أي حد نفسه يسأل عالكلية او أي استفسار يخش هنا ويسأل براحته
 

انا اخوكم مؤمن الغمري 20 سنة من الزقازيق 3 حاسبات ومعلومات جامعة الزقازيق ,, كنت غيبت عن الموقع فترة عشان الدراسة وكدا بالاضافة ان النت بتاعي وقت كبير منه اوي عالفيس عشان كدا ممكن تردوا عليا وتسألوا فى اللى انتو عاوزينه وانا موجود معاكم وهجاوبكم على كل حاجة عاوزينها :)

ودا الاكونت بتاعي عالفيس اتفضلوا

https://www.facebook.com/Momen1993 :022yb4::022yb4::022yb4::022yb4:

ودا رقمي برده 01090108021

:022yb4::022yb4::022yb4::022yb4:

اية افضل معهد خاص ( فى الدراسة و هل مودرن اكادمى هى افضل اكادمبة فى مصر ) و هو فى فعلن دراسة بالعربى و بالانجليزى و انهى فيهم افضل و لية و اية افضل قسم فى حاسبات و معلومات فى مجال العمل فى مصر (وشكرااااااااااااااااااااااااااا خاص على مجهوداتك)

افضل 3 معاهد حاسبات ومعلومات فى مصر " علوم حاسب يعني "
1-الشروق .
2-العاشر .
3-العبور . وال3 قريبين من بعض .

هي كويسة بس فيه احسن منها ,, الدراسة انجليزي وافضل قسم cs او it غير كدا نفض واللى شغال دلوقتي مبرمجين الجافا وال.net c# والشبكات والداتا بيز بأنظمة اوراكل والphp دي اكتر حاجة مطلوبة دلوقتي .

طب انا بنتي 92.3 ممكن تلحق حاسبات ولو في اقاليم ولو ملحقتش ايه الاحسن ليها

ممكن اعرف مصاريف العاشر و اخذ من كام السنة الى فاتت

ايه الفرق بين القسم بتاع هندسة البرمجيات في عين شمس واللي في حاسبات حلوان؟

ايوة ان شاء الله يا استاذ سمير تلحق مع انه صعب بس ادعي ربنا ,, ولو مش لحقت خليها تخش علوم رياضة لان دلوقتي قسم علوم رياضة بقا مفتوح يعني لو دخلت علوم رياضة ممكن تحول كيميا او جيولوجيا وتشتغل دكتورة ادوية او دكتورة فى معمل تحاليل والله مستقبل علوم للبنات حلو اوي

تقصد اللى فى هندسة واللى فى حاسبات ؟؟

لو دا قصدك الاتنين زي بعض :d

العاشر ب6 فى السنة ومجموعها 80% تقريبا

1-لو سمحت حضرتك انا قدمت فى جامعة مصر للعلوم والتكنولوجيا ومصاريفها 13 الف

فانهى احسن اختار الجامعه دى ولا ادخل معهد والفرق فى الفلوس ادخل بيه كورسات تفيدنى بعدين

2-وانا سالت ناس قالولى ان حاسبات ملهاش لازمه لانك ممكن تاخد كورسات فى المجال الى هتشتغل فيه وتبقى زى خريج حاسبات
3- هل متوسط مرتبات خريجين حاسبات اكتر ولا خريجين هندسة

الافضل ايوة المعهد المعتمد وتاخد بالفرق كورسات وتظبط نفسك ,, لا طبعا الاولوية لخريج حاسبات ماكانوش عملوا الكلية ولا عملوا شعبة حاسبات فى هندسة ,, الاتنين زي بعض واوقات حاسبات بتزيد واوقات هندسة بتزيد ودا رزق يعني :)
يعني ممكن خريج حاسبات حديث التخرج ياخد 3000 وواحد تاني ياخد 1000 جنيه بالعافية على حسب مهارتك وخبرتك والشركة اللى شغال فيها وكدا :)

متشكر جدا :) طيب ممكن حضرتك تقولنا نعمل ايه فى الدراسة علشان بعد منتخرج نلاقى شغل كويس

يعني لو دخلت ممكن تكون دكتوره تحاليل كانها كانت علمي علوم

انا عاوز أعرف هل أحسن أخذ كورسات قبل الجامعة و ايه احسن الكورسات و الاماكن اللى اخدها فيها ؟

