فى نشرة السابعة والنصف صباحًا ، قال المذيع :
« هنا القاهرة … نحن الآن فى انتظار مراسلنا الذي سيوافينا بتقرير مفصل عن حالة الممتحنين بلجان الثانوية العامة ، ومراسلنا فُقد فى ظروف غامضة .. لذا نحن الآن فى انتظار اتصال هاتفى منه يحدد موقعه » ، و يدق جرس الهاتف من مكان ما ..
فيقول المذيع : « آلو ؟ »
لا رد …
يكرر المذيع : « آلو ؟ »
لا رد أيضًا …
« آلوووو ! »
قالها المذيع فى نفاد صبر ، فجاءه واحد ابن حلال بسماعة الهاتف ، فقال المذيع بابتسامة لطيفة : « معذرة علي هذا الخطأ الفنى .. آلو ؟ »
ـ « أيوة يا حسام ، معاك » .
ـ « يا ريت يا سيد تنقلنا صورة حية من موقعك علي ماتوصلك كاميراتنا » .
ـ « أنا الآن فى شرفة منزل السيدة ( نفوسة الوزير ) المطلة علي مدرسة ( … ) الثانوية للبنين و للبنات كمان ، و قد تفضلت السيدة ( نفوسة ) ـ مشكورة ـ باستضافتى فى شرفتها ، حيث إن أولياء الأمور محتشدين حول المدرسة فى دائرة قطرها 5 كيلو متر منذ السادسة صباحًا » .
وبعد أن قال المراسل التلفزيونى اللامع ( سيد مراسيل ) كلمته ، دق جرس باب شقة السيدة نفوسة ، ودوت أصوات الزغاريد أعقبها صوت ( نفوسة ) يقول : « التلفزيون ؟ يا ألف مرحب .. داحنا زارنا النبي ! » وبعدها قال ( سيد ) : « لقد وصلتنا الآن سيداتى وسادتى كاميراتنا التى ستنقل لكم صورة حية من ساحة المعركة .. لا مؤاخذة .. قصدى ساحة الامتحان » ، و أخيرًا ظهرت صورة ( سيد ) على الشاشة وهو يقول :
ـ « لم يبدأ الامتحان بعد سيداتى و سادتى ، لذا سننزل لنجرى بعض الحوارات مع أولياء الأمور .. و نشكر السيدة ( نفوسة ) علي استضافتها لنا ، وعلى ساندوتش الكوسة الذى قدمته لى .. »
* * *
« كان أول ـ و آخر ـ لقاء لنا سيداتي و سادتي مع ولى و ولية أمر أحد الطلبة .. » .
ـ نتعرف بيكم ؟
ـ سعيد أبو سمسمة ، سعيدة أبو نمنمة .
ـ إيه كان شعور ابنك ليلة الامتحان ؟
ـ و الله الواد خرج مالصبح و رجع الساعة واحدة بالليل و اتعشى و نام .
ـ يعني ماكانش قلقان ؟
ـ خالص ، وقاللى يا حاج حط فى بطنك قرع عسل صيفى .
ـ و يا تري يا حاجة إيه آخر حاجة عملتيها لابنك قبل مايدخل الامتحان ؟

تابعونا فى الحلقة القادمة :lol: :P

جميله اوى يا استا> بورسعيدى

ياريت حضرتك متنساش تكتب الحلقه القادمه

حلوة اوى يا استاذ بورسعيدى

فى انتظار البقية.....

