بوابة الثانوية العامة المصرية

بوابة الثانوية العامة المصرية (https://www.thanwya.com/vb/index.php)
-   كلية الفنون الجميلة وكلية الفنون التطبيقية (https://www.thanwya.com/vb/forumdisplay.php?f=1015)
-   -   مستقبل فنون جميلة أكثر من عظيم هتغير رايك ليها (https://www.thanwya.com/vb/showthread.php?t=428883)

bahaaeldeen 29-05-2012 10:35 PM

مستقبل فنون جميلة أكثر من عظيم هتغير رايك ليها
 
انا لاحظت ان ناس كتير اوى اوى فى مصر متعرفش ايه قيمة كليات الفنون الجميلة وفاكرين اننا رسامين وفاكرين اننا فنانين وبس وفاكرين اننا بنتخرج مدرسين رسم
اولا الكلام دة كله غلط فى غلط
والاخر طلع فيلم فاشل بيسوء فى سمعة الكلية

اولا على فكرة مستقبل الكلية مش زى ما الناس فاكراه انه بيخرج مدرسين رسم وخلاص
ثانيا الفيلم دة اركنوه على جنب لانه مش بيعبر عن الكلية ابدا غير انه بيسيئ ليها
وعلى فكرة دكاترة الكلية رفعوا قضية على الفيلم وخدوا تعويض ممتاز جداا ودة اللى جاب الفيلم الارض برضو :)

اولا الناس اللى فاكرة ان الكلية مجموعها قليل وبتاخد خمسينات وستينات الكلام دة تعبان
الكلية بتاخد فوق التسعين لعلمى اللى هما قسم عمارة وديكور وادبى بتاخد فوق 85 غالبا واقل حاجة 84

ركز فى كل كلامى ولو انت مش ناوى فنون جميلة متاكد انك هتنويها باذن الله

اولا قسم العمارة
بتدرس كل المواد الهندسية والفنية يعنى بتدرس 5 سنين منهم اعدادى كل حاجات هندسة وزايد عليها مواد فنية ودة اعلى قسم فى المجموع وتنسيقه خاص بيه
وخريجه بيتبع نقابة المهندسين وبيدرسوا كمان شغل ديكور وبيتقووا فى برامج الكومبيوتر اللى بيشتغلوا بيها زى اوتوكاد وثرى دى ماكس وفوتوشوب
غير طبعا بتاع هندسة عمارة اللى بيدرس 4 سنين بس عمارة ومبيدرسش اى ناحية فنية ف بيكون ضعيف بالنسبة لبتاع عمارة فى فنون جميلة والمواااااااد هندسية 200% وباضافة مواد فنية كمان

ثانيا قسم الديكور
ودة تبع فنون فى التنسيق وامتحان القدرات لكن بياخد علمى ومجموعه اقل بفروق بسيطة يعنى عايز تعرف ديكور خد كام يبقى شوف تنسيق فنون جميلة فنون لعلمى
وبتدخل اعدادى ديكور وتدرس 4 سنين وتتخصص جواة على حسب اختيارك لعمارة داخلية وفنون تعبيرية والشهادة هى بكالريوس عمارة داخلية او بكالريوس فنون تعبيرية
عمارة داخلية بتكون مهندس معمارى وديكور ومصمم لكل حاجة ودى ناحية هندسية اكتر
وفنون تعبيرية اللى هى ديكور السينما والمسارح ودى ناحية فنية اكتر
القسم دة ملوش علاقة بفنون بس بتدرس كل حاجة تتخيلها يعنى بتدرس مواد عمارة ومواد فنية بحيث تتعلم كل مبادئ التصميم من الابرة للصاروخ ومن الشقة للعمارة والمؤسسات
بتتخرج بتشتغل مهندس ديكور ومعمارى ومصمم وكل حاجة لان امكانياتك بتكون جامدة وبتاخد خبرة فى الالوان يعنى القسم دة اكتر من قسم عمارة وبتدرس كل مواد قسم العمارة واكتر كمان والناحية الفنية اكبر شوية ومشروع التخرج بيكون مثلا تصميم مدرسة بتصممها من ناحية معمارية وبتعمل البوستر بتاعها وبترسم كل جزء منها برسم هندسى وبتصمم الالوان وبتقسم الفصول لمساحات وبتعمل استخدام كامل وشامل للمبنى دة غير طبعا التقوية الشاملة لاستخدام برامج الكومبيوتر

ملحوظة هامة جداا::
طلبة ديكور بتدرس فى اول سنين ليها عمارة داخلية وتصميم داخلى وبعدين التخصص وبيدرسوا تصميم معمارى فى اخر سنتين
لكن طلبة عمارة وهندسة عمارة بيدرسوا العكس فى اول سنين تصميم معمارى واخر سنتين تصميم داخلى


ثالثا اقسام فنون بتاخد علمى وادبى بس الاولوية لادبى:
اللى بيدخلها بيكون اعدادى فنون بعد كدة بيتخصص ع حسب المجموع لتلات اقسام هما جرافيك وتصوير ونحت
وملوش اى علاقة بالاقسام التانية

