|
اشهر جمل بتتقال ف مصـــر
السلام عليكم ورحمة الله وبركاته كل يوم بابا وماما يقعدوا ينصحونا بس في حاجات اتعودنا عليها خلاص منها الاتي أنت فاكرنا لاقيين الفلوس دى فى الشارع طلع ايدك من جيبك وانت بتكلمنى عيب لازم تحترم اللى أكبر منك والله ما أنت فالح 00 وأدى دقنى أهه سلم على عمك كويس يا ولد يا ابنى كلم خالتك العيانة 00 إسأل عليها بلاش لعب فى الشارع اوعى تنام00غير لما تغسل سنانك ما تلزقش فى التليفزيون كده00نظرك هيضيع المسلسل مش هينفعك00قوم أطفى التليفزيون وقوم ذاكر 00أو ادخلى اوضتك ما فيش مذاكرة على المزيكا00او00 بتذاكر ازاى والبتاع ده شغال جنبك يا ابنى محدش هينفعك اوعى تكدب عليا كده تانى مرة ايه اللامبالاة والاستهتار اللى انت عايش فيهم دول قوم اقرأ لك كلمتين ينفعوك انت فاكرنا نايمين على ودنا يا ابنى أنت مسطول ولا ايه ما تعليش صوتك00 وكفاية رغى فى التليفون بلاش أكل بره لازم تأكل السلطة كل على مهلك 00وامضغ كويس وما تكلش وانت واقف وكل من قدامك ما تحفش ما تطلعش على الملاية النظيفة ورجليك متوسخة كده ما تقعدش قدام المروحة وانت مستحمى نسيت تشرب00 نسيت تأكل00 نسيت تأخد المصروف00 نسيت تعكنن علينا أنا و أمك ما تتأخرش بعد الكلية 00 وتقعد تصيع مع صحابك بص كويس وأنت بتعدى الشارع اللى بيشيل قربة مخرومة بتخر عليه وغيرها كتير طبعا بس يا ترى ايه اكتر جمله بتفرسك ؟؟؟؟ |
هههههههههه ايه الموضوع الجامد دا ..الصراحة كلهم بينرفزوني لان كلهم مش ليهم لزمة :d:d:d:d:d:d:d
بجد الف شكر على الموضوع الجامد ..... و ارجو تقبل مروري |
بصراحه كلهم
بس اكتر واحده اللى بيشيل قربه مخرومه بتخر على دماغه هى مش بتتقلى بنفس الصياغه بس فيما معناه |
اقتباس:
مشكور سمسم على مرورك |
اقتباس:
انا كمان كلهم بينرفزونى وفى غيرهم كتير كمان بس اكتر واحده دى قوم اقرأ لك كلمتين ينفعوك مش بحب حد يقولى ذاكرى بالطرقه المفرطه دى كل ما حد يشوف وشى يقولى ذاكرى :mad::mad: يلا بقى هنعمل ايه ؟ هنغيرهم؟ اكيد لاء :d:d وهيفضلوا يقولولنا كده مشكورة ياقمر على ردك الجميل ونورتى التوبيك :):) |
انا بقالي كتير مسمعتش كلام حلو و زي الزفت زي ده
|
طب ما لازم الجمل دى تتقال
ما هى كلها نصايح و خوف من الأم و الأب و طبعا لازم تتنفذ |
اقتباس:
مشكورين على الرد واكيد طبعا الحاجات دى كلها نصايح وعلشان مصلحتنا مش قلنا حاجه لكن فى حاجات بتبقى زياده عن الحد شويه والشئ اللى بيزيد عن حده بينقلب ضده واكيد فى حاجات كتير غير دى كتر التنبيه ليها بسبب اضرار يعنى لو اب مثلا علطول يحذر ابنه من السجاير واوعى تشرب سجاير ولو شربتها هيحصل كذا وكذا ممكن يكون الابن عنده حب استطلاع مثلا بيقول بابا بيحذرنى منها طيب مانا اجربها واشوف لو زى مابيقول مش هشرب ولو عجبته هيشربها وفى الغالب بيكون الاب كمان بيشرب سجاير طيب منين بتحذر ابنك ومنين انت بتشربها؟ واكيد والدك انت كمان حذرك منها ومش سمعت كلامه هم بيفكروها دى حاجه عاديه لكن مش بياخدوا بالهم اذا كانت ممكن تضايق الابناء ولا لاء يارب تكونوا فهمتوا وجهة نظرى ولو اى حد عنده اى تعليق ياريت يقوله وشكرا على ردودكم الجميله :) |