في انتظار التكملة

موضوع جميل اوي

وفيه حاجات كتير واقعيه

منتظرين البقيه يا استاذ بورسعيدي

we are waiting

هههههههههه ونشكر مدام نفوسه
جميله يا بورسعيدي

عظيم جدا يا أ\ بورسعيدى

شكرا لمتابعتكم ومشاركتكم الجميلة
واليكم الجزء التالى

[COLOR=red]و يا تري يا حاجة إيه آخر حاجة عملتيها لابنك قبل مايدخل الامتحان ؟

دعتله يا ضنايا ، واديتله ساندوتش مفتقة ياكله قبل مايخش الامتحان .
ـ يا سلام ؟ و اشمعنى مفتقة ؟ ليه مش ( بلوبيف ) ؟
ـ عشان النهاردة امتحان تاريخ ، و ساندوتش ( البلوبيف ) يوم امتحان العربى ..
* * *
« سيداتى سادتى ، لقد بدأ الامتحان ! و بعد أن نجحت كاميراتنا ( بوسائل خاصة جدًا ) فى التسلل لداخل إحدى لجان الامتحان ، سأعطي لسيادتكم فكرة عامة عما يحدث داخل اللجنة ..
طبعًا لا داعي لذكر أن ورق الأسئلة تأخر نصف ساعة ( فقط ) ، فهذا شيء طبيعى وجوهرى ، وإليكم بعض الأصوات ، والعبارات التى سمعت بعد توزيع الورق مباشرة :
ـ أخ ! نسيت البرشامة !
ـ أوبس ! هو احنا المفروض نجاوب على ده ؟
ـ يعععع ! ريحة الورقة ( فليت ) !
ـ يا نهار مدوحس ! ده امتحان التاريخ ! و أنا اللى كنت فاكر النهاردة امتحان جبر !
« و نترككم سيداتي و سادتي لتتابعوا بأنفسكم ما يحدث .. » .
ودخل رئيس اللجان بالمدرسة ، و بعد استعطاف ورجاء وتقبيل يد ورجل ورأس وخلافه .. تنازل الرجل و بدأ يقرأ ورقة الأسئلة ، لأن الخط لم يكن واضحًا ( قليلا ) .
« السؤال الأول : اختر الاجابة الصحيحة مما بين القوسين :
1 . متى ولد هتلر ؟ ( فى سنة 1802 ، فى سنة 1990 ، فى سنة سودة )
2 . أين نشأ زوج خالة بنت عم موسولينى ؟ ( فى البندقية ، فى الجوزية ، فى اللوزية )
3 . لماذا فشلت الحملة الفرنسية على مصر ؟ ( لأن الجو كان حارًّا و جنود فرنسا « ساحوا « فى الطريق ، لأن المصريين عملوا عمل للفرنسيين ، لأن النسوة المصريات رقعن بالصوت الحيانى فاعتقد الفرنسويون أننا نستعمل صواريخ ultra ـ sonic ففروا هاربين ) . »
« السؤال الثاني : من هو / هى ؟
1 . قائد عظيم استرد بيت المقدس ، مثل شخصيته ( أحمد مجهر ) فى فيلم من إخراج ( يوسف نادين ) ؟
2 . رئيس أمريكى قاد ( إحدى الدول ) فى حرب فيتنام ، و انهزمت تلك الدولة و ( خدت على قفاها ) من فيتنام ؟
3 . مناضلة جزائرية عظيمة وجعت قلب الفرنسيين حتى قصولها شعرهاÁ la garçon ؟ » .
« السؤال الثالث : لماذا ؟
1 . تخليت عني ؟ ! .. أ .. أقصد دخل الهكسوس مصر ولم يدخلوا الأردن ( مع أنها أقرب ) ؟
