داخل طب أسيوط سمى وخش برجلك اليمين
 

السلام عليكم

موضوعنا النهاردة عن للى داخل طب أسيوط وشوية تعريفات وحجات عن الكلية لمساعدة طلاب أولى الجدد



ركز معايا بقى






أولا موقع الكلية فييييين بالضبظ


الصورة توضح

رقم 11 هو الكلية
15 المستشفى الجامعى


http://up.harajgulf.com/do.php?img=147721


http://up.harajgulf.com/do.php?img=147721


المداخل للى اقدر ادخل منها


الاحمر يشير الى بوابة الترعة الابراهيمة ودة البوابة الرئيسية الغربية
الاصفر البوابة الرئيسية المقابلة



الوردى :بوابة المدينة الجامعية للطالبات ودى أقرب واحدة

الأزرق:بوابة المستشفى الجامعى منصحش بيها

الرمادى بوابةالمرزعة


وأحسن واحدة هيا بوابة المدينة الجامعية (تسمة بوابة صيانة برضه )







طيب احنا تقبلنا فى كلية الطب ايه المطلوب تعمله ؟ركز
بقى

تروح تسال عن معاد التقديم فى شئون الطلبة (وغالبا هيكون 16-8 )

وايه الورق للى هحتاجه

1-ورقة الترشيح (لازم تطبعا ولازم يكون عليه العلامة المشفرة )

2-شهادة الثانوية العامة

3-أصل شهادة الميلاد أو مستخرج رسمى منها

وكم صورة ليها


4- صور شخصية بعدد معين وتزود عليه 2 علشان الكارنيه والاستمارة

5- بالنسبة للطلبة الذكور استمارة ال2 جند

ودى تتجاب من التجنيد (خلى بالك التجنيد منظقة عسكرية يعنى نصيحة لازم بطاقتك معاك ومتروحش بالموبايل والا هتقف طابور وانت داخل وطابور وانت خارج ) وهى استمارة لونها أزرق






سؤال شائع
هو انا لازم أروح أقدم بنفسى ؟
لا مش لازم ممكن تخلى حد من قرايبك يروح يقدملك عادى يعنى (وأنا عملت كدة)


أهم حاجة بس استمارة الكشف الطبى

بص يا سيدى بعد ما تقدم هيدولك استمارة الكشف الطبى (خلى بالك لو حد قدملك يبقى لازم تروح تاخدها بنفسك ) ويحددولك معاد للكشف يا باشا

هتيجى يوم الكشف وتروح على مكان الكشف (مكانه للأسف بيتغير من سنة للتانية ومن كلية للتانية اسال واعرف المكان بنفسك)

طبعا لانكم فى طب الكشف ماهو الا امضاء ورق مفيش كشف أصلا كل امضاء ورق واختام


أهم حاجة أنك تشترى بطاقة الكشف (بطاقة خضرة بتخليها معاك فى حال لو تعبت تروح بيه مستشفى الطلبة )



ممكن اتخلف عن معاد الكشف واجى أى يوم مع اى كلية ؟ أه ممكن بس خلى بالك انت كدة هتبقى لوحدك

وتضطر تلف بقى لأنهم بيغيروا مكان الكشف (على فكرة عملت انا كدة برضه بس اتسترت الحمد لله)







بعد ما خلصنا وختمنا وعملنا استمارة الكشف الطبى ترجع تسلمها لشئون الطلبة تانى

بعدها يجى وقت دفع المصاريف (هما حوالى 250 جنيه )

تدفعهم فى الخزنة (هاقولكم على مكانها ) وترجع بالوصل لشئون الطلبة وتاخد كارنيهك وبكدة يخلص

موضوع اللف الادارى والكلام الروتينى



سؤال أخير فين شئون الطلبة والخزنة ؟

فى المبنى الادارة خامس مكتب شمال
http://im50.gulfup.com/NbFItq.jpg

http://up.harajgulf.com/do.php?img=147721


يتبع ...................

نكمل بقى

طيب خلصنا كلام المكاتب والكلام الفاضى ده


وجه أول يوم
يوم التوهان العالمى لطلبة سنة اولى (تعرفهم بسيماهم)
نصيحة بقى
1-متجيش أول يوم لابس البالطو أو شايله على كتفك أو ايدك او او (لأنكم بجد هيتحفل عليكم بجد وهتصابوا باحباط أول يوم )
2-ابعد عن للى أكبر منك أيوة سيبك منهم لأنك خلاص هتشوف كل حاجة بنفسك (غير ان نفسيتك مش ناقصة )
3-حاول تكون عارف حد يعنى زمايلك صحابك كدة ببسطاة التحرك فى مجموعة بيكون كويس على فكرة
4- قبل الكلية بيوم أو يومين روح اتعرف واستكشف الكلية علشان متتوهش أول يوم وتبقى عارف المكان
5-بلاش تتصور كتير (بجد نصيحة لوجه الله هتدعليى علشانها )

طيب نرجع لأول يوم أروح فين
تروح سريع عند شئون الطلبة وتشوف ورقة الجدول بتاعك (كدة كدة هتتوزع عليكم )
وكمان تشوف ورقة السكاشن وتعرف أنت فى سكشن رقم كام

عموما ده الجدول وغالبا مش هيتغير(اتاكد برضه روح شوفه)


http://im56.gulfup.com/hZcnO1.png



طيب ممكن تشرحلنا الجدول

الخانات بدون الأرقام دى محاضرة يعنى الدفعة كلها تتوجه للمدرج

للى بيشرح المحاضرة طبعا الدكتور ومش مهم الحضور (محدش هيحاسبك )

انما الأرقام دى للسكاشن

بمعنى ان مثلا سكشن 1-2-3-4 يروحوا المشرحة (قسم التشريح )

5-6-7 يروحوا معمل الكيمياء

علشان كدة لازم تعرف انت سكشن رقم كام


السكاشن مهمة لأنه بتشرحلك العملى للى لازم تشوفه بعينك
كمان عليها غياب ولو قل حضورك عن 70% تحرم من دخول الامتحان

ولسبب ثالث أنا المعيدين او المدرسين المساعدين هما للى بيشرحوا وبالتالى هيقدوا يفهموك عن الدكاترة
للى ممكن متفهمش حاجة من المحاضرة خالص




نسيت أقولكم أن المواعيد مهمة فلازم تلتزموا بيها

كمان حاجة
احنا فى سنتنا بدأت السكاشن من اول يوم (على غرار ما هو معروف بعد اسبوع من الدراسة) فلازم تتاكد من موضوع السكاشن ده وتسال هل هتبدا أول يوم ولا لا




أخر حاجة بقى المدرج والأقسام فييييين

الصورةتوضح


http://im89.gulfup.com/4gyIKv.jpg


http://im89.gulfup.com/4gyIKv.jpg

قسم التشريح جناح أ الدور الاول

الكيمياء الحيوية جناح ب الدور الأول

الفسيولوجى جناح ب الدور الثالث

الهيستولوجى جناج ج الدور الثالث


يتبع

نجى نكمل كلامنا بقى


طيب حضرنا أول محاضرة وكانت المفاجئة
مش فاااااااااااااااااااااااااااااهم حاجة

متقلقش ده طبيعى لأنك ببساطة بتدرس الطب لاتينى حضرتك

وغير كمان ان الدكتور للى بيشرحلك مش عارف معنى الكلام بالعربى

يعنى انا مش عارف معنى الكلام لاتنيى أو انجليزى وهو مش عارف عربى يااا حلاوة

الكلام ده هيستمر معاك حوالى شهر

ولذلك الحل كالتالى
أولا تذكر هذه الجملة أول شهر بس (أنت شغال ايه دكتور؟ طرااااااااااااااااااااااخ انت شغال مترجم شغال ايه مترجم )
يعنى قبل ما تقرا الدرس وتحاول تفهمه

اقرا الدرس وترجم الكلمات

ترجم من على جوجل لأنه بيختصر وقت وبلاش القاموس الله يكرمك


بعد ما ترجم تذاكر بقى وتفاجئ بحاجة تااانى

مش فاهم حاجة خااااااااااااااالص

لازم تقرا الحتة مرة واتنين وتلاتة علشان تفهم
لو مفهمتش اسال المعيد فى السكشن علشان يفهمك



طيب أذاكر منين
شوف فى الجامعة مفيش مصدر محدد

بس لو عندك صداع من الموضوع ده تقدر تلتزم بكتب القسم

أجيبها منين الكتب ؟

من مكتب سكرتارية جوة القسم نفسه بتدفع وتاخد كتبك عادى يعنى


طيب وأول أسبوع ممكن الكتب منزلتش

احنا هننزل فى مكتبة (أمام قسم التشريح ) كل يوم المحاضرة للى اخدوتها

ممكن طلاب دفعتنا يدوكم كتاب تصوروا منه انتم بقى حلو الكلام


طيب انا عايز كتب خارجية مش عاجبنى كتب القسم




ايه أفضل كتب فى المواد بقى


الفسيولوجى كتب مجدى صبرى (وعلى فكرة كتب القسم فى الفسيولوجى كويسة )

التشريح(عندك كتب احمد كمال -سامح دوس -البدرى -درية )
وشخصيا كتب احمد كمال هى الأفضل

البيو(سعيد عرابى ) نصيحة هاتو لأن كتب قسم البيو سيئة

الهستولوجى كتب د زكريا (ونصيحة بلاش تجيبو لأن كتب القسم ملونة وأحسن كمان )





منين نجيب الكتب بالظبط

1-مكتبة الشرق الأوسط فى مجمع مدرجات طب (المدرج بتاع سنة تالتة ورابعة فى الصورة للى فاتت)

2-مكتبة ابراهيم نفس المكان برضه

3-مكتبة الشروق وده تلاقيه فى شارع المكتبات

فين الشارع ده


هتطلع من البوابة الرئيسية الشرقية وتلاقى قدامها شارع كبير مليان مكتبات هتلاقيها على شمالك بعد مدة من المشى





المرة الجاية هنتكلم عن المواد (ايه أفضل الدكاترة -الكتب - المحاضرات الخ الخ الخ)


ملحوظة :لو الصور فى المشاركات للى فاتت كبيرة احفظها على كمبيوترك وهتقدر تشوفها كويس



يتبع

الفسيولوجى (الوحش)

اسمها علم وظائف الأعضاء :يعنى هتدرس وطيفة الأجهزة والأعضاء فى جسمك بالتفصيل الممل

موزعة بين أولى وتانية

250 درجة فى أولى 250 درجة فى تانية

تعتبر أهم مادة فى الطب كله لأنك لو فهمت فسيولوجى صح باذن الله هتفهم باقى المواد وتعرف تشخص مستقبليا

المادة دى اوعى تركنها على الأقل مش فى جامعة أسيوط بجد لأن ربع دفعتنا وربع الدفعة للى قبلينا شالوا المادة دى

الفسيولوجى مينفعش تترمى لازم تروح تذاكر للى خدته النهارة


ملحوظة أخرى برضه :الفسيولوجى لازم فهم جامد وحفظ جامد
لازم تفهم كويس علشان تقدر تحل أسئلة الMCQ وتحفظ جامد علشان أسئلة الSHORT NOTES

لحظة واحدة ايه للى انت قولته ده ؟

فى الجامعة فى نوعين من الأسئلة
MCQوده اختيار من متعدد وده بعتمد على الفهم وبيتصحح بالكمبيوتر

short notes زى الأسئلة المقالية وده عايز حفظ جامد وبيصححه الدكاترة
وللأسف بيتصحح بمزاج الدكتور (يعنى دكتور يشوف الكلام ده كويس التانى يقولك لا ده ناقص وينقصك عليه )

ومش هكدب عليكم أن بعض الدكاترة بيصححوا بالشبر يعنى للى بيكتب اكتر بياخد درجة أكتر


نرجع لكلامنا



ايه بقى فروع المادة دى

1-introduction and biophysics
دى مقدمة بتدرس فيها الخلية وازاى بتشتغل
النقل للى بيحصل فى الغشاء البلازمى وازاى بيتم
تركيز الأيونات بالتفصيل الممل جوة وبرة الخلية


وبيتكلم برضه عن الماء وتركيزها واتزانها فى الجسم وتوزيعها

أصغر جزء بس اهم جزء بدونه مش هتعرف تمشى

غالبا لو دخلت لكم الدكتورة نشوى يبقى يا سعدكم يا هناكم
لأنه بتعرف تشرح عربى وبتفهمك فسيولوجى كويس

لدرجة أنك هتطلع من المحاضرة ليك نفس تذاكر وبتدعليها كمان

2-nerve and muscle
جزء سهل بس أهم من للى قبله

ود نشوى هى للى هتشرحه برضه

بيتكلم عن العصب وتركيبه وازاى بيشتغل من الألف للياء وكذلك العضلة

مهم بس فى الجزء ده الأيوناااااااااات لازم تحفظها وتتحفظ تركيزاتها كمان ومينللى بيطلع ومن للى بيدخل لاااااازم

مهم لان فيه برانشات تانية معتمدة عليه


3-respiration
الجهاز التنفسى
برانش رخم جدا الاا أن الدكتورة مروة هتسهله عليك وهتقولك على المهم وللى مش مهم

لازم تحضروا فى معادكم لأن الدكتورة مروة بتكره التاخير جدا

البرانش ده عايز مذاكرة كتيير علشان يثبت

4-blood
ممكن يتاخد فى الترم الأول أو التانى

لو فى الأول يبقى حظكم نحس لأنك ببساطة مش هتعرف تذاكروه
ولذلك متذاكرش حاجة منه الا للى يحددهولك فى الامتحان (أصلك بيحددولك ايه للى جاى فى الامتحانات الدورية طبعا)