اول حاجة يعملها طالب حاسبات قبل الكلية كورس انجليزي عشان يظبط نفسه لان الدراسة كلها انجلش فى انجلش ,, نيجي بقا على وقت الدراسة ودي بتبقا مشكلة لان الطلبة بتقولك وانا هاخد مواد الكلية واذاكرها ولا آخد كورسات واظبط نفسي خصوصا ان مواد الكلية مش بتحتك بالمجال اوي "بتعرفك الاساسيات وبتسهل عليك فهم اي حاجة فى التكنولوجيا" لانها بتديك المواد الاساسية مش بتديك لغات برمجة لان اي سنتر دلوقتي ممكن يدي لغات البرمجة بربع جنيه انما الكلية بتأسسك وبتعرفك اساس الحاجات دي ايه وكل الكلام دا بتفهمه فى الكلية بحيث انك تتخرج منها تفهم اي لغة برمجة على طول لأن البرمجة اللوجيك "المنطق" بتاعها ثابت واللغات اللى بتتغير بس يعني لو عرفت تعمل برنامج بلغة الجافا مثلا وفهمت منطقه فى دماغك هتعرف تعمله بأي لغة تانية على طول لو عندك علم بيها طبعا ,, قولنا اول حاجة كورس الانجلش تاني حاجة كورس c++ عشان تبقا فاهم برمجة سنة اولى عاملة ازاي ,, ودا هيبقا قبل الدراسة او لحد شهر 11 مثلا بعد كدا سيبك للكورسات وركز عشان امتحانات التيرم ومش تركز اوي عالكورسات والايفينتات " دي حفلات ومؤتمرات ومقابلات بتعملها شركات التكنولوجيا تعرفك ايه آخر ما توصلوا إليه وبتفهمك الشغل عامل ازاي وكدا " لان انا ليا صحابي شاطرين فى سوق العمل وممكن يشتغلوا ويقبضوا كمان بس منفضين لمواد الكلية عشان كدا بيسقطوا سنة واتنين ,, عشان كدا بقولك ركز دلوقتي عالانجليزي والc++ وبس وبعد كدا خفافي اتعلم مع نفسك اثناء الدراسة ومش تاخد كورسات مع الدراسة عشان تنجح وتجيب تقدير عالاقل جيد ,, زي ما بيقولوا امسك العصاية من النص يعني لا كله كدا ولا كله كدا وبالتوفيق :)

آه والله بالظبط بس لازم قبلها تروحوا الجامعة اللى هتقدم فيها الاول وتشوفوا الاقسام فتحوها ولا لأ عشان النظام دا عندنا فى جامعة الزقازيق كتير من زمايلي اللى ملحقوش هندسة ولا حاسبات جاتلهم علوم رياضة وحولوا منها لكيميا واقسام تانية خاصة بالادوية والتحاليل والمجالات دي حلوة اوي للبنات ,, انا اختي دكتورة بيطرية وشغالة فى شركة ادوية وزمايلها كلهم من صيدلة وعلوم وبيطري برده Medical Rep علوم مستقبلها حلو بس لو بتحب الكمبيوتر تخش حاسبات طبعا لان بكرة لحاسبات .

ايوة افضل حاجة تاخد كورسات قبل الجامعة وفى الآجازات وزي ما قولت تاخد كورس انجلش وc++ او تذاكرها مع نفسك عالنت كل حاجة موجودة ,, بالنسبة للمراكز والسنترز فدول اكتر حاجة موجودة فى البلد دلوقتي ودا مش لانهم عاوزين يخدموا الناس :) دا لأنهم عاوزين ينصبوا عالناس ويقلبوهم بحجة المنح المجانية والكورسات والهبل دا ,, عشان كدا نص المراكز دلوقتي بتطلع سبوبات كتير "جمع سبوبة :D " وبقت بتنصب عالشباب الغلبان اللى مش فاهم حاجة زي معاهد الحاسبات وادارة الاعمال ونظم ومعلومات او نظم معلومات ادارية اللى بتاخد من ادبي ومن 50% الشاب بيبقا فاكرها حاسبات ومعلومات وبعدها بسنة ولا اتنين يعرف انه معهد تجارة ومالوش اعتماد فى نقابة مهندسي البرمجيات ونقابته التجاريين عشان كدا اي سنتر تروحه او اي معهد خاص او اي حاجة مالهاش علاقة بالحكومة لازم تسأل كويس جدا الناس اللى خدت كورسات فيها وتسأل الناس اللى اتخرجت من المعاهد دي عشان مش يتنصب عليك بس مش اكتر :)

بعد اذنك انا جايب 93.29% و مش عارف اخش حاسبات ولا تخطيط عمرانى و عاوز افهم ايهما افضل و اذا كانت حاسبات شبين مصاريفها فى السنة كام ومتوسط تكلفة الكورسات اللى انا اخدها فى الكلية