2 . قال هيرودوت مصر هبة النيل و لم يقل النيل هبة مصر ؟ »
« السؤال الرابع : ما النتائج المترتبة على :
1 . بناء السد العالي سنة 1960 ؟
2 . فشل حملة لويس التاسع وسجنه فى دار بن لقمان ؟ »
وبعد انتهاء السيد رئيس اللجان بالمدرسة من قراءة الورقة ، قال : « أظن مافيش أسهل من كده .. ربنا يصبركوا .. قصدى ربنا يوفقوا » ، و بعد رحيل الرجل ، بدأت مراقبتا اللجنة فى النظر لفتاة على مقربة منهما فى شك ، و همست إحداهما للأخرى فى خطورة : « تفتكرى دى حطة بارفان شانيل و لا فلور دى سوار ؟ » ، ثم بدأتا تتحدثان فى أمور مهمة مثل سعر الطرشى ، والطريقة المثلى ( للتفاهم ) مع الزوج دون اللجوء للقسم ، وكيفية تفادى غضب ( أبلة الناظرة ) عند الحضور متأخرة للعمل .. إلخ ، و نسيتا اللجنة تمامًا .
وهنا قال أحد الطلبة لآخر :
ـ وله يا ( فادى ) .
ـ إيه ؟
ـ السؤال التانى رقم 2 إجابته إيه ؟
ـ و دي عاوزة سؤال ؟ ( نلسون ماندِلا ) طبعًا يا غبى .
و قالت إحدى الطالبات للأخرى :
ـ و النبى يا ( عزة ) ياختى ، السؤال الثانى رقم 3 ، مين المحروسة دى ؟
ـ ماجدة طبعًا ، انتى ماشفتيش فيلم جميلة بوحريد ولا إيه ؟
ـ آه بس مين جميلة بوحريد دى ؟
ـ أكيد ده اسم بطلة الفيلم .
وهمست ( فايزة ) لزميلها ( جعيصة ) :
ـ ( جعيصة ) .. ( جعوصتى ) .. ( جعاصيصو ) .. إيه النتايج اللي اترتبت على بُنا السد العالى ؟
ـ أما حمارة صحيح ! طبعًا ظهور أغنية الكروان الأشقر ( عبد العليم ) : قلنا هانبنى ، وادحنا بنينا السد العالي .
وسأل ( منير ) زميله ( حسن ) عن إجابة السؤال الرابع رقم 2 ، فقال :
ـ إن الفرنسويين كانوا أول من رفع شعار : الطار الطار و لا العار .
وبدأت الأصوات تعلو داخل اللجنة ، حتى صاحت فيهم إحدى المراقبتين : « بشويش يا اخوانا ، اللى عايز حاجة من حد يطلبها بصوت واطى .. مش هانعرف نتكلم منكوا ولا إيه ؟ » ، و فجأة برز أحدهم من نافذة اللجنة متعلقًا بالماسورة المارة بجانبها ، و أعطى ورقة لأحد الطلبة و عاد لأدراجه ، فأخذ الطالب الورقة ، وصاح فرحًا : « ابسطو يا اخوانا ! ورقة الاجابات النموذجية جاتني من تحت ! » و على الفور وقف الفتى فى وسط اللجنة ـ بعد استئذان المراقبتين طبعًا ـ و أخذ يملى الإجابات على زملائه و زميلاته .
وبعد انتهاء الجميع من إجاباتهم ، شرعوا يتسلون بتملية اللجان المحيطة بهم الإجابات عن طريق النوافذ ، بعد أن صنعوا من ورقة الاجابات طائرة ورقية صغيرة ، وقال مراقبو اللجنة لبعضهم البعض ، وهم يتأملون المشهد فى إعجاب :