ولو دخلت الدكتور سلوى بلاش تحضروا سجلوا المحاضرة بس وابقوا اسمعوها بعدين

د سلوى مش بتشرح غير انجليزى ومش ملتزمة بكتاب القسم فتبقى لخبطة بلخبطة

لكن على فكرة برانش الدم سهل وحلو وبيتذاكر يسرعة فمتقلقش منه

لكن لو اخدتوه فى الترم التانى يبقى كويس (لأانكم تكونوا اتعودتم على الانجليزى وبالتالى تعرفوا تذاكروا )


4-autonomic nervous system(ANS
أسهل حاجة فى الفسيولوجى على الاطلاق لو اتفهم سهل واهم حاجة فى مضوع الفارما (على الأدوية هتاخدها فى سنة تالتة )

بيتكلم عن الجهاز العصبى الذاتى وتنظيمه للجسم من خلال السمباثتيك والباراسمباثتيك (سمعناهم قبل كدة )
أهم حاجة بقى بتكلم عن النواقل العصبية والمستقبلات بتاعتها وblockers للى بتقفل هذه المستقبلات

علشان كدة مهم تفهم الجزء ده واوعى تركنوا لانه مهم ليك فى باقى فروع الفسيولوجى
ومهم فى سنة تالتة علشان الفارما لأنك أول شابترف فى الفارما هو الأدوية بتاعت النواقل العصبية دى


ans ميتركنش


بتشرحه د ايمان وبرانش حلو ود ايمان هتحفظهولك قبل ما تطلع من المحاضرة

فى محاضرة د ايمان ركز لان الدكتورة بتحب تسال علشان تشوف من المركز وللى نايم


5- Digestive system GIT
الجهاز الهضمى

برانش حلو بس للأسف كتاب القسم عاكك شوية فيه

والدكتور مصطفى ما شاء كبير جد فى السن يعنى صوته مبيوصلش وكمان مخارج الحروف عند بااايظة خالص

وفى حل من الاتنين

لو رضخت لكتاب القسم والمحاضرات يبقى أرجوك تحضر بدرى وتقعد قدام علشان تسمع ولأن د مصطفى بيحب بشرح على السبورة مش البروجكتور أو الكمبيوتر

غير كدة متحضرش وتجيب كتب من برة (هأقول عليها بعدين)

ولوقررت ترضخ لكتاب القسم يبقى تذاكر أول باول (خدت المحاضرة النهاردة يبقى النهاردة لان لو اجلتها مش هتقدر تعوضها )


6-الوحش cardiovascular system CVS

الجهاز الدروى
أطول برانش عندك يا مؤمن (البرانش العادى ممكن 80 90 صفحة انما ده 260 صفحة بحالهم)

برانش تقيل جدا ولازن يتفهم كويس جدا جدا جدا

بس هو فى النهاية سهل

مقسم الى 3 أجزاء

الجزء الأول بيشرحه د محمود عبد الفضيل
ده بتكلم عن القلب والعضلة القلبية وازاى تشتغل (لو مفهمتش اول برانشين للى قولتلك عليهم مش هتفهم ده )

بيتكلم عن رسم القلب الكهربائى ECG وهى الأمواج بتاعته والاعراض والأمراض وغيرها

بيتكلم عن الدورة القلبية واهمتيها

كمان عن أصوات القلب وأهميتها برضه


الجزء التانى بتكلم عن أعصاب القلب و الأفعال الانعكاسية reflexes
يعنى مثلا لو على الضغط يقل معدل ضربات القلب وهكذا (وعلشان كدة ANS مهم )

بيتكلم عن ضغظ الدم

بتشرح الجزء ده الدكتورة أميمة ياريت تحضرلها لانها بتقولك عن المهم

بس خلى بالك د اميمة مش بتدى استراحة فى المحاضرات أم ساعتين

فلاوزم تبقى صاحى كويس وواكل كويس قبل محاضرة أميمة لانها لا تعرف الرحمة فى الشرح ابدا



الجزء التالت عن الدورات فى الجسم بتشرحه الدكتورة عفت
بيتكلم عن الدورات المختلفة فى الجسم زى الدورة الرئوية والدورة التاجية والدروة الكبدية وهكذا

احضروا محاضرات د عفت لأنها هى للى بتحط اغلب امتحانات سنة أولى ومبتحبش حد يجيب كلام من برة الكتاب أو المحاضرة


البرانش ده لازم يتلم كويس قبل امتحانات أخر السنة علشان البرانش ده بيبقى تقيل جدا وأصعب برانش

تذاكره

باقى الفروع فى سنة تانية
1-central nervous system CNS
2-endocrine
3-reproductive system
4-special sense
5-metabolism
6-kidney and urinary system



ايه هى الكتب للى ممكن أذاكر منها ؟
كتب القسم كويسة جدا

بس لو زاطت معاك ممكن تستعين بورق د ناجى من جامعة القاهرة وموجود على المنتدى أو كتاب الددكتور مجدى صبرى

خاصة فى respiration وGIT لأن الكتاب الى حد ما ممكن يكون ملخبط


لو مفهمتش حاجة روح لأى معيد يشرحهالك وبلاش الكورسات أو مجموعات التقوية فيها لأن للى بيديها د هبة العراقى ودى للأسف سيئة جدا فى التعامل وسيئة فى موضوع المتابعة (تخليك تسيب كل المواد وتذاكر فسيولوجى بس وتخليك تذاكر كمية كبيرة جدا )

نصيحة بلاش كورسات فسيولوجى
أخرك اسمع تسجيلات د ناجى تبقى زى الفل والمحاضرات الى حد ما كويسة



نيجى بقى للعملى

مش كل المواضيع فيها عملى

مواضيع العملى هى
1nerve muscle

والمرة دى هتعملوا تجارت على الضفدعة وعلى العضلات وتاثير الحرارة والبرودة وغيره على قوة العضلة

هنشرح ضفدعة ؟أيوة
هتحتاج ادوات تشريح ب20 جنيه تقريبا هتلاقى بتتباع قدام المدرج بتاعكم أول أسبوعين (راجل من جمعية صحوة المجتمع

بيبيع ادوات ككتير مهمة ومفيدة )

طيب وايه تانى
فى جامعة أسيوط كل الأقسام بتشدد على البالطو جاند لااااازم البالطو
أه ويكون معاك جوانتيات ويفضل لاتكس (عارفين الجوانتيات المطاطية للى بيلبسوها بتوع الجراحة؟ هى دى )

هتدرسوا برضه CVS وهتقيسوا الضغط وتسمعوا ضربات القلب وغيرها من الحجات الكتير دى

وهتعملوا ECG و تقروه كمان
فى الحالة دى ممكن تحتاج جهاز ضغط وسماعة لو حبيت تتدرب على الموضوع ده

بس نصيحة هاتهم صينى أى كلام لأن فى سنة خامسة هتضطر تجيب أصلى (خلى بالك السماعة الأصلى ب400 جنيه )

هتعملوا اختباررات الدم وتعرفوا فصيلة الدم وغيره

فصيلة الدم؟ أيوة هتعرف فصيلة دمك بس لازم تشك نفسك
وعلى فكرة الموضوع صعب مش سهل (قصدى موضوع الشكة)

هتعملوا برضه شوية اختبارات تنفس وكفاءة الرئة والحجات دى


عملى الفسيولوجى حلو الى حد ما ومهم جدا لأنك هتشتغله بعد كدة فى حياتك العملية


ايه بقى نظام كتاب العملى ده ؟

كتاب بتستلمه مع كتب النظرى وفيه كل مواضيع العملى للى قلنا عليها

مطلوب منك تلصق كل المنحنيات وصور الECGللى عملتوها وتكتبوا شوية كلام نظرى عليها

اليكم ما ستفعلونه

تروحوا عند العامل وتقولوله احنا عايزين كتاب عملى قديم وتصوروه وتعملوا زى للى فيه بالضبط

كتاب العملى فى حجات مفيدة برضه



طيب نظام امتحان العملى فى الفسيولوجى ازااااى؟

امتحان العملى فى الفسيولوجى بيكون ثلاثة أجزاء

جزء نظرى (الشيت) وعملى وشفوى أيوة شفوى

بيجيلك ورقة فيها المنحنيات والكلام النظرى الخاص بالعملى وتحلوه وعلى فكرة سهل لو مذاكر

وبتجليك برضه حالة تشخيصية (حالة مريضة ومطلوب تشخص عنده ايه اسمه case study)وسهل برضه لو مذاكر

بعدين ندخل على الجزء العملى بيجيلك مثلا جهاز الضغط ومطلوب منك تقيس الضغط
مثلا عينة دم وتقيس الهيموجلوبين بتاعه

مثلا مطلوب منك تعرف فصيلة دمك
تمام كدة
بيجى بعد كدة دكتور ويناقشك فى الحجات للى أنت عملتها ليه وازاى وكيف ووووووو

ويسالك كلمتين نظرى بس كدة

اطمن العملى مفيهوش وسايط ولا حاجة
بس المشكلة فى الدكتور نفسه ممكن يسالمك على خفيف وممكن يطحنك أسئلة

الحل تذاكر كويس

بالمناسبة عملى الفسيولوجى سكشن واحد فى الاسبوع

المحاضرات 3 محاضرات (2 كبار يعنى ساعتين واحدة صغيرة ساعة واحدة بس )





توزيعة الدرجات

احنا قلنا أن الفسيولوجى 250 درجة

125 امتحان نهائى فاينال

40 درجة امتحان نصف سنة (بيسموه أعمال سنة )لأن السنة عندينا على بعضيها مش بالترم

10 درجات امتحانات دورية

35 درجة شفوى

40 درجة امتحان عملى وكراسة العملى من ضمنهم


طيب وامتحان الشفوى ؟

امتحان الشفوى بتاع الفسيولوجى لازم تكون فاهم كويس قبل ماتدخل

والحمد لله قسم الفسيولوجى مفيهوش كوسة ولاحاجة (فى أٌقسام تانية فيها )




زى ماقلت امتحان الفسيولوجى من أحد أصعب الامتحانات ولازم يتذاكروله كويس جدا جدا

الفسيولوجى اوعى تركنوا (مواد تانية ممكن لكن الفسيولوجى لا )


كدة أنا خلصت
والمرة الجاية هيكون الاناتومى (التشريح )


يتبع

دلوقتى التشريح الأدمى وعلم الاجنة anatomy and embryology


المادة اللذيذة فى علم الطب

توضيح بسيط مادة التشريح مش غرضها انى أشرح الجثة

غرضها هو استكشاف الجسم من جوة شكله ازاى

بتدرس جسمك متكون من ايه وترتيب هذه المكونات مع بعضها البعض

وكمان معاه علم الاجنة للى بيدرس تطور الجنين


طيب المادى دى عليها كام
250 درجة اولى وزيهم تانية

موزعين ازااااى ؟ 125 امتحان فاينال
40أعمال سنة
40عملى
35شفوى
10امتحانات دورية

المادى دى من النوع للى ممكن يتلم فى الاخر
لانها تعتمد على الفهم والتخيل وشوية حفظ

الحفظ فيها مش حفظ الكلام بل حفظ الصور

أيوة تحفظ شكل الصورة من الكتب والاطالس وترسمها وتتخيلها فى دماغك وبكدة تقدر تسترجع المعلومات بسرعة شديدة جدا

أكبر غلطة فى الاناتومى انك تحفظ الكلام بدون وعى

احفظ الصورة واوصف من دماغك

المادة دى من أهم المواد فى الجراحة (وخلى بالك سنة ساتة بيذاكروها من تانى لانها مهمة جدا )


قسم التشريح فى جامعة اسيوط خليط

فيه للاسف دكاترة كتير مبيعرفوش يشرحوا
غير كمان بيغيرا من توزيع الدكاترة للى هتشرح علشان يفاجئوك كل سنة

كمان د البدرى رئيس القسم هيتغير السنة دى (ولو جات مكانه د درية يبقى قولوا على نفسكم يا رحمن يارحيم)

طيب هسهلها عليك

الفروع للى هتاخدها

1-introduction
2-thorax
3-abdomen
4-pelvis
5-lower limb
6-general embrology

سنة تانية
1-head and neck
2-upper limb
3-neuroanatomy
4-special embrylogy



نبدا نتكلم وحدة وحدة

النظرى محاضرتين فى الاسبوع (كل واحدة ساعتين)
السكاشن 3 فى الاسبوع


introduction

مقدمة فى علم التشريح
هتعرفوا المصطلحات اللاتنية والأوضاع التشريحية والحركات التشريحية
مهم تعرفوهم لانك هتشتغل عليهم على طول

وبعدين هتدرس شوية أجهزة فى الجسم وتعرف أساسياتهم (مهمين برضه )

وتدرس أهم حاجة الجلد واللفائف (skin and fascia)

والاتنين دول تركزوا عليهم لأن كل الفروع بتعتمد على فهمك للحتة دى

غير ان أسئلتها كتير وانتم عارفين

هتدرس برضه شوية كلام عن العضم والمفاصل وركز على المفاصل الله يخليك لانها مطحنة ومهمة جداجدا حدا


