**حلم الطفوله ** كان نفسى ابقى مهندس لكن القدر
 

اخوكم اسلام خريج ثانويه عامه شعبه علمى رياضه عام 2006 التحقت بكليه تجاره انجلش جامعه القاهره والسنه دى انا فى بكالريوس سنه رابعه وان شاء الله هخلص السنه دى 2010 وكنت عاوز استفسر منكم ع حاجه انا كنت عاوز اخش معهد الصحافه ال فى شارع الصحافه معهد سنتين بيؤهل لكليات الهندسه فى مصر وانا فى 2006كان مجموعى جايب المعهد ده وكل حاجه عاوز اعرف بعد ماخلص البكالريوس السنه دى وروحت قدمت فى المعهد ده هايقبلونى ولا ؟؟؟ وانا سالت قالولى ان شهاده الثانويه معترف بيها لمده 5 سنوات كنت عاووزكم بس تجاوبونى هل ينفع اخش المعهد بعد تجاره ولا لا لانى مش عارف مدى صحه الكلام ده ايه ياخوانا بالله عليكم جاوبونى ضروورى مساله تخصنى اوووووووووووووووووووووووووووووووووووووووووى :(:(:(:(

لو نفسك تبقى مهندس بصحيح تأكد إن الكلية مش عائق

خصوصًا فى مجالات ال it ممكن تاخد كورسات سيسكو و ميكروسوفت و تشتغل زى المهندس و يمكن أحلى

ده مثال و قدامك برده برمجة و صيانة و حجات تانية

و لو مش عجباك المجالات ده فى كورسات فى الجامعات و دبلومات تخليك تشتغل فى بترول مثلاً

أو غيره

بس بيتهيألى مينفعش تضيع خمس سنين من عمرك فى حاجة أصبحت ملهاش قيمة حاليًا

شهادة الكلية صفر على الشمال حاليًا فما بالك بعد خمس سنين !!!

طيب بالنسبه يابشمهندس لهذه الكورسات ياترا هاستفيد بشهادتى برضه ببكالريوس التجاره فيها ولا ده هايبقى مجال اخر غير ال درسته ده اولا ؟؟؟
ثانيا كنت بس عاوز اعرف من حضرتك بالنسبه لتكلفه هذه الكورسات ممكن تبقى كام لو عندك خبرات لانى حتا الان مش واخد كورسات كتير لانى بجد كنت متعقد جامد عشان انا كان نفسى اخش هندسه حكومى فياترا لو اخدت هذه الكورسات يعنى هايبقى ليها شغل كويس يعنى يعيش الواحد اليومين دوول حتا انا مش عاوز قصر يعنى انا عاوز ابقى شاب عادى فى الشغل وكده مش طالع فيها يعنى اتمنا من حضرتك بجد ترد عليا بالله عليك

معلش أسمحلي حضرتك أدخل فى الموضوع حتى يأتي الباشمهندس عبده
هو أنا أعرف أن الكورسات ديه موجوده على النت بشكل كبير جدا
لو كتبت كورسات سيسكو هتلاقى كثير وهى عايزه تتفهم بشكل كويس لأن الموضوع عايز واحد يكون بيحب الكلام ده وأنت بتقول أن كان نفسك المجال ده. والتعليم الذاتي موجود فى النت بشكل كيبر وكثير جدا جد
بس الأول أنت كت عايز تبقى مهندس ايه ؟ لو كان يعنى إلى حد ما كمبيوتر واتصالات فالكورسات قريبه جدا وغير كده معتمدة جامد أوي وبعدين هتعتمد على تحصيلك مش منهج هيديهولك فى سنة مش هيخلص لا أكثر ولا أقل من سنة يعنى أنت لو حبيت الموضوع شوف وابحث عن الكورسات وشوف وجرب وافهم وابحث عن إجادة اللغة وعلى فكرة أسمع أن مرتباتها عالية برده لأنك بتوفر على الشركه تصميم وجرافيكس وشغل شبكات واتصالات وصيانة على حسب اللى أنت فهمته
وطبعا دور وشوف
ومستنيين برده رد الباشمهندس عبده

