|
عااااوزه اتجوز ............
بسم الله الرحمن الرحيم اهلا وسهلا بكل الاعضاء والمشرفين وما الى ذلك........ فى لحظه صفا قررت اعمل الموضوع ده الصراحه مش انا اللى هكتب بس اللى هتتكلم بنت مصريه وهتكون معانا طول الحلقات اللى جايه طبعا مش عارفين مين !! اللى هنقل كلامها هنا هى غاده عبد العال كاتبه اى نعم صغيره فى السن بس كبيره بعقلها هتعبر عن بنات جيلنا وكمان الشباب انا كنت طلبت الكتاب فى موضوع مكتبه كتب جامد ومتجدده بس الصراحه قلت اما اعمله هنا بعد اما حسيت انه هيكون منظره الطف وفى ناس كتير هتقراه معايا اول حاجه هيكون فى الموضوع معايا العضوه الجميله asdat ........هتكمل معايا لانى ظروفى مش هتساعدنى عشان الدروس والكلام ده ;) ملحوظه صغيره لمشرفين القسم انا فكرت كتير قبل معمله ع العام وكنت ناويه اخليه فى بنت مسلمه بس الصراحه شايفه ان هنا افضل لان المواضيع مش عن البنات بس بالرغم انه معظمه عننا طبعا واحنا نستاهل واللى عنده اعتراض يتكلم:p اولا هحط حاجه بسيطه كده قالتها غاده عن الكتاب بتاعها وبكره هنزل اول حلقه منه اصل انا بكتب الساعه سبعه الا ربع الصبح وهموت وانام وشكلى كده هتهزق بكره فى الدرس ما علينا كله يهون بقى ودلوقتى هسيب الميك لغاده : و لا كنت اتخيل أبدا أول مابدأت البلوج ده ..إن الموضوع هيتنطور بالطريقة دي..أولا فكرة إني اكتب في حاجة واحدة سنتين ..ثانيا الزوار اللي الحمدلله بيزيدوا مابينقصوش..و قبل كل ده الكتاب و اللي جرى مع الكتاب و بسببه سنتين إستثنائيتين بكل المقاييس حاجة كده زي زلزال جه قلب حياتي رأسا على عقب ..من بنت قاعدة في حالها متحصنة خلف شاشة الكومبيوتر و حاطة بينها و بين الناس سدود و متاريس ..لواحدة بيتضرب بيها المثل في الجرأة(لغاية دلوقتي مش فاهمة ليه) و الشجاعة (أموت و اعرف مين اللي زقني) و الصراحة (مع إني و انا صغيرة كنت باحب الكذب بالظبط زي مرتضى منصور ما بيحب الخناقات) و أصبح ناس كتير جدا بيبصولي على إني باتكلم بلسانهم ..مش بس في مصر ..لأ كمان في الهند و باكستان و بانجلاديش و النعمة ماباهزر لسه الأسبوع ده ال بي بي سي عملت موضوع على موقعها لينكه أهه http://news.bbc.co.uk/2/hi/middle_east/7554892.stm و بعدها سيل من الرسايل من ال3 دول دول بالإضافة ل 2-3 هنود عايشين في أمريكا بيقولولي نفس الموضوع عندنا و إنتي بتتكلمي بلساننا (إستنوني في فيلمي القادم مع أميتاب) البنت المقهورة المظلومة اللي عايشة في شرنقة لوحدها بقت كل يومين في محاطة و كل 3 ايام في حوار و مع كل الشهرة بيجي القلق و الخوف و ألف حساب لكل كلمة بتتكتب و سؤال بيدور في الدماغ كل يوم عن المستقبل ..يا ترى ده الطريق ..والا مجرد شمعة و هتهب عليها شوية هوا و تنطفي؟ لكن دايما تشجيعكوا هو الفيصل و الدافع للأمام تشجيعكوا ليا كان وهمي و غير طبيعي ..الناس اللي بتقرا أول بأول و مع ذلك إشتروا الكتاب و بيعملوله دعايا في كل مكان..و الناس اللي اشترت الكتاب و بعدين دوروا ع البلوج و على حساب الفيس بوك عشان يبعتوا يقولوا قد إيه هما مبسوطين و الناس اللي بتحضر حفلات التوقيع و المناقشات (خصوصا اللي كانوا جايين يتفرجوا و يقولوا ما هي حلوة اهه امال إيه؟ :)) أشكركم و اعترف بالجميل ..كل حد كتبلي كلمة قبل نشر الكتاب فهو شريك ليا في النجاح ..كل حد كتبلي كلمة بسبب الكتاب ..فهو شريكي في الكتاب الجاي (نجح بقه والا لأ ..كله على وشكوا ماليش دعوة ) الناس اللي بتبعت ميلات تشجع و تناقش و تنقد و المشاركين و المشاركات في بيت العرايس و العرسان طبعا من الكلام حاسين ان القمرايه اللى هتنور الموضوع خفيفه الظل ومثقفه لحد كبير وهنشوف شويه مواقف معاها عثل عثل :Dواللى بجد ان شاء الله تستمتعوا بيها استنونا فى اول حلقه بكره باذن الله لما اجى من الدرس;)[/ |
انا كنت متابع المدونه بتاعتها اصلا وكنت ناوي اشتري الكتاب بصراحه
علي العموم هخليه لو في مشرف تاني مننا شايف ان مكانه في حته تانيه ينقله لاني بصراحه مش عارف هو مكن يتحط فين وانا لو نقلته هيروح الركن الادبي بس مش مكانه برضو يبقي الوضع علي ما هو عليه لحد اما نشوف راي باقي المشرفين |
متابعة معاكى يا بنوتة :) |
ممكن تحطي الحلقات كلها في ملف word وتعمليها كتاب ليكي ولأي حد يقرأه لو عاوز
او تسألي عليه في اي مكتبة عامة او تستني معرض الكتاب :D اطلع اشوف كلام الست غادة بتقول ايه :D |
معاكى يا بنوته
هو انتى اشتريتى الكتاب ده ولا لقيتيه على النت ولا جبتيه منين؟ |
حلو موضوعك يا بنوته:)
بس انا قريت الكلام ده عالبلوج:D |
ايه ده انتى ابتديتى بقى :mad:
موش قلتى بكره اللى هو انهارده يعنى اللى هو المفروض دلوقتى المهم بلاش لخبطه:p حطى يا ستى اول حلقه عشان بيفطسو فعلا بس متعمليش حاجه من ورايا تانى :mad: وحثه:p |
موضوع جميل جدا
ومستنين الحلقه :D:D |
ايه ده انتى ابتديتى بقى :mad:
موش قلتى بكره اللى هو انهارده يعنى اللى هو المفروض دلوقتى المهم بلاش لخبطه:p حطى يا ستى اول حلقه عشان بيفطسو فعلا بس متعمليش حاجه من ورايا تانى :mad: وحثه:p |
انا قريت الكتاب الكتاب فعلا تحفه بس صدقيني محستش بالبنت دي غير لما طلعت في برنامج مش فاكره اسمه مع لميس الحديدي ( عصرتها الصراحه ) بس البت جامده برده بس مفيش مانع اني هتابع معاكو ان شاء الله بس كان هيبقي احلي في البنت المسلمه ياللا بالتوفيق حبايب قلبي |
شكرا عالموضوع يا قمر
انا كمان مش عارفة مكانه فين بس هسيبه زيه زى قصر البارون لو حد عنده راى تانى يقول يلا مستنين الحلقات |
يلا مستنييييييييييييييييييييييييييييييييييييييييييين
بسرعة |
بارك الله فيكى موضوعك حلو اوى وفكرة جميلة وجديدة اوى
انا مستنية الباقى |
اما نشوف السلسلة دى
|
على فكرة أنا لسه قارى المدونة دى وهى جامدة جداااااا
|
كلام حلو ......
