لو لسه في ثانوي وعندك سؤال إطرحه هنا
 

انا ياجماعة عاوز استفسار بسيط جدا وياريت الكل يشاركنى انا فى تانية ثانوى وجبت 96.3 وحلم حياتى انى ادخل طب اسنان وخايف اخد احياء واقل فى تالتة او مجموعى ده ميخلنيش الحق احياء واخش علوم وانا مش عاوز غير اسنان ومتردد مش عارف اخد احياء ولا اقضيها رياضة وخلاص ياريت الكل يشاركنى وبموضوعية واخلاص فى الرأى

عاااااااااجل
 

انا جبت 98.3 هكمل احياء ان شاء الله ممكن تساعدونى يا دكاترة وتقولولى ايه احسن ملخص فى الاحياء شرح وايه احسن ملخص مراجعة :confused: وانا عندى مشكلة مش بعرف ارسم اعمل ايه معلهش هتعبكم معايا

انا جبت برضو 98.3 ومتردد اخد احياء ولا لأ

السلام عليكم
اولا مبروك ع المجموع
ثانيا مجموعك ده مش وحش ف ظل الامتحانات والشكاوي والتصحيح اللي كنا بنسمع عنهم دول وده بالنسبه لمجاميع كتير شوفتها ف الكيميا كويس جدا
كمان من المتوقع ان التنسيق هينزل اصلا عن كل سنه وحتي لو ده محصلش فانت تذاكر كويس السنه الجايه ان شاء الله وتبذل مجهود اكتر من كده ومع درجات المستوي الرفيع ان شاء الله مجموعك يبقي كويس وتلحق اسنان
يعني اسنان اصلا كانت السنه اللي فاتت واخده من مجموع97.4
يعني انت مجموعك كويس لو كملت بيه
وكمان من السهل انك تجيب مجموع كويس ف تالته لانك بتبقي خلاص اتعودت علي النظام والمذاكرة وطريقه الامتحانات واعرف ناس كتير كانوا جايبين ف تانيه 95 و94 واقل من كده وجابو ف تالته لوحدها99
ولحقوا كليات كويسه زي صيدله واسنان
فانت اعمل استخاره برده
وان شاء الله ربنا يوفقك

السلام عليكم
بالنسبه للاحياء فهي معظمها بتبقي حفظ وبتحتاج كلام كتير ف الاجابه
فاحسن كتاب تذاكري منه هو كتاب الوزاره
وهو كويس والمذاكره منه بتبقي كويسه
بس بالنسبه للملخصات ف الشرح عندك كتاب الامتحان كان كويس
وكمان فيه مجموعه كتب الندي دي كويسه جدا وفيها اسئله كتير كمان بينزل فيها كتاب اسئله واجابه كويس برده
وطبعا ف الاخر دليل التقويم بتحليه وامتحانات السنين اللي فاتت وكان عندنا اسئله بتنزلها الوزاره ع النت مش عارفه ايه النظام دلوقتي كان اسمها اسئله الاوليمبياد
بتعتمد ع الفهم وكويسه
وبتنزل برده مراجعات لكتاب الامتحان وكتاب الندي
.................................................. ....................
والافضل تسالي زمايلك اللي كانوا احياء السنه دي ف تانيه لانهم اقرب للملخصات والمراجعات من الدفعات اللي فاتت
...............................
وبالنسبه للرسم
بتحفظيه مع كتر التكرار والمذاكره
ومش مهم الشكل النهائي للرسم يطلع حلو
المهم تبقي الرسمه صحيحه علميا وعليها بياناتها كامله
وبالتوفيق ان شاء الله

جزاكي الله خير دكتوره الآء علي متابعه حضرتك

ربنا يكرمك يا دكتورة الاء

ميرسي اوي ليكي
وربنا يوفقنا جميعا

انا جبت فيالسنة دي 97.3 فهل ده مجموع ممكن يدخلني طب ولا احول رياضة السنة الجاية

مش عارفه ايه حاله الاحباط اللي بقت عند كل طلبه الثانويه السنه دي
مجموعك ماشاء الله حلو وكويس
بس محتاج مجهود منك السنه الجايه ان شاء الله علشان ع الاقل تحافظ عليه
ودرجات المستوي الرفيع بتبقي تقريبا 1.2%
يعني لو حتي جبت 1 منهم علي مجموعك فده هيبقي كويس
وزي ماقلت قبل كده من السهل انك تجيب مجموع عالي ف تالته عن تانيه
طب السنه اللي فاتت كان واخد 98%مع العلم ان السنه الجايه احتمال ان التنسيق يقل
وفكر مرة تانيه واعمل استخاره برده واللي فيه الخير يقدمهولك ربنا

والله حضرتك رفعتي معنوياتي
اصل انا جايب نفس مجموع hassanmona
وكنت محتار جدا اكمل ولا احول ولا ايه
وانا بخاف من حكاية ابذل مجهود دي :)
بس انا شايف ان الواحد لو جاب نفس المجموع دا في تالته
واضاف عليه المستوي الرفيع هيلاقي نفسه جايب 98,5
وانا شايف ان دا مجموع كويس
بس برده لسه في قلق ..
الواحد ادرك اخطاء كثيرة جدا كان بيقع فيها من اول يوم في السنة
وحتي يوم الامتحان ...
يعني ممكن نعالجها في تالته ونجيب مجموع احسن
بس برده لسه في قلق ..
والمجموع العالي بيجبرنا علي المحافظة عليه
ربنا معانا كلنا .