كلامك مظبوط جدًا بالتوفيق فى امتحاناتك يا هندسة


بص يا بشمهندس بالنسبة الكورسات ممكن تذاكرها لوحدك فيديوهات و محاكيات و صور من جوجل للأجهزة
يعنى زى ماقال البشمهندس كريم تعليم ذاتى و هو عمومًا المجال ده ممكن تعلم نفسك فيه بسهولة
لأن المهندسين على النت مهتمين بالموضوع ده جامد

وممكن تاخد الكورس فى سنتر و على حسب مثلاً انا باخد ccna ب 500 جنيه

و الشهادة الدولية مكلفة سنة بسيطة لأنها بالدولر حوالى فى ال ccna ب ألف و شوية

هقول لحضرتك نصيحة بشمهندس فاهم كويس فى الحكاية ده

قالى آخد ccna و بعدين mcse و بعدين لينوكس أو يونكس وبعدين ccnp

الموال ده هياخد منك سنتين فى المتوسط عشان متضغطش على نفسك

و أول شهادتين يشغلوك شغلانه محترمة و كمل دراسة وأنت بتشتغل

وبالنسبة للمرتبات فالسوق هيديك على قد شغلك و بشكل عام مرتبات المجال ده عالية

ومطلوبة فى مصر و بره مصر

وبرده هفكرك فيه مجالات تانية زى الصيانة و البرمجة أنت ممكن تتعلم الصيانة و تشتغل بيها مع اللى فات

و شوف الرابط ده فيه شوية كورسات فى الحجات اللى قولتها

عايزك تشوف النظام ماشى ازاى و تقولى لو الجو عجبك و ناوى تكمل فيه و لا لأ

http://www.4shared.com/dir/10208880/...b/sharing.html

و أحلى ما بيميز شغل ال IT أنه بالمجهود يعنى مش بالأقدمية (إلى حد ما ) ولا الكوسة و لا الروتين


و أحب أقولك كل الناس لما ما بتلاقيش شغل يعجبهم ويحسسهم بقيمتهم بيضايقوا جدًا

فأنت أصبر و اعمل اللى عليك و الباقى على ربنا

بالتوفيق إن شاء الله

يعنى بالنسبه لكلام حضارتكم تفتكرو بدل ماضيع وقت واخش معهد سنتين وبعدها هندسه (انا ع فكره كان نفسى ابقى مهندس اتصالات او حاسبات) اخد الكورسات دى وانا حاصل ع بكالريوس التجاره وطبعا اجادتىللغه الانجليزيه وانا الحمد لله كويس فيها
بس النقطه ال عاوز تفسير منكم فيها انا مش بفضل ادرس حاجه من النت انا عاوز فعلا مراكز او حاجات معتمده احصل منها على الكروسات ديا كلها ده اولا ثانيا بالنسبه لجميع هذه الكروسات ال المهندس عبدو قال عليها دى هى كلها ولا فى تانى وتكلفتها الكليه حسبه كم كده ؟؟؟

الكورسات كتير جدًا و متشغلش بالك

أنت امسك فى طرف الخيط و أمشى شهادة أو اتنين و هتشتغل و طور نفسك و أنت بتشتغل

إجادتك الانجليزى هتساعدك إنك تذاكر على النت و فيه طرق كتير

يعنى ممكن تنزل فيديوهات و تشوفها على جهازك و ممكن تشترى كتب و تطبق على الكمبيوتر

بالنسبة للفلوس مثلاً الكورساللى باخده ccna الدراسة ب 500 و الشهادة بألف و شوية

و كفاية عليها تدرس شهادة معاها و تشتغل شغلانه محترمه

بس حكاية أنك مش بتعرف تذاكر على النت حاول تغيرها خصوصًا أنك بتجيد الانجليزى كويس

للعلم فيه ناس حبايب من تجارة فى الكورس اللى باخده

ربنا يخليك ياهندسه بجد طمنتنى ده انا كنت ياسان بجد وحاسس ان تجاره دى ولا ليها اى لازمه ومتدمر نفسيا جااااااااااامد مع انى حاصل على تقدير عام جيد من تجاره جامعه القاهره بس كنت خايف من الشغل وكده بس ان شاء الله هاخد الكورسات دى ... على كده بقى حضرتك هو احسن مكان فى مصر يدرس كورسات انجلش محترمه هو ايه؟؟؟؟ وتعملها كام برضه؟؟؟