بوابة الثانوية العامة المصرية

انتوا عارفين ايه ارخم حاجة ممكن تحصل لطالب الطب من قبل حتى مايدخل الكلية

1-المفروض انه ميغلطش ف اى حاجة ولو غلط هتلاقى الناس بتقول له الكلمة المعهودة(انت ف طب انته؟)

2-لو حد من قرايبه سأله انت عايز تتخصص ف ايه وهو رد وقال مش عارف يقولك ايه ده : ده خايف يتحسد

3-بمجرد ان التنسيق يظهر ويعرف انه ف طب هيلاقى نفسه بينهال عليه كم اسئلة طبية محترمة ميجاوبش عليها واحد مخلص طب وف امتياز سواء بقا من قريب او غريب مع انه يعينى لسه مشفش المنهج حتى

4-لو كنت ماشى ف الشارع ورباط الكوتشى اتفك يبقى نهارك زى بعضه وتلاقى الناس بتبصلك وبتقول (ده شكل واحد ف طب )
ف انصحك تلبس شبشب احسن ما هم كدة كدة هيتتريؤا عليك
وعلى رأى المثل اذا اردت ان تخفى عيوبك فتباهى بها وضعها تحت انظار الجميع

5-اصحاب النفوس الضعيفة ممن حول هذا المظلوم ينتهزون الفرص لكشف القطط الفطسانة فيه (خدوهم بالسوط قبل ما يغلبوكم)

6-لو جه يشتكى م المنهج هتلاقى كل الناس ف نفس واحد بتقول(مش انت اللى قلت عايز ادخل طب)

7-واااااه بقا لو شال مادة دة هيبقى فرجة الحارة بحالها

8-وكل سنة الناس تسأل ها بقيت ف سنة كام
المهم عايزين يعرفوا انت سقط ولا لسه محصلش الشرف

9-و خد بقا عندك لو وقعت تحت ايد حد واطى هيستغلك اشد استغلال

10-واول ما سواق التاكسى يشوف ف ايدك البالطو هيطمع ف اجرة زيادة وكأننا بنقبض واحنا لسه طلبة يعنى

11-لو حبيت تاخد كورس ف مادة متخليش بتاع السنتر ياخد عليك حتى لا يحدث مالا تحمد عقباه

12-لو كنت متكبر او متواضع الناس هتقول عليك متكبر بردو ف هات م الاخر واتكبر على اللى تحس انه واطى

13- طب ازاى اعرف الواطي ده

بص ياسيدى لوجيت تعامله كويس هتلاقيه بدأ ياخد عليك ويعاملك وحش

ولو جيت تعامله وحش هتلاقيه اتعدل وعاملك كويس

14- طب بالنسبة للناس اللى بتحترم الطب والاطباء والله عاملهم كويس بس متخليهمش ياخدوا عليك بردو

15-لو كنت بتحب الطب قوى وعندك هوس

اتقل شويه لاحسن يشتغلك هو كمان وعلى رأى الشاعر
اياك ان تحبب جمادا

احببت علما قد تهادى

عل شط النيل يا حماده

فى الوصول الى الفؤادا

16-لو كانت اعصابك خفيفة خاصة البنات

امسك اعصابك لاحسن تلسع الاخر او تموت ف امتحان شفوى ولا حاجة

17-اما بقا لو كنت تقيل وراسي

متبردش اوى عشان متسقطش

انا خايف على مصلحتك

19-لو كنت داخل طب وعايز تعيش حياتك

تبقى غلطان

اللى بيدخل طب بيبقى عايز يموت مش يعيش

فراجع حساباتك

20- سنة ممكن تمر عليك اللى بيبقى صيفها زى شتاها

كل دراسة يا عمو

هتلاقى اخوك الصغير رايح جاى يقولك

ما تقوم ذاكر جوه ياعم مش عارفين نعلى صوت التليفزيون

يعنى ساقطين وقارفينا كمان

21-لو كنتى بنت ومش عايزة تساعدى مامى بحجة انك عايزة تذاكرى

صدقينى اخرتك هتتجوزى وتقفى ف المطبخ

ابقى خلى الطب يعلمك الطبخ بقا

22- اما بقا لو كنت ولد انصحك بحاجة م الاتنين

اما تذاكر مووت وتبقى معيد

او تقصر (لو مكنتش غاوى تبقى معيد يعنى) وتتعلم مهنة كدة على قد ما قسم

23- نيجى بقا للامتحانات

لو كنت رايح امتحان تحريرى متراجعش اخر كتاب ومتذاكرهوش اصلا من البداية

لانك يا نغة مامى مش هتلحق تجاوب عليه عشان الوقت مش بيكفى فلازمته ايه وجع الدماغ ده