المقدمة دى نظرى بس وغير كدة انها بتجى MCQ فقط وده كويس

غالبا للى بيشرح الجزء ده هو الدكتور سيد أنور

نصيحة اوعى ثم اوعى ثم اوعى تحضر له
هيعقدك فى الاناتومى وهيكرهك فى الطب كله وممكن يخليك تحول من الكلية بعد المحاضرة

مش هزار بجد اوعى تحضر والا هتندم (هتحس بالم الضمير علشان محضرتش المحاضرة بس صدقنى عدم حضورها اهم )



thorax الصدر

بيتكلم عن المنطقة الصدرية

هتبدا دايما أول برانش بالعضم

يعنى هتبدا بعظة القص sternum

وبعدين الضلوع ribs
ثم الفقرات الصدرية وخصائص كل وحدة فيهم

العضم مهم جدا لانه هو الاساس للى بتبنى على فهمك للمنطقة

هو احنا هنحتاج عظم ؟

أيوة هنحتاج وهقولكم على الموضوع بعدين


غالبا للى بيشرح البرانش ده د اشرف حمودة
اوعى تسيبوا محاضرة أشرف حمودة لازم تحضروها هيطلعك حافظ وفاهم كمان
ممكن تشرحه الدكتورة هبة وده كويسة برضه


Abdomenالبطن

أصعب برانش فى التشريح كله

اوعى تركن البرانش ده بالذات لان ركنه كارثة حقيقة

للى هيشرحه الدكتور محمد نبيل ورفعت وشحاته

لا تحضر لده ولا ده

الاتنين أزفت من بعض ومش هتفهم حاجة خالص


البرانش ده عايز يتذاكر له من كتاب كويس جدا ومش اى كتاب ينفع (هقولكم على الكتب بعدين)



pelvisالحوض

برانش سهل جدا ويتذاكر بسرعة البرق

ممكن يشرحه الدكتور البدرى وممكن د هالة والاتنين كويسين جدا

ممكن يتذاكر من أى كتاب

البرانش ده مهم فى ناحية العضم لأانك هتاخد عظمة الحوض hip bone ودى صعبة جدا

والبرانش ده يحب المقارنات

لان الحوض منطقة مختلفة كليا بين الميل والفيميل

المقارنة هتلخصلك بسرعة




lower limb الطرف السفلى

برانش غلس شويتين وعايز تلخيص شوية

للى بيشرحه دكتور منال ودكتور عادل

احضر لمنال وبلاش عادل

ولو حضرت لمنال ركز كويس جدا لأنه بتتكلم بسرعة شديدة

برانش كله عظم وعضلات وشرايين وأوردة
ولازم يتحفظ كويس ويتفهم كويس

برضه بلاش تركن البرانش ده برضه (أنت هتقدر تلمه بس هيتعبك جامد )


general embryology علم الاجنة العام (برانش نظرى مفيهوش عملى)


بيدرس التطور العام للجنين

مقسوم نصين

النص الأول سهل وكلام هتلاقى نفيك عارفه من الثانوى مع شوية زيادات كتير

بيتكلم عن الجهاز التناسلى reproductive system

بيتكلم عن تصنيع الحيوان المنوى sperm وكذلك البويضة ovum

بتكلم عن الدورة الشهرية والهرمونات الكتير للى فيها (لازم تتحفظ )


وعن الاخصاب


لحد هنا وحلو

الجزء التانى جزء زفت صراحة ولازم يتفهم كويس قوى قوى

بتكلم عن كلام جديد وتطور الجنين لحد ثلاثة شهور خلية خلية نسيج نسيج حتة حتة

بجد ممكن تكره نفسك لو زاكرت البرانش ده

ممكن تركنه شوية بس لازم تفهمه كويس


للى بيشرحه برضه د محمد نبيل ورفعت شحاتة

واوعى تحضرلهم



كتاب القسم فى البرانش ده سي جدا





نتكلم شوية عن الكتب

مادة التشريح تحب الصور

وبالتالى الكتب ذات الصور الجيدة للى تقدر تفهمها هى أفضل الكتب

الintroduction كتاب القسم كويس ويا حبذا لو تشترى كتاب احمد كمال وتذاكر التنين تبقى برنس

الthorax كتاب القسم فيه كويس بس لو ماعجبكش أسلوبه كتاب احمد كمال حلو
فيه برضه كتاب البدرى كويس جدا
كتاب سامح دوس حلو بس فيه رغى كتير

الabdomen كتاب القسم وحش هات لك يا اما كتاب أحمد
كمال او كتاب سامح دوس غير كدة بلاش (فيه كتاب الدكتورة درية وهو كتاب ملون وحلو بس للاسف غالى شوبة)

الpelvis ممكن أى كتاب وكتاب القسم يكفى وزيادة

الlower limb كتاب القسم كويس بس فيه رغى كتير وكلام كلينكال كتير

فلو معرفتش تذاكر منه كتاب أحمد كمال او البدرى

الأجنة كتاب أحمد كمال او سامح دوس وبدون تفكير



هتحتاج أطالس ملونة علشان تعرف تذاكر

ممكن تستعين بأطلس الدكتور الفقى أو تجيب أطلس pdf زى جرانتس وجراى Gray

الأطالس هتسهل عليك كتير جدا





نيجى للعملى
هحتاج ايه فى العملى ؟ البالطو بتاعك أساسى والعضم

ونيجى لمشكلة العضم
خلى بالك 1- العضم يكون حقيقى مش بلاستيك
2-يكون كويس ونضيف مش قديم جدا وعفى عليه الزمن
3- يكون عظم تقدر تشوفه ويكون عضم مهم مش عضم أى كلام
نصيحة متجيبوش لوحدك خد حد معاك

نجيبه منين ؟ ممكن تشتريه من حد كان عنده قبل كدة
ممكن محلات الادوات الطبية والله أعلم
ممكن تأجره من المشرحة أو من رعاية الطلاب أو من الاسر للى فى الكلية


طيب ملكش فى كل ده فى حل أخير تقدر تعمل زىى

أنك فى وقت المشرحة بيكون فى وقت فاضى ممكن تقدر تستعير بالكارنيه بتاعك العضم لى أنت عاوزه وتذاكر عليه فى الوقت الفاضى بدل مانت بتضيعوا وقت كتير فى السكشن فى الرغى

وترجعوا تانى بعد مايخلص السكشن وده أسهل وأحسن حل



ده غير ان فيه سكاشن مراجعة على العضم



ممكن تحتاج برضه فورسبس ملقط يعنى علشان تقدر تمسك الحجات للى فى الجثة بسهولة

وخلى معاك كم جوانتى لو بتقرف من مسك الجثة بايدك





العملى ببساطة أنت هتشوف الكلام النظرى للى انت خدته

هيشرحهولك المعبد كلام نظرى الأول وبعدين تشوفوا العملى لو عضم او جثة أو عينات أو جارات (ايه جارات ده ؟)

أعضاء بشرية محفظة تحت الفورمالين



اه صحيح خلى بالك أول ماتدخل المشرحة هتشم ريحة غريبة ممكن تسبب لك دموع وغثيان وحجات كدة

معلش استحمل ده الفورمالين (المادة الحافظة بتاعتنا)

وكمان تاثيرها شبه الغاز المسيل للدموع أو البصل برضه

بس بعد كدة هتتعود وتلاقى نفسك عادى جدا مفيش اى مشاكل



ومش هنخاف؟ ههههههه

يا حبيبى أنت بعد كدة هتفقد الاحساس يعنى هتلاقى نفسك بتلعب فى الجثة عادى يعنى وبايدك كمان

المشرحة حواليها اساطير وخزعبلات كتير عند الشعب المصرى

بس لما تدخلها هتلاقيها مكان عادى جدا

بالمناسبة التصوير حراااام فهمت حرررراااام ادينى حذرت





طيب وامتحان العملى هيبقى ازاااااى ؟

هيجيب لكم عينات ويعلم على حاجة فيها ومطلوب تكتب ايه ده

خلى بالك كلام ده فى دقيقة واحدة لكل عينة وانت عندك عشرين عينة

مثلا يجيب لك عظمة ويعلم على حتة معينة فيها

هتكتب اسم العضمة وتقول ده يمين أو شمال

تكتب اسم الحتة المعلمة

وتكتب ايه للى ماسك فيها لو عضلة تكتب اسمها


ممكن يجيب لك رئة مثلا وويمسك بسلكة أو شريط شريان أو وريد ومطلوب اسمه


خلى بالك الموضوع مش سهل
لأن الوقت عامل مهم جدا وغير ان الجثث حالتها زفت جدا وصعب تتعرف عليها بالوضع المنيل ده الاب عد تدريب كويس

ولذلك ركز فى سكاشن المراجعة كويس وسكاشن الشرح

لو مشفتش كويس اطلب من المعيد
أنه يعيدلك الكلام عادى مش هتغرم حاجة ومتتكسفش علشان المعيد واحدة ست (أصل انتم سنة أولى بتفضحونا )


كل البرانشات فيها حجات عملى الا introduction -embryology -وجزء بسيط فى الpelvis اسمه perineum





كتاب العملى :كتاب بتستلمه مع الكتب

مطلوب ترسم فيه حجات معينه (ارسم ؟) أه ترسم

ترسم مثلا stomach bed وهو كل الأعضاء والشرايين والأوردة والأعضاب وكل حاجة تحت المعدة مثلا مثلا

ترسم مثلا الدورة الكبدية وكل أوردتها وهكذا وبيتسلم أخر السنة وعليه درجات تبع درجات العملى


نرسم منين

من أى كتاب ممكن كتب نور الدين وده كويسة جدا فى موضوع الرسم أو ممكن تشفها من أى حد



بالنسبة للشفوى فى التشريح للأسف فى كوسة وشوية هبل بيحصل

طبعا بعض الدكاترة زى رفعت بيطلب تقوله حجات من محاضرته وطبعا ممكن ينقصك جامد جدا


بس بتعدى باذن الله المهم تذاكر كويس



ممكن لو معجبتكش المحاضرات تاخد مجموعات مع غبريال (مدرس مساعد فى القسم وبشرح كويس جدا )

أو تسمع محاضرات د مدحت من جامعة القاهرة وهى موجودة على اليوتيوب

كمان حل أخر تسجيلات احمد كمال زى الفل وتخليك فاهم تشريح أحسن من أى حد

قسم التشريح مش بيهمه المصدر للى كتبت منه المعلومة وده الى حد ما كويس
بس يهمهم المعلومة صح ولا لا


التشريح لازم بتذاكر كتابة ورسم
يعنى ترسم الرسومات للى تقدر عليها طبعا وتكتب لأن فيه كتير مصطلحات لاتنية

بس مع التكرار هتلاقى نفسك بتفك شفرة المصطلحات بلمح البصر





انا كدة تعبت وهنكمل المرة الجاية مع البيو (مش عارف قلبى مقبوض ليييه ؟)

يتبع

الحياة مش كلها اختبارات ........لا فى امتحانات برضه

دلوقتى دور الكيمياء الحيوية biochemistry

أول حاجة هتسمعها عن المادة دى انها زفت وبنت سيتن تييييت ووووو

وهى فعلا كذلك ولكن

كل للى قالك عليها محدش فهمها صح

مادة البيو من أسهل و ألذ المواد على الاطلاق بس لو فهمتها صح

مادة البيو مهما كنت متأخر فيها ممكن تتلم بسرعة (لو فمتهما صح برضه )


فائدة مادة البيو هى للى عايز يشتغل فى مجال تحاليل الطبية (الكلينكال باثولوجى) وكمان مهمة فهم مادة الفارما (علم الأدوية)


المادة ده عليها 150 درجة أولى 150 درجة تانية (مادة صغيرة)


التوزيعة كالتالى

75 امتحان فاينال
25 امتحان اعمال السنة
25 شفوى
25عملى مفيش امتحانات دورية فى المادة دى (على الاقل فى سنة أولى)

بندرس ايه

كيمياء الجسم وتذكر الكلمة كيميييييااااااء لأان دراسة الكيمياء غير الفسيولوجى وباقى المواد

فرع من الكيمياء العضوية بس أصعب بكتير من الثانوي خلى بالك وركز وعايزة تركيز جامد

عايزة تركيز جامد + حفظ جامد +فهم جامد

بمعنى فى حجات تتفهم وحجات تتحفظ وحجات لازم تفرق بينها وبين بعضيها

مشكلتنا كطلبة طب اننا للأسف ممكن متعرفش ايه للى يتحفظ وايه للى يتفهم وايه وايه وايه

خلى بالك المادة دى كفيلة أنها تكرهك فى كلية الطب كلها علشان كدة لازم تفهمها صح والا هتلعن اليوم للى شفت فيه الكلية ده والمادة ده


طيب سيبك من كل ده

ونجى لفروع المادة


هناخد فى سنة أولى
1-proteins
2-carbohydrates
3-lipids
4-molecular biology
5-vitamins
6-enzymes
7-free radicals and antioxidants
8-immune chemistry
9-hemoglobin
10-physical chemistry



ركز بقى معايا

المحاضرات :3محاضرات فى الاسبوع (كل واحدة ساعة _قابلة للزيادة الى محاضرة أخرى )

السكشن :واحد فى الاسبوع




1-proteinالبروتنيات

مبدئيا لازم تعرف ان جسمك كيميائيا متكون من بروتين وكربوهيدرات ودهون (ليبيد)

دول مكونات جسمك وكمان هما الطاقة بتاعته يعنى جسمك بيستخدمهم برضه للطاقة بس بأولويات

