|
نصيحة طالب جامعى لطلبة علمى رياضة اللى مجبوش مجموع هندسة
للأسف طلبة الثانوية العامة مبتعرفش الكلام ده الا لما بتدخل الجامعة .. أنا فى تجارة انجليش عين شمس و عايز أقولكم ان فرص العمل عندنا أحسن حتى من هندسة .. خصوصا بالنسبة للطلبة اللى بيجيبوا جيد جدا و امتياز .. و عايز أقولكم ان مفيش حاجة اسمها كليات قمة .. القمة ان أنت تتميز فى كليتك أيا كان اسمها .. و نصيحة لطلبة علمى رياضة اللى مجبوش مجموع هندسة حكومة .. فكر كويس و اهدى قبل ما تقرر تدخل هندسة خاصة و اعرف كل كلية بتدرس ايه الأول عشان ممكن تلاقى مجالات تانية كتير تكون أنت حاببها أكتر و عارف انك هتتميز فيها عن باقى الناس .. و أوعى تدخل هندسة عشان اسمها .. انك تتميز فى كليات تانية عن باقى الناس أحسنلك بكتيير انك تدخل هندسة و تجيب مقبول بالعافية كل سنة أنا كنت نفسى أدخل هندسة و كنت زيكم كده بالظبط و أكتر .. بس لما مجيبتش مجموع هندسة حكومة ابتديت أفكر ايه البدايل و أعرف أكتر عن الكليات التانية بتدرس ايه بالظبط و لما اتخرج ممكن أشتغل فى ايه و ايه فرص العمل بتاعة الكلية دى .. و بالنسبة ليا أكتر كلية شدتنى بعد هندسة كانت تجارة انجليش رغم ان مجموعى كان يجيب حاسبات و معلومات لكن أنا عشان مش بحب شغل الكومبيوتر و البرمجة و عارف انى مش هتفوق فى المجال ده فرفضت ان أنا أدخلها رغم ان هى بتاخد أعلى مجموع بعد هندسة لكن سمعت بعد كده عن تجارة انجليش و ساعتها كان أول حاجة اسأل عنها هى شغلها و فرص العمل بتاعتها و عرفت ان اللى بيتفوق فيها و بيجيب تقدير عالى و اللى بيكون فاهم جدا الحاجات اللى درسها فى الكلية* بيكونوا أكتر ناس مطلوبين فى البنوك و الشركات و خصوصا انهم دارسين كل حاجة بالانجليش و اللى مش مصدقنى يسأل أى حد كبير عن شغل تجارة انجليش أنا مش بقول للناس انها تدخل تجارة انجليش , لكن بقولكم فكروا كويس قبل ما تختاروا هندسة خاصة , و بحاول أقدملكم بديل تانى عن هندسة بجانب حاسبات و معلومات , أنا لما دخلت تجارة انجليش اكتشفت ان الكلية دى بتدرس فيها مواد كتيير جدا و متنوعة بجانب المجال اللى أنت هتكمل فيه بصراحة مقدرش أقولكم ان تجارة انجليش كلية سهلة لأن مفيش حاجة اسمها كلية سهلة أو كلية صعبة , و مقدرش أقولكم برضو انك لما تخش الجامعة هترتاح بقى من ثانوية عامة , من الأخر لو هتريح فى الجامعة أيا كانت الكلية مش هتجيب تقدير و مش بقولك برضو انك تقضيها مذاكرة , أنا بقولك طالما أنت حابب الحاجة اللى أنت بتدرسها و بتجتهد و بتذاكر يبقى سيب الباقى على ربنا أنا عن نفسى اكتشفت فى نهاية أول سنة ليا انى لو كنت جيبت مجموع هندسة و دخلتها كنت هتعب جدا و هفشل فيها لسبب واحد , انى بكره الفيزياء و هندسة كلها فيزياء و رياضة . و فى نفس الوقت حسيت انى اتعلمت حاجات كتير أوى فى تجارة انجليش بالذات لما تكون بتدرس كل المواد بلا استثناء بالانجليش حاول لما تدخل الكلية مايكونش هدفك الأول انك تجيب تقدير و خلاص , لأن اللى بيفرق بين الناس مش التقدير بس , التقدير و الفهم , لازم تكون فاهم جدا اللى أنت بتدرسه عشان ده اللى هيكمل