بوابة الثانوية العامة المصرية - لازم تمـتحــن القـــدرات حتى لو مــش هتقدم !!! (اعرف السبب)

1- ((امتحان القدرات بيكون تقديــمه بــعـد امتـحــان الثانوية العامة))

لاحظ إني قولت تقديم وليس امتحان يعنى حضرتك بتحدد ميعاد امتحانك بنفسك,
والامتحان مش اجباري وبتختار براحتك أي امتحان منهم على حسب شعبتك والقسم اللى عايزه, بس هيفيدك جدا في حاجات كتير هنقولهالك دلوقتى هتخسر كتير لو ممتحنتش.

2- ((إمتحان القدرات شرط أساسي لدخول كليات فنون جميلة وفنون تطبيقية وتربية فنية وتربية نوعية))

يعنى لو ممتحنتش قبل النتيجة مينفعش تكتبها أصلا في التنسيق, ولا تقدم بعد ما مواعيد الامتحان تفوتك.
لو حضرتك قولت أنا هستنى المجموع أو التنسيق يبقي مش هينفع تقدملها أبدا بعد كدة, ولو حضرتك قولت أنا هستنى التحويل برضو مينفعش ومستحيل تكتبها في التنسيق أو التحويلات طالما ممتحنتش قبل كدة (لازم تكون مخلص 3 ثانوي وفي السنة بتاعتك).

3- ((إمتحان القدرات مش شرط تكون موهوب في الرسم !! ))

طبعا حضرتك هتقولى أنا هعمل ايه بامتحان القدرات وأنا مبعرفش ارسم !!
- هقول لحضرتك لا متقلقش الامتحان مش طالب موهبة, والرسم موهبة قابلة للتعلم ولو مش مقتنع بص كدة معايا ...
- الفرق بين الموهوب واللى اتعلم الرسم إن الموهوب ربنا خلقه معاه أسس ونسب وقواعد الرسم زى المحاور اللى بتظبط الرسمة, وزي قواعد التظليل وتحديد مصدر الضوء واختيار كادر.
وكل دة قابل للتعلم بدليل وجود اكتر من 20 مليون كتاب لتعليم الرسم وفي كليات كتير جدا فنية لتعليم الرسم وتطويره.
ومشكلة الموهوب إنه لو مطورش نفسه ومعرفش الأسس والنسب دي مستواه بيقل جدا ومش بيتطور, لكن أي بني آدم طبيعي له آيدين ممكن يتعلم جدا الرسم والنسب دى ويبقي أحسن من الموهوب.
الموضوع كدة زي سواقة العربيات وزي الكتابة والقراءة كلها قابلة للتعليم.
والرسم فيه غلطات بتخليها مش حلوة ولو إتعرفت بتخلي الرسمة كويسة عشان مفيش حاجة بتترسم كدة لوحدها من غير قواعد أو نسب (الموضوع مش من فراغ ومش صعب).

4- ((إمتحان القدرات هيفيدك جدا لو هتعمل تحويل من أي كلية لفنون جميلة أو لتطبيقية))

ودى ميزة بقي كويسة جدا ولو ممتحنتش في السنة بتاعتك مش بتدخل ولا ينفع تحول ولو جيت تحول مش هينفع.
يعني لو جالك كلية تجارة مثلا أو أداب وعايز تحول لفنون واكتشفت إن مجموعك جايبها تقدر تحول عادي طالما ناجح في القدرات وممتحنها غير كدة مستحييييل.

5- ((إمتحان القدرات هيفيدك أوي في خدمات تقليل الإغتراب))

يعني لو جالك مثلا في التنسيق (لاقدر الله) فنون جميلة الأقصر وإنت ساكن في القاهرة وفرق أكتر من 30 أو 40 درجة بينها وبين فنون جميلة حلوان اللى في الزمالك تقدر تحول بكل سهولة حتي لو مجموعك مش جايب حلوان خلال خدمة تقليل الاغتراب بيتقبل بنسبة أكتر من 90%

6- ((إمتحان القدرات هينفعك جدا لو هتدخل هندسة أو طب أو صيدلة أو حتى أداب))