يعنى الأولوية للكربوهيدرات وبعدين اللبيد وبعدين البروتين

وبالتالى أنت هتدرس البروتينات وأساسها وهوالحمض الامينى

هتدرس خصائص الحمض الامينى وشوية أحماض امينية لازم تحفظهم وهما

1-valine
2-leucine
3-isoleucine
4-theroine
5-methionine
6-cysteineوأخوه cystine
7-tryptophan
8-phenylalanine
9-histidine
10-glutamic acid
11-arginine
12-lysine


دول الأحماض الأمينية للى تتحفظ بس وغير كدة وحتى ولو موجود ىف الكتاب سيبك منه اعرف بالاسم بس (الا لو الدكتور قال على حجات معينة )

خلى بالك الجزء ده فى اسماء كتير متشابهة ولذلك الكتابة هى الحل الامثل فى الحفظ

ومش كدة وبس لازم الخرائط الذهينة والروابط العقلية (يمعنى أخر التحشيشات )

يعنى مثلا تحفظ بأغنية أو مثل شعبى أو رسمة معينة تفكرك بيهم كل ده مهم والا هتنسى بسرعة البرق


هتدرس بعد الحمض الامينى والرغى بتاعهم
هتدرس البروتين وتصينيفاتهم وخصائصهم وغيره وغيره

وكل بروتين بيخش فى ايه وأنواعهم كمان



لو شرح الدكتور عاطف البرانش ده نصيحة (فر منه فرارك من الأسد أو من أبوك يوم النتيجة)

وهنتكلم على موضوع الكورسات بعدين



2-carbohydrates

برانش حلو ولذيذ كله سكريات وحجات حلوة

بس خلى بالك البرانش ده بالذات لازم متابعة ومذاكرة أول بأول لأنه رخم جدا

كل تركيبات المواد للى فى البرانش ده لازم تتحفظ ويتحفظ الأساس بتاعها كمان

هتلاقى كمية مركبات كتير وغريبة وكل شبه بعضه وطبعا لازم يتحفظ كل ده



الحل :نفس الحل السابق
وكمان زود عليهم أنك تحفظ بفهم

يعنى تبقى عارف المركب ده اساسه ايه (مثلا الجلوكوز من عيلة الألدهيد فتبقى عارف هترسمه ازاى انما الفركتوز من عيلة الكيتوز فتبقى عارف هترسمه ازاى )
وتبنى المركب على الأساس ده



فى الغالب لو شرحته الدكتور مديحة احضر وخلاص
ليه؟ شرحها الى حد ما كويس غير أنه بتاخد غياب ف ىالمحااضرات وكمان بتنقص درجات للى مبيحضرش

فاحضر وخلاص



3-lipid الدهون يعنى

برانش تافه جدا لو اتفهم كويس وممكن يتلم بسرعة

بتدرس الكحولات والأحماض الدهنية (للى أخدتها فى الثانوى بس على توسع جامد)

وبتدرس الدهون وأنواعها وكمان بتدخل فى تركيب ايه (يعنى مثلا lecithinبيدخل فى سوائل الرئة المعروفة باسم surfuctant وهكذا )


بيشرحه الدكتور عثمان وشرحه ممتاز وكمان بيلغيلكم حجات فى الاخر


البرانش ده حرام تضيعوا نفسكم فيه



4- molecular biology

البيولوجيا الجزيئية (هييييييه خدناها فى ثانوى )
متتسرعش البرانش ده من أصعب برانشات البيو كلها وكمان تعقيد ملوش حل

البرانش ده للفهم الجامد جدا

وكمان اغلس مافيه اسماء الانزيمات الكتير للى شبه بعض
acyl transferase _ helicase - polymerase - rnase وهكذا



الحل :الانزيمات تتكتب --- اوعى تركن البرانش ده بالذات ولو ركنته دور على حد يفهموهلك كويس جدا

لازم الفهم فى البرانش ده لازم الفهم



بتشرحه الدكتور تحية :لو بتذاكرأول بأول احضرلها غير كدة بلاش صدقنى بلاش


ده بالذات هاتوا تسجيلات الدكتور مايكل لأنه أحسن واحد ممكن يشرحلك البرانش ده (مايكل بقى مدرس ومتقريبا معادش يدى مجموعات فى الكلية )


بلاش كتاب القسم فى البرانش ده بالذات (الا لو عدلوه أصلا بيعدلوه كل سنة وهات لك ورق الكورسات وخلاص)


بيتكلم البرانش ده عن الDNA وRNA من الالف للياء

بيتكلم عن القواعد النيتروجينية وكل واحد بتدخل فى تركيب كذا وبيعمل كذا


والقواعد النيتروجينة لازم تتحفظ major فقط (اوعى تحفظ الminor bases)



5-vitamins هتدرس الفيتامينات بقى وحركات

البرانش ده فى كلام كلينكال كتير و هتحس بقى أنك دكتور وكدة

وهتعرف كل فيتامين بيعمل ايه ولو نقص يعمل ايه و مصادره وهكذا


بتشرحه الدكتورة رجاء(الفيتامينات الذائبة فى الماء) وهى الى حد ما كويسة فى الشرح

أما الذائبة فىالدهون للدكتور حسنى (ده بقى اوعى تفوتوا محاضرة واحدة ليه لأنه هيطلعكم فاهمين ومبسطوين دكتور دمه خفيف جدا وكل محاضرته ضحك وفى نفس الوقت فهم برضه)


أيوة صحيح نسيت أقول

الفيتامينات عيلتين كبار

عيلة الماء water soluble vit ودولB وC

عيلة الدهون fat soluble vit ودول A K E D



المركبات فى البرانش ده مش للحفظ والدكتورة هتقلكم الكلام ده (متحفظش الصيغة الكيميائية بتاعت vitamins)



6-enzymes

برانش مافيهوش أى مركبات وحلو جدا

برانش للفهم مش للحفظ

لو فهمته هتحل فيه زى العسل

بتشرحه الدكتور منال (شرحها حلو بس صعبة فى الاسئلة وبتنفخ جامد )

بيتكلم عن الانزيمات والتصنيفات العالمية واسمائها ازاااى؟ ليه قواعد طبعا

وكذلك العوامل المؤثرة على كل انزيم

ومنشطات الانزيم ومثبطاته


وغيره وغيره
البرانش ده مهم يتذاكر لأنه مهم جدا فى سنة تانية (كل للى تانية مذاكرهوش رجع يذاكروا تان)




كده خلصت البرانشات الكبيرة

أما الباقى برانشات صغيرة ومفيهاش كلام مهم يذكر صراحة







بالنسبة لكتاب القسم للأسف سئ
ممكن تستعين بورق كورسات أو تعتمد على المحاضرات وتشطب الكلام للى مش مهم (أنا عملت كدة بس للأسف صعب )

الحل الامثل تشترى كتاب سعيد عرابى الجزء الأول والثالث (واحد برتقالى وواحد أخضر )الاخضر على فكرة مش هتحتاجه كله


ورق الكوسات فى رايى كويس برضه



ناخد عند مين
1-مجموعات الكلية
كويسة بس للاسف كان بيشرحها مايكل وطبعا السنة دى اترقى

ممكن يجى دكتور تانى وانتم وحظكم بقى
صراحة للى يفوت شرح مايكل خسارة جامدة جدا


2-برة الكلية
عند معيد فى صيدلة اسمه محمد عامر

بس شخصيا منصحش بيه لأنه بطئ فى المنهج

الا أنه بيشرح كويس

أو ممكن عند د عثمان بس خلى بالك بيدى ب1000 ج فى الترم
وهو كويس برضه


او تريح خالص فى بيتك وتسمع محاضرات الدكتور رشيد
أو تسجيلات مايكل

بس كدة






نيجى للعملى

عملى المادة سهل وحلو جدا

وهو عبارة عن الكشف عن مادة


هيجيبللك مادة والمطلوب منك تعرف هى ايه ؟ بروتين سكر

بشوية تفاعلات

عارف الأفلام للى بيجيبلك مادة غريبة ليها لون معين وفجاة يحط مادة وتلاقى لونها تغير كالسحر
أيوة هيحصل كدة بالضبط


هتعرفوا تفاعلات البروتين والكربوهيدرات وازاى تفرقوا ما بينهم

طيب هحتاج ايه ؟

أدوات معمل ب 20 ج

أنابيب اختبار
فوطة
ماسك
حامل انابيب
نظارة
وجوانتى




خلى بالك فى أول سكشن هيعلموكم تعليمات السلامة وغيره
لازم تاخدها على محمل الجد
لأنت عتتعامل مع نار وأحماض وغيره فخلى بالك




امتحان العملى بقى مفاجأة

ده مش امتحان أصلا

الامتحان بيسمحلك تخش بكتاب العملى وبأى ورق أنت عايزه ده غير الدكاترة نفسهم بيساعدوك


وحتى لو غلطت
المعيد مش هياخد منك الورقة الا لما تصحح غلطك




طيب وكتاب العملى ؟
كتاب بتكتب فيه كل الاختبارات للى عملتها وليه وايه للى خلاك تقول مثلا أن ده بروتين
وهو ده برضه للى هتكتبه فى امتحان العملى






بالنسبة لشفوى المادة دى

مش هكدب عليك الكوسة فيه أحلى ماتتوقع بس انت ذاكر وملكش دعوة خالص

وعلى فكرة الشفوى فى المادى بيبقى سهل جدا










كدة خلصت البايو

المرة الجاية الهيستولوجى

بعتذر لو فى اخطاء املائية
علشان كنت بكتب بسرعة وكمان الكيبورد بايظة


يتبع

مش كله ضرب ضرب ..........لأ فى شتيمة

الهيستولوجى (علم الانسجة والخلايا)

مادة أقل وصف ليها (نار الله الموقدة)


نصيحة خلى عندك شماعة (قصدى مسوغ لدخولك الكلية دى )

يعنى مثلا أهلك صحابك كدة

علشان المادة دى حتخليك تعلق كل لعناتك وغضبك عليها وبكدة متحسش بالذنب
وتحس أنك دخلت الكلية غصب عنك (مش انتم غصبوتنى استحملوا بقى )


مبدئيا المادة دى رخمة جدا جدا

كلها حفظ فى حفظ

مفيش فهم حتى

لازم تتذاكر أول بأول والا أنت عارف

المادة مبتتلمش بمعنى أى تأجيل ليها هتشيل يا عينى (وطبعا لما أهلك يشوفوا أول فشل ذريع ليك هيزعلوا جامد )


ملهاش أى لازمة فى حياتك العملية بعد كدة
اللهم الا موضوع البحث العملى والسرطانات والحقن المجهرى وغيره من المواضيع للى مش بنسمع عنها الا فى الدول المتقدمة بس غير كدا
ملهاش لزمة

بس الحق يقال أسهل مادة تجمع فيها درجات (أنا نقصت أربع درجات بس)

ومادة امتحاناتها بتيجى من الكتاب يعنى مفيش لف ودوران كتير



المادة دى عليها 150 درجة فى أولى وزيهم فى تانية

التوزيعة

75 امتحان فاينال
20 امتحان أعمال سنة
10درجات امتحانات دورية
15 درجة امتحان رسومات
10درجات كتاب عملى
20امتحان عملى




طيب ايه فروع المادة دى

البرانشات الكبيرة هى
1-cytology علم الخلية
2-general histology وده علم الأنسجة العام بتدرس الأنسجة الأربعة للى أحنا عارفينهم
3-special hisology وده بيدرس الأعضاء وترتيب الأنسجة بينهم (يعنى مثلا المعدة بتتكون من نسيج طلائى وعضلى ومرتبين ترتيب معين )




أولا وقبل كل شئ انت بتدرس مقدمة
كلام عن الميكروسكوبات والضبغات وازاى نحضر الشرائح وفكرة عمل كل ميكروسكوب

كلام مش بتتسال فيه بس مهم علشان للى جاى (وعلشان متفضحوناش فى المعمل وانتم مش عارفين تظبطوا الميكروسكوب )




وأول برانش معانا
1-cytology

بتدرس الخلية من الألف للياء

بتعرف أحجامها وأعدادها والخلايا للى بتنقسم وللى مبتنقسمش وتبدا تدرس كل تفصيلة فى الخلية

من أول الغشاء البلازمى plasma membrane الى اأخر النواة nucleus

بتتعرف على مراحل الخلية وبتعرف كمان موت الخلية وأنواع موت الخلية

برانش كبير جدا وفيه مقارنات كتير جدا جدا

على فكرة المادة دى مهم فيها الصور ولازم تكون ملونة وواضحة (ونفس فكرة الاناتومى احفظ الصورة بس المرة دى لازم تحفظ الكلام معاها ولاا هتضيع ووديع)


بتدرس مكونات السيتوبلازم وأنواعها وبتظهر ازاااى تحت الميكروسكوب

لازم تقول كل موكن منهم تحت الميكروسكوب الضوئى والميكروسكوب الاليكترونى

كل الهيستولوجى كدة LM ميكروسكوب ضوئى , EM ميكروسكوب الكترونى وتصوف كل واحدة فيهم



2- genreal histology علم الانسجة العام

هتدرس الانسجة المختلفة للجسم

للى هم
1-النسيج الطلائى epithelium

2- النسيج الضام وانواعه connective tissue

نسيج العضم bone
العضروف cartilage
الدم blood
النسيج الضام الأصلى CT proper

والأنسجة الضامة الدهنية adipose tissue

3- النسيج العضلى muscular tissue
انواع العضلان وغيره وغيره

4- النسيج العصبى Nervous Tissue


هتدرس كل نسيج من حيث النشاة والخلايا بتاعته وبيظهر ازاااى تحت كل من الميكروسكوبين