|
منتظرين الحلقات
|
بما ان البت شكلها هاجرت معرفش:D
او يمكن شويه زملاكويه اتلموا عليها:p خلاص موش اشكال قابله للتعويض:p المهم انا حبتدى بقى على طول بس دى يعنى لسه مقدمه حنموتكو معانا:p: سموا كده و خليكوا معايا واحدة واحدة...خلينا نتفق الأول ان موضوع الجواز و العرسان و تأخر الجواز ده موضوع حساس جدا..وصعب جدا انكوا تلاقوا حد بيتكلم فيه بصراحة..خصوصا بالنسبة للبنات....لأن اللي بتتكلم فيه بصراحة يا إما بيتبصلها على إنها قليلة الأدب و ماتربتش ..يا إما على انها مسروعة ع الجواز ..يا إما على انها بارت و مش لاقيه حد يتجوزها.. عشان كده تلاقوا بنات كتير بتقول ..جواز ايه بلا نيلة ..يعني هم اللي اتجوزوا كانوا خدوا ايه...انا قاعده في بيت أبويا معززة مكرمة ,ايه اللي يخليني أروح أتبهدل مع حد ماعرفوش..أنا ما بافكرش في الجواز دلوقتي لما أبني مستقبلي ..و الجملة المستهلكة في كل الأفلام العربية .."لما أحقق ذاتي ""...مش عارفه ايه ذاتها دي و تحققها ازاي يعني يمكن فيه بنات كتير ليهم طموح في دراستهم و في شغلهم ..لكن أتحدي ان أي واحدة فيهم مايكونش طموحها الأول انها تبقى زوجة ..على الأقل لأن دي الطريقة الوحيده اللي تخليها تبقى أم نتفق بقه على أسس تانية مهمة ....عدد البنات في مصر أكبر من عدد الرجاله دي نقطة أساسية مش عايزة أي حد يناقشني فيها ..و سيبوكوا بقه من إحصائيات الحكومة اللي بتقولك عدد الإتنين زي بعض ..لأن دي إحصائيات عاملة بالظبط زي درجات الحرارة اللي بيعلنوها في النشرة ..يعني الناس بتحلف بالطلاق ان الحرارة أكيد فوق ال 45 ..و هما لا يمكن يزودوها عن 38..أنا ليا واحد صاحب بابا قاللي ممنوع يذيعوا ان الحرارة فوق ال42 عشان السياحة ماتنضربش و السياح مايهربوش موضوع نسبة الإناث للذكور برده فيها لعب بالطريقة دي..ليه بقه النسبة أكبر؟ أقولكم موضوع الستات اللي بيقعدوا يخلفوا عشان يجيبوا الولد..يعني فيه عائلات كتيرة تلاقيها كده..4 بنات وولد..5بنات وولد..6 بنات وولد ..و هكذا...و تفضل الست تخلف تخلف عشان البأف جوزها يجيله الواد..يجيبوا يعمل بيه ايه؟ ماتعرفش ..و بيجي في الآخر خايب و نايب و يقعدوا يدلعوا فيه لما يطلع فسدان و يضيعهلم اللي وراهم و اللي قدامهم و اللي جنبهم كمان... ما علينا ده موضوع تاني..بس أي حد بيدرس أو درس في أي كلية في جامعات مصر هيلاحظ ان عدد البنات في أي كلية أكبر من عدد الولاد ..في كليتي مثلا كانوا تلتين العدد بنات و التلت ولاد ..يعني الضعف نقطة تانية ..الرجالة بقوا حاسين بنفسهم و بيتكبروا على خلق الله من البنات ( يقعدلهم في عينهم و عافيتهم يا رب ) و تلقي الراجل قاعد هو و أمه يتشرطوا ...لازم تبقى بيضا و شعرها بني و عينيها عسلي و شبه نيللي كريم ..الله يخرب بيوتكم طب بص لنفسك يا خويا في المرايه الأول ..طب بلاش بيقولوا الراجل مايعيبوش الا جيبه ..طب شبرقنا كده و ادخل في ايدك ان شالله علبة ملبس ..ألا لأ البعيد هو و امه يروحوا يشوفوا العروسة الغلبانه اللي أهلها صارفين عليها الشئ الفلاني و مكلفين قعدة التعارف دي شئ و شويات ..رايحين إيد ورا و إيد قدام ..و البت مافيهاش أي عيب و يقولولكم ..[COLOR="Red"]لأ أصلها مش شبه نيللي كريم قوي [/COLOR]..دي قالبه شوية على نجلاء فتحي و انا مابحبش النوع ده ..تقولش حسين فهمي رايح يتقدم للبت لأ و الأفراح ..نككككتة..زمان كنتوا تشوفوا في الأفلام العربي أي بنت تدخل فرح و هي لابسه شيك كده شوية ..يتلموا عليها الشبان و يبقوا عايزين ياكلوها .. و ما تخرجش م الفرح إلا بعريس..دلوقتي نفس التجمعات بس بالعكس ...تلاقي كل أم قاعده هي و بناتها مراقبين الشباب و ياويله اللي يعدي جنبهم...طارق ..إزيك يا ولد ..مش تيجي تسلم على بنات خالتك شوف بقوا حلوين إزاي؟...أنا مش طارق يا طنط و أنا متهيألي كده حضرتك مش خالتي ...صحيح؟ معلش يا حبيبي العتب ع النظر طب ما تعرفنا على نفسك كده ..يمكن ربنا يحبك و يبقالك نصيب معانا طبعا الواد يا إما بيطلع يجري ..يا إما حد من صحابه بياخد باله من الكمين اللي وقع فيه ويجي ينقذه على أساس في حد عايزة و كده طبعا ده غير اللف اللي بيقعدوا البنات يلفوه حوالين العروسة عشان يبقوا واضحين لكل اللي في القاعة من كل الجهات ..و لما بيقف اللف تلاقيهم يزقوا في بعض أو يعملوا انهم بيعدلوا للعروسة فستانها أو طرحتها عشان يطلعوا في الفيديو..و يحاولوا يطلعوا في أكبر عدد ممكن من الصور ..يمكن يعجبوا حد و يتكل على الله و ينتشلهم من عالم الآنسات الكلام ده كله على فكرة مش المفروض تضحكوا عليه..