لو مثلا امتحنت فنون جميلة عمارة أو فنون جميلة فنون أو تطبيقية وناوي تقدم هندسة امتحان القدرات بيفيدك جدا, عشان قسم عمارة كله رسومات مناظير وبتعتمد بشكل كبير على القدرات, ف يعتبر كأنك خدت كورس تأهيلي وهيفيدك جدا ويميزك عن الباقي.
وساعات قسم عمارة بهندسة بعض الكليات بتعمل اختبار قدرات علشان دخول القسم بتاعها,
ومثلا لو كلية طب أو صيدلة في مواد فيها رسوم كتير زى تشريح اللى لازم تدرس نسب الجسم كويس جدا ودة اللى بتتعلمه في قدرات فنون جميلة فنون أو تطبيقية.
حتى لو كلية أداب في رسومات زى قسم جغرافيا وتاريخ ورسم الآثار والنسب التصميمية بتاعت الفراعنة والاغريق والرومان وهكذا.
طبق دة بقى على كليات كتير وشوف هتستفاد ازاى.

7- ((إمتحان القدرات هيديك مهارات جديدة ويخرجك من الاكتئاب))

طبعا هتستفيد وتتعلم موهبة جديدة وهتطور من طريقة تفكيرك والأهم إنها هتخرجك من مود الثانوية الفاشلة والمذاكرة وهتعيد صفاء ذهنك بشكل كويس جدا, وهتخرج من القالب الفاشل بتاع التعليم المتخلف. وهتفتح مخك على مهارات جديدة مكنتش متعود عليها قبل كدة.

8- ((إمتحان القدرات هيديلك شهادة معتمدة ويميزك عن غيرك في الحياه العملية))

بمجرد ما تمتحن قدرات بتاخد شهادة معتمدة من الكلية, إنك ناجح وإنك اتقدمت ودي بتنفعك جدا لو حابب تغير مجالك فيما بعد, ولاحظ إن لازم تكون ممتحن في السنة بتاعتك بتاعت الثانوية العامة وتكون مخلص 3 ثانوي والامتحان بيكون بعد امتحان ثانوي وقبل التنسيق والنتيجة متطلع.

9- ((ممكن تبقى مهندس ديكور أو معماري أو مصمم جرافيك بمجموع قليل جدا))

كليات فنون جميلة وتطبيقية وتربية فنية ونوعية بتاخد مجموع قليل جدا عن هندسة وطب وشهادتها عليا,, وشوف تنسيق أخر سنة كان عامل ازاى
- فنون عمارة اخدت ع الاقل 365 ونص
- فنون ديكور وجرافيك وباقي الاقسام لعلمى علوم ورياضة خدت ع الاقل 365
- تربية فنية لعلمى خدت ع الاقل 206 وفى الزمالك خدت 281 ونص
- فنون جميلة لادبي خدت ع الاقل 341 ونص
- تربية فنية خدت لادبي ع الاقل 233 ونص والزمالك خدت 300 ونص

10- ((ممكن تبقى مهندس ديكور أو معماري أو مصمم جرافيك ودعايا واعلان وانت ادبي أو علمى علوم))

- لو انت أدبــــي:
ممكن تمتحن امتحان فنون جميلة فنون ودة بيأهلك لجرافيك وبتدرس كل قسم الديكور وتشتغل في تصميم الدعايا والاعلانات والرسوم المتحركة والديكور والتصميم ككل ودة مجالاته كتيرة جدا في الشغل وعملية ومش طالب موهبة.
أو ممكن كمان تمتحن تربية فنية وتختار قسم تثقيفي وتدرس مواد فنية زى فنون ودي بتاخد أقل من فنون جميلة كمجموع بس بالبرامج والكورسات بتشتغل في الديكورعادى ودة حل لو مجموعك قل (لاقدر الله).