وطبعاً للمشهد بقية

دائما تشوقنا بتحفك

أسد عجوز
بس بجد أسد صح
أيه يا عم ده
أيه الروعة دي
الموضوع مثبت يا حبيبي

استاذ اشرف ؟
يا 1000 خطوة عزيزة
يا 1000 مرحبا
تشريفك لموضوعى
يزيدنى شرف
ويزيد الموضوع قيمة

أهلا بيك يا استاذ أشرف بس حضرتك قلت ان الوضوع مثبت وأنا شايف انه مش مثبت ولا حاجة

يا خسارة نسى
اى والله نسى

هو نسى بس انا مش ناسى

البركة فيكم بقى
هو نسي افتكروا انتوا

شكرا أستاذ بورسعيدي على الموضوع الجميل.

على فكرة ننتظر باقي اليوميات.

موضوع جميل جداً يا أستاذ بورسعيدي
بإنتظار البقية

بعد أن صنعوا من ورقة الاجابات طائرة ورقية صغيرة ، وقال مراقبو اللجنة لبعضهم البعض ، وهم يتأملون المشهد فى إعجاب : « يا سلام علي التعاون ! » .
* * *
« سيداتى وسادتى ، بعد أن تركنا لكم فرصة نادرة لتشاهدوا حالة اللجنة ( الموقرة ) دون تعليق ، التقينا بعضَ الطلبة تو خروجهم من لجنة الامتحان سائلين إياهم عن حالة الامتحان ، فكانت بعض الإجابات كالآتى :
ـ امتحان لوز .
ـ كوبيا .
ـ مُكن .
ـ زفت و أطران على دماغ اللي خلفونا .
ـ cool .
ـ امتحان مضروب ، فى أسالة مش علينا .
ـ هو احنا امتحنا إيه ؟
« وبسؤال أولياء الأمور ـ سواء المجتمعين حول المدرسة أم الراقدين فى غرف الإنعاش ـ عرفنا أن الامتحان لم يكن متوقعًا ، وأن بعضهم يعتزم احتلال وزارة المعارف ـ التربية والتعليم سابقًا ـ وتصحيح الورق بأنفسهم . »
« و سوف نوافيكم بآخر الأخبار من مكان الحدث أو مكان ( مطل عليه ) كعادتنا ..

شكرا لكم و إلى اللقاء . »
بورسعيدى
* * *
شكرا اينشتاين على التثبيت

شكرا يا عبقرى على التثبيت

ولكن ارجو الا تطيل فترة التثبيت

يعنى كفاية اسبوع حتى يتمكن كل الاعضاء من القرءة ثم نطلق صراح الموضوع لكى ندع فرصة التثبيت لموضوعات اخرى

موضوع جميل اوى استاذ بورسعيدى
وفكره جديده
وانا بحب الكوميديا الساخره من الواقع الاجتماعى جدااااااا

رائع وننتظر التصحيح

شكرا لمشاركتكم جميعا

شكرا اينشتاين على التثبيت

شكرا يا عبقرى على التثبيت

ولكن ارجو الا تطيل فترة التثبيت

يعنى كفاية اسبوع حتى يتمكن كل الاعضاء من القرءة ثم نطلق صراح الموضوع لكى ندع فرصة التثبيت لموضوعات اخرى

ان شاء الله

بسم الله أولا وأخيرا

رائعة جدا أخي بورسعيدي تلك الفانتازيا الكوميدية

حقا رائعة

بس من خلالها قد استنبطت شيئا هاما جدا

جدا

أنك كنت علمي في الثانوية وعمرك مادرست تاريخ

هههههههههههههه

شكرا ونتمنى المزيد من عبقريتك الأدبية

شكرا
أخوك :: مروان حسن

اولا شكرا على مرورك الكريم اخ مروان
ثانيا حمدا لله على السلامة
ثالثا فعلا استنتاجك سليم 100%
انا فعلا كنت علمى علوم
وسبب اختيارى للعلمى هو عدم حبى للتاريخ

عفوا
لقد وضعت رد فى غير مكانه وتم تحريرة

افهم من هذا انك درست العلمي بسبب التاريخ
التاريخ مسئول عن تغير مسارك
اعتقد ان التاريخ خسر كثيرا تلك العقلية الأدبية الرائعة

انا عارفه ان الموضوع ده مبالغ فى القدم
بس هو برده مبالغ فى الجمال و الابداع
فطلعت عن كونى مش عايزه حد يرد و انا رديت
فى حاجات تستحق ان الواحد يعرضها على الناس كل شويه
و اكيد دى منها
فى رعايه الله

كده برضة ؟؟؟

ده موضوع من تاريخ 04-03-2006

ودلوقتى فى ناس نازلة حزف فى الموضوعات القديمة

يعنى يرضيكى التراث ده يتحزف؟؟

انا افضل انه يفضل مركون احسن مايطلع على الهوى ويتحزف

على العموم شكرا لك على مرورك الجميل

ومش خسارة ابدا انه يتحزف او يتنقل من اجل عيونك

جميله أوي القصه دي

حميلة أوي وننتظر المزيد

هههههههههه حلو يا بورسعيدى يمكن كل البورسعديه حلوين زى بس على فكرة فى كلام كتير من دة حقيقى وحصلى

