ايه رأيكوا ؟
 

السلام عليكم ورحمة الله وبركاته
اولا : انا فى 3 ثانوى علمى ازهر .
انا بدأت دروس طبعا فى شهر 8 بس لقيت نفسى لحد دلوقتى ماحصلتش اى حاجه وكل المدرسين همهم انهم يخلصوا المنهج وخلاص طبعا انا باخد عند مدرسين فى البلد اللى انا فيها (( انا مش من القاهره )) عشان لو روحت المركز (( اللى مايعرفشى يعنى ايه مركز هو تقسيم ادارى كدا اصغر من المحافظه الكلمة قديمة انا عارف بس مش لاقى كلمة تانيه تدى نفس المعنى مش دى المشكله خلينا فى موضوعنا )) هاكون بضيع وقت كتير طبعا فى المواصلات المدرسين دول فى حاجات بتعدى منهم ساعات خصوصا فى الانجليزى والعربى والشرعى والكيميا وعندى مشكلة فى الفيزيا ان احنا متأخرين اوى احنا لسا ماخلصناش الدرس الاول فى فصل التأثير المغناطيسى انا قررت انى متوفر ليا مذكرات فى كل المواد من البوابة الحمد لله وربنا يجازى الناس هنا كل خير غير انى لو فى حاجه واقفه عليا هاسأل هنا وفى فيديوهات فى الفيزيا مدرسه على الهوا والاستاذ محمد عبد المعبود مالية النت وفى فيديوهات مدرسة على الهوا فى كل المواد انا الصراحه اما اتفرجت عليها وبروح الدرس بحس ان احنا مابناخدش حاجه فى الدرس اما بالنسبه للعربى والشرعى اما سمعت ملفات الاساتذه (أحمد بهدر - ابو عمر الصاوى ) ربنا يجازيهم كل خير حسيت انهم متمكنين فى الماده اكتر من المدرسين اللى انا باخد عندهم وحسيت انى بضيع وقتى فى الدروس وبقيت قدام انى اسيبنى من الدرس ياسيبنى من الفيديو عشان الوقت وطبعا دورت عالنت لقيت فيديوهات كتير مش شرط تكون لسنه 3 ثانوى بس شارحة نفس المنهاج اللى عندنا (( للى مايعرفشى المناهج بتاع العريى والشرعى معظمها كتب متألفه من زمان بقالها اكتر من 500 سنه وهم بيحطوا عليها ملاحظات وبيقرروها علينا )) وطبعا لقيت حاجات تانية كتير وكلها احسن من الشرح 100 مرة فانا قررت انى أذاكر مع نفسى كل المواد ماعدا الرياضه هاروح الدرس بس عشان استفيد من الملاحظات على الدروس وايه اللى بيجيى فى الامتحان وايه اللى مابيجيش انما انا هاتفرج على برنامج مدرسه عالهوا طبعا واحل مع نفسى بعيد عن الدرس انا قررت اعمل الكلام من بعد العيد ان شاء الله خصوصا ان انا مش بألف او بقول حاجه جديده بل ان الاسراف فى دروس زى العريى والشرعى خصوصا لو المدرس مش متمكن اوى من المواد دى هو الى تأليف وتضيع وقت عالفاضى انا باخد رأيكوا هنا كخطوه أخيره عشان اللى عنده ملاحظات على اى حاجه مايبخلشى بيها وربنا يوفقنا كلنا مع العلم انى هابدأ من اول خالص مش هاعتمد على اى شرح خدتوا فى الشهرين دول اسف جدا انى طولت :rolleyes: عليكوا اى حد عندوا ملاحظه ياريت يقولها وشكرا ليكوا :d

احسن قرار اخدته ...والدروس كلها زى بعض تضيع وقت ......وبالتوفيق

انا لسة فى 3 اعدادى ازهر ممكن ميكونش عندى خبرة كفاية بس انا من وجهة نظرى جرب نفسك اول اسبوع تكون جربت جميع المواد اللى عليك وشوف نفسك ان ربنا وفقك كان بها وان لم يرد الله فمن الافضل ترجع دروسك تانى والافضل اكتر لوربنا وفقك ونجحت بنفسك تحضر دروس المراجعة مع المدرسين وبده فكر مع نفسك واستشيرزميل كان فى 3 ثانوى السنة اللى فاتت وربن يوفقك

ازاى طب الفيزيا لازم يكون معاك مدرس متابع مستواك بس لو انت فعلا هتقدر تعمل اللى قولت عليه ربنا معاك :)

شكرا لردك وبالتوفيق لنا جميعا

انا عملت مادتين لحد الوأتى فى اليومين دول واستفدت كتير اوى وفى حاجات ماكنتش خدت بالى منها وانا بذاكر ورا الاستاذ الوأتى ركزت عليها وبالنسبالى كل النقط مهمه
وانا فعلا استشيرت واحد اكبر منى هو الوأتى فى طب وأيدنى فى كلامى واستشرت استاذ تانى بثق فى كلامه وقالى لو هاتعرف تفيد نفسك اكتر من الدرس وفر وقتك احسن وشكرا لمشاركتك :d :d وربنا معاك