متألقه يا لولو كالعاده
ربنا يكرمك كده ويبارركلك فيا :d (بدعيلك اهو )


الاحياء اهم حاجه فيها المدرس لانها طويله بغباء ولو مش معاك مدرس شاطر هتلاقى نفسك لايص ف الاخر ومش عارف تلم حاجه لازم ف الاحياء بالذات مدرس شديد كل شويه امتحان م الاول لحد ماوقفت ووجبات واسئله كتير و الحاجات الى بتنرفز دي
لولا ميس الاحياء بتاعتى رغم ان انا ماكنتش بطيقها ولا بطيق حصيتها ماكنتش عمرى افلت الاحياء وخاصه ان انا بكره الماده جدا ياعنى اللى اعرفهم بياخدو مع مدرسيت تانى شاطرين كشرح واسمهم كبير بس مابيعملوش امتحانات وكده نزلو جامد لان الماده دي مابتجيش غير كده
الاحياء نصيحه لوجه الله كتاب المدرسه وبس ف الشرح ماتبصش لاى كتاب تانى ف الشرح علشان هتتلغبط والامتحان اصلا بيبقى عايز بنص كتاب المدرسه
كتاب المدرسه ده يتحفظ بالظبط ف امتحانات الدرس لو بس كتبت حاجه مش بترتيب الكتاب وهى صح بنقص وبتهزأ وبحس انى عملت جريمه فركز جامد ع كتاب المدرسه
فالاسئله بقى
كنا شغالين م كتاب اسمه الاول او حاجه كده مش فاكرة بالظبط بس مش هتفرق ف الاسئله
اسئله كتاب المدرسه طبعا مهمه جدا و دليل التقويم وامتحانات السنين اللى فاتت
وربنا معاكو


ما شاء الله المجموع حلو جدا جدا
توكل ع الله امال مين اللى هيخش احياء ياعنى

hassanomna و د. محمد شعبان
انا كنت جايبه ف تانيه 97 وكملت احياء عادى والحمد لله ف تالته زدت و جبت مجموع يدخلنى طب مستريح بس انا اللى فقر :d
فمتقلقوش ان شاء الله خير
اهم حاجه تصلو صلاة الاستخاره
و كل واحد عارف قدراته شوف اسنان وا طب او صيدله او الكليه اللى انت عايزها خدت كام السنه اللى فاتت و شوف متوسط المجاميع العاليه ف سنتكو ياعنى اللى جايبين 99 و 98 لحد 96 كده اد ايه
و حاولوا تتوقعوا متوسط التنسيق هيبقى ازاى
و شوفوا مجموعكوا هل لو استمريت ع نفس مذاكرتك هتجيبها ولا لا
او لو اعلى شوف الفرق هل هتقدر تجيبو ان شاء الله وانت كنت مقصر ف حاجه السنه دى تقدر تغيرها السنه اللى جايه ولا لا هل الاحياء والفيزيا هتبقى احسن فيها م الريااضه والكميا بتوع تانيه ولالا
واهم حاجه تبقوا صرحه مع نفيكو وكل واحد ادرة بنسفه
ربنا يوفقكوا ويعملكوا اللى فيه الخير

طبعا يا بنتي
هو انا اي حد ( ومتشغليش الغباء بتاع الفيس تاني وتقولي انتي الاء والا ا اي حد)

بس صحيح
مبروك ع الاسم الجديد ( اخيرا غيرتيه )
.....................................
بس ايه ده يا لولو انتي لسه فاكرة ميس الاحياء بتاعتك ومش ناويه تنسي مواقفها البايخه
هو فعلا عندك حق الاحياء محتاجه مذاكرة كتير وفعلا مينفعش تتذاكر غير من كتاب الوزاره
بس كمان الفهم بقي مطلوب فيها كتير عن الحفظ مش زي ايامنا
يعني امتحان السنه دي كان فيه اسئله فهم كتير اوي مش زي كل سنه احفظ ورص
بس تصدقي طلعتي بتقولي كلام حلو اهو وبتنفعي ف المواقف اللي زي دي

طب انا جايبه 95.6 وبرده مش عارفه اعمل ايه
اناحلمي ومن وانا صغيره ادخل صيدله مش عارفه اكمل علمي علوم ولا رياضه ولا اكمل علوم واعمل اللي عليا وزياده حتي لو مدخلتش الكليه اللي نفسي فيها اقدم فنون تطبيقيه وابقى برده حاجه كويسه ابقى مهندسه