|
مـن أطلق الرصاص على جمعه بتاع الفول؟؟
بسم الله الرحمن الرحيم :mad: مـن أطلق الرصاص على جمعه بتاع الفول؟؟ :mad: :mad: لو سمحت .. تقدر تقولي كام واحد غني في مصر؟؟ لا مش اقصد الغني بتاع شغلانه محترمه في شركه مثلاً و ساكن في شقه إيجار جديد و معاه عربيه فيات 128 لالالالا انت فهمتني غلط خااالص أنا أقصد الغنى الفظيع بتاع الفيلل و البودي جاردز و المرسيدس , و الخدم و الحشم و القصور تاني نرجع نقول .. من أطلق الرصاص على جمعه بتاع الفول == قولي بقى .. كام واحد غني في مصر؟؟ على فكره السؤال ده منطقي أوي .. بعد الوجبه الدسمه من شلل الأطفال اللي شوفناها في مسلسلات رمضان .. الحمد لله ختماناها و شدينا حيلنا في العشره الأواخر أنا مش شوفت اي مسلسلات بصراحه غير أول يوم عشان كنت في بيتي و للأسف بكل عبطت مش نزلت اصلي التروايح اول يوم ما علينا خير اللهم اجعله خير .. عربيات وبودي جاردز و خدم و حشم و حمامات سباحه و فيلل .. و الخلافات كلها ان الملياردير الأولاني كان مزعل المياردير التاني يا عيني :rolleyes: فالملياردير التاني خسّر الأولاني كام مليار جنيه و بعدين اتصالحوا و قاموا باسوا بعض و خصنوا بعض و عزمه في جراند حياه على حسابه .. و جوز بنته لابن الملياردير التاني عشان كان بيحبها وهيموت عليها و توته توته فرغت الحدوته لولولولي والأخت ناديه الجندي.. أخت إيه؟؟؟ نينة ناديه الجندي صحفيه شريفه آه وعهد الله وبتدافع عن الأخلاق وبتجري ورا الخبر والمستندات والصحف كلها واقفه على رِجْل أيوا حضرتك فين الكلام ده بقى؟؟ صحفية إيه اللي بتلفّ وتتعب وتتنكَّر وتتقتَل وتتخطَف عشان خبر ولاّ قضية فساد؟؟؟ كنتوا اكتبوا في تِتْر المسلسل بقى هذه الأحداث لا تمت للواقع بصلة وأي تشابه في أرض الواقع يبقى انتوا اللي هُبْل و مش عندكوا خبره في الحياه كلنا عارفين ان الصحافة كلها سبُّوبَة.. من أتخَن مؤيِّد لأتخَن مُعارِض.. وعدوّ النهارده حبيب بُكره.. مادام مرتب رئيس التحرير المعارض بيعَدِّي 35 ألف جنيه شهرياً ده غير نِسْبته من الإعلانات تبقى الحياة زي الفل ومفيش مشاكل ولا فساد == فكّروني برضو بأفلام خالد يوسف الأخيره (ماعدا حين ميسره لإنه حقيقه فعلاً او دي مصر مستقبلاً)الأبطال كلهم أغنيا بالصلا ع النبي.. حتى البواب عنده هيونداي على قَدُّه.. ورايحين يتفسحوا في شاليه أي واحد فيهم ما كلهم عندهم شاليهات صلوا ع النبي وبعدين مالقوش حاجه يعملوها ولا يفكروا فيها قالوا يللاّ نلعب ويجا.. طب بالله عليكم حدّ كِدَه يقعد جنب موظف راجع من شغله في المترو .. ويقول له: لو سمحت ممكن نلعب ويجا مع بعضينا؟؟؟ الاحتمال الوحيد انه هيلعب صلَّح على قفاك ولاّ العلاقات بين الجنسين.. دي بقى عايزه قعده.. أي حد مذكر بيروح بيت أي حد مؤنث..