24-اوعى اوعى اوعى تزعل من اى حاجة تحصلك بعد ماتدخل الكلية دى

لازم تستحمل نتيجة اختيارك

25-لو لقيت الناس كلها بتعاملك معاملة وحشة

اطمن يابنى

انت كدة ع الطريق الصح

الحقد البشرى اللى عندهم اشتغل ومفعوله بدأ يظهر

وقول لنفسك يا عينى غيرانين منى

اكيد يعنى هو حد بيدخل الكلية دى بالساهل

26-طيب ما انت اكيد بردو لازم ترد عليهم

هتقول لهم ايه

بص (يعنى لو حد قال لك انت ف طب انته؟)

فى جمل معينة كدة بتتقال ف اى موقف بايخ زى ده

زى مثلا

*هو الطب مزعلكوا ف ايه بالظبط وانا اروح اشتكيه ل بابى

*او لو كنت متضايق بقا امرى لله

قول(انا ف طب غصب عن عينك) بس بلاش تضايق احسن الاسلوب ده بقا مبتذل ولم يعد متبعا ف الحوار المصري المعهود

*او قول لا انا مش ف طب وقوم قايل انا ف كلية كذا وكذا دى هى هى اسم الكلية اللى البنى ادم اللى قدامك متخرج منها هتلاقيه اتكسف على دمه ووشه قلب الوان

*طب لو معرفتش ترد هتقول ايه

اقولك انا

اشتغلةه بمصطلحات طبية من اللى عندك امال انت بتتعلم ليه

زى مثلا لو لقيت اللى قدامك من ذوات الدم الحار ومتعصب قوى قول له

(انا خايف ع الجول بلادر بتاعتك ليجرالها حاجة)

هيقوم هو يسالك ايه هى الجول بلادر دى

انت بقى بكل برود ترد وتقوله المرارة

هتلاقيه اتفحم وهو واقف

27- نيجى بقا ليوم النتيجة

مش اى حد يسالك عن نتيجتك تبقى عبيط وتقوله ع النتيجة الحقيقية

تتحسد كده

علّّى تقديراتك عل قد ماتقدر

يعنى لو جايب جيد قول جايب جيد جدا

ولو جايب جيد جدا قول جايب امتياز

طب لو جايب امتياز قول طلعت الاول ع الدفعة

لان اللى قدامك كدة كدة هيقولك وحشة ف انت تنصف نفسك م البداية احسن لك

(بس الكلام ده بالنسبة للاخوة اعداءك اللى انت واثق انهم مستنين يشمتوا فيك

يعنى متعملش الشويتين دول عليهم ف البيت لاحسن اكون بشجعكوا ع الفساد ولا حاجة)

28-لو جيت تسلم على حد بص ف وشه الاول

لو كانت اعراض الحقد شديدة

انصحك متحاولش تصاحبه

طب لو كان بيعرف يمثل

اكشفه ازاى

بص ياسيدى

هتلاقى اسلوبه ناعم اوى

وبعاملك باحترام لم يعد موجودا على وش الكرة الارضية

فتعرف حاجتين

ياما يكون الشخص ده بيكرهك اوى

ياما عايز منك مصلحة

وانصحك بلاش صداقة المصالح

هتقولى طب ما الصداقات كلها بقت كدة

هقولك لو انت مش صاحبه وطلبت منه طلب هيبقى لسه في شويه ذوقيات وهيعبرك ان شاء الله

اما بقا لو انت من النوع اللى مبيقدرش يعيش لوحده

هقولك ماشى خليك ف السكة دى

بس بلاش تخليه يعرف عنك حاجة خالص