<div align="center">للكوسه في بلادي شئون



بتخلي المسنود فرعون



يتفرعن فين مهما يكون



وتخلي الجاهل أستاذ



والأعرج لاعب جمباز



وتخلي الأحول هداف



والكوره الآوت ف الجون



للكوسه ف بلادي شئون



لو تعرف واحد ف الشرطه



راح تخرج من أجدع ورطه



والراجل اللي انت ظلمته



تلاقيه متلقح مسجون



أو تعرف شخصيه كبيره



شغاله ف البنك مديره



راح تاخد من غير ضمانات



كام قرض بمليون مليون



وهروبك طبعا مضمون



ويا عيني لو تعرف نايب



ف المجلس مش نايب خايب



راح تبني أبراج وهميه



أوراقها مظبوطه أكيد



وفلوس الناس المهريه



حتجيلك م الجيب للإيد



بعديها تروح المستشفى



وتقيد نفسك مجنون



أحكامك تسقط ف ساعتها



بعديها ترجع موزون



ويا عيني لو تعرف شيخ



فجنابك طاهر علطول



وصيامك طبعا مقبول



وإذا فرضا حبيت تتجوز



تتجوز من غير مأذون



وإذا ساكن ف عماره جديده



وحبيبك راجل مسئول



فسيادتك من غير ما تقول



يركب لك فورا تليفون



ولو انت عندك عربيه



ونمرها سوده بنسرين



حتعدي أجدعها كمين



وحتكسر أوضحها إشاره



ماهو نمرك سوده جباره



ولا تعرف أيتها قانون



ولو انت بتعرف فرّان



أو واحد بياع جرنان



راح تاخد طلبك وحتمشي



من غير ولا دوشه ولا دور



والناس الغلبانه حتاخد



طلباتها بعدك وتغور



ماهو كله غيرك بيهون



ولو انت زميل الحلاق



راح تحلق اولها زبون



وإذا كنت بتعرف دكتور



حتعيش متطمن مسرور



وحتسلك ف لجان الشفوي



ومجال تعيينك موفور



وحتطلع فالتليفزيون



بالبدله وفيها الببيون



تتكلم وبكل بساطه



عن شرف المهنه المدفون



لكن لو شاعر غلبان



قلت اللي ف نفسك علطول



حيقولو مين قال لك قول



ويهاجمك مليون إنسان</div>

محدش ليه في الشعر ولا ايه

جميلة جميلة جميلة جميلة وبجد لا تعليق كل كلمة تعبر عن مصر بالضبط

شكلنا هنتاخد امن دولا يا جامبو ههههههههههههههههههههههههههههههههه :D :lol:

انا كنت خايف من كده

الله عليك بجد الاسلوب روعه

والمضمون لا خلاف علي انه حال البلد

كلمات معبرة فعلا

اسلوبك جميل في التعبير والأخراج


ولكن اعيب عليك كلمة (((( فرعون ))) في جملة ( بتخلي المسنود فرعون) فليس فرعون هو المرجو من اي فرد , وان كانت لتتزن القافية فقد تقبل00

وبالتوفيق ان شاء الله
m.h.b( شباب الراية)

شكرا للكلمات
يسلمو جمبووو

شكل الباقي مقتنع ان البلد ديحكمها كويس

الله الله بجد
جميله جدا جدا جدا جدا .......
انت بجد عبرت عن الموضوع باسلوب وكلمات ممتازه
وانت تناولت قضيه تستفز اى انسان عايش دلوقتى لانه بيعانى منها
وده هيكون من الاسباب الاساسيه لنجاح العمل
بعد كونه جميل
لكن تعاطف القارىء مع القضيه التى تتناولها لابد ان يؤدى الى نجاحها
والى الامام
ولا تحرمنا من مثل هذه الاعمال الرائعه

يا جماعة الراجل بيقووووووووووول منقوووووووووووووووول
منقووووووووووووول

يعني مالوش يد ف حاجة غير انه تكرم علينا وجابها لينا

شكرا اخي الفاضل

وعجبني جدا::

لكن لو شاعر غلبان



قلت اللي ف نفسك علطول



حيقولو مين قال لك قول



ويهاجمك مليون إنسان


ههههههههههههههه

كلمات جميلة جدا تعكس واقع اليم جدا


يا ريت بلادنا مكنتش كدا


دا الوسطة بقت فعلا فى كل حاجة حتى وانت بتجيب رغيف العيش


الله اكبر ربنا يرحمنا



شكرا ليك كتير

الشاعر يحضر الشنطة
بتاعت المعتقل وسلملي عليه

الرد ده انا جبته من واحد صاحبي لما وريته القصيده

جميلة جدا يا علوة

بجد بتوصف حال البلد اللى اصبح الوطنى فيها خاين و العميل مسؤول

يلا حسبى الله و نعم الوكيل

:):D:):D:):D:):D:):D:):D