وكل خلية شكلها ازاى تحت الميكروسكوب الضوئ والاليكترونى

وطريقة التجديد بتاعت اذا كان بتجدد أو لا
وازاى الخلية بتموت




3-special histology علم الانسجة المختص

هتدرس انسجة جسم الانسان
هتدرس كل جهاز system وكل عضو والتكريب بتاعه ايه

مثلا المعدة كما ذكرنا سابقا
الجدار بتاعها

مكون من الأتى
نسيج ضام من برة
وبعدين 3 طبقات من النسيج العضلى وبعدين نسيج طلائى

طبعا ده كلام مبسط جدا جدا

الحقيقة أعقد من كدة بكتير جدا

هتدرس بس فى سنة أولى من ال special histology جهاز الاوعية الدموية vascular system

مثلا جدار الاوعية الدموية متكون من ايه

مش بس كدة هتدرس كل شريان وكل وريد نظامه ايه
مش كدة وبس هتدرس الشعيرات الدموية وتركيبها الدقيق وأنواعها (مش كلها زى بعض )


وهتدرس برضه الجهازالليمفاوى والجهاز المناعى
immune and lymphatic system
وده أرزل وأغلس برانش عندك فى أولى كلها


بالذات البرانشين دول اوعى ترميهم ل
أنهم تقال وصعبين جدا وعاوزين اكتر من مراجعة







مادة الهيستولوجى من أسوا مافيها أنه زى السبيرتو
تذاكرها من هنا وتطير من هنا ولازم تتراجع مرة واتنين وتلاتة واربعة وخمسة وستة

على عكس باقى المواد ممكن تكفى مرة واحدة بس







بالنسبة للكتب كتاب القسم ملون وجميل جدا
ممكن تستعين بكتاب زكريا حلوة برضه


المحاضرات كويسة والدكاترة بتعرف تشرح الى حد ما

بس ابعدوا عن اتنين
د نشوى بتاعت الblood
د كوثر immune

بجد هتندم لو حضرت للاتنين دول




محاضراتها مرة واحدة فى الاسبوع بس
وسكشن واحد بس







العملى بقى


عارفين شرائح الميكروسكوب الضوئى للى فى النظرى ؟

هنخدها فى العملى ونرسمها كمان (فى كتاب العملى)


هاحتاج ايه ؟ كراسة رسم والوان فابر كاسيل (أم 12 جنيه ؟)
أيوة أم 12 جنيه لأان فيها لونين معينين هتحتاجهم مش هتلاقيهم الا فى فابر كاسيل


نرجع لموضوعنا :
زى ماقلت ختاخد الشرايح وتشوفها بعينك تحت الميكروسكوب وترسمها فى كتاب العملى (بيشددوا على البالطو جامد فى معمل الهيستولوجى )


الحاجة الأسوا فى عملى هذه المادة هو الرسم

أنك هترسم الحاجة يجى 7 مرات وفى الأخر تيجى معيدة تقولك (رسمك غلط عيد من تانى )

ولا والاحلى الرسمة الواحدة بتاخد ساعة بحالها فيه كمان ؟ لسة

وكمان كل واحدة ليها رايها الخاص (مثلا دى تقولك رسمك حلو وتمام تيجى واحدة تانى تقولك لا عيد رسمتك الرسمة غلط)


فى الاخر هتشد فى شعرك ويجيلك تساقط شعر أو صلع







فى مشكلة اخرى (ايه تانى؟)

الشرايح للى فى المعمل مش سهل التعرف عليها كدة
لا لازم تشوفها مرة واتنين وتلاتة علشان تثبت فى دماغك

وكمان اغلب شرايح المعمل بايظة (والحل ؟)


تستأجر علبة الشرائح من عند فنى المعمل ب50 ج للسنة
مش لوحدك لازم على الأقل 2- 3 معاك

الشرائح للى بتأجروها دى نظيفة جدا وكمان تقدر تشوفها فى أى وقت وبراحتك بدون هبل ومزاحمات السكشن

ولو معاك ميكروسكوب تقدر تاخدها معاك البيت
لو معكش تسيبها عند فنى المعمل (ليه رقم معين لازم تحفظه )
ولما تجحب تراجع فى أى وقت فاضى عندك تروح له وتقول عايز العلبة رقم كذا

هيديلك ميكروسكوب وتراجع براحتك

لازم طبعا تكون بتعرف تظبط الميكروسكوب







طيب امتحان العمل نظامه ايييه ؟


امتحان العملى بيجيلك شرايح ومطلوب منك
تكتب اسم الشريحة
الصبغة
ومكانها فين الجسم وكل ده خلا ل دقيقة

طبعا بيبقى عندك 10 شرائح كل دقيقة بتخلص واحدة وتروح للى بعديها






طيب وامتحان الرسومات ؟

ده امتحان للشرايح للى رسمتوها فى كتاب العملى

بمعنى مثلا هيقولك ارسملى الشريحة كذا ولنقل مثلا شريحة الغدة الليفماوية

أو شريحة الغضروف وهكذا


بيجيلك 3 شرائح مطلوب ترسمهم فى ساعة واحدة وبالألون طبعا ومن دماغك (يعنى خلى بالك مش هيكون معاك الأطلس أو الكتاب زى ماكنت بتعمل فى المعمل )



فتدرب على رسمهم كويس جدا وكمان مذاكرة النظرى مهمة لانه مربوطة بالعملى (أنت بترسم الكلام النظرى للى بتدرسه)





بالنسبة للشفوى عندنا مفيش أى كوسة المرة دى

انت بتدخل عند الدكتور وبتختار كارت فيه أسئلة بتجاوب عليها وبس





كدة الهيستولوجى خلص

المرة الجاية نتكلم عن التقديرات والمذاكرة وأهميتها




يتبع

أنا حاسس أنى بشرح لنفسى مش عارف ليه ؟


خلاص بلاش أكمل أحسن

لالا كمل يا دكتور .. انا صدقت ما لقيتك :d

كمل يا دوك .. كلنا وراءك

كويس طالما حد رد يبقى نكمل


قبل الكلام عن التقديرات أو المذاكرة هتكلم عن مادتين تانيين مش بيضافوا للمجموع


هما English , Computer



المادتين دول نظرى بس

يعنى تمتحنهمن أخر السنة وخلاص

كل واحدة عليها 50 درجة


لا يضافوا الى المجموع


كل واحدة محاضرة واحدة فى الاسبوع


فى الغالب بتحضر أول محاضرتين تلاتة من كل مادة

الدكتور هيقولوكم على الملخص ويقولوكم تيجبوا الكتاب منين

وأنا هقلكم برضه



نبدا بالانجليزى

عندك فيها 5 فروع

فرع المصطلحات الطبية medical terms

وده للى يهمنا لأنه فيه المصطلحات والاختصارات الطبية

سهل جدا لان الكلام أنت بطبقه وبتدرسه يعنى عايش معاك

يتذاكر من الكتاب




2الكتابة writing

هنكتب براجراف زى الثانوى
بس بأسلوب صح (لأن أسلوب الثانوى كان غلط )

وهنتعلم ازاى نتكتب التقارير العملية والأبحاث

كلام فاضى

3القراءة reading

قطعة عن كلام علمى وطبى وبتحل عليه زى امتحان الثانوية بتاعكم


4-قواعد grammer

نفس قواعد الثانوى
لو انت شاطر فيهم هتعدى زى السكينة فى العجينة


5-puncuation

كلنا عارفينه بس المرة دى جد الجد



كل فرع من دول عليهم 10 درجات فى الامتحان





أهم حاجة تشتروا الكتاب وملكوش دعوة بالباقى (ونذاكر المصطلحات الطبية )

دعبير بتحددهم لك وبتقول دول هيجى منهم كذا وعملية أخر حلاوة





كتاب المادة دى يتجاب منين .؟

الصورة موضوحة

تمشى فى الشارع الطويل اما م الكلية الى ان تصل للاستاد

تمشى فى الشارع المجاور للاستاد الى ان تصل الى بوابة مفتوحة وبها لافتة (معامل اللغة الانجليزية )

اسال عن الكتاب

http://im78.gulfup.com/teNylz.jpg

http://im78.gulfup.com/teNylz.jpg




نيجى بقى للحاسب

مادة بتتكلم عن الكمبيوتر وغيره وغيره و

بتتكلم عن استخدامات الكمبيوتر فى المجال الطبى واهيمته وكدة يعنى

الدكتور بتاعها بتغير كل سنة

يبديها دكتور من كلية حاسبات قسم علوم الحاسب (ركز حاسبات مش هندسة)

الكتاب يتجاب برضه من حاسبات
من المبنى الملون بالأسود فى الصورة

تدخل فيه وتسأل عن وحدة النشر


http://im66.gulfup.com/0Rjlot.jpg

http://im66.gulfup.com/0Rjlot.jpg


المادى قبلها حوالى 5 ايام تذاكرها فيهم كويس لان امتحانها يبجى امتحان امتحان


بتتكلم برضه عن الأنظمة العددية الثنائى والعشرى والثمانى والسادس عشر

نفس كلام الالكترونيات بتاعت الفيزياء الحديثة فى ثانوى بس على توسع



حاول بين كل أسبوع وأسبوع انك تقرا فى المادة علشان متشيلهاش




ونكرر تانى مش بتضاف للمجموع









تذكير هام

فى سنة تانية بتاخد بدل دول

علوم سلوكية وانسانية(تضاف للمجموع )50درجة

أداب مهنة (لا تضاف ) (استبدلت حديثا مكان حقوق انسان)





بس كدة النهاردة ونتكلم المرة الجاية عن التقديرات والمذاكرة

يتــــــبــــــــع

طيب ودلوقتى التقديرات

أولا التقدير فى كلية الطب تراكمى بمعنى يتم جمع مجموع كل السنين على بعض

درجات أولى طب 800 درجة
تانية 850
تالتة 950
رابعة يمكن 1000 أو 950 برضه
خامسة 1400

ساتة 1400





خلى بالك بقى

الامتياز من 85% فما فوق
جيد جدا 75%:85%
جيد 65%:75%
مقبول من60%

وما تحت ال 60% يعتبر راسب (يعنى النجاح من 60 % )


بس اوعى

اوعى تفتكر أن الامتياز سهل على العكس انت كدة وقعت فى أول الفخ

فى الكلية عندنا فى درجات كتير بضيع منك وامتحانات كتير

ولما يتجمعوا فى الأخر بتلاقى نفسك ضاع منك كتيييييرر

الامتياز مش سهل ابدا وعايز مذاكرة كويس وخلى بالك برضه انه مش صعب

الصعب فعلا فى كليتنا ان ترتب على الدفعة وده بقى للى فعلا عايز مجهود عنيف



طبعا تلاقى واحد يقولك يا عم انت فى طب حلو قوى جيد كل سنة

هأأأأأأوووو

لا يا حلو
التقدير فى كلية الطب مهم جدا
لأن ده هو للى بيسمحلك تختار التخصص

عارف تنسيق الثانوية العامة ؟هو ده بالضبط


ممكن تقديرك يمنعك من أنك تختار التخصص للى انت عاوزه وبالتالى تشوفلك حاجة تانى

وكمان حاجة


أن التقدير بتاعك بيسمحلك تختار المكان للى هتشتغل فيه بعد كدة

بمعنى لو مجموعك حلو بتشتغل فى الحتة للى أنت عايزها

لو مجموعك زفت بتشتغل فى الحتة للى عايزاها الحكومة (وطبعا بتروح أخر الدنيا وتلف ويبقى حالك يصعب على الكافر)


عرفت ليه دلوقتى أن المجموع مهم

فيه سبب أخر ألا وهو اسمه metacognition

معناه ايه ده ؟ معناه التقييم الذاتى (مش فاهم؟) انا اشرحلك

زمان لما كنت فى المدرسة كنت لما تدخل امتحان وتطلع منه كنت على الأقل عارف أنت هتجيب كام تقريبا

وكانت النتيجة مشابهة للواقع صح؟

يعنى مثلا كنت تقول انا هقفل المادة دى وفعلا كنت بتقفلها

الكلام ده مش فى الجامعة

أنت ممكن تدخل امتحان وتحل فيه وتطلع تقول انا مقفل الامتحان

تلاقى نفسك ضايع منك درجات كتير على غير المتوقع (بس على الأقل انت مش هتسقط مثلا)

وممكن تلاقى العكس


وده حصل معايا على فكرة

فى مادة البايو كنت حالل كويس جدا ولقيت نفسى ناقص 18 درجة (على فكرة 18 درجة تبوس ايدك وش وضهر)


فى حين أن مادة الهيستولوجى كنت فاكر أنى حالل وحش ولقيت نفسى ناقص 4 درجات بس


عرفت ليه بقى

فى الكلية مفيش حاجة اسمها اذاكر عشان اجيب جيد مفيش حاجة اسمهاأذاكر علشان اجيب امتياز