معاك بعد كده , و صدقونى ثانوية عامة مش أخر الطريق , بالعكس دى بداية الطريق و هتعرفوا الكلام ده كويس لما تدخلوا الجامعة , ياما ناس كانت جايبة مجاميع كبيرة جدا و دخلت هندسة و مقدرتش تتفوق فيها , اللى عايز يتفوق فى هندسة لازم يكون متميز جدا فى الرياضة و الفيزياء بصفة عامة على كلام زمايلى اللى فيها أخير بالنسبة لتنسيق تجارة انجليش , أنت أولا فى التنسيق بتقدم على تجارة عادى. بعد ما تقبل فيها بتقدم جواها على انجليش و بيتعمل تنسيق داخلى فى الكلية على اللى هيقبلوه و لازم تكون جايب درجة عالية فى الانجليزى بتختلف من سنة لسنة و من جامعة لجامعة يعنى ممكن يكون مطلوب منك 45 أو 42.5 و التنسيق بتاعها طبعا بيختلف برضو من سنة لسنة يعنى السنة اللى فاتت مثلا تجارة انجليش عين شمس كانت واخدة 87.5% أدبى و 90.5% علمى و ده اسمه مجموع اعتبارى له حسبة كده معينة أتمنى أكون أفدتكم و أى استفسار على أى حاجة أنا تحت أمركم |
طمنتنى اووووووووى كلام ف الجون
|
ممتاز جداً وكلام منطقى |
ربنا يكرمك زى مابتفكر فى غيرك وتنصحه
اسأل الله العليم الخبير ان يرزقك من حيث لاتحتسب وان يوفقك فى كل خطوات حياتك سؤالى هو ابنى حصل معاه بالظبط الكلام اللى قلته وبفكر فى تجاره انجلش القاهره بس قلقانه اكتب فى التنسيق تجاره بس وبعدين الاختيار لانجلش متجيش يبقى مقلب كبير مجموع سنه تالته الاعتبارى هو 415 فهل ممكن تيجى ولا لآ مع الشكر |
ربنا يكرمك زى مابتفكر فى غيرك وتنصحه
|
لوسمحت ايه هو المجموع الاعتبارى ؟؟ وبيتحسب ازاى ؟؟
|
ابن دفعتي xD
المجموع الاعتباري لانه هو موضحش :) المجموع الكلي + مجموع الانجلش مره تانيه + المستوى الرفيع لو كان انجلش من بعد 5 درجات والانجلش مطلوب 42.5 هو السنه اللي فاتت نزل ل 40 بس معتقدش انه هينزل السنه دي :) ولو نزل خير ليكم لان اكتر الدكاتره اشتكت من ان الدرجه تنزل ل 40 وبالتوفيق ليكم جميعا |
اقتباس:
لكن بالنسبه لتنسيق القاهره ياريت يسئل اي حد من القاهره :)برده وانا ليا واحد كان جايب اقل منه ودخل القاهره بس فرع الشيخ زايد :) |
اقتباس:
يعنى مثلا السنة اللى فاتت كانت تجارة انجليش عين شمس بتقبل من علمى لحد مجموع اعتبارى 90% لكن السنة اللى قبلها كانت واخدة مجموع اعتبارى 91.5% , يمكن الفرق ده لأنهم ضاعفوا عدد الطلبة المقبولين عندنا فى عين شمس لكن القاهرة السنة اللى فاتت كانت واخدة أكتر من 91% , فهو الموضوع معتمد على عدد الطلبة المتقدمين لتجارة انجليش فى كل جامعة اللى بيتغير كل سنة فهو معتمد بشكل كبير على التوفيق , بس أنا شايف فرص ابن حضرتك فى عين شمس أحسن من القاهرة لأن عدد المقبولين فى عين شمس زاد الضعف تقريبا و ربنا يوفقوا ان شاء الله و يقبل |
اقتباس:
|
اقتباس:
المجموع الكلى + مجموع الانجلش مره تانيه + المستوى الرفيع لو كان انجلش من بعد 5 درجات يعنى مثلا أنت جايب 379 و جايب فى الانجليش 47 و واخد مستوى رفيع انجليزى و جايب فيه مثلا 7.5 فأنت بتجمع 379 + 47 + 2.5 فيبقى مجموعك الاعتبارى 428.5 و اجمالى المجموع من 460 فكده يبقى مجموعك الاعتبارى 93.1% |
اقتباس:
اقتباس:
اقتباس:
و أنتوا بعد ما تخلصوا أول سنة فى الجامعة هتعرفوا الكلام ده كويس و أنتوا اللى هتنصحوا الناس الجديدة |
صح الصح :d
انا ف أولى حاسبات عين شمس وبصراحه داخل الكليه تنسيق بس لما دخلت لقبت دفعتنا 630 منهم 170 لاحقين هندسه وداخلين حاسبات كنت مستغرب شويه ف الأول .. بس بعد كده عرفت ان الناس دى بتفهم وداخلين مجال بيحبوه بعد ما دخلت الكليه نسيت الدنيا والهندسه وكل حاجه وحبيت الحاسبات جداً بس مشكله الناس جهلهم بالكليه محدش عارف احنا بندرس ايه ولا بنعمل ايه الترم الأول كله فيه ماده واحده اللى خاصه بالكمبيوتر والترم التانى هكذا وباقى المواد فيزيا وماث و الكترونيات ولما كنت بقارن المناهج مع زمايلى اللى ف هندسه لقيت تقريبا نفس المناهج ف لازم كل واحد ربنا يختارله مجال .. لازم يحب المجال ده عشان يمشى فيه وربنا مبيخترش لحد حاجه وحشه :) |
اقتباس:
بس الغلط مش فيهم , الغلط فى الأساتذة و الأهالى اللى ثبتوا فى دماغهم فكرة كليات القمة و انهم لازم يدخلوا الكلية اللى بتاخد أعلى مجموع و الغلط برضو فى نظام التعليم الفاشل اللى فى مصر لما يكون واحد مشكلته الفيزياء و جايب فيها مجموع مش كويس و مش بيحبها لكن جايب فى باقى المواد درجات عالية و فى الأخر يدخل هندسة هيكتشف بعد كده ان هندسة أصلا رياضة و فيزياء لكن هو داخلها عشان يبقى مهندس مش أكتر لو كل واحد اتعرف على كل الكليات و اختار الكلية اللى عارف انه هيتفوق فيها ساعتها مش هتلاقى حد شغال فى غير مجاله |
طيب على كده اللى واخد مستوى عربى يضيف عادى فى المجموع الاختيارى ولا لا ولو كان لا كده المجموع هيقل هل ده هيبقى ليه مجموع خاص ولا هيعدوها
|
اقتباس:
أنت مثلا مجموعك فى ثانوية بالمستوى الرفيع سواء كان انجليش أو غيره 380 و جيبت فى الانجليش 47 مثلا لو أنت بقى واخد انجليش مستوى رفيع هتضيف تانى الزيادة اللى فوق 5 من 10 لكن لو المستوى مش انجليش يبقى مش هيضاف تانى , فافترضت مثلا انك واخد مستوى عربى و جايب فيه 7 أنت هتحسب بس مجموعك الأول بالمستوى اللى هو 380 + 47 بس كده مش هتضيف بقى ال 2 الزيادة بتوع العربى المستوى لكن لو كان المستوى انجليش هتضيفهم أقولك حاجة اكتب مجموعك كام و درجة الانجليزى و المستوى الانجليش لو فيه و أنا أجيبلك المجموع الاعتبارى بتاعك xD |
ليه واحد صاحبى جاب 372.5 بالمستوى العربى من غيره يبقى 369 والانجليزى بتاعه 48.5 وهل ممكن يلحق تجاره انجلش
سوال على جنب كده:: هو ممكن يلحق حاسبات الاول ؟ |
اقتباس:
مش هكدب عليك صعب جدا يلحق حاسبات , السنة اللى فاتت خدت 93.1% أقل حاجة (أقاليم يعنى) هو مجموعه فى الانجليش ممتاز جدا و المجموع الاعتبارى بتاعه لو هو جايب 90.8 يبقى : 372.5 + 48.5 = 421 يعنى 91.52% , أنا شايف فرصته كبيرة جدا انه يدخل تجارة انجليش بس يستحسن جامعة عين شمس مش القاهرة عشان يبقى فى الأمان و ما يغامرش , مع العلم ان تجارة انجليش عين شمس متقلش عن القاهرة فى حاجة , يمكن أحسن كمان منها |
لو سمحت انا 93.29 فى امل ادخل حاسبات ومعلومات ؟
يعنى ممكن اخرها كام تقريبا يعنى؟؟؟ |
اقتباس:
السنة اللى فاتت كانت حاسبات و معلومات عين شمس أو القاهرة واخدة 93.6% لكن أقاليم كانت 93.1% بس التنسيق بيختلف كل سنة فأنت عندك أمل تلحق حاسبات و معلومات بس مش عارف هتبقى جامعة ايه بالظبط , أنت و حظك حاول بس متصدقش أى حاجة عن أخبار التنسيق دلوقتى و استنى عشان رغبات الطلبة نفسها بتفرق مش المجاميع بس و ربنا يوفقك ان شاء الله و تدخل اللى أنت بتحبه |
يا هندسة انا ممكن الحق حاسبات القاهرة انا من قنا ونفسي في حاسبات القاهرة انا جبت 93.7%
|
اقتباس:
حاسبات القاهرة السنة اللى فاتت خدت 93.6% و طبعا بيتغير تنسيقها من سنة لسنة على حسب الرغبات و ده مش معناها انها هتقل هى ممكن تزيد و ممكن تقل على حسب الرغبات أنا لو مكانك هفضل أدعى الكام يوم دول انها تيجيلى لأن الموضوع بجد متوقف على التوفيق مش أكتر عامة أنت فرصتك كبيرة مش قليلة أهم حاجة تحط كده بالترتيب رغبة أولى حاسبات القاهرة و بعديها عين شمس و بعديها حلوان مثلا حاول بس اليومين دول متسمعش أخبار عن التنسيق كتيير عشان فى ناس كتيير بتفتى و بتلعب بأعصاب غيرها (عن تجربة) و ان شاء الله يجيلك حاسبات القاهرة و ربنا يوفقك |
اقتباس:
بس كنت عايز اسال حضرتك سؤال هي اية التخطيط العمراني؟ وهل هي افضل من الحاسبات ؟ |
اقتباس:
الحقيقة معنديش معلومات كتيير عن الكلية دى فمش هقدر أفتى بس ممكن تبحث عنها فى جوجل و تعرف بيدرسوا ايه بالظبط و ايه شغلهم و مقدرش أقولك انها أفضل من حاسبات لأن الموضوع مش بالأفضلية لازم أنت تشوف هل الحاجات اللى هتدرسها فى الكلية دى أنت بتحبها و متميز فيها و الا لأ و بعد كده تقارنها بالحاجات اللى هتدرسها فى حاسبات اللى هو كله متعلق بالكومبيوتر و البرمجة |
طيب هو لازم اكون واخده مستوى رفيع انجليزى ؟
|
اقتباس:
لأ مش اجبارى انك تكونى واخده الانجليش مستوى رفيع الاجبارى بس انك تكونى جايبة فوق درجة معينة فى الانجليش بتختلف من جامعة لجامعة و من سنة لسنة ممكن تبقى 40 أو 42.5 أو 45 بس لو واخده مستوى رفيع انجليش بيضاف الزيادة عن 5 من 10 فى المجموع الاعتبارى فبيزود فرصك فى القبول عارفة المجموع الاعتبارى بيتحسب ازاى ؟ |
تسلم ........
|
بالله عليكم افيدوووى انا اتظلمت
انا جبت السه دى 87.8%ونفسى ادخل تجاره انجلش هل المجموع ده يدخلنى ولا ايه وبالنسبه لمجموع الاجليزى لو اقصدكم اضيف انجليزى تانيه لتالته انا فى تانيه جبت فى النجلش 23.5وتالته 24.5 يعنى انا فى الانجلش جبت 48 ياريت تردو بسرعه لان عايزه اعمل تظلم لو هدخل تجاره انجلش مش عمل تظلم بالله عليكم ردو عليا
|
الف شكر انا جايب 91% و كنت محتار بين حاسبات و معلومات و بين تجارة انجلش لكن بعد الكلام ده داخل تجارة انجلش
|
اقتباس:
لو أنتى أدبى يبقى ان شاء الله فرصك كبيرة فى تجارة انجليش و يستحسن عين شمس عشان تضمنى تقبلى لكن لو علمى فمش هقدر أكدب عليكى صعب جدا تقبلى فى عين شمس أو القاهرة , ممكن حلوان بس معرفش بتقبل من كام الصراحة عامة انتى المجموع الاعتبارى بتاعك لو انتى مش واخده انجليش مستوى رفيع: 360 + 48 = 408 يعنى 88.69% ياريت لو واخدة انجليش مستوى رفيع تكتبى الدرجة عشان ده هيزود المجموع الاعتبارى بتاعك السنة اللى فاتت تجارة انجليش عين شمس خدت من أدبى مجموع اعتبارى 402 (87.39%) و من علمى 416 (90.43%) فأنتى لو أدبى فرصتك كبيرة فى جامعة عين شمس أما لو علمى فممكن فى جامعة حلوان أو جامعة القاهرة فرع الشيخ زايد و ياريت لو واخدة انجليش مستوى رفيع تكتبى الدرجة |