تخطيط ميزتها انها فى نقابة المهندسين لكن حاسبات لسة نقابتها بتتعمل "مهندسي البرمجيات" ,, لا مصاريف الكلية بتبقا 130 جنيه او 150 دا للحكومي وتكلفة الكورسات غالية شوية بس انت هتشوف الحاجات الضرورية وهتاخدها فى الكورسات زي الانجلش والمبادئ والباقي انت تذاكر مع نفسك النت مليان كتب وفيديوهات وعلى حسب الحاجة اللى انت حاببها فى المجال بتحدد وجهتك , ربنا يوفقك :)

نسبه قسم نظم و معلومات

ايهما افضل

اكاديميه المستقبل

العاشر من رمضان

معاهد العبور

والله انا ماعنديش معلومات عن نظم ومعلومات بس اعتقد ان العاشر افضلهم

فوع كليه حاسبات ومعلومات علي مستوي الجمهوريه

انا جايبة 92.56 ممكن الحق حاسبات انا عايزة اعرف عدد الكليات ع مستوى الجمهورية عشان اكتبهم كلهم فى الرغبات عشان الحقها حتى لو بعيدة

فروع كليات الحاسبات على مستوى الجمهورية :-
1-القاهرة .
2-عين شمس .
3-حلوان .
4-الاسماعيلية .
5-الزقازيق .
6-بنى سويف .
7-شبين الكوم .
8-الفيوم .
9-اسيوط .
10-المنيا .
11-بنها .
12-المنصورة .

توقعاتي الحد الادني لحاسبات هياخد من 381 درجة وامنيتي عشان الناس تلحق

بصراحة انا مش هضحك عليكي واقولك نسبة انك تلحقي عالية ,, هي ضعيفة بس فيه امل لان كلية الحاسبات كلية جديدة وبتقبل كل سنة اعداد اكبر ولو اخدت نفس اعداد السنة اللى فاتت ممكن الحد الادني يبقا 381 ولو اخدت الف بس زيادة عن السنة اللى فاتت هتاخد من 379.5 وتلحقي ان شاء الله ,, انتي بس ادعي وربنا معاكي :)

السلام عليكم
انا ناوية ان شاء الله اقدم حاسبات و عاوزة اعرف بس .. الكلية دى حلوة ومستقبلها حلو ولا لا ؟؟
وايه هو احسن قسم فى الدراسة والشغل ؟؟
ومصاريفها قد ايه .. بالذات اللى فى جامعة عين شمس والقاهرة ؟؟
وشكررررا

المصاريف رمزية 130 جنيه مصاريف جامعة الزقازيق ماعرفش عين شمس والقاهرة كام بس هتبقا فى الحدود دا برده ,, الكلية كلها بتتكلم عن هندسة البرمجيات ,, يعني صناعة البرامج لأي حاجة على وجه الكرة الارضية لكنها بتركز على برمجة الكمبيوتر لان دا خلاص بقا لغة العصر وكله دلوقتي بيستخدمه " الكمبيوتر يعني التابلت او اللاب او الموبايل إلخ " والشغل موجود وسوق العمل محتاج خريجين "شاطرين" والمرتبات كويسة جدا بتبدأي على 2000 دا لو مستواكي تعبان وعلى قدك انما لو شاطرة هتبدأي على 3000 وممكن اكتر وعلى حسب كل شركة ,, فيه شركات محلية ممكن تبدأي فيها على مرتب بسيط وشركات multi national دي زي فودافون وميكروسوفت الشركات العالمية يعني ودي مرتباتها بتبقى اعلى بشوية صغيرين من الشركات المحلية .

أنا عارف ان الحاجات دي مش معتمدة لكنأنا كنت عايز أدخل وانا عندي فكرة عن البرمجة قبل دخول الجامعة علشان لما اسمع الدروس يبقى عندى فكرة عن المنهج و لو من بعيد و هل لو انا اعتبر كويس فى الانجليزى هل لازم كورس انجليزى دلوقتى ولا الاحسن كورس برمجة؟

لا الاحسن كورس برمجة طبعاً ,, انا ماخدتش كورس انجلش لاني كويس فيه ,, يبقا تاخد كورس c++ فورا

طب في رايك انهي احسن حاسبات ولا تطبيقية ؟؟

الاتنين مستقبلهم قريب من بعض لان حاسبات مهندس برمجة وتطبيقية مهندس ديكور ,, يبقى ميولك وحبك اللى يحكم

لو سمحت هى دراستها صعبة اوى زى هندسة كده ؟؟

ايوة صعبة وفيه ناس بتقول انها اصعب من هندسة والعكس بس من وجهة نظري الاتنين فى مستوى واحد .