فى حاجة اسمها أذاكر المادة وأتحكم فى كم المعلومات للى معايا


انت فى الجامعة عندك كم هائل جدا من المعلومات

منهج أولى طب مقارنة بمنهج ثانوى

زى ما تقارن سنة بيوم واحد بس

أنت متخيل كلامى؟ يعنى منهج الثانوية يتذاكر فى يوم واحد مقارنة بمنهج طب


الأمر مش سهل زى ما انت متوقع علشان تقول أجيب جيد أو جيد جدا





ده بقى بخلق ضغط نفسى وعصبى عشر أضعاف الثانوية


وتلاقى نفسك فى الأنشطةاليومية العادية بتأنب نفسك أنك مش بتذاكر

وياسلام بقى لو شيلت (لاقدر الله) تقعد تأنب نفسك اكتر

ومش اكدب عليك أن أغلبنا عنده اكتئاب فعلا





وطيب والحل ؟


ايجاد منفد لنفسية كويسة

يمعنى أنك تلاقى حاجة لما بتعملها تخليك مبسوط جدا
وبالتالى ترفع من نفستيك


حاجة كمان

نذاكر بضمير وافتكر انك فى يوم من الأيام هتشيل مسئولية مريض

ولو مذاكرتش كويس تبقى بتاخد ذنبه










احب كمان أقول حاجة

الامتياز مش حاجة فى كليتنا

بمعنى انا دفعتى جايبين 140 واحد امتياز من أصل 500

بمعنى النجاح الحقيقى فى طب هو أنك تنافس كل ده








كدة خلصنا

المرة الجاية عن المذاكرة وشوية رغى بس مفيد بالنسبة لكم

يتبع

نيجى بقى للذاكرة والامتحانات

فى سنة اولى هتواجه الامتحانات كالتالى


فى شهر 11 أى بعد شهر أو اتنين دراسة

كل مادة هتعمل امتحان (البايو فى الأغلب لا)

المتاحن يااما 10 درجات وبيتقسم

أو 5 ومش بتقسم



خلى بالك متستخفش بالامتحانات الدورية دى
لأن زى ماقلنا كله بيتجمع فى الأخر



أغلب المتحانات بتبقى MCQ

امتحان اختيار من متعدد

بتاخد ورقة أسئلة وورقة اجابة

ورقة الاجابة بتبقى كلها دوائر (ايه الدوائر دى؟)


الدوائر دى هى الاختيارات للى ورقة الأسئلة وأنت بتظللها


لأن الامتحانات دى بتتصحح بالكمبيوتر

فركز وانت بتظلل لو سمحت

خلى بالك بقى أنت كمان بتظلل رقم جلوسك فيها (أصل الكمبيوتر برضه هو للى بيحط الدرجة)






بس ممكن (زى الهيستولوجى ) تبقى Short notes

ودى أسئلة زى (اكتب نبذة مختصرة عن )

ومطلوب منك تكتب وترص كل للى تعرفه
وطبعا بتعمتد على الحفظ والمذاكرة أكتر من الفهم (على عكس الMCQ)






طيب وهنلحق نذاكر ؟

صحيح نسيت أفكرك ان أنت أول شهرين بتقى تايه ومش عارف تذاكر
وطبعا هتلاقى نفسك كل يوم بيتراكم عليك كمية كبيرة جدا من المناهج ومش عارف تذاكرها


فالحل كالتالى

تذاكر الجديد وسيبك من القديم

ممكن تذاكر القديم فى الWeek end

بس كدة هتضطر تحرم نفسك من أى حاجة ترفيهية خالص (وده للى هيحصل )

حتى أهلك هتنسى شكلهم (معلش مش فى طب تبقى تستحمل )



كمان حاجة

الدكاترة بيحددوا للى داخل فى الامتحان بالصفحات يعنى اطمن (بس أهم حاجة تذاكر) ده لو عرفت تذاكر وقتها (أصل الكلام سهل انما الفعل ......)


طيب بعدين بيجى امتحان أعمل السنة (مش نص السنة )

لأن أنت السنة كلها على بعضيها ومفيش فواصل (منهج الترم الاول مع الترم التانى فى امتحان واحد )

امتحانات أعمل السنة كويسة
بس للأسف كمية للى داخل فيها من المنهج بيبقى كبير جدا
وكمان الوقت بيبقى ضيق لكنه كافى

وفى هذه الحالة تعمل زى الثانوية العامة أخر شهر


اطحن نفسك مذاكرة ومفيش حل غير كدة (طبعا مش هنكر هتشتم الكلية وللى خلاك تخشها )


امتحانات أعمل السنة كلها MCQ(عدا البايو بيبقى فيه SHort notes)


بعدها بناخد اجازة نص السنة

نصيحة بقى

اوعى تريح الاجازة كلها لا
لازم تذاكر المتاخر عليك من الترم الأول (متأخر؟)

أيوة متاخر أنت فاكر نفسك انك زى الثانوى هتدخل الامتحان مخلص للى وراك ؟ هأأأو وقابلى لو حصل

ممكن لو عصرت نفسك مذاكرة بس خلى بالك ممكن تتعب نفسيا جامد وبدنيا كمان



علشان كدة معلش ضحى باجازة نص السنة
ولسبب اخر أنك لما تدخ الترم التانى

هتلاقى الكمية زادت أضعاف الترم الأول وهتلاقى نفسك بالعافية ملاحق المحاضراتا والساكشن ولو ملحقتش تلم المناهج قبل شهر 3 أو أربعة
يبقى قول على نفسك يارحمن يا رحيم

طيب ليه كدة ؟


لان من أول شهر تلاتة هتبدا امتحانات دورية وامتحانات العملى وشوية امتحانات شفوى

كل مادة كدة وأول متخلص من الامتحانات هتلاقى نفسك طرااااااااااااااااااااخ
امتحانت الفاينال على الابواب ومش باقى الا أسبوعين بس


طيب والحل ؟

قلنا نستفيد من أجازة نص السنة كويس ونخلص المتاخر علينا

كمان فى الترم التانى نذاكر أول بأول واوعى نكسل ونقول (هذاكر المحاضرة دى بكرة صدقنى هتندم جامد)

كمان ياريت فى الترم التانى تحاول تحسن نفسيتك
لانك هتقعد تمتحن من أول شهر تلاتة لغاية شهر 6

وأنت قاعد تذاكر وتمتحن (لدرجة انك هتنتحر وتموت من الملل وده حصلى)


الحل ؟ االصــــــــــــــــــــــــــــبـــــــــــــــــ ـــــــــــــر




طيب نكمل تانى



فى الترم التانى من أول شهر تلاتة

الأقسام هتعمل امتحانات زى بتاعت الترم الأول وهتحددلك للى تذاكر منه بالصفحات كمان


وده كويس لو أنت متابع أول بأول

لو أنت من بتوع هلم فى الاخر وبتوع جيد (صدقنى هتلعن الكلية وأبو الكلية)

وطبعا كل الامتحانات ورا بعض (علشان كدة متريحش بعدالامتحان يا حبيبى ...لا تستعد للامتحان للى بعده حتى لو ماقالوش لأنهم ف ىالواقع بيحبوا يفاجئوك )



بعد الامتحانات دى

بتبدا امتحانات من نوع اخر

امتحانات التجهيز لأخر السنة




مثلا الفسيولوجى دايما بيعملوا امتحان شفوى

البايو بيخشوا على امتحانات العملى على طول


الاناتومى ملوش

الهيستولوجى امتحان الرسومات


ومتستقلش الامتحان دى عليه درجات وكتير برضه




وبعدين ؟



امتحانات العملى زى ماانت عارف

وبعدها تفاجأ بان جدول أخر السنة نزل خلاص ومش باقى غير أسبوعين او ثلاثة اسابيع

ومعاد امتحانات الفاينال ومعناه (المنهج كله معاك بقى)
أما الشفوى فبعدالنظرى على طول (وممكن يكون فى نفس اليوم )



فى الحالة دى لو متابع اول بأول (أحب اقول كذاكر كويس جدا هترتب باذن الله )

لو متابع نص ونص (ذاكر وهتجيب امتياز )

غير كدة (ذاكر وانت وحظك )





طيب لو سقطت يا دكتور ؟ (بعد الشر)

لو رسبت فى المادة نفسها وقليت عن 60%

هتمتحنها دور تانى فى سبتمبر ولو رسبت كمان هتدخل تانية ومعاك منهج أولى
يعنى تمتحن اولى وتانية فى مادة واحدة (مثلا فسيولوجى هتمحن منهج أولى وتانية معاك امتحان لكل منهج )

لو نجحت خلاص انتهت المشكلة

ده فى حالة أنك لو نجحت فى امتحان الفاينال بس قليت عن ال60%

طيب لو رسبت تحريرى



ده مشكلة بقى وده معناه هتطر تعيد السنة علشان المادة دى يا حلو









طيب انا سمعت عن حاجة اسمها تأجيل ايه ده؟


ده ياسيدى لو لا قدر الله حاسس نفسك مش هتقدر تخش الامتحان تروح شئون الطلاب وتدفع 100ج وتمتحن مع دور سبتمبر


مزاياه: تاخد درجتك كاملة على عكس التانيين مهما جبت تقدير فى المادة مش هيدولك اكتر من مقبول
عيوبه : الأجازة ضاعت

وغير كمان انك دلوقتى مش أى حد يأجل لازم بظروف قهرية


فعلشان كدة من الأول نذاكر ونلم نفسنا



خلى بالك السنتين دول بس للى فيهم فكرة أطلع السنة للى بعديها بمادة

لان موادهم زى بعض

غير كدة كل السنين مش هتطلع من السنة الا لما تخلص كل للى وراك









كدة خلصنا والباقى المرة الجاية بقى

يتبع

حضرتك تقدر فيدنا لو قلتلنا على اسم دكاترة نشوفهم على اليتيوب

فى مشاركة جاية ان شاء الله
بس انتم متستعجلوش من دلوقتى

المشاركة الجاية هتكون عن الانقلاب المفاجئ للمصطلحات و المفاهيم

للأسف أغلب الطلبة شايفين أنه هيستمر على نجاحه فى الثانوية العامة ومش مدرك أنك ممكن تفشل وتتحول ببساطة

من طالب ناجح الى فاشل (صدقنى حصل منه كتير فى دفعتى واحد كان أول ثانوية ودخل شال ال3 مواد )







هيكون فيها كلام جامد شوية

لو عايزين ممكن ألغيها وأريح نفسى

انتم ايه رايكم؟

موضوع جميل ومفيد ربنا يجعله ف ميزان حسناتك ..
عندي سؤال بس خارج موضوع سنة اولى .. ايه رايك ف الطلبة اللي خلصت اولى وحاليا بتخلص ف مناهج تانية قبل ما السنة تبدأ .. هو دا الصح وﻻ خليها ع الله والبداية مع اول السنة ؟

على العكس ده كويس وان كنت أنا شخصيا بفضل نريح فى الاجازة

بس ده افضل بكتير

هأحود شوية واتكلم عن ما بعد التخرج


بص يا سيدى أنت عارف مسار كليتنا ازااااى؟


بتقضى 3 سنين أكاديمى

و4سنين اكلينكال ( تذكير بس أن سنة خامسة سنة ونصف من الدراسة المتواصلة
سنة ساتة نفس القصة ومفيش بينهم اجازة)

وبالتالى تنشأ أسطورة السبع سنين


وبعدها سنة الامتياز

وبالتالى تكون قضيت 8 سنين فى الكلية



نيجى بقى للمهم

هنعمل ايه بعد كدة ؟ (لازم أعرف يا يعنى ؟ ماخلاص دخلنا كلية الطب وبعدين كل شئ بأوانه )

لأ ...غير صحيح لازم تحدد طريقك من دلوقتى
وهأقولكم جملة قالت لنا المعيدة عليها جملة مهمة جدا (لو انت مش عارف طريقك من دلوقتى .....هتبقى زيك زى أى دكتور اليومين دول .........لكن لو عرفت هتقدر تحدد أنت هتبقى ايه)


هنقسم كلامنا الى جزئين :1- أوائل الدفعة 2-مش من أوائل الدفعة


أولا :أوائل الدفعة (عندنا فى أسيوط بيكون أول 100 )

ودول بينقسموا لطريقين 1- أكاديمى 2-اكلينكال

الأكاديمى :الأقسام الأكاديمية زى (التشريح -الفسيولوجى-الباثولوجى-البارا -الفارما) بتطلب معيدين
طبعا مش كل الأقسام بتطلب ومش كل سنة

وخلى بالك بتطلب بمجموع معين (علشان كدة كلمتكم عن التقدير قبل كدة)

وعدد معين برضه

(هكلمكم عن العدد بعدين)


لو اختارت الأكاديمى بالتالى هيتم تعيينك كمعيد فى هذه القسم

وبعدين تحضر ماجستير وتبقى مدرس مساعد

ثم دكتوراه وتبقى مدرس وبعدين أبحاث لتصبح أستاذ مساعد ثم أستاذ


ده الأكاديمى (غالبا البنات بياخدوا الأقسام دى )



طبعا كل ده لا يمنع أن يكون لك تخصص اكلينكال تشتغل فيه
(مثلا الدكتور البدرى رئيس قسم التشريح عندنا تخصصه نساء وتوليد )



طيب الاكلينكال

الاقسام الاكلينكال زى(جراحة العظام -الانف والأذن -النساء والتوليد - الباطنة ....الخ)

بتطلب حاجة اسمها نواب (مش مثبت التعيين على العكس المعيد فى الأقسام الاكاديمى يبيقى مثبت)


