التعاقد مع 81 الف معلم جديد
 

اكد الدكتور يسرى الجمل وزير التربية والتعليم انه تم تخصيص 322 مليون جنيه فى الموازنة الجديدة للتعاقد مع 81 الف معلم جديد فى اول يوليو من بين العاملين بعقود مؤقته او بالحصة .
نقلا من جريدة المساء يوم الخميس 4 يونيو 2009 .

حضرتك دي تعاقدات جديدة مدرسيت تعاقد زينا بس دفعة جديدة يعني غيرنا احنا وضعنا زي ماهو يعني دي عقود جديدة مش تعديل لعقودنا ولا بدل منها

لا تقريبا من نفس النتعاقدين مع تعديل عقود لانه قال من بين العاملين بعقود مؤقتة او الحصة
بيلعبوا باحلام الشباب الله ينتقم منهم

السلام عليكم
ياجماعة دى عقود جديده كانوا مقدمين من شهور

يا إخوانى لا تضعوا أمل كبير على هذا السفه ، فهذه التعاقدات إما بالتقدير (جيد جدا طبعا) و إما كما يعلم الجميع بالواسطة.
فى البحيرة الأسماء ظهرت و كان المعيار الوحيد هو التقدير بغض النظر عن الأقدمية ، هل هذا عدل ، ثم أنه منذ متى و كان المعيار التقدير ، فهناك ألاف مؤلفة قد ألتحقوا بالتربية والتعليم فى التعاقدات الماضية و ليس لهم أدنى صلة بالتربوى إما تجارة أو حقوق ، بل و الأدهى أن حملة دبلومات متعاقدين و مدرسين فصول أيضا ، فمن أين حصلوا هؤلاء على التقدير ، أم أن السياسة الحالية هى الكيل بمكيالين.
حسبنا الله و نعم الوكيل

انا مش معاك فى الكلام ده يا باشا.. لازم يكون التقدير هو معيار الاختيار والمفاضلة فعلا.. امال نفرق ازاى بين اللى تعب واجتهد فى الكلية وبين اللى قضاها لعب.

وبعدين الدبلومات اللى بتتكلم عنها دى كلها طلعت بره التعاقدات.. اما بالنسبة للحقوق والتجارة فالشرط واضح جدا وهو انهم لازم ياخدوا دبلومة تربوى علشان يتساوا مع خريجى تربية

وبكده انا شايف ان الموضوع عادل جدا.. وبعدين فكر فيها لو كنت مكان اللى بيختار هاتعمل ايه فى الاعداد دى كلها وهاتنصف بينهم ازاى الا بالطريقة دى ؟!!

انا شغال مدرس علوم بالحصة منذ ثلاث سنوات وانا خريج علوم قسم كيمياء خاصة تقدير عام جيد جدا وانا ليس موجود بالتعاقدات الجديدة وكان الوزير بيقول ان التعاقدات لمن يعمل بحقول التربية والتعليم كلة في الهواء علشان كدة ادعوا جميع مدرسي الاجر بمصر الي الاعتصام امام مبني وزارة التربية والتعليم ويكون لنا وقفة بعد ثلاث سنوات حروح فين الشارع مصيرنا

بالنسبة لموضوع التعاقدات
حضرتك بتقولى انهم اللى مقدمين من شهر مش فاهم هم قدموا فى محافظات ومحافظات تانيه لا ولا ايه بالضبط .
ثانيا انا عندى فى الغربية كانوا من حوالى شهرين ثلاثه كانوا طالبين من الناس الذين كانو يعملوا بالحصه من قبل وحصلوا على مكافأة امتحانات ان يحضروا خطاب من المدرسة يثبت انهم حصلوا على مكافأة امتحانات وبالفعل ذهبت الخطابات الى الادارة التعليمية وبعدها تم تبييض الكشف بالاسامى وذهب الى المديرية ومن بعدها لا حس ولا خبر فهل هذا سيكون له علاقه بالتعاقدات الجديدة .
ارجوا سرعه الرد

