|
مش فالحين الا فى الكلام
السلام عليكم بقالى كتيير معملتش مواضيع فى القسم العام علشان الصراحة لما أجى فى القسم دة بلاقى المواضيع كلها شبة بعض يأما تلاقى واحد تانى بيحكيلك قصة حياتة :blush: المهم فية موضوع كدة جاى على بالى بقالة كتيير أوى أوى وقولت لازم أناقشة معاكم يمكن نوصل لحل المشكلة دى أو يمكن نكون أحنا المشكلة نفسها كل مأمشى فى حتة الاقى الى عمال يشتكى والى عمال يقول الأسعار بقت نار والى عمال يقول البلد دى مفهاش شغل والى عمال يقول مش عارف أجيب عيش بزمتكم أنتم حاسين بظلم فى البلد دى ؟؟ طب طالما حاسين بظلم لية متطلعوش وتعملوا مظاهرات أو حتة ثورة زى زمان ولا أنتم بتحبوا تشتكوا وخلاص عمال على بطال من كام يوم طلعلنا مشكلة وهيا تحديد النت وبتاع لقينا بسم الله ماشاء الله شباب مصر ظهرت وطلعت عملت أحتجاجات قدام شركات النت وبعديها بكام يوم القرار دة أتلغى شوفتوا بقى لما أتكلمتم وبقيتوا يد واحدة أزاى قدرتم توصلوا للى أنتم عايزينة ولا أنتم مش فالحين الا فى كدة وبس أهم حاجة عايزين النت علشان مش عايزين نتفرج على هيفاء وهيا بترقص :d من غير محد يقطع النت عننا لا أحنا عايزين نبقى Free يامان مننكرش أن القرار دة كان فية بعض الظلم علشان فية ناس عايزة النت علشان شغل وأنا واحد منهم مع أنة مكنش هيظلمنى بس كل الى كانوا بيعملوا أحتجاجات الى يقولك لا أزاى يحددوا النت أنا كدة مش هقدر أحمل أفلام جديدة والى يقولك مش هقدر أحمل أغانى والى يقولك علشان أعمل دونلود 24 ساعة براحتى يااااة للدرجة دى هو دة بس الى بتفكروا فية ياشبابنا والى زعلانين علية وبعد القرار على طول بقيتوا يد واحدة وعملتوا مظاهرات بس هسألكم سؤال وصلتوا للى أنتم عايزينوا ولا لا ؟؟؟ طبعآ وصلتوا للى أنتم عايزينوا طب لية منبقاش أيجابين شوية لية نقعد كل يوم نشتكى ونقول البلد بايظة البلد خربانة الحكومة ظالمة :o طب مهو أنتم لو حاسين بظلم لية متتكلموش زى متكلمتم على تحديد النت ؟؟؟ هقولكم كام حاجة كدة بس محدش يقولى أنت بتدافع عن البلد أو الحكومة أو واحد تانى يقولى أنت أتلاقيك تبع الحزب الوطنى لا أنا أنسان مواطن مصرى زيى زيكم نيجى للبطالة هو بجد فية بطالة ؟ ولا كلام وبس طب ياعم أنت يالى مش لاقى فلوس طب بدل متصرف فلوسك على الحشيش والبانجو والمخدرات أصرفها على حاجة تنفعك وبدل مأنت قاعد على القهاوى بتكركر معسل روح دور على شغل وهتلاقى بأذن الله والله فية شغل على قفا من يشيل وكمان تشتغل أى شغلانة المهم تكون حلال و واحدة واحدة ربنا هيكرمك وكمان هو أنت بتجيب الفلوس الى بتشترى بيها الزفت دة منين ؟؟ أنا أعرف ناس بتشتغل والله علشان يجيبوا بيها سجاير وتلاقى ياعينى أبنة فى المدرسة مش عارف يدفع مصاريف الكتب والأخر نقعد على المصاطب ونقعد نولول ونقول الكلام الى خلاص زهقنا منة بجد دة أيام عبد الناصر علشان رغيف العيش غلا نص فرنك قامت ثورة وأحنا عاملين نتكلم ونشتكى وبس حتة لما الأسعار نزلت برضوا بنشتكى اللحمة الى كانت بــ 50 جنية بقت بـ 25 جنية فرن العيش بقى فية دقيق وبقى فاضى عن الأول طبعآ كل مكان و بيختلف وكمان هتقعد تقول فين أيام زمان زمان يا والدى كنت بتاخد مرتب أكتر حاجة 5 جنية دلوقتى بقى مرتبك ميقلش عن 500 جنية زمان يا والدى كنا 25 مليون نسمة دلوقتى قربنا على 90 مليون نسمة وتقولى الحكومة ومش الحكومة هو مش أنت الى بتخلف 7 أو 8 وبعد كدة تشتكتى !! غير كدة مش من كام شهر حصلت حاجة اسمها أزمة أقتصادية ولا مسمعتش عنها ؟؟ شوفت الدول التانية حصلها أية ؟؟ ياترى بزمتك أنت حسيت أن الأزمة أثرت فى مصر ؟ دة بالعكس والمرتبات عليت كمان :) هتقعد تقول الرئيس دة وحش وهو الى عمل فينا كدة طب هو مش أنت الى بتنتخبة ؟؟ نقعد نقول رئيس ظالم وحكم ظالم ويوم الأنتخابات تلاقى الى يقولك أية دة الرئيس بيدى 50 جنية وكيلو لحمة للى هينتخبة تلاقى الشعب كلة نسى الى قالوا ويروح الأنتخابات ويقعد يقول فداك نفسى وروحى يا ريس :d بجد أحنا شعب نستاهل الى بيجرى وبيحصل فينا ولو أحنا حاسيين أن فية ظلم فى البلد كنا عملنا حاجة لا بنتكلم وبس يا ترى بعد الكلام دة كلة أنت (ى) معايا فى الكلام دة ولا ضدى ؟؟ ولية ؟؟؟؟ ومين المشكلة أحنا ولا الحكومة ؟؟ ولية الناس كلها نفسيتها بايظة ومحدش طايق نفسة ولا طايق غيرة ؟؟ عبر وقولك رأيك بكل صراحة ومن غير مجاملة وكل عام وأنتم بخير |
بس يا حبيبي بس
هما شوية برد ويروحوا بهزر طبعا بس انت شكلك مش عايش انا مش عارف اتكلم دلوقتي وعندي كلام كتير بس عايز اقولك شوف احصائيات البطالة في مصر وارجع ده بدون النظر لحجم المرتب لو اشتغلت لي عودة |
اقتباس:
متنساش أنى قولت طالما أحنا شايفين أن فية ظلم لية منعملش زى معملنا على موضوع النت ؟؟ ومتنساش برضوا أننا الى بنختار دة ومهما كان مرتب الشغل الى بتشتغلة هيبقى أفضل طبعآ من القعود على القهاوى منتظر عودتك |
بجد انا معااااااااااااااك فى معظم اللى قولته بجد المشكلة دلوقتى فى الشعب نفسه فعلا زى ماقولت اهم حاجة دلوقتى الشباب بيفكروا فيها هى حكاية النت والاغانى وبجد معظم الشباب اللى باشفهم مستهترين وتافهين
وحكاية البطالة يجى الشاب يقول انا هسافر انا والله ماانا قاعد فى البلد ده ولما يسافر بيشتغل ايه؟؟؟؟ بيشتغل عامل نظافة بيغسل صحون بيشتغل فى المطاعم بيبيع جرايد !!!!! ويكون ده اقصى طموحاته والمشكلة ان الشباب المصرى عاوز اول مايشتغل يقعد على مكتب وفى غرفة مكيفة وياخد مرتب كويس وكله يكون فى التمااااااااااام من غير مايتعب ولا للحظة واحدة وانا عندى معظم الشواهد اللى بتاكد كده طب ليه بدل مايسافر ويتطلع عينه يشتغل هنا فى بلده ويبداها بجد وحكاية الظلم هو فيه فعلا ظلم وظلم كبير كمان لان كل واحد مسئول فى البلد بيضحك على غيره انا بجد لما بشوف مثلا البرامج اللى بتجيب احوال المستشفيات والسكن والناس الغلابة اللى بيتعاملوا على انهم مش ادميين بجد بحزن جداا جدا على الحال اللى وصلناله والزيادة السكانية اللى بتتكلم عنها صحيح مش عارفة فيها ايه لو الواحد خلف طفلين او تلاتة بالكتير فى ناس هتقول الدين بيقول كذا وكذا بس برضه ماينفعش نتحجج بالدين لحد مانبقى فى مجاعة وكمان الرسول صلى الله عليه وسلم اكيد اكيد مش هيباهى بينا الامم يوم القيامة ومعظم الجيل حرامية ونصابين ومخريبين وتافهين معلش انا اسفة للاطالة وبجد اللى عاوز يغير بلده بفعله مش بكلامه لاننا عمرنا ماهنتغير بالطريقة الحالية بس بجد موضوعك رائع وانا معاااااااااااااااااااااااااك |