بتطلب مجموع معين وعدد معين

زى الأكاديمى


طيب أنا فاهم فكرة المجموع زى تنسيق الثانوية العامة
ايه فكرة العدد ده ؟


شوف ياسيدى هاضرب مثال بسيط


دلوقتى قسم القلب والأوعية الدموية طلب مجموع معين تمام ؟

وطلب برضه عدد6 نواب

أول 6 نواب يكتبوا القسم ده فى رغباتهم هما للى يتعينوا


لنقل مثلا أنك أنت ترتيبك 19 على الدفعة تمام

وللى جايبين مجموع القسم حوالى 23 واحد تمام كدة ؟


فللى هيحصل كالتالى

جه الثالث وكتب قلب وأوعية دموية

وبعدين السابع (يبقى كدة اتنين تمام؟)

وبعدين ال10 وبعدين ال12 وال13 وال17

كل دول كتبوا التخصص ده وليهم أولوية المجموع عليك

يبقى كدة خلاص القسم قفل وملكش مكان تشوف لك مكان تانى


أظن كدة وصلت





مش كل الأقسام بتطلب ومش كل سنة ومش نفس العدد

على حسب حاجة القسم (ومزاج رئيسه برضه)







طيب فرضا أنك قبلت فى احدى الأقسام ولنقل مثلا الباطنة وبقيت اسمك نائب باطنة


كدة أنت متخصص غير رسمى (بمعنى أبسط بتتدرب على التخصص ده علشان تكون بعد 5 سنين أخصائى باطنة )

بيسموك مساعد أخصائى يعنى لسة بتتدرب





بتعمل ماجستير فى االتخصص بتاعك مدة 5 سنين

وبعدين؟


فيه احتمالين
الاحتمال أ :أنهم يثبتوك وتبقى مدرس مساعد فى القسم
كدة بقيت من أعضاء هيئة التدريس
وبقيت متخصص رسمى (بس لأانك متعين فى الجامعة متقدرس تفتح عيادة الا بعد الدكتوراه )
وده عيب من عيوبها وعيب كمان
ألا وهو تسلط الدكاترة الكبار عليك
ممكن يخلوك تسقط فى الدكتوراه حوالى 7 مرات (حصل بالفعل )
وياسلام بقى لو أنت بنت فى تخصصات مش للبنات (زى الجراحة )
قولى على نفسك يارحمن يا رحيم
فى التخصصات دى بالذات (وتخصص النساء برضه)
بيعاندوا فى البنات جامد جدا
ومش بيعلموها حاجة
ولو حبت تدخل عمليات مش بيخلوها
طبعا مفيش بنت بتستمر أو بتفكر أن تدخل أصلا من الاول
لو كملت (ده لو كملت أصلا بيسقطوها فى كل حاجة ماجستير أو دكتوراه أو أو





احتمال ب :لو لم تعين
فى هذه الحالة ترجع وزارةالصحة بقرفها وبنيلتها

بس ميزة أنك تقدر تفتح عيادة ومفيش تسلط عليك
بس للاسف بقيت زيك زى للى جاب جيد ومقبول وكأنك معملتش حاجة









ده طريق أوائل الدفعة من الأخر







طيب الطريق التانى ؟ طريق الخرجين العاديين

سيادتك بتقدم على حاجة اسمها التكليف فى وزارة الصحة


ايه التكليف ده بقى ؟

سنوات شغل اجبارى فى وزارة الصحية فى الوحدات الصحية فى القرى

أقل مدة هى 6 أشهر
أطول مدة هى 2 سنة



بتشتغل ايه؟ عارف دكتور ربيع ؟ بالضبط الدكتور بتاع كله

تكشف نساء -أطفال -جراحة .....الخ



طيب لغاية امتى ؟ الى أول 6 أشهر

هنا بقى بتيجى حاجة اسمها نيابات (زى نيابات الجامعة ) اسمها النيابات الملحة

تخصصات بتبقى الوزارة عايزاها بسرعة وبعدد وبالتالى تقدر تقدم على النيابات دى

خلى بالك بالمجموع والعدد برضه زى ماقولنا قبل كدة


مش هأكدب عليك غالبا مش بتقبل لأنه مجرد كلام روتينى مش أكتر




غير كدة بتكمل مدة سنتين


عيوبها : مستشفيات وزارة الصحة بتجيب المرض للمريض والدكتور مع بعض
بتبدا تنسى للى تعلمته
كل شغل ادارى


وانا كان تقدر تاخد التخصص للى أنت عايزه الى حد ما لأن التقدير بتاع وزارة الصحة بيبقى منخفض


وبتقدر تربى زباين كويسين لو شاطر يعنى



طيب ومكات التكليف بتحدد ازاى ؟ بتقديرك برضه



وبعد التكليف ؟


بتيجى النيابات بتاعت وزارة الصحة وبتقدم لها وتقعد 3 سنين زى أو اربعة فى التدريب على التخصص


مش هكدب برضه وهأقول أنهم بيسقطوا كتير دلوقتى من دكاترة الصحة



لأان للى بيمتحن الماجستير هما الجامعة وانت عارف دكاترة الجامعة الكبار





فى الأخر مقارنة سريعة بين الاتنين (الصحة والجامعة )




الجامعة : مزايا : تعليم كويس (مش كل التخصصات خاصة النساء )
بتحصل على مرتب من الجامعة كويس الى حد ما ولو بقيت استاذ بتبقى كويس جدا
زبائن مجانيين لعيادتك حيث أن الناس أغلبه بتروح للاستاف وكمان بتبقى عيادته محجوزة لشهرين قدام
(مش كله كدة بس الغالبية كذلك)
بتشرف على تعليم الطلاب وده حلو برضه
لو عملت زمالة أو شهادة أجنبية جنبيها بتبقى لوز اللوز
عيوب : تسلط الدكاترة والأساتذة الكبار (وخاصة مع البنات اكتر )
فى بعض التخصصات وبالذات النساء والتوليد الصحة بتكون أحسن فى التعليم منهم
مش بتقدر تفتح عيادة الا بعد الدكتوراه
انعدام الضمير فى الشغل (حيث ؟أن أغلبهم ونتيجة لتسلطهم ممكن تتحول لواحد منهم مجرد دكتور شجع لا يهمه صحة مرضاه وللأسف غالبيتهم كذلك لا القليل )
للأسف بتترفع قدامك قضايا كتير بسبب النواب للى ممكن يعملوا حاجة غلط لأنك مسئول عنهم




الصحة : مزايا: تقدير التخصصات أقل وبالتالى تقدر تاخد التخصص للى بتعمله



تقدر تربى زبائن أحسن من أآآ ستاف ولو شاطر وليك سمعة بتكسب أكتر من الاستاف نفسه
مفيش تسلط عليك من حد (اللهم الا المديرية والكام الادارى)

تخصصات النساء وبعض تخصصات الجراحة أحسن بكتير من الجامعة


عيوب: للأسف بتنسى الطب
مرتب قليل جدا ىف المستشفيات
الكلام الادارة يخنق ويبيجب الشلل

تعليم زفت ومش هكدب عليك
الشهادات الاجنبية مش مفيدة قوى
معرض للبلطجة أكتر من أى حد (ممكن تاخد مطوة وتتكل على الله على المقابر )






وعيوب الاتنين مع بعض أن مفيش دولة بتعترف بشهادتك

حتى السعودية والخليج مش بيعترفوا بشهادتك الا بعض امتحان لازم تعمله

وهناك مش بتشغل فى كل حتة (فى حتت معينة شهادتك متنفعش فيها)






طيب كدة خلصنا





يتببع

بقول اكمل ولا بلاش ؟


منتظر رايكم

موضوع فعلا ممتاز و شكرا علي مجهودك و ياريت تكمل :)

أنا صراحة مش عارف أكمل بايه بالضبط أصلا مفيش حاجة فى دماغى


وبالتالى أعلن انتهاء الموضوع


لكن للى عنده أى استفسار يتفضل

دى محاضرة تمهيدية للطلبة بتوع طب أزهر اتعملت سنة 2011


صراحة للى مسمعش المحاضرة كأنه مدخلش طب وسورى يعنى


لازم تسمعوها واستحملوها لأنه غلسة شوية وكمان ساعتين

الرابط اهوه

https://www.youtube.com/watch?v=_d2VcYcOrNI

موضوعات مفيدة جدا

جزاك الله الفردوس الاعلى

نصييييحة أخيرة لبتوع أولى


اوعى ترمى المواد
أبوس ودن باطك ذاكر أولا بأول


انسى فكرة الثانوى أنك هتراجع المادة عشروميت مرة

مش فى كلية الطب الكلام ده


صدقونى بكرة تتحولوا من طالب الثانوى الواثق من نفسه المقطع السمكة وديلها

لطالب طب بالعافية بيلاحق للامتحانات

زمايلكم الأكبر منكم منهم كان كدة وبعدين تلاقيهم بيفتحوا المادة قبل الامتحان بربع ساعة والكام مش هزار



تنبييييييه أخييييير ::اوعى ترمى حاجة ذاكر أول بأول



ادينى حذرت

ونصيحة كمان بلاش تدخل على صفحة (علشان لو جه مايتفاجئش ) لأن الواقع صادم شوية


واستمتعوا باجازتكم قبل ماتروح لأنه مش هتتعوض

بجد انا مش عارفة اشكر حضرتك ازاى موضوع حلو جدااااااااااااااااااااااا
انا مش داخلة اسيوط ومع ذلك قريت كل كلمة حضرتك كتبتها وفهمت حاجات كتييييييييييييييييييييييييييييييييييييييير
وياريت لو جه فى بالك اى حاجة نسيتها تكتبها علشان طريقتك كويسة خالص
ربنا يكرمك

تصدقوا نسيت أقولكم على حاجة مهمة

ده الجروب بتاعكم (طب أسيوط الدفعة 56 )



https://www.face book.com/groups/Medical.56/?ref=ts&fref=ts


ملحوظة :شيل الفاصلة للى فى الأول وخد الرابط كوبى بيست


ملحوظة كمان : الجروب مغلق وللدخول تعرف نفسك للأدمنز وبعت لهم صورة من ورقة الترشيح

هناك هتلاقوا شوية من دفعتنا هيشرحولكم الموضوع بالتفصيل وهيجاوبوا على كل أسئلتكم

نصائح للمرة التانية



نصائح بقى فى الفسيولوجى


1-الفسيولوجى مابيتلمش (أنت للى هتتلم )
2-الفسيولوجى مابيتلمش

3-يا أخى حرااام عليك تضيع نفسك فى المادة دى بقولك مايتلمش عشان كدة يتذاكر أول بأول

4-العملى بتاع المادة دى مهم جدا لازم تشوفه وتعمله بايديك لان ده للى هتشتغله بعد كدة

5-العملييييييييييييييييييييييييييييييي مهم جدا

6- فى العملى :ركز على قياس الضغط والنبض
سماع أصوات القلب
متخافش فى اجهزة كفاية فى القسم عندنا (يعنى جهاز لكل طالب )

7-ركز برضه على ECG -pulmonary function test الاتنين دول بتشغلوا عليهم بعدين فى تخصصات الباطنة الخاصة
8- تجارب الBlood كلها مهمة لازم تفهمها صح لأنه أساس الباطنة (غير أنك بتتسئل كتير جداااااا فى الشفوى عنها )


9-فى الBlood مهم قياس الهيموجلوبين (هى صعبة ومعقدة شوية ) لأانك هتعملها كتير بعد كدة


10-اوعى ترمى الفسيولوجى هتندم
11-الفسيولوجى مابيتلمش (أنت للى هتتلم والله)
12-اوعى ترمى CVS


13- الCVS لازم يتلم قبل الامتحان ويتراجع مرتين على الأقل لأنه كبير جدا وبيبقى so so heavy

علشان كدة المذاكرة أول بأول مهمة

14- اوعى ترمى الRespiration و الGIT وال ANS دول بالذات

15-بلااااااااااااااااااااااااش تاخد مجموعات فسيولوجى والله والله هتدعيلى

16- أخرك تسجيلات ناجى وروق ناجى (لو معجبكش كتاب القسم)



17-خلى بالك امتحانات الفسيولوجى كلها لازم تكون فاهم كويس وحافظ صم (لو وقعت فى واحدة من دول هتلطم)


خلى بالك برضه من حاجة
امتحان الفاينال بتاعنا عملوا معانا حركة بنت..............