و الله البنات دول غلابة ..زمان ما كانش مطلوب من أي بنت غير انها تحترم نفسها و تقعد في بيت أبوها و تستنا العدل اللي بيكون في الغالب من إختيار أهلها دلوقتي الكورة بقت في ملعب البنات ..يعني لازم تخرج و تشتغل و تروح أفراح و تزور أصحابها لأن مسؤلية إحضار عريس بقت ملقاه على عاتقها بالكامل ..أنا أعرف حالات كتيرة أهل البنات بيتخانقوا معاهم خناقات لرب السما عشان يخرجوا و يشتغلوا يا إما عمرهم ما هيتجوزوا .. و من الجهة التانية المجتمع في حالات كتير و خصوصا خارج القاهرة و الأسكندرية مابيرحمش أي بنت تخرج مع راجل عشان تتعرف عليه و يمكن يبقى فيه نصيب ..ده غير ان الراجل نفسه في الغالب ما بيرضاش بيها و يقولك عايز واحدة خام لا خرجت و لا اتكلمت مع حد غيري طب بالله عليكم البنات يعملوا ايه...ده غير العداد اللي بيعد من أول ماتتخرج من الجامعه ...يعني البنت تعتبر بدأت تعنس من أول ما يعدي عليها سنتين أو تلاتة متخرجه و لسه ماتخطبتش أنا شخصيا بدأت أحس اني هاعنس من أول ما كملت 23 سنة..طب نعمل ايه بصراحة المجتمع المنيل اللي احنا عايشين فيه و اللي بيقيم البنت بجوازتها واللي تتجوز بسرعة تبقة شاطرة واللي تتأخر يبقى فيها عيب ..و ع الجهة التانية الراجل من حقه ينقي و يتشرط و يبقى مقطع السمكة و ديلها و يتقال عليه مفتح و مدقدق..و يبقى معدي الأربعين و من حقه يتجوز في أي وقت ان شالله واحده عندها 18 سنة المجتمع ده ظااالم و مفتري ..و البنات غلابه و الضغط عليهم بيزيد كل يوم والناس بتحاكمهم على حاجه مالهمش يد فيها خليكوا معايا بقه ..من المرة الجايه كل حلقة هاحكيلكم على بلوة م البلاوي اللي اتقدمولي ..عشان تعرفوا احنا بنستحمل أد إيه سلام |
اقتباس:
اكيد كله دلوقتى قاعد يقول البت النصابه :p .........والله مانصابه ولا حاجه ........استنو عليا بس انا فى الموضوع ده هتكون الحلقات يا شباب بتاعتنا....... يعنى انا اخدت المدونه باب عشان افتح معاكو حوار يعنى والله انا فكرت كتير قبل محط ع العام بس ده مناسب جدااااااااااا لان الموضوع هيكون حوار واحنا اللى هنتكلم ونعلق من خلال الحلقات اللى ممكن اى موقف فيها يحصلنا.........او لحد قريب مننا وانا ليا حوارات كتير اووووووى فى الموضوع ده .......... مش حصلتلى انا اوعى حد يفهمنى صح;) لقرايبى وهكون صريحه معاكو اتمنى منكو كده اكيد ;) وهبقى انزلكو اماكن وجوده بالمحافظات ومن اى مكتبه وكده وهنزل حلقات من يوتيوب .......هظبطكو يعنى مش اى كلام :Dوبالنسبه لنقله فوالله كنت هحطه فى ركن الرداله اصلهم هياخدو تريقه ع ودنه :p وبعدين قلت البنت المسلمه وبعدين قلت احطه فى الركن الرياضى:p بهزر طبعا انا مش اووى كده فخلوه ع العام عشان النقاش ...........واللى مش هيتناقش هيشوف العين الحمرا :p :p اقتباس:
اقتباس:
بس قلت احنا هنا مع بعض حتى لو حلقه حطتها مش ليها لو حبيت اكتب ولا بتاع هقول رايي هنا وانتو كمان الموضوع ده مش بتاااااااااااااااااااااااااااعى ده بتاعكو وعاوزه اشوف فى احلى شغل والصراحه .... غاده عبدالعال كانت فى ندوه قريب فى المنصوره فى books and beans كنت هموووت واروح بس الله يجازيه بتاع الفيزيا مواعيده مضيعانى :( اقتباس:
اقتباس:
مش احلى منك يا جوليت وانا كنت عامله حسابى ع ان فى كتير قروه وهيكون الكلام مكرر .........عشان كده معتمدتش ع انه هيكون مجرد كلام ده نقاش ومعتقدش هيكون موجود ع البلوج :p |
شوفتى ياختى ادينى هتخطب قريب ياختى
بس مش بودى والله ياحببتى ان لسه 18 سنه واهلى محسسنى انى عنست اصلا مش فاهمه المجتمع ده فى حاجه غلط دماغه تقريبا رايحه شمال لا وايه وتلاقى البنت اتقدملها كتير تروح والدتها ربنا يطول فى عمرها تعد تقولها افضلى ارفضى كده لحد ماتفضلى منوره البيت ويقولوا من كتر اللى اتقدمولها عنست هههههههههه بذمتكوا ده كلام هو الولد ليه حق انه يتشرط والبنت لاء طب ليه الولد لما يكون لافف ومقطع السمكه وديلها وبالشوك كمان يبقى ناصح وحلو ولما البنت تعد على النت ويبقى ليها زمايل فى الجامعه وتبقى عايزه تشتغل وتعمل وتسوى تبقى متحررة واهلها معرفوش يربوها .....؟؟ اشمعنا يعنى ليه بيفرقوا بين الشباب والبنات............؟؟ ده والله اللى بيحصل ده حراااااااااام بجد البنات طلع عنها مابقيتش عارفه تعمل ايه؟؟؟ |
اقتباس:
والله مهعمل حاجه تانى بس الساعه كانت سبعه هقلك ازاى مش هصحيكى اكيد لتقومى تضربينى عرفاكى شرانيه اقتباس:
اقتباس:
اه منا ناويه احط اللينك بتاع الحلقه هنا وكمان حلقتها مع منى الشاذلى -مش كان اسمها كده بردو :D - عاوزه اعمل موضوع كامل متكامل عن العنوسه ......... ومش عاوزه حد يفهمنى ان جايه ادور ع عريس:p لا طبعا دول واقفين توابير توابير وانا رديت ع موضوع النقل فوق يا باشا ;) اقتباس:
اقتباس:
اقتباس:
اقتباس:
اقتباس:
اقتباس:
اقتباس:
[SIZE="4"]بس اكيد هيعجبكو :p ويبقى حد يقول كلمه [/SIZE] اقتباس:
اقتباس:
والله انا اول مجيت مالدرس النور كان قاطع .......... اول مجه فتحت قلت اشوف ايه ردود الافعال لقيت النت قااااااااااااااااااطع -الله يجازى اللى كان السبب- ادغديت ونمت وقلت اما اقوم احطه بس يلا انتى سبقتى;) وبالنسبه للزمالكويه ...............ميقدروووش :) اه هم هيموتو وعاوزه اقول حاجه عن المقدمه هى ممكن متكنش بحلاوه اللى جاى بس استحملونا بقى احنا لسه فى الاول يا شباب[/CENTER] |
اقتباس:
اه انا معاكى ان السن الصغير فى الخطوبه هيكون صعب هههههههههههههههههه 18 سنه ومعنسه ازاى يعنى ده فى 35 ولا يعرفو سيره الجواز انتى هتقوليلى ده مش شمال بس ده مش متركب اصلا ;) هههههههههههههه ارفضى ارفضى ده فى بيوت الب والام عاوزين يرموها من الشباك وهتلاقلا فعلا ان انا هنا ههتم اووىبمعايير العريس ومعايير العروسه بس اصبرو لما اشوف الناس ايه رايها ؟؟;) والله فعلا حاجه عجيبه تلاقى الواد عاوز البت البيضه ولا ام شعر اصفر والبت اول ميجيلها الاخ تتدلق وده تقريبا موضوع الحلقه الجايه :D والله انتى بجد جامده بتيجى ع مناطق حلوه ........... هوده النقاش اللى كنت بقول عليه مش عارفه بس ده نظام مجتمع كامل بجد اه والله طلع عنا .........انا مردتش ارد كتير لان اسالتك هى محور الموضوع تقريبا^_^ ومستنيه راى الاعضاء |
موضوع جميل خالص يا قمرتيني وان شاء الله اتابع معاكم لو لم يشاء يببقي نصيبكم دمتم بكل الود |
اقتباس:
وانا عارفه انك هتابعى باذن الله ........ ومستنيينك ;) |
موضوع جميل
بس للاسف مكملتهوش طويب بكره حاجلا و اكمله اوعى تمشى بس موضوع عسوللللللللل |
ربنا يخليكى يا ايه ...بس الصراحه هو ممل اوى فى اوله احلى حاجه لما يروحو يتقدمولها ...وبكره كمليه وشكرا لمرورك
|
اقتباس:
كنت عايز اقول حاجة فى الأخر كنت قرأت فى احد الجرايد انه سنة 2025 ان شاء الله هتصبح عوانس الوطن العربى 25 % من السيدات طبعا ده لو حصل كده تبقى كارثه بس برضه نقول دى توقعات والله أعلى وأعلم وكنت عايز اقول حاجة تانية فى بنات بقى لما تروح فرح ولا حاجة تفضل بقى تقولك مش عارف مين اتقدملى وكلام فاضى كده ونص اللى بيقولوا كده محدش عبرهم ولا حاجة بس هما بيقولوا كده علشان عايزين عرسان والمفروض اصلا البنت لو اتقدم ليها عريس متقعدش ترغى وتكلم كتير ياجماعة لا هى بتسمع الشارع كله ويسلام على مامتها بقى والعريس فى الأخر يطفش هقولكم على سر خلاص بقى مبقاش سر انا اختى داخلة تانية كليه اتقدم ليها حوالى 7 او 9 الحمدلله بس احنا فى البت مش بنقول حاجة وسايبن الموضوع ده لظروفة وتقريبا محدش يعرف حاجة بس ياجماعة هو الموضوع محتاج تفكير ورزانة وهدوء وصبر وضرورى اقوى الصبر واهم حاجة دارى على شمعتك تنور وربنا يرزقكم كلكم بإبن الحلال ياااااااااااارب بس متنسوش تعزمونا على الفرح شكرا جزيلاااااااااااا |
اقتباس:
انا اللى اشكرك يا احمد ع صراحتك والله منور الموضوع بجد وانا هنزل ان شاء الله اول الحلقات ..ع الساعه 7 ولا 8 حسب الاخ بتاع الوصله يارب ميقطعها بقى :( |
بجد الحلقه دى دمها خفيف جداا ..ويارب تعجبكو بصوا بأه ..أولا الحكاية دي برضه من فصيلة هم يبكي و هم يضحك ..بس الصراحه يعني الصراحه ..انتوا هتضحكوا عليا أنا..هتشوفوا ..بس بقولكوا ايه بما اني فتاه ركيكة ..قصدي رقيقة..و مهيضة الجناح..ههه حلوة مهيضه دي..فبليز بليز ..بلاش تريقة الحكاية دي مايعرفهاش أي حد غير انا و ماما ..ماحكيتهاش لأي حد من أصحابي ..يعني ابقوا اتفشخروا قدام كل أصحابكم بالأمتياز ده ....حكاية العريس التاني لقصة عايزة أتجوز ..إقرا الحادثة ..اقرا الحادثة احمم..مقدمة... عارفين ايه احساس واحده و هي ماشية في الشارع و تحس ان حد معجب بيها..مش معاكسه يعني و كده ..لأ بيبقى فيه كده كيميا زي مابيقولوا الأجانب .. و على فكرة فيه جوازات كتير بتبدأ كده ...واحد يشوف واحده في الشارع..يمشي وراها ..يعرف ساكنة فين و يسأل عليها و يخطبها ..ابن عمي عمل كده و البت لسعته حتت قلم على وشة ..علم على وشه 3 أيام ..قام هو اتكيف قوي و قال البت دي واضح انها مؤدبة و متربية وراح خطبها ..آه والله ..هي صحيح بعد كده اتضح ان ايديها بتطول عليه في كل المواقف مش في الموقف ده بس ..