اقتباس:
لا أطالة أية بس بالعكس دة كلامك غطى على كلامى بجد الحمد لله أنك فهمتى وجهة نظرى بس للأسف محدش بيسمع وزى مقولت أحنا مش فالحين الا فى الكلام وبس كلمة الظلم على بوقنا على طول دة حتى الموظفين الى بيشتغلوا فى مصالح حكومية يعنى أكتر ناس بتنهب الا ما رحم ربى بيقعدوا برضوا يشتكوا وبيتكلموا على البلد مهو البلد هيتصلح أزاى وأنتم خربتوها ؟؟ وأنا أهو بقولها ثالث مرة لما أحنا حاسيين بالظلم لية معملناش ثورة وأنقلبنا على الحكومة زى ما زمان يامة كانوا بيعملوا بس بجد أحنا شعب نستاهل الى بيتعمل فينا وللأسف أحنا الى بنخربها شكرآ بجد على مرورك الجميل وكلامك الأجمل وكل سنة وأنتى طيبة |
ايه يا معلم .. انت عايز تشيل المسئولية من الحكومة ولا ايه؟
المذيعين و الشخصيات العامة .. بيقولو البلد فيها شغل و فيها فلوس. مثلا الدكتور احمد زويل لما كان ف مكتبة اسكندرية قال "محدش يقولي ان مصر مفيهاش فلوس"...انا معاك مصر فيها فلوس كتير بدليل اننا عندنا رجال اعمال من اغنى الرجال في العالم. بس النقطة هنا .. الفلوس كتيرة بس موجودة مع مين بالضبط؟ و الشغل ..الشغل لا مفيش شغل .. يا اما تشتغل شغلانة متجيبش حتى الفلوس اللي اتصرفت عليك عشان تتعلم و تاخد شهادة من الجامعة. اما بقى بالنسبة للمظاهرات و كده .. عايز اقولك بس وطي صوتك احسن تلبس تهمة تحريض على الشغب. محدش طايق نفسه ولا غيره و الناس بقت اخلاقها زبالة .. عشان كل اللي انت قولته في الموضوع. مش عارف .. هل احنا لازم ندخل حرب عشان اخلاقنا تتحسن زي حرب 73 .. اللهم اصلح احوال بلادنا. كنت عايز اقول كمان .. ان الشباب مش كله تافه .. و الله في شباب كتير عندهم طموح و مش بيفكروا غير في التعليم و الشغل. و اللي بيفكر للسفر مش عشان الشغل بس .. اللي عايز يسافر عايز يروح حتة يقدر يحافظ فيها على كرامته و يقدر ياخد حقه و لو ان بالنسبة للمصريين الكرامة ضاعت جوه و بره..عندنا سفارات المفروض تتقلب افران بلدي. و بعدين اكيد في ناس حاولت تصلح في البلد .. يا دخلت السجن يا اتقتلت يا حصلها اي مصيبة .. الحل ان الشعب كله يتفق. واحد لوحده مش هينفع .. اعتقد ان الثورات اللي حصلت في مصر حصلت بسبب ظروف اقل من دي كتير. انا مش بحرض على ثورة .. مش عارف بصراحة ايه الحل. |
هى فعلا مشكلة كبيرة جدا
لان كل ماالواحد يروح فى حتة يتنكد مش عارفة ليه كدة هل احنا السبب ولا اللى حوالينا انا بحييك ع الموضوع الجميل وان شاء الله هحط شويه افكار كدة بس اجمعها الاول |
شكرآ على وجهات النظر واضح أن الناس هنا مش عايزة تدخل ترد علشان يأما 1- خايفين يتكلموا ( زى ميكون هيتقبض عليهم ) 2- يا أما مالهمش فى الكلام دة وليهم بس فى المواضيع التافهه الى نازلين بيعملوا فيها كل يوم ربنا يهدينا يارب ويهديهم يارب واضح أننا عمرنا مهنتغير وعقليتنا هتفضل زى ماهى كل سنة وأنتم طيبين ودمتم زى مأنتم |
هو معروف ان اي شعب لما بيفيض بيه بيبقى اخر حل هو الثورة و بتكون اخر حاجة لانها ممكن تعمل خساير كبيرة فبتبقى اخر حل زي الحرب كده.