الامتحان جزئين كالعادة 1- MCQ
2- Short Note
المعتاد أنك تاخد ورقتين أسئلة وورقتين اجابة وتحل زى ما انت عايز فى ال3 ساعات

للى حصل أنهم خلوا أول ساعة بس للMCQ واجبارى (وكان الMCQ كان صعب صراحة )
ولموا بعدها الورق وعطونا الShort Notes واتزنقنا طبعا



فنصيحة فى الفسيولوجى :خليك سريع الكتابة (ده شرط أساسى لطالب الطب وبدونه مش هتفلح )



بس كدة

وده الاناتومى



ركزوا بقى


1- الاناتومى تحب الصور كل ماكان الكتاب فى صور أكتر وأحسن كل ماكان افضل

2-الاناتومى يحب التخيل والفهم قبل ما تبدا تذاكر فلو مش فاهم متذاكرش حاول تنفهم قبل ما تذاكر

3-الاناتومى بتذااااااكر بسرعة لو اتفهم وتم تخيله صح

4-لو انت بتحب الحركة والكورسات والدروس والكلام ده (خد مجموعات مع دغبريال )

5- لو انت مش كدة اسمع تسجيلات أحمد كمال موجودة على اليوتيوب أو محاضرات د مدحت

6-محاضرات الأناتومى معظمها مش كويس وعلشان كدة احضر للى تفهم منه (واوعى تحضر للدكتور سيد أنور )

7- افهم الintroduction متحفظهوش زى العبيط وتقعد تحفظ فى anterior و posterior زى الأهبل
لأنه مبيجيش غير MCQ فقط

8-تذاكر الthorax و ال pelvis بس من كتاب القسم (ونصيحة ارمى كتب القسم وهات كتب أحمد كمال )

9-فى ال Abdomen بالذات هات كتاب سامح دوس مش هتفهم الا منه

10-الembryology افهمه كويس قوى قوى قوى لأنه مهم فى تانية

11-للى فات دول آراء شخصية انت حر فى النهاية

12- لو لا قدر الله الدنيا ضربت معاك اوعى ترمى الAbdomen وال lower لأنهم صعب تلمهم

13- ولو لا قدر الله ضربت برضه افهم ال embryology كويس عشان مابيتلمش الا لو اتفهم كويس

14-ال Bone (العضم ) مبيجيش الا عملى أو شفوى مبيجيش نظرى والله

15- لازم الأطلس والصور الملونة ولا مش هتمشى

16-أحسن أطلس هو جراى أو جرانتس بدون منازع

17- Surface anatomy مهم لأنه أساس أسئلة الشفوى (وأساس الباطنة برضه)

18-فى امتحانات الأناتومى المهم صحة المعلومة مش مصدرها

19-السرعة ضروية فى الامتحان مهمة برضه

20 -امتحان العملى مهم جدا السرعة السرعة السرعة (هى عامل الفارق فى الامتحان )

21-عينات العملى راجع عليها أكبر قدر ممكن واحفظ شكلها كويس لأنها عينات حالتها حالة زبالة وممكن تتلبخ فى عينة منهم فى الامتحان وانت وحظك بقى

22-متقرفش فى الأناتومى (أنا كنت بلمس الجثث بايدى بدون قفازات عادى يعنى)

23-مفيش بنات بيغمى عليهم فى المشرحة (البنات مبياكلوش الا فى المشرحة أو الأصح مش بتتفتح نفسهم الا فى المشرحة )

24-العينات شوفها كويس فى العملى ادينى حذرت

25- الوقت الفاضى فى المشرحة راجع عظم وعينات أو ذاكر بدل متتزنق وتحتاس بعد كدة (أصلك أنتم بتضيعوا أغلب الوقت فى الرغى وبيحصل وهيحصل )

26-الاناتومى ممكن يتلم لو اتلعب صح (ممكن تشيل برضه ووللحيطة ذاكر أول بأول )

27-لو احتاست فى الفهم خليك مع تسجيلات أحمد كمال (سهلة وحلوة جدا والله )

28-اوعى تضيع سكاشن المراحعة مهمة جدا (امتحان الأناتومى العملى هيعلم عليك فلازم تستعد له صح)

بس كدة

البااااااااااااااااايو


1-المادة لا تذاكر الا كتابة

2-لو مذكرتهاش كتابة أنت حر

3- التحشيشات ثم التحشيشات ثم التحشيشات لأن الحجات فيها عايزة أكتر من مرة مراجعة ومذاكرة
علشان تقدر تحفظ

4-البرانشات الصغيرة (free radicals and antioxidants-hemoglobin-immune chemistry-physical ch)سهلة وحلوة بس لازم تكون مذاكرها أول بأول علشان لو اتركمت عليك هتزعجك ومش هتعرف تلمها

5-فى الهيموجلوبين مهم جدا تعرف تركيب الهيموجلوبين (علشان بتتسالوا فيه فى الامتحانات )

6-فى الimmune ch مهم الفروقات بين أنواع antibodies لأنهم بيجيوا فى الامتحانات كتشييييييييييييير

7-احضر المحاضرات للى تفهم منها (مهما حذروك من غياب وهددوك بشوية درجات الوقت مش بعزقة)

8-للى متفهموش هات لك تسجيلات مايكل من للى اكبر منك أو خد مجموعات فى الكلية (وانتم وحظكم بقى مع الدكتور الجديد للى هيديها مكان مايكل )

9-كتاب العملى لازم تخلصوا أول بأول وتمضيه من المعيد فى السكشن (علشان لو اتركم عليك هياخد وقت كتير وانتم فى أخر السنة مش بتبقوا عارفين تذاكروا ولا تعملوا ايه)

10-العملى بتاع المادة دى يتفهم ويتعمل معاه حاجة اسمها نظام الاستبعاد

يعنى مثلا كل خطوة تعملها تسبعد أن ده كذا

مثلا عملت تجربة معينة على المركب وطلعب التنيجة positive يبقى تستبعد أن المركب ده يكون كربوهيدرات
negative تستبعد أنه يكون بروتين (عن البيورت تيست أتحدث هتعرفوه بعدين)


11-امتحان المادة مسمح تخش بكتاب العملى (أو الأصح ده مش امتحان ده الدكاترة نفسهم بيقولوك اعمل كذا أهم حاجة بس متنساش تدى العامل 5جنيه أنت فاهم بقى)

12-اوعى ترمى ال carbohydrates لأنه صعب يتلم

13- اوعى ترمى ال vitamin وال molecular لأانهم تقال جدا جدا جدا

14-ممكن تركن الmolecular لو فهمته كويس جدا جدا (ال enzymes برضه تتفهم كويس جدا )

15-بلاش كتاب القسم فى المذاكرة لأنه زفت

16-بلاش كتاب القسم

17-بلاش كتاب القسم يا كتاب سعيد عرابى يا ورق كورسات يا أنت حر بقى

18-لو زاطت معاك ولقيت نفسك فى مأزق سيبك من البرانشات الصغيرة وركز على الكبيرة (لأنت نسبة البرانشات الصغيرة فى الدرجات لا تتعدى ال 15 % ) ده غير أنك لو مذاكرهم أول بأول مش هتحتاج تراجعهم

20-ال molecular افهمه كويس الله يخليك ولو عرفت تذاكره أول بأول اعملها (والانزيمات تتكتب علشان اسماءها شبه بعض)

21-المادة دى فى مركبات كتير جدا شبه بعض ولازم تتكتب وتفرق مابينها كويس


22-الmolecular احفظ ال major bases فقط

23- اوعى تحفظ مركبات ال vitamins مش للحفظ (فيتامين سى بس هو للى يتحفظ التركيب بتاعه)

24-متزعلش من الكوسة فى الشفوى فى المادى دى بالذات وذاكر وسيبها على الله

25-المادة دى من المواد للى أسئلة امتحاناتها بتتكرر فلو قدرت لو يعنى تحل فيها أسئلة حل (محدش يقولى منين عندك كتب كتير فى المكتبات )

26-هات تسجيلات مايكل هات تسجيلات مايكل هات تسجيلات مايكل

27-المادة ده بالذات فى امتحانات النظرى اكتب كتشييييير كتير كتير كتير على قد ما تقدر تكتب (وسرعة الكتابة مهمة طبعا)

28-اوعى تدخلوا فى خلافات مع دكاترة القسم لانهم سيئي التعامل

29-هات أدواتك معاك بدل أدوات القسم لأنه زبالة

30-اعمل حسابك فى انابيب كتير (test tubes ) لأنك هتكسر منهم كتير جدا

31-تعليمات السلامة مهمة جدا والا أنت حر

32- خلى بالك أنت هتسخن حجات على النار وهتمسك أحماض وكدة فلازم النظارة والجوانتى والبالطو يكون مقفول

33- تيجى قسم البايو بأسوا طقم عندك وأكتر طقم بتكرهه لأان متعرفش ايه للى بيحصل لما المواد بتيجى على الهدوم (بتبوظ بتدوب ) فمحبكتش أنك تيجى بأجمد طقم عندك

وأخر حاجة الهيستولوجى


1-محاضرات المادة دى كويسة احضرها

2-كتاب القسم ملون وكويس وكمان الأطلس حلو جدا

3-الحفظ ثم الحفظ ثم الحفظ (لا مكان للفهم فى الهيستولوجى )

4-الهيستولوجى يحب الصور الكتير فهات لك صور من النت

5-فيه في النظرى أطوال أقطار الخلايا والتركيبات للى بتضهر تحت الميكروسكوبات (احفظهااااااااااااااااااااااا)

6-المادى دى مبتتلمش ......تقيلة جدا مبتلمش ذاكرها أول بأول

7-عاملة زى السبيرتو ولازم تراجعها أكتر مبتستحمى

8- فى ال blood مهم جدا الفروق ما بين الخلايا وبعضيها وكمان أطوال أقطار مهمة جدا

9- فى الConnective tissue الخلايا تتذاكر كويس لأن ده أكبر درجات وأكتر اسئلة بتيجى منه

10-للى يقولك أن أصعب برانش عندكم هو ال immune اضربه بالقلم أصعب برانش هو ال Bone لازم يتراجع أكتر من مرة
(ال immune بتذاكر بدرى بدرى سهل بس تقيل)

11-برانش ال nervous مهم يتراجع اكتر من مرة وكمان لأان النهايات العصبية كتير ولازم تتذاكر كويس

12-اوعى ترمى الهيستولوجى هتشيل

13- اوعى ترمى الهيستولوجى هتشيل

14- يا أخى أنت برضه مبتفهمش المادة دى عندنا أكتر للى شايلينها ساقطين تحريرى

15- بلاش تحضر لد نشوى ود كوثر بلاش الاتنين دول

16- برانش ال blood vascular يتذاكر جداول ومقارنات

17-رسومات ال EM الميكروسكوب الالكترونى مهمة وتتحفظ ووترسم لأن أسئلة النظرى أغلبها Ilustrate With Diagram
وضح بالرسم

18- الهيستو لوجى ما بيتلمش................... بيتشال بس

19-الرسومات فى الهيستولوجى هتسسال فيها نظرى وعملى وشفوى (أه والله)

20-فى العملى ارسم كتييييييييييييييييييييير

21- بص على الميكروسكوبات فى المعمل كويس وبص أكتر من مرة

22-هستمع تريقة على الرسم بتاعك لحد ما تشبع معلش استحمل

23-حاول ترسم بدون الأطلس لأن عندك حاجة اسمها امتحان رسومات

24-لازم تكون مذاكر النظرى مع العملى علشان الاتنين مربوطين ببعض

25-اوعى ترمى الهيستولوجى هتندم

26-اوعى

27-الهيستولوجى أكتر أسئلتها Short notes فتدرب على حلهم (إن لقيت وقت )

28-حاول ترسم الرسومات فى السكشن وبلاش رغى وتضيع وقت

29- لو السكشن خلص ولسة مرسمتهمش ارسمهم فى البيت واوعى ترميهم علشان لو اتراكموا مش هتعرف تلمهم

30-حاجتين اوعى تنساهم فى سكشن الهيستولوجى (البالطو وكتاب العملى )

31- اوعى تنسى البالطو والا هتاخد زعيييق من هنا للصبح

32- اوعى تنسى كتاب العملى لأنك هتتاخد غياب

33-الألوان مهمة جدا فى العملى لازم تكون معاك

34-مهم كتاب العملى يخلص قبل امتحان الرسومات لأنه هتسلمه بعده (فنرسم ونخلص للى ورانا اول بأول )

35-لو دخلت الدكتورة أمل مرزوق أو الدكتورة أمل طه احضرلهم بالذات (لأان دول هما للى بيحطوا الامتحانات)

36-أجر علبة الشرايح من المعمل واتفرج عليه كل أسبوع (علشان امتحان العملى)

37-امتحان العملى مهم فيه السرعة برضه زى الأناتومى

38-مادة الهيستولوجى من المواد للى سهل تجمع فيها درجات فحرام لو ضيعت نفسك فيها

نصيحة كمان مزنوقة فى زورى من زمان


خلى بالك من للى بيعيط وبيصوت ومن بتوع (هشيل وهسقط وياختتتتتتىىىى)


دول بالذات بيبقوا عاملين الدور عليكم


تلاقى الواحد ذاكر 6 ساعات وبعدين يدخل على الفيس على الجروب ويقول (أنا مذاكرتش حاجة الحقونى)

احذر من صنف الناس دى سواء كانوا ولاد أو بنات (وبالذات فى البنات أكتر خلوا بالكم )


ادينى حذرت

[QUOTE=ahmedfezo;6287539]البااااااااااااااااايو


3- التحشيشات ثم التحشيشات ثم التحشيشات لأن الحجات فيها عايزة أكتر من مرة مراجعة ومذاكرة
علشان تقدر تحفظ
/QUOTE]

ايه التحشيشات دي يا دكتور

[QUOTE=أمــلــي فــ ربنـــا كبيــــر;6291337]

الروابط العقلية والخرائط الذهنية


يعنى مثلا د حسنى بتاع الفيتامينات كان يقولنا عن تسمم الvit D

قالك لما فيتامين د بيعمل تسمم بتبقى الأعراض ايه ؟


دايما كنا بيفكرنا بيها بمثل بسيط

(قليل البخت يلقى العضم فى الكرش)


بمعنى علمى ossification of soft tissues like mesentry and kidneys

بمعنى أخر تصلب وتعضم(تحول الى عضم) الأنسجة زى المساريقا أو الكلى




وهكذا افتكر المعلومات بأغنية أو

التركيبات بصورة أو رسمة

بحيث افتكرهم بسرعة فائقة وبأقل جهد ومنساهمش أبدا


أظن كدة وصلت

بجد شكراااااااا..انا رايخه 3ث ..بس ان شاء الله السنه الجايه ابقر رايحه اولى طب..طب اسيوط

نصيحة لوجه الله بلاش

الله المستعان والموفق

شكرا جزيلا