- لو انت علـــمى رياضـــة:
ممكن تمتحن فنون جميلة قسم عمارة بمجموع قليل وتدخل عمارة من اعدادى 5 سنين وتنضم لنقابة المهندسين تصنيف أول ودة بيعادل هندسة وأكتر لانك بتدرس مواد فنية جنب التصميم وجنب الهندسة وبتتميز عن خريج هندسة نفسه لانك خمس سنين مش 4 زى هندسة لأن اعدادى من اول سنة بهندسة عامة.
ممكن تمتحن فنون جميلة فنون أو فنون تطبيقية جنب امتحان فنون عمارة وتدخل قسم هندسة الديكور بمجموع اقل من فنون عمارة وبتدرس مواد هندسية جدا وتصميمية وبتشتغل مهندس ديكور ومصمم عمارة داخلية وفي ناس بتمتحن التلاتة مع بعض عشان تضمن واحنا في الكورس عاملين عرض وضامين فنون ج فنون مع تطبيقية ف 6 حصص سوا وهتضمن معانا امتحان القدرات لاننا بندربكم ع نفس موديلات وتماثيل الامتحانات.
متاحلك برضو تربية فنية بمجموع أقل وتختار قسم تثقيفي وتدرس مواد فنية زى فنون ودي بتاخد أقل من فنون جميلة كمجموع بس بالبرامج والكورسات بتشتغل في الديكورعادى ودة حل لو مجموعك قل (لاقدر الله)

- لو انت علـــمى عـــلــــوم:
ممكن تمتحن فنون جميلة فنون أو فنون تطبيقية وتدخل قسم هندسة الديكور أو التصميم الداخلى والاثاث, ودة ضامينه في كورس واحد 6 حصص كل حصة 6 ساعات وكتاب مجانى كل حصة ومتابعة ع النت ومتابعة وقت الامتحان 24 ساعة وكل دة بنتحاسب بالحصة ب 40 ج بس.
متاحلك برضو تربية فنية بمجموع أقل وتختار قسم تثقيفي وتدرس مواد فنية زى فنون ودي بتاخد أقل من فنون جميلة كمجموع بس بالبرامج والكورسات بتشتغل في الديكورعادى ودة حل لو مجموعك قل (لاقدر الله)

طبعا أنا اتكلمت بشكل مختصر عن الأقسام لانى موضحها بالتفصيل في بوستات كتير على قسم المنتدى هتلاقيها, أو اسالنا فى الكومنتات.

11- ((إمتحان القدرات هيفيدك لو هتقدم في كلية خاصة))

في هندسة خاصة قسم العمارة لازملها امتحان قدرات وممكن اوى يعفوك من مصاريف غالية جدا بتاعت عقد الامتحان بتاعهم, وانت بس بتقدم الشهادة انك نجحت في قدرات حكومي.
كليات كتير خاصة زى تطبيقية التجمع واكتوبر وبدر, مش بتمتحن تانى وبتقدملهم بس الافادة, بدل ما تدفع الف جنيه امتحان قدرات انت بتقدم ورقة الحكومي اللى تمن امتحانها ميكملش 200 ج.

استنى علي القسم دة في المنتدى دى بس مواعيد التقدم امتحان القدرات,
وانت بتختار ميعاد امتحانك ع موقع التنسيق, وبعدين تطبع الورقة وتقدمها الكلية اللى حددهالك,
لأن الامتحان ملزم باقرب كلية لبيتك,
وبعدين بتدفع المصاريف في حدود 200 ج لكل امتحان,
وليك تمتحن براحتك ممكن فنون جميلة عمارة جنب فنون جميلة فنون جمب تطبيقية جنب تربية فنية وجنب نوعية زى ماتحب.
بس خلي بالك في كليات بتقولك ادفع فوقيهم 500 ج أو 400 ج فوق مصاريف الامتحان وتقولك قدم ع كورس الكلية, بصراحة ملوش أي لازمة ولا هينجحك بالعافية ولا الموضوع ماشي بوسايط, علشان متخسرش مصاريف ع الفاضي احنا في قفا القرش.

مواضيع هتفيدك جدا لو هتقدم في امتحان القدرات:

- نظام امتحان القدرات 2018 الجديد كل التفاصيل(اضغط هنا)

- أشهر غلطات تمنعك من دخول كليات فنون جميلة وتطبيقية(اضغط هنا)

- معلومات لازم كل طالب ثانوية عامة يعرفها لدخول القدرات(اضغط هنا)

- مستقبل فنون جميلة هيغير رأيك(اضغط هنا)

لأي استفسار تحت أمركم (مهندس بهاء الدين)