قسم جرافيك بيخرج مصممين جرافيك وشغلهم فى الانيماشن والكارتون وكله تمام طبعا يعنى بتصمم كل حاجة ثرى دى من افلام الكارتون لحد خدع السينما وشغل الافلام وشغل المراكز الثقافية
قسم تصوير بتتخرج تكون فنان جدارى او مصمم تشكيلى يعنى وظيفتك مثلا ترسم لوحة فنية واجهة فى فندق او اى ارت ورك
قسم نحت بتشتغل فى مصانع نحت كل حاجة تتخيلها خصوصا الارت ورك

من الاخر مرتباتهم جميلة جدا

وانا مش بجبرك على الكلية بس الكلية نظامها مختلف وجميل جدااااااا يعنى بتدخل الكلية عددكم قليل جدااااااا عكس الكليات التانية اللى عددكم فيها بالالاف
دة غير ان التانيين بتدرس حاجات نظرى والاخر تتخرج وانت حافظ مش فاهم ومش هتعرف تلاقى شغل
دة غير ان خريجين الكلية بالمئات مش بالالاف واظن هاتلى واحد بس خريج فنون جميلة ومش لاقى شغل
دة غير ان الدراسة اغلبها عملى مش كلها نظرى يعنى بتعمل تطبيق للواقع قدامك

اتمنى انكوا تغيروا قرارتكم :)

وشكرااا


loleta_lolla 03-07-2012 06:08 PM

ميرسي على المعلومات دي مع العلم هو مش تفكيرنا احنا هو بيبقى تفكير الأهالي بس لما بيسألو ناس مجربة بيعرفوا ان عندنا حق

bahaaeldeen 03-07-2012 06:46 PM

اقتباس:

المشاركة الأصلية كتبت بواسطة loleta_lolla (المشاركة 4618548)
ميرسي على المعلومات دي مع العلم هو مش تفكيرنا احنا هو بيبقى تفكير الأهالي بس لما بيسألو ناس مجربة بيعرفوا ان عندنا حق

اتمنى انك تنتمى للكلية :)

lolo cat 04-07-2012 05:14 PM

طب معلش سؤااااال ضرورى يعنى لو دخلت قسم ديكور عمارة داخلية اطلع مهندسة معمارية بس انا علمى علووووووووووووم

bahaaeldeen 05-07-2012 12:40 AM

اقتباس:

المشاركة الأصلية كتبت بواسطة lolo cat (المشاركة 4621176)
طب معلش سؤااااال ضرورى يعنى لو دخلت قسم ديكور عمارة داخلية اطلع مهندسة معمارية بس انا علمى علووووووووووووم

اة تمام ومصممة ديكور كمان

Ahmed Asko 15-07-2012 07:40 AM

ياريت تتكلم على اقسام ادبى شوية يعنى انا مفهمتش تصوير ونحت
وكمان انا مش رسيم اوى بس عاجبنى قسم الجرافيك هو فى امتحان القدرات بيركزوا على الرسم

bahaaeldeen 16-07-2012 09:58 PM

اقتباس:

المشاركة الأصلية كتبت بواسطة ahmed asko (المشاركة 4647959)
ياريت تتكلم على اقسام ادبى شوية يعنى انا مفهمتش تصوير ونحت
وكمان انا مش رسيم اوى بس عاجبنى قسم الجرافيك هو فى امتحان القدرات بيركزوا على الرسم


جرافيك بتتخرج مصمم جرافيك يا احمد
وشغلك بيكون كمان فى مجال الديكورات والتشطيب المعمارى
ومجالات الدعايا والاعلان والسينما والمسرح والخدع السينيمائية
يعنى بتتخرج ومعاك ذخيرة فنية وفى الكومبيوتر والبرامج كمان
وممكن تشتغل رسام معمارى وممكن تشتغل فى الانيماشن والجرافيكس سواء كومبيوتر او افلام او اى حاجة تكنولوجية
من الاخر مجال الجرافيك ممتاز وليه كذا طرييق
وربنا يوفقك

Ameera.123 21-07-2012 04:29 AM

لو سمحت الكلية بجميع اقسامها ممكن ادخلها سواء انا علمي علوم او ادبي ؟؟ و لا كل قسم محدد بشعبة معينة ؟؟؟ يا ريت ترد عليا لاني محتارة اكمل علمي او احول ادبي

bahaaeldeen 21-07-2012 01:08 PM

اقتباس:

المشاركة الأصلية كتبت بواسطة ameera.123 (المشاركة 4664803)
لو سمحت الكلية بجميع اقسامها ممكن ادخلها سواء انا علمي علوم او ادبي ؟؟ و لا كل قسم محدد بشعبة معينة ؟؟؟ يا ريت ترد عليا لاني محتارة اكمل علمي او احول ادبي

عمارة لعلمى رياضة بس
ديكور لعلمى علوم ورياضة
فنون(جرافيك تصوير نحت) لكل الاقسام ومتاحة لادبى

