ألف مبارك ألف مبارك ألف مبارك ألف مبارك ... استنوا .... نسيت واحدة .. ألف مبارك
 

السلام عليكم ورحمة الله وبركاته جميييييييييييييييييييييييييييعاا ...

أنا قولت لازم اشارك الشعب .. قصدي شعب المعلمين فرحتهم بالصرف ... ... قصدي صرف الكادر ... قصدي يعني صرف زيادة الكادر ..

معلشي أنا مش مركز أوي ... لان الفلوس اللي جايه دي خلت الواحدة مش عارف يسيطر على الكلام .. من الفرخه .. قصدي الفرحه ...

وأحب أطمن الجميع ..

الحمد لله

بدأت تندع عندنا ..

وانهارده لقيت كشوف بأسماء اللي هيصرفوا الزيادات المهولة متعلقة في غرفة الإمضاءات في مدرستي العريقة ... ومتقسمين معلم خبير ومعلم أول أ ومعلم أول غلبان

وبناشد ... كل المعلمين اللي صرفوا واللي هيصرفوا واللي الفلوس هتبقى على قلبهم أااااااااااااااااااد كده ..

أنهم يبصوا شويه للغلابه ... ((( الإداريين )))

وبقترح ... ((( بجد يعني ))) بقترح عن طريق إدارة المدرسة .. كل واحد فينا يطلب انه يتخصم من زيادة الكادر ( خمسه جنيه ) تتجمع كلها وتتوزع على الإداريين في المدرسة ...
وأقسم بالله أني من بكره هعرض الفكرة دي على المدير بتاعنا ... وإن شاء الله هيوافق ..
وياريت كلكم من بكره تطبقوا الفكرة دي .. على أد ما تقدروا يعني .. انا عارف ان فيه ناس هتفترسكم في المدرسة لو قولتوا الكلام دا ... لكن قولوا ورزقكم على الله ...

وبالنسبة للزيادة ...
كلنا في المدرسة .. قصدي اللي هيقبضوا يعني
بدأ كل واحد يجهز شنطة عشان يقبض الزيادة لوحدها ...

الحلم اتحقق يا معلمين ...

وواجبكم ... بهذه الزيادة الكبيرة المهولة الخرافية الرهيبة الخطيرة الطويلة الشديدة .. انكم تسددوا كل ديونكم .. للبقال والجزار .. دا إن كان فيه جزار بتتعاملوا معاه أصلا .. والأقساط كلها تتسدد الشهر دا دفعة واحدة .. خلاص احنا عدينا الفقر يا معلمين ...

ولازم نتفاءل كلنا ... وبلاش ننظر للحياة بنظرة سوداوية متشائمة ...

الحياة مليانه أمل وهناء وسعاد ونادية وأم إبراهيم كمان ، دا غير الجيران اللي في الدور الأرضي .

ومن هنا بعلنها للجميع ..

أنا مصدق الحكومة في كل حاجه ... قبل الكادر وبعد الكادر وقبل الصرف وبعد الصرف وإن شا الله ماصرفنا حتى .. انا مصدقها ...


ألف مبارك ليكم كلكم وعليكم كلكم ... معلم معلم .... بضم الميم .

وأشوفكم لما أقبض الفلوس وتبقى في أيدي كده .. واقعد نص ساعة مصدوم ومش مصدق نفسي ..

عود حميد اخي محمد
ويسعدني ان اكون اول المشاركين برجوعك الينا مره اخري بهذا الخبر الجميل
وده وش الاستاذ طارق والاستاذ نعيم
وش السعد فعلا

لا بجد .. بقا مبارك بجد .. على الإشراف يا ريس ...

وربنا يكون في العون ...

وأنت أهل لها ..

والإشراف أهل لك ..

وأهنئ الأستاذ الذي كان يستحق الإشراف بجدارة من زماااااااااااان ..

أخي الكبير الأستاذ نعيم ...

انت اللي وش السعد يا وش السعد والهنا

افتح الإيميل على مصراعيه ..
لحسن تتقتل .

منور يا مستر محمد
وحشانا موضوعاتك الحلوة
مين فينا منفشوش يقعد حتى ساعتين مصدوم مش نص ساعة زيك يا عم بس يشوف الفلوس دى
يا اخى مش عارف بجد الواحد هيعمل ايه بكل الفلوس دى
هيغير العربية ولا هيشترى عمارة ولا عفش ولا هيعمل ايه ولا ايهولا ايه ولا ايه - تعرف تغنى معايا تقول ولا ايه .....
والله الواحد خايف ليغير العيااااااااال!!!!!!!!!!!!!

منور يا باشا وعاوزين نشوفك دايما
لك احترامى والجميع

ألف مبارك علينا كلنا يا أستاذه نبيلة ... وأهلا بيكي .. معلشي بقالي فترة كبيرة غايب عن الملاعب .. ولسه ماتشرفت بناس محترمة وأخوات فاضلات زي حضرتك ..

عموما ..

بلاش مبروك .. لان مبروك دي بتاعة الجمل ...

خليها مبارك .. لأنها أصح لغويا ............. واللي يحصل يحصل .

حمدا لله على سلامتك يا أستاذ محمد

ومبارك عليك الكادر ويارب تنفقهم فى الخير والصحة

كما أن اقتراحك بشأن الاداريين مفيد وجدير أن ننشره فى مدارسنا وإن شاء الله يلقى القبول

السلام عليكم ومدلله على السلامه استاذ محمد وعودا حميدا

احنا طبعا قبضنا الكادر بالامس ولله الحمد فاضل منهم خمسين جنيها

الحمد لله المهم اقتراحك سوف ناخذه ببالغ الاهميه
ولا ننسى ما اتفقنا عليه قبل ذلك

1-مستشفى السرطان
2-اهل غزه
3-فقراء البلد اللى كل واحدفى بلده
عارفهم او البلد الغنيه لاينسى صله رحمه

واحد يقولى ام العيال عارفه عدد الفلوس

واحده تقولى هاجيب تايير

صدقونى الشهرين دول لو انفقت منهم هايرجعوا لكم ويبارك لكم فى باقى الشهور

وربنا يزيد كل منفق خلفا اللهم امين

كنت عايزه اسال حضرتك استاذ محمد سؤال هو جنب اسم حضرتك اسفل الصفحه علامه + ليه
يعنى يزودك بركه فى الرزق؟ولا ايه

والله واحشني جدا أستاذ مصطفى النحاس باشا ...

ومبارك عليك الكادر .

أهلا أختي الغالية جدا ...

بالنسبة لسؤالك عن علامة زائد ..

دي لأني كنت واخد وسام التميز من زماااااااااااااااااااااااااااااان .. بسبب مسابقة كنت شاركت فيها في قسم الكمبيوتر والأنترنت وكسبت ...
فكان مكتوب تحت اسمي وسام التميز .. او حاجه زي كده مش فاكرها والله ..

وبعدين اختفت .. مش فاكر من امتى ..

ولسه موجودة كلمة زائد دي ....
لكن دي مالهاش علاقة بزيادة الكادر والله ..
ولو ليها علاقة هاخبي عليكي برضه ؟؟
ينفع ؟

مبارك يا استاذ محمد وربنا يزيدك وعقبال حوافز ال 75 %
اظن سعتها بقى نقدر نغير العربية والشقه والعفش كمان
واشكرك على اقتراحك بالنسبة للاداريين