بس و الله الراجل مبسوط و بيحلف باليوم اللي شافها فيه..و بيلعن أبو ... والا بلاش دي في مقام عمتي برضه [COLOR="DarkRed"]المهم أنا يوم نازله من البيت رايحه الشغل..حسيت بكيميا م اللي كنت بقولكم عليها دي ..حسيت ان فيه عين هتخرم قفايا ..اتديرت بسرعه كده في الخباثة لقيتلكم راجل انما ايه ..طول بعرض بارتفاع.ماسك فى ايده شنطة سودا و لابس بدله و كرافته و نضارة شمس....عامل كده زي العيال اللي كانوا بيطلعوا في إعلانات جمعية شباب المستقبل بتاع جمال مبارك "شباب الجيل ..قوام جينا ..هو ..هو" فاكرينهم ؟.. المهم الواد كان حليوة و انا قلبي هفهفله أول مالمحته ..استنيت شوية ع المحطه و بعدين جه الميكروباص..ركبت راح راكب ورايا..قلت الشياكه دي كلها هتركب مكروباص ليه يعني..أكيد في الأمر إن ..و جه كمان قعد جنبي ....يا حلولي يا حلولي..بس كنت خايفه ليعاكس و ساعتها أنا ماعرفش أبويا ..باللي ف رجلي و لايهمني لا شباب المستقبل و لا جمال مبارك ولا حاجه أبدا..بس لاقيته في نص المسافه كده ..بيميل عليا و بيقول باسلوب رزين كده ..لو سمحتي ممكن أسأل حضرتك على حاجه ..وانتوا ماتعرفونيش... باتسطل لما حد يقولي حضرتك ..بس برضه مش سهله يعني..صدرت الوش الخشب و قلتله ..خير بمناسبة ايه ؟... يعني كنت عايز أسأل بس ..هو حضرتك مرتبطه ..واضح انك مش مخطوبة ولا متجوزة مافيش دبل في ايديكي ..بس الإرتباط بأه لازم أتأكد منه من حضرتك ..(حضرتك تاني يا حلولي)..والله الكلام ده مايتقالش في مواصلات و بعدين انا ماعرفكش و مش متعوده أكلم حد ماعرفوش ..طب يعني أنا لو معجب بحضرتك و عندي نيه أتقدم رسمي ..أعمل ايه ..أصلي بصراحه متابعك من مده بس دي أول مرة أتشجع و أحاول أكلمك ..ياحلاوة ياحلاوة متابعني من زمان ..ده واقع بأه..بس برضه على مين ..لازم أثبت ..والله لو حضرتك متابعني زي مابتقول تبقى عارف بيتي و عارف بابايا ..هو الوحيد اللي ينفع يتكلم في المواضيع دي ..لو سمحت ماتحرجنيش اكتر من كده ..جامده جامده يعني ...الحقيقة انت كده أثبتيلي اني أحسنت الإختيار.[/COLOR]...ياسلام ياسلام..الله الله ..هو ده الكلام ..لحد كده الأمور كلها صح و مية مية ..صديته آه بس كمان قلتله كلم بابا..سيبتله سكه مفتوحه يعني . الواد بأه التباع راح شاخط فيا في اللحظه دي ..الأجرة يا أبله والا هتركبوا ببلاش...يابن اللذينا ..دانا عماله أترسم من ساعتها تبعتر كرامتي كده ؟...جيت أمد ايدي جوه الشنطه لقيتلكوا الأخ بأه راح بسرعه مطلع فلوس و محاسبلي ..لأ مايصحش ..لأ بأه اسمحيلي ..أنا لا يمكن أقبل واحده هاتقدملها تدفع و انا موجود ...وجون وجون وجون ..هيتقدملي خلاص أيوة كده هو انا صحيح ماعرفش هو بيشتغل ايه و الا عايش فين والا بيقلد فنانين والا ايه نظامه بس الجواب بيبان من عنوانه. أول ما المكروباص وقف لقيته نزل معايا في نفس المحطه و بصلي و قاللي ..أنا حبيت أنقذك يعني في المكروباص ..واضح قوي انك ماعاكيش فلوس...الدم ضرب في نافوخي..وله انت هتتمنظر عليا والا ايه ؟..واضح ان شنطتك فاضية آخر الشهر بأه يالا وفرتلك أجرة المكروباص تنفعك ..بصتله بذهول كده و قلت له ..مين اللي قالك الكلام الفارغ ده ..انا عمري مامشي بشنطتي فيها أقل من 300 جنيه..قالي باستهزاء كده ..لاااااماصدقش..الدم كان خلاص قرب يطلع من نافوخي زي النافورة..رحت مطلعه كل اللي في المحفظه مورياهولي ..أهه حتى شوف 50-100-200-220 لقيته مد ايده اخد الفلوس..و بصلها كده و عدها و قاللي آه صحيح انتي معاكي فلوس أهه و في لحظه راح مطبقهم و حاطتهم في جيبه ..و قاللي انا هاخليهم معايا بأه سوفينير لحد لما آجيلكم البيت ..ماستوعبتش و قبل ما آخد فرصة أقول كلمه واحده كان راكب ورا واحد على موتوسيكل شكله كده كان ماشي ورا المكروباص و هوا ..فص ملح و داب أختكوا بأه واقفه في وسط الشارع هابلااااااااااه ..زي اللي اتدلق عليه جردل ميه مش نضيفة..مش عارفه أصوت والا أطلع أجري وراه والا ألطم على وشي ...فضلت واقفه يجي خمس دقايق في الشارع مش عارفه اروح فين والعربيات تقعد تزمرلي و لما تلاقيني مسهمة تقريبا اللي سايقين يقولوا في نفسهم دي يا اما طارشه يا اما مجنونة يا اما م اللي بيبيعوا مناديل ..و الناس تعدي تبصلي... و العيال الصغيرة يشدوا في هدوم أهاليهم ..بابا بابا هي الست دي عامله كده ليه؟ بعد شوية كده لفيت و دخلت المستشفى اللي باشتغل فيها ..و على وشي تعبير كده زي تعبير العمده الآلي بتاع زمان ..دخلت الصيدلية..قعدت ع المكتب ..و فجأه .....انفجرت في العياط ..و العيال زمايلي اتلموا حواليا..مالك ..فيه ايه؟...حد زعلك ..حد كلمك؟ من بين العياط و الشحتفه ما اقدرتش أقولهم غير كلمه واحده ................................................. .................................. .................. اتسرقت عااااااااااااااا |