يعنى ايه القاهره فرع الشيخ زايد
وايه الفرق بينه وبين الفروع االتانيه معلش هتعب حضرتك |
اقتباس:
فى الفرع الرئيسى بياخدوا ناس جايبة مجموع عالى شوية لكن فى الشيخ زايد بياخدوا مجموع أقل ففرصتك بتبقى أكبر هناك لكن الفرعين عامة تبع جامعة القاهرة و الدكاترة بتاعة جامعة القاهرة بتبقى متوزعة على الفرعين زى كده هندسة حلوان اللى فى حلوان و هندسة حلوان اللى فى المطرية تقريبا بعد ما بتقبلى فى تجارة القاهرة بتقدمى هناك على قسم انجليزى و بيعملوا تنسيق داخلى و بياخدوا ناس فى الفرع الرئيسى و الأقل منهم فى المجموع بيدخلوا فرع الشيخ زايد بس مش متأكد من الكلام ده , ممكن كل فرع بيبقى ليه تنسيق معين عامة انتى لو علمى فرصتك فى فرع الشيخ زايد أكبر خصوصا لو واخدة انجليش مستوى رفيع |
طيب فرع الشيخ زايد ايه المميزات وايه العيوب وهل دخولى الفرع ده هيقلل من انى ممكن اجيب امتياز وابقى معيده ولا ايه وايه اللى يفرق بين فرع الشيخ زايد والكليه نفسها
سؤال لحضرتك لو سمحت هو راى حضرتك ايه افضل كليه تناسب مجموعى غير تجاره انجلش |
اقتباس:
هو مفيش فرق بين الفرع الرئيسى و فرع الشيخ زايد الا فى ان اللى بيدخلوا الفرع الرئيسى بيبقوا جايبين مجموع أعلى مش أكتر لكن الاتنين بيدرسوا نفس الحاجة و امتحانتهم تقريبا بتبقى بنفس درجة الصعوبة و اللى بيتفوق فيهم بيبقوا زى بعض فى كل حاجة لأن فرع الشيخ زايد أصلا تبع جامعة القاهرة اللى بيفرق بين الطلبة مش اسم الجامعة اللى بيفرق بينهم تقديراتهم و فهمهم للى بيدرسوه عامة انتى واضح انك علمى رياضة فأعتقد ان الكليات اللى هتبقى متاحة ليكى هى تجارة انجليش حلوان أو القاهرة فرع الشيخ زايد أو تجارة عربى القاهرة أو عين شمس أو تربية عين شمس أو هندسة خاصة |
انا مش فاهم حاجه خالص انا جبت 87.35 وممكن الحق تجارة انجلش ولابعيدة
|
طيب القاهره وفرع الشيخ زايد فى نفس الجامعه (المكان بيبقى جامعه القاهره ولا ايه
|
اقتباس:
الأول أنت أدبى و الا علمى ؟ و جايب كام بالمستوى الرفيع من 410 ؟ و جايب فى الانجليش كام ؟ و لو واخد مستوى رفيع انجليش جايب فيه كام ؟ |
انا علمى رياضة وواخد مستوى عربى وجيب ف الانجليش 48 ؟؟؟
|
انت ليه محسسنى ان الحياة وردية و مفيهاش مشاكل وان التجارة هتحققلك مكاسب مادية خرافية، حتى لو الكلام ده صح هتخسر اكبر حاجة وهى العلم، انت مش هتتعلم حاجة فى الكلية دى تحسسك انك انسان محترم و ليك مكانة فى المجتمع، بلاش خداع فى الناس اللى مش فاهمين..! لو عايز تحقق ذاتك و تحس بالعلم بيجرى فى عروقك ومتنذلش فى حياتك عشان جاهل و منتاش فاهم اللى قدامك بيقول ايه، مفتكرش ان بديل الهندسة هيبقى تجارة باى شكل من الاشكال ده هبل، ممكن حاسبات او فنون او علوم رياضة.
