طب بشرى ام أسنااان محتار يا جماااعه
 

السلام عليكم
يا جماعه ممكن حد يفيدنى انهى افضل اسنان ولا طب بشرى ؟ انا محتار جدا ادخل انهى فيهم ناس خوفتنى من طب لانها صعبه جدا و هتاخدنى من اهلى و صحابى وكدا و كمان هتاخد كل سنين عمرى مش بس 7 سنين دا بعديهم 7 كمان دكتوراه و اللذى منه ؟! و ناس بتقولى اسنان احسن لانها خفيفه عن طب و انا كان طموحى ادخل جراحه :blush:

اسنان طبعا متغلطش غلطتي وتقول عايز ابقي مجدي يعقوب والكلام الفاضي ده
اسنااااان اسناااااان اسنااااااااااان

طيب بس لو انا حابب جراحه مش مهم عندى الدخل المادى بعد كدا
بس هل مجال جراحه ليه شغل كويس و هقعد اد ايه بعد ال 6 سنين و سنه الامتياز على ما اقدر احط مشرط ف جثه بنى ادم :d :d :d :d :d :d ??

انا أقولك

أولا أنت ولد يعنى ممكن تدخل الاتنين مش فارقة

لكن بتقول أنك بتحب الجراحة (نصيحة فكر مرة تانية قبل ما تحبها ..أصل الطب بالممارسة مش بالحب)

ده معناه انك ممكن تدخل طب بشرى وتستحمل البهدلة (ممكن؟ متاخدش كلامى انه الزام)

ونصيحة منى جاوب على الأسئلة دى


1-حالتك المادية كويسة وتمام ولا؟

2-تفضل المذاكرة 24 ساعة ولا الشغل العملى والتدريب

3-بتحب تخلص مسيرتك الدراسية بدرى ولا السن معاك مش فارق

4-شاطر فى الحفظ ولا الشغل اليدوى

5-نفسك طويل وتستحمل ولا بتعيط من أول امتحان؟(خلى بالك امتحانات الكلية غير خالص .....هتعلمك معنى أنك تقول حقى برقبتى)

6-مصمم على الجراحة ولا أى تخصص مش فارق (أصل الأسنان دى كلها جراحة ...أومال أنت فاكر الحشو والخلع دول ايه ؟..حاجة اسمها جراحة اسنان أضف لذلك فيه حاجة اسمها جراحة وجه وفكين فى تخصصات الأسنان برضه)

7-لو أنت مصمم على جراحة هل أنت مصمم على أى نوع من الجراحة العامة ولا الخاصة ؟ وياريت تحدد أى نوع من الخاصة (مخ واعصاب-- قلب وصدر --أوعية دموية --تجميل الخ)
ولا أى جراحة وخلاص

8-مستعد أنك تسحمل بهدلة الماجستير قبل ما تفتح عيادة فى طب بشرى ولا عايز تفتح عيادك من أول يوم تخرج؟
(أصل أسنان تقدر تفتح عيادة تانى يوم بعد ما تخلص ...امنا بشرى لازم ماجستير 5 سنين للى هو يسمى التخصص)

9-تهمك التقديرات فى الكلية ولا مش فارقة ؟


10-الوالد والوالدة سهل اقناعهم ولا؟


11-بتحب الجرى بين الكلية والمستشفى ولا قعدة مليون كتاب

12-تنستحمل ان تدرس 3 سنين ورا بعضيهم ولا بتحب أسلوب الدراسة العادى (دراسة ثم اجازة )