والحد المؤنث عايش في بيت أي حد مذكر.. وطلع بالشيفروليه واحنا قاعدين.. وحَمِّل ع الشيفروليه واحنا قاعدين و في خالد يوسف عنده الهَوَس ده الله ينوّر بقى .. في فيلم وسط البلد محمد نجاتي بيقول لهند صبري تعالي معايا الشقة.. هند صبري بكل براءة وطُهْر قالت له: مفيش مشكلة.. أنا اعرف ان الواحدة تروح شقة الواحد تشرب شاي .. تقعد تتكلم شوية.. بس المشكلة ان الناس ممكن يفهموها غلط طبْ حدّ يجيب كٌباية عصير قصب من عند أشرف فرغلي اللي جنب بيتنا بسرعه للبنت اللي اتجننت دي .. اللي هي أنا يا عيني علياااااااااااااا يعنى الواحدة تروح شقَّة الواحد تشرب شاي.. اتمَنَع الشاي من البلد ما عدا في شقة المحروس؟؟مافيش قهاوي في البلد ؟؟ :mad: بلاش قهاوي ياي مش استايلهم خالص مافيش كافيهات في البلد يكون الـ Minimum charge بتاعها 30 جنيه مثلاً؟؟ بس يا عيني تلاقيها نسيت تاخد المصروف من بابي :eek: == فين المسلسلات بتاعتنا إحنا .. إحنا عامة الشعب الغلابه فين عربية الفول بتاعة الصبح , فين سندوتش الفول اللي بقى بجنيه , فين عربية الكبده بتاعة عم محسن فين عم حسنين أحمد البقال ؟؟ فين العربيه اللادا مو 80 اللي طلعت عينينا في التصليح ؟؟ فين عم إبراهيم الميكانيكي اللي على أد حاله؟ يا جدعان حد منكم شاف بودي جاردز و شاليهات و فيلل و عربيات بالهبل كده؟؟ حد شاف حمامات سباحه و موبايلات أشكال و الوان و تليفزيونات شاشتها أد شاشة السينما .. ده في الأحلام ولا فين ده مش فاهمه انا :eek: :o فين الأتوبيس اللي زهق مني .. فين الموظفين الغلابه اللي بشوفهم يومياً في المترو لما آجي اروح المدرسه بتاعتي .. فين الموظف اللي بيجري ورا الأتوبيس عشان يلحقه و هو مبتسم من غلبه ؟؟ :rolleyes: فين النت اللى عايزين يحدِّدوه زى النسل وفين مشاكل التأمينات والمعاشات؟ فين مشكلة رغيف العيش .. فين مشكلة الميّه الملوثه و أكياس الدم الملوثه .. ولا فين أهل ضحايا العبّاره ولا فين صاحبها اصلاً .. بس هيروح من ربنا فين؟؟ فين مشاكل الميَّة والزِّبالة اللي بقت على فواتير الكهربا ومش عارف إيه دخل الزبالة بالكهربا؟؟ جايز عشان اللى مايدفعش فاتورة الزبالة يكهربوه فين مشكلة السَكَن والشباب اللي اتجوَّز على روحُه والبنات اللي بتشَمْشِم على عريس حد يقولي مش جم ليه جنب المشاكل دي؟؟؟؟ == مش هي دي مصر الحقيقيه؟ ولا مصر شوية صفقات و عربيات و بودي جاردز و فيلل و شاليهات و جامعات خاصه و تحرر فوق الوصف زي مانكون في ألمانيا .. !!! ولا ده عشان نفضفض عن نفسنا شويه و نقول فيه ناس عايشه آهي؟؟ زي إعلانات السَمْنة.. الإعلان يجيب ألف صنف فراخ ولحمة وهُبَر هُبَر عشان يقنعك ان السَّمنة هيه السبب.. مع ان المشكلة مش في جَوْدة السَّمنة حضرتك.. المشكلة مين اللي هيجيب لك الأصناف دي؟؟ دي الفرخة عندنا بتتقسم على أربع ليالي.. والشوربة بنشرب فيها أسبوع وتلاقي الست الوالدة جايبة نفس نوع السَّمنة بس الفرخة مش زى اللي في التليفزيون الفرخة بتاعتنا م الآخر هيه فرخة لينا بتاعة مسرحية المتزوجون == مش هي دي حياتنا؟؟ يا جماعة يعني واحد زى اللي قتل أمه من كام شهر عشان مش راضية تدّيله تلاتة جنيه ..لو شاف مسلسل زي بتاع نينة نادية الجندى والعيلة كلها عندها عربيات.. يعمل إيه؟؟؟ طب صحافة إيه ولا طبّ إيه ولا شغلانة إيه عموما اللي تجيب الفلوس دي كلها؟؟؟ طب حضرتك هما خرِّيجين آداب إنجليزى مش تبع الشغلانات دي يعني؟؟ !! مش عارفه أقول إيه يعني؟؟؟؟؟؟؟؟؟ محدش مهتم بعامة الشعب ليه ؟ مافيش حد بيسمع لهم ليه غير في 90 دقيقه و العاشره مساءً و البيت بيتك .. تفتكروا الغلابه اللي بييجوا دول حقيقه . طب لو حقيقه مشاكلهم بتتحل ولا اهو كلام وخلاص؟؟ انا سمعت ان الراجل اللي جه في 90 دقيقه مع معتز و قال ان مراتي غلطت (اعزكم الله) و جابت ولد حرام و انا عقيم و ربته على انه ابني و في الآخر هي و ابنها واخواتها يستولوا على ثروتي و انا حي و في الحلقه اللي بعدها مراته تيجي و تقول ان هو عنده تخلف عقلي من أثر حادثه و ان الواد ده ابنه و محدش استولى على فلوسه ولا حاجه !! سبحان الله اتمنى الموضوع يعجبكم |
اعتقد عم خميس بتاع الفلافل بس جاري التحقيق
|
ههههه
شكراً للرد الجميل |
مشكوووووووووووووووورة علي الموضوع الجميل :) :)
|
شكراً دكتور تاز
|
الموضوع بجد اكثر من رائع اى مجتمع متحضر فيه 3 طبقات الطبقى الغنية الطبقة المتوسطة ودى الشريحة الكبرى والطبقة الفقيرة ودى نسبة متفاوتة بس حاليا فى مصر الطبقة الوسطى اختفت ده لان الحكومة لا تعمل الا لرجال الاعمال فى احدث احصائية ثبت ان رجال الاعمال بيصرفه كل عام على الهداية ما يتجاوز 100 مليون جنيه سنويا ودى قيمة الهدايا بين رجال الاعمال واللى بتبداء بالاقلام الذهبية والفضية وبتنتهى بالشليهات والسيارات والشعب الغلبان بيروح يجيب كيلو الفول ب4 جنيه والعدس ب11 جنيه العدس اللى كلنا بنرفض نكله كوجبة كل سنة ب11 جنيه الكيلو وده بيدفع شريحة ضخمة من الموظفين للرشوى وده لضيق ذات اليد شكرا مرة تانية على الموضوع |
اقتباس:
|
اقتباس:
دي صوره معبره جداً لحال الوظايف اليومين دول http://www.mrkzy.com/uploads/caf4937af9.jpg و دي صوره برضو معبره لحال شبابنا http://www.mrkzy.com/uploads/5119900137.jpg تعرف انه في امريكا الشخص المتسول أو Beggar اللي هو مش ليه شغلانه الدوله مسئوله هناك انها توفر له سكن و تصرف له 1000 دولار كل شهر .. انا عمي عايش هناك و بيحكي لي .. قصدي بيعقدني أشكر مرورك |
‘لي فكرة الاغنياء كتير مليانة روحي الساحل او مارينا او علي الاقل اسكندرية !ّ!!!!!!!!!! بس المشكلة ان معظمهم بيبقي بالحرام و العياذ بالله
نرجع لموضوعيك المسلسلات د و الافلام معمولة علشان تاخد جايزة او اي حاجة و لو جابو عربية الفول يبقي هيخدوا سندوتش فول مش جايزة :::::: علشان كيده بيخلصوا نفسهم و يجبوليك عربيات هامر و بي أم علشان تشرف اوسكار :::: فهمتي قصدي هما مش هممهم الشعب المهم الشهرة و الفلوس :: :( : |
هى دى مصر يا جماعة و عمرها ما بتتغير
ربنا يسترها علينا و عليكم |
موضوع جميل جدا
بس للاسف الدنيا ماشبة بالمشقلب اول ما يشوفوا الغلبان يحتقروه ويذلوه واول ما يشوفوا الغنى حتى لو كان جاهل بيخلوه احسن واحد فى الدنيا مشكورة على الموضوع الجميل:) |
فعلا عندك حق بقت ك***ي
|