انا بتكلم في العام على اي شعب .. معرفش احنا فاض بينا ولا لسه. بس اعتقد ان الاضرابات و الاعتصامات اللي بتحصل بقالها كام سنة دلوقتي بقت نموذج مصغر لثورة. |
واللة انا معاك فى كل اللى انت قولتة
واللة انا لما بشوف الشباب فى الشارع اليومين دول بحزن على حالنا اوى وبقول هو اية اللى جرالنا وبعدين بلدنا فىها خير كتير اوى بس نعرف ازاى نستغلة وبعدين لية منشتغلش فى بلدنا ونتمرمط فيها احسن مانتبهدل برة لية بنرضى بالذل برة بلدنا وبنيجى فيها وبنتشرط وبعدين اصلا احنا لو عايزين نغير بلدنا للاحسن هنغيرها بس كل دة مش هيحصل الا لما نتجمع كلنا ونبقى ايد واحدة وكمان احنا لو فعلا بنعترض على كل ظلم بيحصل وكل غلط بيحصل قدامنا مكانش هيبقى فى فوضى كدة وبعدين منعلقش اخطائنا على شماعة الغير وكل واحد يمشى على قدة ومش نخلف كتير ونقول كل طفل بيجى برزقة .............................ومعلش انى طولت بس واللة فى كلام كتير الواحد عاوز يقولة وساكت......................... |
أحمد باشا أزيك أية أخبارك ؟؟ يارب تكون بخير دايمآ فعلآ لية منعملش ثورات ؟؟ طالما أحنا شايفين فية ظلم فى البلد وعاملين نتكلم ولية بنعمل أحتجاجات على حاجة تافهه وبس ؟؟؟؟؟ لية منبقاش أيجابين مش سلبين ؟ _______________________________ بالنسبة لماتش الأهلى الى متذاعش بجد عندك حق الواحد أتحرق دمة مش علشان مشوفناش الماتش لا علشان الطريقة الى بيعملونا بيها والله أحنا بجد شعب يستاهل الى بيحصل فية _____________________ المواضيع الى فى العام دى دلوقتى كلها مواضيع تافهه الا ما رحم ربى طبعآ يعنى بنسبة 90% وفية ناس تستحق أنك ترد عليها بس بجد مواضيع تافهه وكلها شبة بعض ومش بتتكلم على مواضيع هادفة وكلها مواضيع عن البنات والمعاكسات والشباب والمواصلات :romarioxp6: عمومآ خلينا فى الموضوع أفضل يلا ربنا يهديهم ويهدينا جميعآ شكرآ على مرورك الجميل وكل سنة وأنت طيب |
اقتباس:
|
اقتباس:
لا أتكلم زى ماحضرتك عايز هو أحنا حيلتنا أية غير الكلام وسط الى بيحصل دة بس أهم شىء كلامنا يبقى أيجابى زى رد حضرتك كدة وفعلآ الشباب بيطلعوا برة مصر بيمسحوا الجزم ولو هيشتغلوا هنا هيبقوا عايزين مكتب وتكيف ويقعد حاطط رجل على رجل وياخد مرتب ومازلت وبقول أنا مش بدافع عن الحكومة ولا عن البلد بس خير بلدنا فى أيدينا أحنا والساكت عن الحق شيطانآ أخرس وأحنا كدة أتساوينا بالشياطين وبس شكرآ لمرورك الى أسعدنى بجد وكل سنة وأنت طيب |
اقتباس:
لا مش بتتقال كدة أسمها الناس ملهاش حيل غير للكلام نورت :d |
اقتباس:
|
| جميع الأوقات بتوقيت GMT +2. الساعة الآن 12:06 PM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.