جاوب على الأسئلة دى بدقة وبكل صراحة

1- اه الحمدلله الحاله الماديه كويسه يعنى يقدرو على مصاريف طب

2- انا بفضل المذاكره اللى بعدها العملى بعدين عادى معنديش مشكله ولا مانع انى اشتغل ب ايدى بعدين بس مش جايه معايا اشتغل ف بق حد و انا مش حابب مجال الاسنان
3-لا عادى ممكن اخطب و اتجوز و كدا و انا بدرس او بعد مخلص يعنى مفيش مشكله هقدر اوفق كله مع بعضه
4-انا كويس ف الحفظ الحمدلله بس العملى ك طب معرفش لانى مجربتش ما دى مشكله تعليمنا انه دش و بس 　
5- نفسى طويل الحمدلله عادى
6 + 7 - انا نفسى ف جراحه قلب او مخ و اعصاب
بس لو قدام غيرت وجهه نظرى احب يكون قدامى رمد او عظام او باطنه
انما اسنان هتبقا هى دى و بس فاهمنى ؟
انا حابب ادرس كل شئ جوا الانسان و كدا انما جراحه الاسنان محصوره اوى و اقسام طب كتيره لو حتى مجبتش جراحه او ميولى انجرفت ل تيار تانى
8- اه ان شاء الله اقدر عادى ربنا يقوينى
9- اكيد تهمنى
10- لا موافقين عادى
11- معنديش مشكله ف ال 2 انا فاهم ان اسنان اكتر ف العملى من طب ف سنين الدراسه
12- اكيد بجب دراسه و بعد كدا اجازه بس هستحمل عادى
　 　 نتيجه اجاباتى امتى بقا ههههههه 　

سبحان الله
أنت لايق على طب بشرى وش

سم الله وخش برجلك اليمين

بس افتكر أوعى ترجع تعيط (وأرجوك بلاش تدعى عليا )

وبالتوفيق ان شاء الله

أنا هشرح ليه سألتك الأسئلة دى علشان الناس تفهم بس


بالنسبة للماديات
الأسنان تكاليفها بشعة جدا وخصوصا فى تالتة ورابعة وكذلك فتح العيادة (الكرسى ب 50 ألف)


أسنان العملى فيها أكتر (هو صراحة كتييير جدا ) أما البشرى الدش والصم والنظرى كتير جدا جدا جدا


بشرى للاسف بتصيع العمر (فى ناس رايها كذلك )

ليييه؟

البشرى 7 كلية ( خامسة وساتة كل واحدة فيهم بسنة ونصف يعنى المحموع سبعة ) +سنة امتياز+5ماجستير +3جيش

الاسنان 5كلية +سنة امتياز +3 جيش



بشرى تحب الحفظ جدا جدا
أسنان تحب الشغل والتدريب مرة واتنين وتلاتة


بشرى عايزة أبو نفس طويل لأنه بجد صعبة


وللى مصمم على أى تخصص هيسحمل علشانه
انما لو مش فارقة بنصح العيال بأسنان


التقديرات فى كلية طب مهمة (لأن التخصص بالتقديرات مش بالمزاج)


أسنان تحب اللف والدروان فى المستشفى والعيادات

البشرى تحب القعدة على الكتاب


ولما سألتك على موضع ال3 سنين

كان قصدى أن سنة خامسة سنة ونصف
سنة ساتة سنة ونصف
ومفيش بينهم الا اجازة اسبوعين بس

خلى الكلام ده فى معلومك


وطبعا لو كنت بنت كنت قولتك أسنان من الأول


(ملحوظة الكلام مرتب بنفس سياق الأسئلة )



لو كانت اجاباتك زى ما انت كاتبها يبقى خش بشرى

احمد والله والعظيم قلبت عليا المواجع

المصيبه العيال بتبقي تفكيرها زيينا قبل مندخل الكليه يقولولك قدوتي مجدي يعقوب وهدخل واجيب امتيازات واتخرج بسهوله واشتعل في مستشفي زي بتاع الاجانب واحضر بسهوله وافتح عياده بسهوله برضو واكون مشهووور واكسب كتييير
وحابب اعرف كل حاجه في الانسان فاكرين هيدرسوا احياء زي بتاعه الثانويه ولا كيمياء هع هع

انا مش بعقدك يا مصطفي بس نص اللي بيدخلوا الكليه بيندموا اثناء الدراسه والنص التاني بيندم بعد مايخلص دراسه و001.% بس هما اللي بيفضلوا حابين الكليه ومش بيندموا
انا كنت هموووت علي طب ولما دخلتها هموووت ويرجع بيا الزمن وادخل اسناااااااااااان

بارررررررررررررررررررررك الله فيك