شكرا للموضوع بوسى بجد اكتر من رائع بصى انا ولا عاوزه شاليهات ولا غيره انا حلمى بسيط اوى انى لما اذاكر وجيب مجموع وادخل كليه القى شغل بعدها امال احنا بنتنيل نذاكر ليه معلش نفسى فى حاجه كمان يرخصوا ثمن الفول والفلافل شويه قال ايه اروح الصبح لـ ام ابراهيم بتاعت الفلافل وبعد طابور طويل تقولى الفول بقا بـ75والفلافل الواحده بـ25:eek: طب لو اسره عددها 5 مثلا طبعا هتفطر فول وفلافل بس قولى بقا هتفطر بكام ولا البيض الواحده بـ 75 يا لهووووووووووووووووتى بجد الواحد مش واخد راحته فى الاكل:p بيتهيالى لو روحنا الصومال يبقا احسن:D |
اقتباس:
زي اسلام ما قال كدا اي مجتمع بيكون مقسم طبقات ف بلد زي مصر مثلا حاليا المجتمع تلت طبقات اول طبقه الطبقه الارستقراطية طبقة الاغنيا الطبقه المعزوله عن بقية المجتمع المصري بتعيش فوق بمعزل عن عامه الشعب ليه مدن خاصه بيها واماكن خاصة بيها تاني طبقه البروليتاريا او طبقه العماله الكادحه ودي بتمثل معظم المصريين الراجل اللي بيشتغل طول النهار سواء ف المصنع او الشركه يجي تعبان بيته الايجار او اوضته اللي فوق السطوح ينام يقبض اول الشهر كام مليم تالت طبقه طبقة الحرامية و المتسولين و اطفال الشوارع ودي ظهرت نتيجه التمرد ع الطبقة التانية ف مصر يالا مش مشكله برضه لسه فيه بقايا للطبقة المتوسطه موجوده بس حاليا اقرب لخط الفقر الا صحيح عرفتوا مين اللي قتل بتاع الفول :D |
لا حول و لا قوة الا بالله .. بجد الوضع بقى غير محتمل ... و فعلا الأغنياء عمالين يزيدوا غنى و الفقرا بيزيدوا فقر... و بعدين يعني ... في ناس عايشين ومش عايشين .. المشكلة ان بلدنا فيها خير كتير و موارد ... بس بيستغلوها غلط .. يعني خلاص الشعب مش محتاج حاجة و عندنا فلوس بالهبل عشان يروحوا يبيعوا الغاز و لا مشعارفة ايه لإسرائيل ....حاجة تنرفز !!!
بس افتكروا دايما :: و من اعمالكم سلط عليكم !! |
احيكى على فكرة الموضوع
|
هى دى مصر يا عبله
|
تصدقي وتؤمني بالله انا كنت هنفجر اقسملك بالله النهارده من حاجة شبه كدا
معدي فلقيت واحده قاعده علي الرصيف وحاطه شوية مناديل وقاعده بتبيعهم انا عندي اللي قاعد بيبيع مناديل ده اشرف من بليون واحد بيكسب مكسب غير شرعي والله لقيتها حاطه ايديها علي خدها وبجد اول مره احس بالحزن والألم ده بقولها بكام علبه المناديل لقيت عنيها مغرغره بالدموع ومفيش اي تعبيرات علي وشها ابتسامه ممزوجه بحزن وبتقولي اي حاجة مش هتفرق والله لولا اني مسكت نفسي كان زماني انهارت اشتريت علبه المناديل بأزيد من تمنها الحمدلله بس بجد اول مره احس بالحزن ده والألم ده ومشيت اضرب في الاسفلت والله واقول حسبي الله ونعم الوكيل واحد عنده 40 مليار جنيه ودي بتقولي علي علبه مناديل بـ 50 قرش اي حاجة ومستنيه الـ 50 قرش او الربع جنيه الزياده اللي فيها بجد كنت محتاج حد اتكلم معاه النهارده لاني كنت هنفجر بكل المقاييس وسببتلي ألم نفسي اوى شكرا لموضوعك |
عمار يا مصر بمشاكلك وبلاوي ناسك عمار يا مصر باللي طعنك في ظهرك وقال ايه باسك عمار يا مصر للي في ايده ماسك رقبتك وخانقك طلعوا روح اللي خلفوا ناسك عمار يا مصر يا ارض الفول سمعتوا ولا عايزني تاني اقول عمار يا مصر |
عايز اقول حاجة بسيطة...