انا بتفرج على شرح الاستاذ محمد عبد المعبود ومدرسة على الهواء
انا المره اللى فاتت فى الدرس كنا بناخد درس جديد انا كنت قرأته قبل ماروح وحليت عليه روحنا الدرس حلينا 4 مسائل انا فى البيت كنت حالل 10 يعنى روحت ضيعت وقت فى حاجه عملها قبل كدا وهنا فى البوابة الحمد لله لو فى مسأله محتاجها هاسأل الاساتذه الافاضل ربنا يخليهم
شكرا لردك وربنا يوفقنا كلنا :d

هي فكره كويسه بس هيبقي عليك مجهووود اكبر شويه
وربنا يوفقك :) :)

أكيد هايكون فى مجهود اكبر بس الدروس هاتثبت فى دماغى اكتر وخصوصا انى ماكنتش مستريح لطرق الشرح بتاع الدروس فأكيد الوأتى انا هافهم الحاجه بالطريقة اللى تريحنى وربنا يوفقنا كلنا ومايضيعش تعب حد :d

شكرا لحضرتك وربنا يوفقنا كلنا :)

ربنا يخليك يامحمد وربنا وفقنا كلنا
الصراحه كلامك عن العربى انه مش لازم نضيع وقت فى الدرس كان من اكبر الحاجات اللى خلتنى افكر فى ;) كدا ربنا يوفقنا يارب :rolleyes:

لو الوقت بتاع الدرس وبتاع المواصلات والوقت الضايع ده كله ذاكرته لوحدك هتعمل كمية معلوماات كتتتتيرة جدا

والله انا عايز اعمل زيك

طبعا ده فكره كويسة احنا بنضيع وقت كبير فى الدروس بس فى ملاحظات

اولا هيبقى عليك مجهود شوية لان ممكن تبقى مش فاهم حاجة المدرس بيشرحها ع النت مش هتعرف تفهم الجزئية اللى مترتبه عليها فلازم تمشى معاه خطوه خطوه ويكون الكتاب قدامك انا عملت كده فى الفيزيا والرياضة على فكرا وحاسة انى مرتاحة
ثانيا الكسل يعنى ممكن يوم تكون تعبان تقول هذاكر بكرا ويتراكم عليك دروس وممكن متذاكرش كتير
ثالثا المراجعه ودى طبعا مهمة جدا فلازم تتابع مع حد ونظام الورقة والاسئلة بتكون ازاى
رابعا لما بتكون مع صحابك فى درس بتشجعوا بعض وبيكون فى منافسة كويسة وده هيخليك تشد اكتر

طبعا انا مش بحبطك كلنا عارفين ان الدروس اكبر حاجه بتضيع الوقت وكلنا نفسنا نبطل الدروس دى بس لو هتعرف تتأقلم مع نفسك و تشجع نفسك ومتكسلش وتتخطى الملاحظات دى فطبعا ده هيبقى افضل وده طبعا يرجع ليك فى الاخر وانت اكتر واحد تقدر تحدد هتقدر على كده ولا لا و بالتوفيق إن شاء الله :)

أولا شكرا لرد حضرتك ده اللى انا مستنيه بصراحة ان حد يتكلم معايا فى الفكرة مش يقول حلوة بس
بالنسبة للمجهود انا وضحت انى هاتفرج على فيديوهات قناة الرحمة وبرنامج مدرسه على الهواء وفعلا عملت نفس اللى قولتى عليه فى الاحياء والانجليزى والفيزيا لحد الوأتى وحسيت ان احسن من اى درس زى مايكون فى مدرس بيشرحلى خصوصى وموضوع الكسل عندك حق فيه عشان كدا انا كل شوية بشوف حاجه جديدة تخلينى اكمل فى المذاكرة ممكن تنافس مع واحد صاحبى او محاولة فهم الماده اصلا يعنى انا لو قرأت سؤال قبل ماذاكر الدرس هايدينى طاقة انى اخلص الدرس كله عشان احاول اعرف اجابات الاسئلة اللى قرأتها وبالنسبة للمراجعة كلامك صح مية بالمية انا هاراجع معاهم ان شاء الله وبكدا انا عامل خطتى انى ماشى معاهم فى المنهج وموضوع التنافس ان شاء الله هنا فى البوابة هاحاول اعمل نفس الموضوع اننا نتنافس مع بعض وكلام حضرتك مش احباط ولا حاجه بالعكس انا اتشجعت من كلامك وشكرا جدا ليكى وربنا يوفقنا كلنا :rolleyes:

الشكر لله ... احنا هنا كلنا بنساعد بعض وانا معملتش حاجة احنا بنشجع بعض
و إن شاء الله حضرتك تحقق اللى نفسك فيه و تتابع فى دروسك و احنا نشجعك و بالتوفيق دائما إن شاء الله :)

صح كلااااامك
احيييك علي قرارك ده :078111rg3::078111rg3:

لو انت شايف ان الشرح والمعلومات من النت افضل من الدروس يبقى انت صح طبعااااا. ......بس خلي بالك من حاجة ان الحافز في الدروس بيكون اكتر من ناحية الالتزام والامتحانات والمنافسة وكده وحد بيتابعك لكن البيت انت لوحدك وبس لو كسلت مفيش حاجة تمنعك .....لكن لو معندكش مشكلة في الموضوع ده خلاص كمل في طريقك وربنا ييوفقك ان شاء الله

شكرا لردك :)
وان شاء الله نحفز بعض هنا فى البوابة وربنا يوفقنا كلنا