و الله انا شايف ان الكلام مظبوط و كوسه عااامه
بس هو فين الموضوع اصلا لو حد شاااااف بنكي ستاااار يسلملي عليها

بجد القصه جميله اوى يا استاذ مجدى
فعلا مش معقول موضوع يطلع تحفه كده الا اذا كان كاتبه واحد زى حضرتك

بجد رائع استاذ بورسعيدي
يعني الموضوعات اروعه مش جديده ع حضرتك
بس صدقني محدش هيحذفه
هو احنا هنلاقي موضوع زي ده فين

نحذفه مين يا استاذنا
صلى على النبى يا استاذ مجدى
لو انا عرفت اعمل بس ربعه ابقى احذفه
هههههههههه
شكرا جزيلا على الموضوع
بس حاسس انه اثرى
!!!!
فى امان الله

جميل جداااااااااااا مكنتش اعرف ان البورسعدين بيمخمخوا كده ويطلعوا حاجات جميلة ههههههههه

فعلا فى لجان بتبقى كوسة كده ومعظم المراقبات مبيبطلوش كلام وخاصة عن الطبيخ والبيت والعيال وابو العيال

وكلامهم عمره مبيخلص ابدااااااااااا ومنتظرين بقية ابداعك

شكرا لمرورك يا نورهان


طبعا الكلام ده حقيقى وبيحصل
امال يعنى انا جايبة من خيالى
بيحصل بس يمكن اختلاف القالب وميل المشهد للشكل الكوميدى بس فى النهاية بيحصل وكتييييير كمااااان
ربنا يخليكى يارب وشكرا على رأيك الجميل فى البورسعيدية
والله مرورك هو الى رائع ومشاركتك خفيفة وجميلة جدا

شكرا جدا والحمد لله انها عجبتك
مرور مقبول وعلى العين والراس

شكرا لك ولزيارتك الكريمة

شكرا لمرورك العطر
والحمد لله ان الموضوع مقنع وغير مبالغ فيه

ربنا يخليكى على مجاملتك اللطيفة يا سيدة النت

شكرا لمرورك الجميل

اهلا وسهلا
شكرا لمرورك العطر
التكملة فى الصفحة السابقة

سندريلا شخصيا عندنا ؟؟
يامرحبا يامرحبا
الموضوع اتنقل فعلا راح بعثة الى سلة المهملات والموضوات المكررة
ماعلينا
المهم ان الحمد لله ان موضوع عجبك
شكرا لمرورك الكريم

اعزك الله يا دكتور سعيد
ده انت الخير والبركه ياراجل والله
هو فعلا اثرى تقريبا من 2005 من ايام النسخة القديمة

شكرا لمرورك وشهادتك الغالية يا طبيب المنتدى

شكرا لمرورك الجميل
وطبعا فى لجان كده واكتر من كده

واكيد لجان العام الادم سوف تشهد تطورات عجيبة

ااااااااه

كلامك جه فى الصميم

انا معاك لكن الكوسة عامة واحنا كلنا بنشوفها وبنعانى منها

لكن مش كلنا بنقدر نستخدمها

اذن هى عامة للنظر ولكنها خاصة للإستخدام

كل منا ممكن يشوف الكوسة فى المرور - فى اقسام الشرطة - فى دخول الجيش والكليات والتوظيف - فى الترقيات والعلاوات -فى الاسكان - فى جميع الوزارات الخ الخ
ياسيدى الفاضل اقدر اقول لك اننا محاصرون بغيط من الكوسة
لكن لا نقدر على الاقتراب او التصوير

وسؤالى الان بتشوف الكوسة والا مش بتشوفها ؟؟؟

وكمان سؤال بتستخدم الكوسة والا لاء؟؟

انا ممكن اجاوب بالنيابة عنك
طبعا باشوف الكوسة فى كل شيئ حولى
ولكن لا اقدر على استخدامها لانى ببساطة مواطن شريف

ملحوظة : اجابة الاستاذ منتصر كانت باللون الازرق

حقيقى مرورك نور الموضوع

اهلا وسهلا بحضرتك