المسلسلات والأفلام دي شوهت صورتنا في العالم العربي... وكأن مصر الناس بتمشي فيها في الشارع عريانة ولا مؤاخذة!!!!!! والمشكلة ان احنا بنشوف الحاجات دي زينا زيهم في الأفلام بس!!!! ربنا ينتقم منهم المخرجين بتوع اليومين دول |
أشكر مروركم الكريم .. و جزاكم الله خيراً
و ياريت تكونوا فهمتوا الرساله اللي حبيت اوصلها ليكم و لكل اللي زيي |
هههههههههههههههههههه موضوع لذيذ جدا والله
تسلم ايديكى |
شكراً يا خلوله
|
ارجع واقول ان خلص الفول انا مش مسئول :::::::::::::::::::::: موضوع كويس بصراحة مصر حققت رقم قياسى فى سرعة التخلص من الطبقة الوسطى دلوقتى فيه طبقتين طبقة الهاى فاى ( الاغنياء ) وطبقة الاندر جراوند ( بتوع الفول يعنى ) ربنا يخليلنا مصر ورجال اعمال مصر والشعب الغلبان بتاع مصر حكومتنا ميه الميه بياكلو بورجر واحنا بناكل طعمية (هيا دى التفرقة العنصرية ) شكرا على الموضوع وان خلص الفول انا مش مسئول :::::::::::::::::::: كان عندى استفسار من اطلق الرصاص على جمعة بتاع الفول:D ودمتم |
لا حول ولا قوة الا بالله
باذن الله حال مصر يبقى كويس ومتخافوش ياجماعة قل لن يصيبنا الا ما كتب الله لنا |
اقتباس:
احنا البلد الوحيده اللي فيها طبقتين عارف .. ايام عبد الناصر و الثوره ماكنش فيه كده هو بابا حسني (حبيب الكل) جه وقضى عالناس اللي في النص الحمد لله و بيقول ما البلد اغنيا و الغني هو اللي عنده عربيه وساكن في شقه 85 متر الحمد لله الحمدلله |
اقتباس:
|
اقتباس:
الغنى غنى النفس ( حتى الناس دلوقتى معدش عندها غنى نفس) يعنى الفقير فقير بكل المقاييس ربنا يخليلنا بابا حسنى عنده الغنى كله ( اللهم لا حسد ) بس ناقصه غنى النفس وبكدا هو فى نظرى افقر الناس ربنا يديله على قد نيته شكرا مرة تانية على الموضوع ربنا يخليلنا الطبقة العليا |
اقتباس:
معاك حق والله الغنى .. غنى النفس مش المال و هو فعلاً كده فقير لإنه بينحني للدول الأعلى منه للأسف مش راح يقدر يعيد امجاد الثوره اللي ضيعها |
الموضوع ده جميل اووووووووووووى
شكرا ليكى يابوسى بس هتعملى ايه مصر هى مصر ومش هتتغير ابدااااااااااااااااااااااااا |
ان الله لا يغير ما في قوم حتى يغيروا ما بانفسهم
لازم نغير من نفسنا بس فور سوري اللي بيقول كلمة حق بيروح روا الشمس شكراً يا ازهريه |
بجد انتي مالكيش حل الاسلوب رااااائع وفعلا ده الواقع المؤلم ربنا يحميها مصرهههههههه ووويخليكي لمصر مرسيه جدا عالموضوع وبصراحة مش عارفة اقول ايه بعداللي قالوه الاعضاء غير لنا ولكي الله يامصر |
شكراً يا دكتورتنا لمرورك الجميل
|
| جميع الأوقات بتوقيت GMT +2. الساعة الآن 06:01 AM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.