Ameera.123 21-07-2012 06:12 PM

انا اللي فهمته من المواضيع التانية اني ممكن ادخل ديكور لو انا ادبي بس في اسكندرية بس ده صح ولا لا ؟؟؟
انا علمي علوم وجبت السنة دي 93 .. بس عايزة احول ادبي علشان اضمن اكتر

bahaaeldeen 23-07-2012 01:23 AM

اقتباس:

المشاركة الأصلية كتبت بواسطة Ameera.123 (المشاركة 4666865)
انا اللي فهمته من المواضيع التانية اني ممكن ادخل ديكور لو انا ادبي بس في اسكندرية بس ده صح ولا لا ؟؟؟
انا علمي علوم وجبت السنة دي 93 .. بس عايزة احول ادبي علشان اضمن اكتر

تمام صح كلامك

ahmedyamany 23-07-2012 01:43 AM

شكرا على المعلومات الجميلة دي يا بشمهندس
انا تعبت جدا من كتر الحالة اللي انا فيها .. كنت شهادة معادلة السنة اللي فاتت كنت عايز هندسة بس حظي جه اني اترميت ف حاسبات ومعلومات القاهرة ودي كلية منصحش اي حد يدخلها ... كل حاجه فيها من اولها لاخرها زي الزفت -عارف ان كل مكان فيه الحلو والوحش- بس مش بالطريقة دي يعني :mad: انا حاليا شيلت مواد كتير وباخد سمر كورس عشان احاول اشيل شوية مواد من عليا ... بس انا طهقت وزهقت من الكلية واتفقعت مرارتي وميولي كلها بقالي 3 سنين عايز ادوس اكتر ف مجال الجرافيكس والويب ديزاين والكلام ده -طبعا كنت فاكر ان حاسبات هتعمل كل ده بس اتضح عكسه تماما- انا عندي استفسار واتمنى الرد السريع عشان لو نفع هحول ان شاء الله على طول...
دلوقتي لو جيت حولت على طول اتقبل عادي ف الكلية ولا لازم اخش التنسيق من جديد ؟؟
وامتحان القدرات هيبدا وينتهي امتا ... انا عندي احساس انه انتهى اصلا :(
وممكن حضرتك توضح امتحان القدرات بيكون عامل ازاي بالزبط ؟؟ مع اني مش قوي ف الرسم اوي ومش ضعيف برضو
اسف ع الاطالة وشكراً

nourhan mohamed2020 28-07-2012 09:44 PM

يعنى انا لى ادبى وجايبه 96% وعملت قدرات فنون ينفع ادخل ديكور قسم عماره داخليه؟

Mostafa Walid 29-07-2012 05:34 PM

هو لازم يكون فى امتحان قدرات لكل الاقسام واللى مدخلش الامتحان مينفعش يدخل الكليه خالص حتى لو جايب مجموعها ارجو الرد وشكرا

bahaaeldeen 29-07-2012 09:24 PM

اقتباس:

المشاركة الأصلية كتبت بواسطة ahmedyamany (المشاركة 4670705)
شكرا على المعلومات الجميلة دي يا بشمهندس
انا تعبت جدا من كتر الحالة اللي انا فيها .. كنت شهادة معادلة السنة اللي فاتت كنت عايز هندسة بس حظي جه اني اترميت ف حاسبات ومعلومات القاهرة ودي كلية منصحش اي حد يدخلها ... كل حاجه فيها من اولها لاخرها زي الزفت -عارف ان كل مكان فيه الحلو والوحش- بس مش بالطريقة دي يعني :mad: انا حاليا شيلت مواد كتير وباخد سمر كورس عشان احاول اشيل شوية مواد من عليا ... بس انا طهقت وزهقت من الكلية واتفقعت مرارتي وميولي كلها بقالي 3 سنين عايز ادوس اكتر ف مجال الجرافيكس والويب ديزاين والكلام ده -طبعا كنت فاكر ان حاسبات هتعمل كل ده بس اتضح عكسه تماما- انا عندي استفسار واتمنى الرد السريع عشان لو نفع هحول ان شاء الله على طول...
دلوقتي لو جيت حولت على طول اتقبل عادي ف الكلية ولا لازم اخش التنسيق من جديد ؟؟
وامتحان القدرات هيبدا وينتهي امتا ... انا عندي احساس انه انتهى اصلا :(
وممكن حضرتك توضح امتحان القدرات بيكون عامل ازاي بالزبط ؟؟ مع اني مش قوي ف الرسم اوي ومش ضعيف برضو
اسف ع الاطالة وشكراً


لازم تقدم فى التنسيق من جديد
امتحان القدرات رسم تماثيل وتصميم ابتكارى بالوان خشب ونظرى


جميع الأوقات بتوقيت GMT +2. الساعة الآن 04:36 PM.

Powered by vBulletin® Version 3.8.11
Copyright ©2000 - 2024, Jelsoft Enterprises Ltd.