اقتباس:
|
الحمد لله انه دفعلك اجرة الميكروباس لاحسن دي كانت تبقى حوسة ممكن السواق يشغلك تباعة دورين تلاتة بالأجرة يلا معلش تعيشي وتاخدي غيرها ... الحمد لله جت على أد كده (حضرتك) متنسيش تقولي في سرك يا (حلولي) عشان حضرتك بتحبي كلمة حضرتك عاملة زيي اللي يقولي يا باشا اديله عنيا .....ههههههههههههه
|
هاهاهاهاها
عرسان اخر زمن |
ههههههههههههه
جميلة جدااااااااااااااااااا تسلم ايديكى |
تماااااااااااااااااااااام
|
اقتباس:
بس الكلام ده مش حصلى انا :D ده لو حصلى كنت ولعت فى نفسي اقتباس:
ايه الضحكه العجيبه دى عامه ده مش عريس ده نصاااب جداا والبنت الغلبانه صدقتو اقتباس:
اقتباس:
عامه ربنا يسهل وانزل بكره الحلقه التانيه فى حاله انى مكنش اتوقفت ;) |
بجد الحلقة جامدة موووووووووووووووت
بس المشلكة انى مش فاهم حاجة يعنى فين كلامك وفين كلام الكاتبة ويعنى اية مدونة والكلام دة كلة باين الواحد بعد امتحان الفيزياء مبقاش يفهم اى حاجة |
بصراحة مش عارف انا جيت هنا ازى
الموضوع خطير جداً لكن الجميل هو فتح الموضوع للمناقشة البنائة لو سمحتم بعد أذنكم يعنى وبدون زعل منى ولا مشاكل ولا حد يدعى على أقول رآى أقول وبالله التوفيق الى كل بناتنا انتم زهرة عمرنا انتم أملنا فى الحياة نشعر بالسعاد لبتسامتكم نشعر بالحزن اذا غابة السعادة عنكم اما موضوع زواج البنات فلى فية رأى 1- هناك هلع من الأسر غير الواعية والتى لاتعرف ما قيمت البنت التى أحسن تربيتها وأعدادها لقيادة وأكرر لقيادة بيت الزوجية هذة الأسرة تشعر وكأن لديها كابوس يجب ان تتخلص منه بالزواج وأقول بكل صراحة ما رخص هذة البنت وما أصعب حياتها عند والدها او فى بيت زوجها لانها دائما تشعر وكأنها عالة على الرجل سواء كان الأب او الزوج فما أصعب حياتها 2- الأسر الواعية المنتبة المقدرة لما ربت وعلمت ودربت وأعدت بنتها لدور القيادة لاتشعر ابدا ان لديها كابوس يجب ان تتخلص منة بل على العكس تشعر ان لديها الكنز الذى يطمع فية الكثيرون وان على الأسرة ان تحسن أختيار من يستحق هذا الكنز 3- الفارق بين الأسرتين كبير الأولى لم تعد ولم تدرب أبنتها على الحياة الجادة لذا عليها تسويق سلعتها معتمدة على جمال السلعة وشكلها ورونقها وهى تصارع الزمن خوفا من ان تفقد السلعة هذة المميزات بمرور الوقت اقصد كبر السن لذلك يطلبون من البنت تسويق نفسها بنفس الطرق التى ذكرتيها ( تخرج مع الشباب تحاول الظهور فى الأفراح ................الخ ) فما أتعسها أسرة وما أتعسها فتاة الأسرة الثانية أعدت وربت ودربت بنتها على قيادة سفينة الحياة الزوجية فهى تشعر ان لديها الكنز الذى يبحث عنة الكثيرون فتتريث فى ألأ ختيار لبناتها ولا تشعر ان مرور الزمن عقبة لأن الجواهر لاتفقد قيمتها بمرور الزمن بل تزيد قيمتها والجواهر يسعى الناس الى امتلاكها ولا تسعى هى الى الناس ( هذة تجربتى الشخصية مع أخوتى البنات وهن 6 بنات توفى والدى وتركهم أمانة أحسنا فيهم التربية والتدريب على مصاعب الحياة كلهن بفضل الله تزوجن وسنهم ما بين (19- 23) سنة وأزواجهم بفضل الله تم أختيارهم بعناية فائقة رسالتى لكل أسرة من رزقه الله بالبنات فقد رزق من الخير الكثير أحسنوا تربية بناتكم على القيم والمبادئ الصحيحة ولا تخشوا بعد ذلك شئ رسالتى الى كل فتاة أستعصمى بالله وبدينك وقيم مجتمعك وأ متلكى من أسباب العلم والدنيا ما يجعلك مثقفة واعية قائدة لأسرتك مربية للعلماء هذة صفات البنت (الجوهرة ) التى يبحث عنها الشباب ليزنوها بالدهب هدى الله الجميع ووفقكم الى مافية الخير والرشاد |
اقتباس:
كله كلام غاده عبد العال بس اكيد احنا حنضيف حاجات عليه بس لسه مش اضفنا و المدونه بقى دى قصه كبيره تانيه ملناش دعوه بيها قوى اما عن اثار امتحان الفيزيا فدى على الكل انت مش شايف الناس بقى الزهيمر فيها ازاى يلا فى رعايه الله |
اقتباس:
اللى فعلا اضافت للموضوع او هي بمعنى اصح جوهر الموضوع نفسه ياريت حضرتك تتابع معانا و تشاركنا بارائك على طول فى رعايه الله |
موضوع جميل
|
يلا على بركة الله |
اقتباس:
انتي اللي غلطانه يعني هو في شاب مصري بالشياكه دي في الزمن ده هما الحراميه اللي معاهم فلوس هما اللي بالوجاهه والشياكه دي كان لازم تعرفي انه حرامي:D:D:D:D |
موضوووووووووووووووووووووووووووع جميل مشكورة عليه بجد !