|
اقتباس:
مش عارف بصراحة , أنا بسألك دلوقتى واحد صاحبى فيها عن كل التفاصيل بتاعتها و هرد عليكى قريب جدا و ممكن برضو تدورى على الصفحة أو الجروب بتاعهم على الفيس بوك |
اقتباس:
مع احترامى لحضرتك أنا هرد على كل نقطة أنت اتكلمت عنها أولا واضح ان حضرتك متعرفش ايه العلوم اللى بتدرسها تجارة انجليش بالظبط , حضرتك بتقول ان تجارة مش هتدرس فيها أى حاجة تحسسك انك محترم , أنت فى تجارة انجليش بتدرس Accounting , Management , Economics , Organizational behavior , English for business communications , Math , Public Administration , Law , Economic resources , Economic Evolution , Statistics و كل ده بتدرسه فى سنة أولى بس غير انك بتدرس كل الحاجة دى بالانجليش مش زى تجارة عربى, و غير ان الكتب دى بتجيلك من بره مصر من جامعات أمريكية و بريطانيا و نظام الدراسة مختلف تماما عن تجارة عربى و بيكون فيه اهتمام بالطلبة لأنهم بيكونوا متقسمين على سكاشن بأعداد قليلة مش بأعداد المدرجات بتاعة عربى و ليهم نظام امتحانات تانى لأن فى الترم بيكون فيه 2 Quizzes و Midterm و Final غير انه بيكون مطلوب منك تعمل Presentation و بيدربوك على كل حاجة و أنت لسه فى الجامعة , ده بالنسبة لنقطة ان انك هتخسر أكبر حاجة و هى العلم اللى بتقول عليها ثانيا أنا مش داخل أقول للناس تدخل تجارة انجليش بالتحديد و متدخلش هندسة , أنا كل اللى عملته انى بعرفهم على علم هم ميعرفوش عنه حاجة , زى محضرتك كده اتخدعت بكلمة تجارة و مكنتش تعرف هى بتدرس ايه بالظبط أنا داخل أقدم للناس دى بديل تانى لهندسة و لحاسبات و فنون و علوم رياضة و اعرفهم على علم تانى عشان أزود الخيارات المتاحة قدامهم مش عشان أجبرهم انهم يدخلوا تجارة ثالثا أنا قولت فى موضوعى ان اللى بيدخل هندسة لازم يكون متفوق جدا فى الفيزياء و الرياضة و دى الحقيقة أنا داخل أنصح الناس انهم يدخلوا اللى هم بيحبوا و اللى هم عارفين انهم هيتميزوا فيه و ده من ضمنه كلية هندسة يعنى اللى عارف انه هيتفوق فى هندسة يدخلها , مقولتش ميدخلهاش حتى لو خاصة بس أهم حاجة ميدخلهاش عشان لقب مهندس , يدخلها بس عشان بيحب الدراسة اللى فيها و عارف انه هيتميز فيها و المثال اللى أنا حطيته هو انى جالى حاسبات بالفعل بس عشان أنا مبحبش شغل الكومبيوتر و البرمجة مدخلتهاش و دخلت حاجة أنا بحبها أما بالنسبة لأن تجارة كلية متقارنش بهندسة فده يرجع لسبب واحد بس ان اللى بيدخلها مش بيدخلها عشان عارف بتدرس ايه و بيدخلها برغبة , هو بيدخلها عشان ما قدموش غيرها عشان كده مش بينجح فيها و أنتوا بتاخدوا فكرة سيئة عن تجارة , لكن اللى داخلها زيى رغم انه كان قدامه حاسبات عارف قيمة اللى بيدرسه كويس أخر حاجة ياريت تعرف تفرق بين تجارة و تجارة انجليش عشان صدقنى مش زى بعض |
اقتباس:
أنا أسف جدا على التأخر فى الرد أنت مجموعك الاعتبارى = 358 + 48 = 406 (88.26%) السنة اللى فاتت تجارة انجليش جامعة عين شمس خدت 416 (90.4%) علمى فأنا شايف فرصتك هتبقى أحسن فى جامعة حلوان مثلا لأنها بتاخد أقل بس مش عارف بتاخد كام بالظبط و ممكن برضو جامعة القاهرة فرع الشيخ زايد عشان بتاخد مجموع أقل |
اقتباس:
أهم حاجة تشوف الأول المواد اللى هتدرسها فى تجارة انجليش قبل ما تختارها و اعمل حساب المصاريف بتاعتها برضو هى بالكتب ممكن تبقى 5000 أو 5500 و لو من غير 3500 أو 4000 على حسب كل جامعة |
انا جبت 85% و جبت فى الانجليزى 42 و مش وخده مستوى انجليزى ممكن كده اعرف ادخل تجارة انجليزى ؟؟؟؟؟؟؟؟
|
اشك ان انتى تقبلى حاسبات لان مستقبلها كبير وشكرا |
| جميع الأوقات بتوقيت GMT +2. الساعة الآن 09:59 AM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.