أطفى التليفزيون وقوم ذاكر 00أو ادخلى اوضتك
الجمله دى بتعصبنى بس بدل التليفزيون الكمبيوتر وميرسى على الموضوع |
اقتباس:
شكرا على المرور الكريم وانا زيك على فكره برده :d:d |
اكتر كلمة بتتقالى منهم كلهم
*يا مجنونة* بقت عادى انى ابص يمين وشمال قبل ما اعدى الشارع والناس بتتفرج عليا مبقتش تفرق |
اقتباس:
مشكورة على مرورك ياجميل |
هههههههههههههه
كل ده بنسمعه في اليوم ميييت مرة بس والله نصايح حلوة , احنا اللى مش بقي عندنا خلق بس في حاجة بتفرسنى وهى كلمة أنت حرة . |
يا ابنى محدش هينفعك
|
بجد عندك حق فى كل جملة قولتيها
|
والله يا جماعة الموضوع دة احنا هنتريق يعنى ولا هنقول الى بيقولوا اهلينا نكت
انتم بتتكلموا على اساس انهم بيقولوا كلام تافة ونقعد نستهتر بية حرام والله وما ينفعش نعمل مواضيع زى دى ومحدش ونبى يقولى احنا بنهزر بلا لعب عيال |
بصراحه الموضوع ساقط مش موضوع هادف
يعني الاخت اللي عامله الموضوع عاملاه ليه عشان تتريق علي مين ازاي اصلا اي حد يفكر يعمل موضوع زي ده وانا اطالب بحذفه لانه في اساءه لاغلي الناس عند اي حد وبعدين الكلام ده نصائح من اب وام خايفين علي مصلحه اولادهم وبالنسبه للسجاير انتي قولتي هو بيكون بيشرب وبيقول لابنه اوعي تجربها ده شيء طبيعي جدا وعادي وده دليل علي حب الزياده لابنه لانه عاوزه يكون احسن منه في كل حاجه وعاوزه كمان يتمتع بصحه جيده الموضوع تافه وليس له اي قيمه اطالب الاداره بالحذف |
اقتباس:
اولا شكرا على ردك ثانيا انا لما كتبت الموضوع ده مكنتش داخله اهزر ولا اتريق على الاب والام لانى لا أجرؤ اصلا اعمل حاجه زى دى والكلام اللى بيقولوه ده مش كلام تافه بالعكس ده كلام مهم جدا واحنا نفسنا لو مش سمعناه هنحس بتغيير فظيع فى حياتنا اليوميه ويمكن مش هنقدر نعيش سعداء كمان لانهم بيحسسونا انهم بجد خايفين علينا ودى حاجه حقيقيه الموضوع ده انا كتبته علشان بس كل واحد يرد يقول بيسمع ايه وليه بتخنقه ومعنى كلمة بتخنقه دى مش من باب التريقه انما احنا كأبناء فمش دايما بنقدر معنى الجمل دى ولكن علشان نقدرها لازم نتمعن فيها وندقق اوى علشان نهدى ومش نتنرفز ولا نضايق من الجمل دى وشكرا ليك مرة تانيه وارجو ان حضرتك تكون فهمت قصدى |
اقتباس:
شكرا على ردك وتعليقك على الموضوع بس احب اقولك ان حضرتك زودتيها حبتين اعتقد لو المشرفين شايفين الموضوع ساقط زى ما حضرتك اكيد كانوا هيحذفوه وانا مكنتش هاعترض لو مقتنعه انه ساقط لكن بالعكس انا شايفه الموضوع مهم جدا لكن حضرتك انتى و الاستاذ مصطفى بصيتوا للموضوع من زاويه واحده وهى التريقه بالعكس الموضوع مش كده خالص وانا مش حطيته علشان اتريق وقلت قبل كده انى لا أجرؤ كل مافى الموضوع لما قلت كلمة الججمله اللى بتخنق مكنش قصدى منها تريقه لكن احنا كأبناء مش بنقدر