|
[CENTER]
بسم الله الرحمن الرحيم تقريبا دى الحلقه التانيه ولا التالته مش فارقه كتير :p طالما انتو معايا بس بجد جامده جدااااااااااا اولا احب اشكر كل اللى شاركو فى الموضوع واتمنى ان حلقه المره دى تعجبكو ;) بس رجاء صغنون متزهقوش من الكتابه الكتير :d هسيب لغاده الكلام ;): عنوان الموضوع : (((((((((((((كلنا ليلي ......أنا مش صفر ع الشمال))))))))))))))) مجتمعنا الحلو العسل ده بوشين ....قديمه يعني مش جديده..شفتوا أي تجمع عائلي موجود فيه ولد و بنت صغيرين؟؟ اول حاجه بيقولوها للولد ايه ..عايز تطلع ايه يا حبيبي لما تكبر..نص العيال المفترية بتقول ظابط و اللي عنده وعي شوية يمكن يقولك رئيس جمهورية:d ..جيل المستقبل بأه يا سيدي عنعمل ايه؟... طب والبنوته الصغيره بيقولولها ايه؟؟؟...نجوزك حماده يا سوسو لما تكبري ..والا تتجوزي ابيه خالد؟؟...تبص البت بغباء كده و تقولهم ..أنا هاتجوز بابا ..و الكل يتفتح في الضحك و يخلص الموضوع على كده و تطلع البت من صغرها يجيبولها عروسة ..تسرحها و تلبسها الفرحه و تزفها .:d..و اي بنت في اي مجتمع تلاقي اول لعبه نفسها تلعبها ...عروسة و عريس !!! بالمعنى الطفولي مش بتاع الجامعات الخاصة و الورق العرفي;) و تمشي البنت في سلك التعليم و كل اما تنجح في مرحلة ما يقولولها ..مبروك عقبال مانشرب شرباتك.:lol:..وعقبال عدلك يا حبيبتي ..و لما تيجي تستشير حد في الكليه اللي هتدخلها بيبقى الرد الموحد ...يا ستي ماتشغليش بالك ..هي البنت آخرتها ايه غير بيت جوزها و تفضل البنت تتشحن تتشحن طول حياتها على ان الشئ الوحيد المتوقع منها في الحياة انها تتجوز و تجيب عيال.....طب و لو ماحصلش شوفوا معايا التلت حوارات دي م1:هو انت معاكي ايه دلوقت؟؟ م2: معايا جوزين غوايش و ماشاءالله م1:لأ يعني معاكي عيال ايه م2: لا انا لسه ماتجوزتش م1: يا عييييييني --------------- بيئة تانية و مستوى تاني م1: وانت معاكي ايه دلوقتي م2:معايا ماجستير و باحضر في الدكتوراه م1:لأ قصدي معاكي عيال ايه؟ م2: لأ انا لسه ماتجوزتش م1: يا عيييييييني--------------- بيئة تالته و مستوى تالت م1: وانت معاكي ايه دلوقت م2: انا معايا شيروكي 4*4 م1: لأ قصدي معاكي تشيلدرين ايه؟ م2:نو ..أنا لسه ماتجوزتش م3:أوه ماي جود ..هاااانييييي هو هو الحوار في كل المستويات ..ولا يوجد اي نجاح في اي مجال يقدر يحل محل الزواج بالنسبة للبنت الشرقية...طب و اللي مش لاقيه و اللي فاتها القطر و اللي بارت على رأي الناس مابتقول ...يبقى مالهاش لازمة ..تروح تولع في نفسها يعني؟؟ هي غالبا ما بتبقاش مستعده لا نفسيا و لا علميا و لا اقتصاديا لللحظه دي ..كل الناس بيقولولها هتتجوزي يعني هتتجوزي ..و ساعة لما مايحصلش .مابتلاقيش حواليها غير نفسها و بس بعد مالنسبة زادت و بقى عدد اللي لسه قاعدين بالملايين..لازم كل البنات يحبوا نفسهم و يدوروا ع النجاح في كل الأماكن و يعيشوا حياتهم على انها حياتهم مش على أساس انها تتر لمسلسل لسه مابتداش ولازم المجتمع يبطل يحصر البنت في دور العروسة و بس ..لأنه وقت الجد مش هيقدر يعلها حاجه و هيبقى هو اللي جنا عليها لأنه فهمها ان ده الطريق الوحيد و مافيش غيره..و هتحس ساعتها ان مالهاش لازمه و انها صفر ع الشمال و هتيجي تعمل بلوج زيي كده و تقعد تشتكيلكم وانا من هنا بقولها ..لو ماحصلش ..لو ماتجوزتش وما جبتش عيال و ماقدرتش اتبع خطة المجتمع ...أنا برضه ليه شخصيتي و حياتي و مش هابقى أبدا ......صفر ع الشمال كده غاده خلصت دورهاا وييجى دورى انا ....انا عاوزه اعرف امتى هتنتهى مصطلحات عانس وبارت واللبخ ده ؟؟؟؟؟؟؟؟؟ الناس بتطور واحنا بنرجع لورا يا جماعه ..ايه نظرتكو للبنت اللى مش اتجوزت هل انتو بتفكرو كده بنفس السلبيه ولااااااااا؟؟؟؟؟؟؟؟؟؟؟؟؟؟؟؟؟؟؟؟؟؟؟!!!!!!!!!!!!! اقولكو سلام دلوقتى ;) واشوفكو الحلقه الجايه بالرغم انى عارفه ان مش هيكون فى اقبال :d بس انا عجبانى الحكايه دى ;)[/CENTER] |
موضوع جامد اووى