اخش حاسبات ومعلومات والا اخش هندسة خاصة

لو سمحت انا مرحلة اولى وجتلى حاسبات و لسه مقدنتش فى الجامعة هو عادى اقدم اى يوم و لا فى يوم محدد شكرا ؟؟

انا جايب 382 درجه يعنى 93.17 % ممكن الحق حاسبات ومعلومات او تطبيقيه ولا مش ممكن وهل فى كليه فنون تطبيقيه قسم ديكور لآلآ وشكرا

حاسبات حكومي احسن من هندسة خاص

ايوة ممكن ان شاء الله ,, هي اصلا فنون تطبيقية شغلها كله ديكور واما بتتخرج بتبقا مهندس ديكور

طيب هيا توقعات حاسبات السنادى كام وتطبيقيه اعلى منها ولا اقل؟

الله أعلم بس الاكيد الاتنين بيبقوا لازقين فى بعض :)

هل ينفع بعد نتيجة التنسيق التحويل من جامعة لتانية؟ يعني مثلا كل الجامعات الموجودة منطقة جغرافية ج بالنسبة لي , فممكن أعمل تقليل اغتراب بعدين ولا ما ينفعش ؟

ايوة ينفع طبعاً السنة بتاعتي كانت كدا :)

شوف الاقرب ليك وخشه لان الاتنين مستواهم قريب من بعض ,, بالنسبة للكورسات عادي جدا انك تخش الكلية من غير اي كورسات واثناء الكلية تبقا خد كورسات بس نظم وقتك عشان مش تنزل فى المواد ولقدر الله تشيل سنة ولا حاجة عشان ليا صحاب كتير حصل معاهم كدا ونزلوا ,, اهتموا بالكورسات والايفنتات وفى الآخر سقطوا

السلام عليكم ,,
انا في حاسبات المنصورة (داخل تانيه) وكنت عايز احول لعين شمس ,, فممكن حضرتك تفدني يعني ايه اضمن طريقه احول بيها والتحويل يقبل ولازم اقامه وبطاقه ولا اقامه تكفي؟؟!!

حضرتك التحويل كل سنة وليه ظروفه وانا مش هقدر افيدك بس كل اللى اقدر اقولك عليه انك تبقا جايب تقدير عالاقل جيد عشان لو الكلية عالية زي عين شمس او القاهرة تتقبل فيها على طول ,, والأضمن تروح لشئون الطلبة دلوقتي تسألهم هما عارفين اكتر مني ومنك لان دا شغلهم :)

انا دخلت حاسبات ومعلومات بنى سويف و عاوز احول لى شبين علشان قريبة منى ممكن ولا صعبة خصوصا انا جابيب 382.5

ممكن تقولى على اماكن كويسه للكورسات ومعلش ايه كورس c++ معلش اصل انا جالى نتيجة التنسيق حاسبات معلومات ونفسى اكون فاهمه انا باعمل ايه وايه افضل قسم فى حاسبات وشكرا لحضرتك

ايوة ممكن جدا فيه لسة تقليل اغتراب بعد العيد ولو مش روحت الجامعة اللى عاوزها هتروح تحول عن طريق الشئون

حاسبات يا سيدي كلية هندسة برمجيات وتقنية معلومات واتصالات وشبكات ,, يعني بتتخرج منها مهندس برمجة او مبرمج او مهندس شبكات او محلل برامج ,, كل دا بيدور حول البرمجة وعلم الاتصالات بجميع فروعه ,, اللغة العربية هي لغتنا وبالتالي الكمبيوتر مش هيفهمها عشان كدا فيه علما زمان عملوا لغات برمجة عشان الجهاز يفهمنا بيها ونقدر من خلالها نكلمه ويكلمنا عن طريقها من ضمنها لغة c++ و java و c# كل لغة ليها خصائصها وظروفها بس كلهم منطقهم واحد واساسهم واحد والبرنامج اللى يتعمل باللغة الاولى ممكن تعمل زيه باللغة التانية وهكذا ,, عشان كدا انت المفروض دلوقتي تدعم نفسك من النت وتتعلم c++ واحدة واحدة مع نفسك ولو النت عندك تمام افتح الyoutube واتعلم مع نفسك ولو وصلت لحد الarrays قبل الدراسة تبقا انت معلم :)

ربنا يوفقك