نقدرها وعلشان نقدرها لازم كل واحد يفكر فيها بتمعن والناس اللى ضحكوا على الجمل دى انا متأكده ان مليون فى الميه الضحك ده مش سخريه ولا تريقه ولكن الضحك على الجمل نفسها ومتأكده كمان انهم على درايه كامله بان كل الجمل دى لمصلحتنا وفى حاجه حضرتك من حقك تطالبى بحذف الموضوع لو الناس شايفه ان فيه اساءة معاكى لكن للاسف حضرتك لوحدك اللى شايفه الاساءة دى لانك شفتى الموضوع من زاويه غلط تماما على فكره حضرتك مختلفه معايا فى كل حاجه مع انى قلت كل اللى قلتيه ده لكن حضرتك للاسف قريتى الحاجات اللى ممكن حضرتك تخليها مأخوذه عليا والدليل على كده موضوع السجاير المشاركه دى انا كتبت فيها نفس الكلام اللى قلتيه وقلت ان الحاجات دى مهمه جدا وحضرتك دلوقتى بتقولى نفس الكلام يعنى افتكر ان انا مش غلط فى النقطه دى وبالنسبه للسجاير طبعا شئ طبيعى لما الاب يحذر ابنه منها وده دليل على حبه الشديد بس كمان لازم يعرف ان ابنه ده بيحب يجرب كل حاجه بحكم سنه واكيد كتير بتحصل لحد ما الابن يبدأ يدخن وابوه مش يعرف عنه حاجه ولو ابوه عرف وواجهه هى كلمة واحده الابن هيقولها لما ابوه يقوله مين اللى علمك هيقوله انت واظن الكلمة دى كفايه اوى على الاب لما يلاقى ابنه اللى عايزه يبقى احسن منه بيقلده فى الصفه السيئه وده كان قصدى من موضوع السجاير علشان كده قلت منين بتحذر ابنك ومنين بتشربها؟ عالعموم انا بشكر حضرتك على احترامك ليا واحترامك للموضوع التافه بتاعى :( وشكرا على ردك استودعكم الله |
ياريت ياجماعه لوسمحتم انا عايزة رد على الموضوع ده من اى مشرف علشان يحدد اذا كان الموضوع ده تافه فعلا ويستاهل الهجوم ده والمطالبه بحذفه ولا لاء
ويحدد كمان كلامى صح ولا غلط ؟ ولكم منى جزيل الشكر والتقدير |
اقتباس:
شكرا على ردك الجميل وتأييدك للموضوع ودى فعلا نصايح حلوة ومهمه كمان ايوه الكلمة دى تنرفز فعلا :d:d |
اقتباس:
صعبه اوى برده :d:d مشكور على الرد الكريم |
اقتباس:
شكرا على مرورك الكريم والرد الاكرم وتقديرك وفهمك للموضوع |
ياريت ياجماعه لوسمحتم انا عايزة رد على الموضوع ده من اى مشرف علشان يحدد اذا كان الموضوع ده تافه فعلا ويستاهل الهجوم ده والمطالبه بحذفه ولا لاء
ويحدد كمان كلامى صح ولا غلط ؟ ولكم منى جزيل الشكر والتقدير |
اقتباس:
هي الحمد لله مش اتقالتلي من اهلي بس اتقالتلي من استاذ و فضضلت يومين تعبان جدا منها شكرا علي موضوعك |
اقتباس:
و دول بقى بيخلوا عفاريت الدنيا كلها تتنطط في وشي و ابقى عايزه اقوم اضرب اي حد من نرفزتي بس بمسك نفسي يعني اقتباس:
شكراً للموضوع |
:d:d:d:d
جامد اخر حاجه بجد ههههههه وبصراحه كلهم بيفرسونى بجد هههه لانهم فعلا ما ليهمش لازمه عمر ما كانت الطريقه دى هى الطريقه الكويسه للتعامل |
لما تقوالى قومى زكرى معناها شيفنى من نص ساعة كانت بذاكر
|
شكرا على الموضوع الجميل ده
|
| جميع الأوقات بتوقيت GMT +2. الساعة الآن 04:29 AM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.