انا لسه شايفاه دلوقتى وعينى تعبت من كتر الكتابه:rolleyes: بس يلا كله يهون على الرغم من انى مش عارفه مين غاده عبد العال دى ومين المدونه بس ليا كلام كتير وعوده ان شاء الله بكره لانى هموم وانام;) واشكرك تانى ع الموضوع الرائع ده يا بنوته:d |
اقتباس:
ايه الانورا دى يا جميل والله انا شفت اسمك من هنا وقلت ادخل اشوف عامه انا هبقى انزل حلقه اوضح فيها معنى المدونه واعرفكو اكتر ع غاده عبد العال ومستنيه عودتك تانى يا جميل لا شكر ع واجب ;) |
والله موضوع جميل بجد
ومستنين الحلقات والتعليق في الاخر هههههههههه ع اساس اني مافيش تعليق دلوقت:dاو يمكن مش مركزه عشان اعلق بس اقدر اقولك البنت تقدر تثبت نفسها بنفسها مش لازم جواز كلام شعارات صح:p بس فعلا لو بنت من جواها عاوزه تثبت نفسها حتثبت رغم انوف الاخرين بس عشان ده بجد سنه الله ورسوله وحاجه لازم منها بس اقدر اقولك كل واحده ليها نصيبها والمجتمع باصص للبنت الي مش اتجوزت دي نظريه وحشه بجد مع انها ممكن تكون احلي من الي اتجوزت وتعرف تشيل مسئوليه جامده كمان حاسه اني بقول اي كلام في اي كلام:mad::mad::d:rolleyes: اعذريني باه عشان مش نمت من امبارح:confused: تقبلي مروري وليا مرور تاني هنا ان شاء الله:) |
اقتباس:
ان شاء الله النهارده بليل ابقى انزل حلقه تانيه ربنا يسهل وانتى كلامك مظبوط كل بنت تقدر تثبت نفسها ..........هو مش كلام شعارات بس كل واحده دايمه بدور ع عتريس :d العريس ....... فعلا الجواز قسمه ونصيب .......مش بيجى بخطط او ترتيب اه انا بحس كده وبالرغم انها ممكن تكون ناجحه فى حياتها العلميه والمهنيه بس نظرتهم ليها كانها مصابه بقصور فى حياتها لا بالعس كلامك منظقى وواقعى اووى .........ههههههههههه عذراكى بتحصل كتير وبحس انى بكتب كلام عجيب وانا مش نايمه كويس طبعا مرور من اجمل المرورات ...ومستنياكى ;) |
الى البنوتة الأهلوية
أولاً :- الف مبروك فوز الأهلى ثانياً :- لابد أن نتفق حول عدة أمور لفهم الموضوع واليوم نتكلم حول الأمر الأول هو أهمية الزواج او لماذ نتزوج ؟ هو سنة كونية فرضها الله سبحانة وتعالى على كل المخلوقات سواء كانت كائن حى او نبات او حتى جماد ولكن لماذ ؟ لأن الزواج من أيات الله الدالة على الوحدنية والتفرد........وهذا ما أعنلة الرسول الكريم فى حديثة الزواج من سنتى الى آخر الحديث .....ومن رغب عن سنتى فليس منى ولماذا أيضاً ؟ بالزواج يحفظ للكون الأستمرار وللنفس البشرية السكن والمودة والرحمة وكلها امور ضرورية ليتمكن الأنسان من القيام بما سيكلف بة من خالقة و هنا نجد الحلقة المفقودة وهى أجابة السؤال لماذا نتزوج ؟ وليس هناك أختلاف بين أجابة الذكر والأنثى هل للمتعة ؟ واجهه أجتماعية ؟ حاجة أقتصادية ؟ حفظ للنوع ؟ أستكمال لمتطابات الحياه ؟ كما يفعل الناس؟ تحقيقا لرغبة الأهل ؟ كل هذة الأجابات ليست الهدف الحقيقى للزواج وان أحتوى عليها ياسادة يأفاضل أن أهم تكاليف الأنسان من خالقة أمرين هامين ( عبادة الله و أعمار الكون ) مهما أختلفت العقيدة والأمرين لا يتمان ولا يمكن القيام بواجبهم دون زواج لأن من خلق و كلف أعلم بإحتياجات المكلف وهنا بيت القصيد ولله الأمر من قبل ومن بعد والى لقاء آخر مع دعواتى بإن يعد الله للأمة هداها ورشدها |
اقتباس:
والله بجد رد رائع وفتح باب مناقشه كبير انا ليا تعليق صغير لانى مش هكون اد حضرتك فى الرد هى المشكله فى الوقت الحالى ان فرص الزواج قلت جدااا ..والبنت اللى لسه متجوزتش بيتبصلها بنظره مش كويسه كانها عندها نقص الناس مش مستوعبه ان الشباب معدش عنده فرص حلوه عشان يروح يتقدم ضغوط الحياه كتير شبكه وشقه وفرح وعفش الاخ هيعمل ايه ولا ايه بقت فى ضغوط كتير اووى فالناس ترحم البنت يعنى ميجوش يقولولها انتى بايره ولا معنسه ولا الكلام العجيب ده لانه بيجرح بجد وبيعمل فجوه بين البنت دى والمجتمع ....وبتحس انها مضطهده مش من المجتع بس لا ده من اهلها كمان بجد منور الموضوع يا استاذ عزت ومستنين ردودك ....وشكرا :d |
| جميع الأوقات بتوقيت GMT +2. الساعة الآن 10:36 PM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.