانوا هيجيبولها
اللى عايزاه انا عن نفسى كنت مخلتش حد فى اللجنه يحل كنت اقطع وش المراقب اساسا واللى بيقولها الاسم مش عاجبه كانت تنفضله تقوله مش زنبى رقم جلوسى عندك هى توريله البطاقه وتنفضله واللى بيقوله تعالى بالبادله والله كان قاله هو كده لو كان عاجبك والله مكان هيعرف يعمله حاجه احنا كنا بنمشيهم على العجين لو حد يسمع على مدرسه السلام الثانوى شبرا الخيمه والحمد لله داخلنا الجامعه اهه عقبالكم يا رب مشاهد من الثانويه |
اقتباس:
في حد في مصر كلها مش سمع عن مدارس شبرا اقتباس:
بس بردوا مش سيبت حقي يعني :d |
هههههههههههههههههههه أنا اتعقدت منها من قبل مدخلها استرها معايا يار ب دا أنا غلبانة |
انا فى حقوق عين شمس وحقق عنى بعدين والله مرة جابلنا رئيس اللجان معرفش يعمل حاجه
جاب الحرس الظابط الواد قعد يشتم وكان هيضربه و معرفوش يعملوا حاجه اعملوا اللى عايزينه بس موتوا على ورقت الاجابه لو اطنطط متديهالهوش وهو ميقدرش يشدها لو اتقطعت هيروح فى داهيه اللى عايز اى مهم يخش هناااااااا وده ايميلى اى خدمه انا تحت امركم pop4negom ياهووووووو |
اقتباس:
تفائلي يا تيمون تفائليييي الدنيا لذيذة واي حد يكلمك نص كلمة صفري بس وانا ولا اعرفك :D |
يا جماعه بجد حد يجيبلي اي حاجه للضغط :D انا خلاص اعصابي في الحضيض ايه اللي بيحصل عندكم ده هو انا بمتحن في المريخ ولا حاجه احنا مفيش في قاموس لجنتنا حاجه اسمها غش ورق الاجابه بيتوزع 9 الا عشر دقايق عشان نسطر والاسئله 9 الا دقيقه عشان ع اخر اللجنه تبقي 9 و دقيقتين ولا حاجه والورق بيبتدي يتلم اول ما الجرس يضرب والمدرسين بيمضو في اول اللجنه عشان مش يعطلونا والمستر اللي بيدخل يتأكد من البيانات وكده يعد يهزر معانا وانتي تعرفي اللي في الصوره دي ومش عارف ايه وبيجيبولنا ميه ساقعه كل عشر دقايق الحاجه الوحيده اللي مش صح ان المروحه بايظه قامو جابولنا مروحه مكتب المديره وهي تولع بقي مش مشكله :D مع العلم اني في مدرسه حكوميه مش خاصه ولا حاجه واللي اتفرج اول امبارح ع نشرة 6 او 9 شاف شكل المدرسه وشكل اللجان واحنا بنمتحن مع انهم صوروا ع غفله من غير مقدمات يعني الواحد محسش بالنعمه اللي هو فيها غير لما سمع كلامكم بجد ربنا يكون في عونكم ده انا ع كده المفروض اطلع الاولي ع الجمهوريه امال بجيب درجات هباب ليه انا مش عارفه وبعك في الامتحانات ليه برده مش عارفه ده انا لو كنت في لجنه من لجانكم كنت سقطت في سنتي دي انا اصلا لو في نمله معديه جنبي بعد اتفرج عليها واسيب المذاكره ياللا يا جماعه برنا يوفقنا جميعا الحمد لله الذي عافاني مما ابتلي به غيري |
قلتلكوا يبقي انت اكيد في مصر
يعني امال ليه بيقولوا اللي يشرب من النيل لازم يرجع ليه؟؟؟؟؟؟؟؟؟؟؟؟؟؟؟؟؟؟؟ ماهو فيها جرعات مصرينن شقاوة علي خنقة و سذاجة و رخامة اهمال كل اللي يعجبك جينات مورثة و السبب النيلبس في ناس تقلت في الشرب اوي بقي برب |
حسبي الله ونعم الوكيل
|
انا مفيش حد بيعرف يتكلم معايا
لازم تدبحلهم القطة من اول يوم في اللجنة قولهم اخوك امن دولة قولهم اي حاجة ابوك مثلاً مخابرات اي حاجة
هايعاملوك احسن معاملة ودي نصيحة جامدة جدا وعملت بيها ناي كتييييييييير |
بلد عايزه الحرق
طيب والبلد مالها ششعب عايز الحرق طيب والشعب ماله حكومه عايزه الحرق طيب والحكومه مالها يبقي انا اللي عايز الحرق طيب وانا مالي حسبي الله ونعم الوكيل |
يا جماعة الثانوية دى عايزة قلب لازم تكون بارد مع المراقب و رئيس الدور حتى لو انت مش بارد تبقى غلس بدل هو ميرزل عليك و يخنقق ترزل انت علية و يخلية يسيبك انا كان خنقنى المراقب فى امتحان التفضل و حساب المثلثات و النهردة فى امتاح الانجليزى
بس اا مرحمتهوش لاغايط اما جبلى رئيس الدور و جالى رايح رئيس الدور جايب تختة و قاعد قدامى بالظبط بس انا مرحمتهوش قعد اغش بس المشكلة ان الغش سهل بس مافيش حد تعرف تغش منه يعنى كل كان فى اللجنة فى امتحانالانجليزى بيقول no comment |
لا واسعه دي
|
تزاكر جامد ومتنجحش يبقي انت اكيد في مصر ولما تتخرج ومتشتغلش يبقي انت اكيد في مصر ولما تشتغل ومتكسبش يبقي انت اكيد في مصر ولما تحب وتفشل يبقي انت اكيد اكيد في مصر ولما تخطب ومتتجوزش يبقي انت اكيد في مصر عظيمه يا مصر يا ام الدنيا ...
|
ياجماعه اى حد عنده امتحانات الجبر بتاعت نماذج المركز القومى ياريت يبعتها لانى محتجاها
|
ياجماعه لو سمحت اى حد يقولى هما بيعملو كده ليه لو مش عايزين حد يدخل ثانويه عامه خلاص يقولو من الاول انا اتعقدت بجد خلاص حرام
|
انا معايا نماذج الفرنساوى لو حد يدينى الجبر واديله:( الفرنساوى
|
| جميع الأوقات بتوقيت GMT +2. الساعة الآن 09:50 PM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.