السلام عليكم
فى الغربية بس ادارة غيرك قدموا عادى فى الادارة وجابوا ورق يثبت انهم بيشتغلوا بالحصه حتى المكافاه 110 كمان قدموا وفى البحيرة كمان زمايلى قدموا عادى للادارة وعلى فكره اسمائهم منزلتش يعنى راحت عليهم الحصه والعقد وحسبى الله ونعم الوكيل

السلام عليكم
يا اخ فاشوش يعنى الى ضيع عمره فى الحصه وتعب واتبهدل وانت عارف ازاى بيتعامل نقوله باى خلاص مع السلامه لازم يكون فيه عدل مش عشان التقدير يطلع يعنى هو مستحمل ده كله على انه يتعاقد ويمكن ضيع شغل تانى عشانه يعملوا فيه كده انا اعرف ناس بقالها خمس سنين بالحصة واسمائها منزلش الظلم حرام برده

الى الأخ fashosh585 إسمح أختلف معاك كل الإختلاف
1- هل يعتبر التقدير هو المعيار فعلا ؟ هل نحكم على كل أصحاب التقديرات أنهم كانوا بيتعبوا و الباقى قضوها لعب إسمح لى هذا كلام غير صحيح بالمرة فأنت تعلم جيدا كيفية الحصول على تقدير بالكليات الأن، كان معى زميل ينقل كل الملخصات على التختة و طلع طبعا بتقدير جيد جدا، أما فلأننى أخاف الله طلعت بقدير جيد مرتفع ، و عندك ناس باتخد كورسات عند الدكاترة أو عند المعيدين، يعنى بيشترى التقدير. و بعد ده كله تقول لى بيتعبوا و بيشتغلوا و نعينهم عن غيرهم ، أسف أنا مش معاك.
2- أما بالنسبة للدبلوامت مين قالك أنهم طلعوا بره التعاقدات ، فى البحيرة تم عمل إحصائية ,جدوا فيها أن حملة الدبلومات الحاصلين على تعاقدات يفوق أعداد التربويين مرتين أو مرة ونصف حتى أكون دقيقا، و إلى هذه اللحظة يتقاضون أجرا كمتعاقدين و مكافئات و كل الأمتيازات، لولا أنه لا يصح لكنت كتبت لك قائمة بأسمائهم ، أسف برضه مش معاك فى ديه كمان.
3- بالنسبة للحقوق و التجارة و غيرهم لم يشترطوا أبدا الحصول على شهر واحد دراسة أخرى ، مش تقولى دبلومة تربوى و برضة عندى آلاف الأسماء المتعاقدين فى البحيرة و هم لا يمتون للتدريس بأدنى صلة، أسف كمان مش معاك فى ديه.
4- هل أبو تقدير اللى كان لسه بيدرس من شهر أو شهرين عنده خبرة بالتدريس زى اللى أشتغل بالحصة سنين و صبر على قرفها على أمل أنه يتعاقد بعد كده ، و ده حصل أمام عينى واحد جيد جدا حضر للمدرسة و بسببه إتقطع عيش واحد تانى بحصة له خبرة سنين و لكن معلش أصل تقديره جيد بس ، وبعدين واحد قاعد بقاله سنين إزاى نسيبه و نشغل واحد لسه حديث التخرج ، و أقسم بالله أن كل كلامى واقع مرير رأيته أمام عينى، برضه مش معاك فى ديه.
مع الأسف كما ذكرت السياسة الحلية هى الكيل بمكيالين.
و حسبنا الله ونعم الوكيل

السلام عليكم
والله بجد كلامك صح وفعلا انا كان لى زميلى مش بتحضر ولا بتعمل اى بحث كل الى كانت بتعمله انها كانت تيجى فى الاخر وتصور وخلاص واخدت تقدير جيد جدا

السلام عليكم ورحمة الله انا المهندس سعيد السيد عضو جديد بالمنتدى ياريت تساعدونى على التعارف الجاد وتقبلونى صديق

السلام عليكم اهلا بيك يااستاذ سعيد