|
قصة حياتي 2
أنا حبدأ بالتعريف عن نفسي وبعد كده حتكلم بتلخيص عن البارت الأول وبعد كده طريقة البارت التاني Details About Me الاسم : محمد السن / 19 سنة الدراسة / أولي تجارة إنجليزي الهواية / كمبيوتر وتصميم (بس لسه مبتدأ ) :) Summary ( Part 1 ) Not all أنا حكيت شوية عن حياتي الشخصية وبتلخيص كده أنا ليا 3 إخوات بنات ( بموت فيهم ) و كان ليا أخ توفي مارس 2003 Part 2 Show أنا ححكي تفاصيل معينة عن حياتي بس أنا حبيت أضيف فكرة حلوه برضو في الجزء التاني لو حبيتو تسألوني عن مواقف معينة في حياتي وأنا أجاوب عليها وبعد كده أسمع التعليق والنقض ودي أكتر حاجه بسعي عليها |
ربنا يوفقك ف حياتك كلها
|
حكايتي 1
أنا ححكي حكايتي معي خطيبتي ( نظريا مش رسمي يعني ) مينفعش أحكي تفاصيل معرفتي بيها لسببين علشان الادارة وعلشان ممكن حد يعرفني يقرا الموضوع ده فيسببلها إحراج المهم أنا عرفتها وبعد كده بفترة هيا مكنتش لسه عقلت أو خليني أقول نضجت المهم هيا كانت متعودة تخرج في البلكونة من غير حجاب وكان ده بينرفزني وهيا بسم الله ماشاء الله جميلة اوي ففي يوم لقيت كام واحد واقف في الشارع وعنيهم رصده البلكونة بتاعتها وهيا واقفه مدخلتش إضايقت دا غير إني كنت بفكر في نفس الوقت إني عايز أسيبها لأني عندي مبدأ إني مش ححب غير اللي حتجوزها وكنت خايف أحبها عشان كده كنت عايز أبعد المهم مصدقت لقيت الفرصة المناسبة والكلام ده كان أيام الامتحانات رحت قايلها إني مش حكلمها تاني وكده فاتضح إنها كانت لسه ناقلة جديد وفبيتهم القديم كان عادي عندها تخرج بشعرها وكده فهيا مش مقدرة قصدي إيه فحست إن كرامتها إتهانت فقلتلي ومالو وقعدت فترة عادي جدا لحد مجات أيام الامتحانات لقيت دماغي مشغولة بيها مش عارف أكل ولا عارف أذاكر ولا عارف أعمل حاجة خالص بمعني أصح مش عارف أعيش رحت متصل بيها أستجديها نفسي أكلمها ساعتها أتاكدت إني بحبها لأني مش عارف أعيش من غيرها فوضحتلها وجهة نظري وهيا كانت زعلانة وبصراحة هيا ليها حق لأني مقدرتش إنها كانت عايشة في بيئة تانية قبل كده رحت مكلم أختها الكبيرة قلتلها أنا قصدي ايه وإني بخاف عليها علشان كده إتصرفت بالطريقة دي ويمكن تكون الطريقة غلط بس وجهة النظر والمقصد صح فكلمت أختها لحد مقلبها حن عليا بعد العذاب ده بعدها بقي وإحنا في تفاهم علطول ومزعلتهاش ولا مرة بس بتقلقني كتير عليها وهيا متهورة وأنا بخاف عليها أوي ومش عارف القلق ده جالي منين بقالي فترة بفكر فيها 24 ساعة معرفش أنام غير لما أكلمها وأشوفها كنت عايز أطلب منكو طلب هيا مبتتكلمش خالص هيا أصغر مني بـ4 سنين فأنا حاسس إن فيه مساحة بيني وبينها ووضحتلها الكلام ده كذا مرة أنا عارف إن هيا بتحبني وعشان كده بتخاف تقول كلمة تخليني أحس إنها تافهة أو شبه كده مع إنها من أذكي الناس اللي قابلتهم في حياتي فمش عارف أعمل ايه نفسي أموت المساحة اللي بينا علشان تحكيلي كل حاجه أنا بحكيلها كل حاجه تقريبا طول الوقت أنا اللي بتكلم وهيا بتسمع حتي التعليق علي اللي أنا بقوله مبسمعهوش منها
|
مش عارف أكمل الموضع ولا أنا مش شايف أي إهتمام أنا بقول لو حد عايز يعرف تفاصلي أكتر يسألني وأنا أجاوب
|
اقتباس:
اخبارك ايه القصه بتاعتك جميله وانا لسه حالا مخلصها وربنا يكرمك ويوفقك بس انا عاوز اعرف حكايتك مع الكمبيوتر اللى انت قلت فى البارت الاول انك هاتحكيها. سلام. |
السلام عليكم ورحمة الله وبركاته
والله الكلام دا حلو وجميل جدا انك تكون صريح كدا وانت اخدت خطوه اجمل انك كلمت اختها بس انا حسه من كلامك انك لسه صغير تفكيرك يعنى صغير وكمان هى صغيره اوىىىىى يعنى اصغر منك باربع سنين يعنى عندها 15 سنه ودى لسه صغيره خاااااااااالص فانت بلاش تحير نفسك معاها وتحيرها معاك و تتفقوا على وقت تخطبها فيه ومتكلمهاش دلوقتى لحد ما تخطبها رسمى ودا راى يعنى وانت حر فى الاول وفى الاخر والسلام ختام |
اقتباس:
اقتباس:
|
اقتباس:
لا كمل كمل دي حدوته شيقه خالص:022yb4: كمل كمل |
حكايتي مع الكمبيوتر
حكايتي مع الكمبيوتر تبدأ حكايتي مع الكمبيوتر وأنا في سنة 4 إبتدائي يعني بعد ما جينا من السعودية بكام شهر كان جوز خالتي لسه شاري كمبيوتر وحبينا نشتريه منه فاشتريناه وزي مدايما عارفين محدش عارف الخير فين كان جهاز وحش خالص ممكن تقول عليه يكفر اللي يقعد عليه يعني كان كل ما تيجي تقيده لازم تنزله ويندوز يمكن تقولو إني ببالغ بس دا فعلا اللي كان بيحصل كان بيبوظ كل يوم يمكن أكتر من مرة في اليوم وزي ماقلت محدش عارف الخير فين من كتر ما الجهاز كان بيبوظ أنا إتعلمت واحدة واحدة إزاي أصلح وكده بعد كده كنا بنوديه لواحد صاحب بابا من البلد يصلحه فكنت بقعد عنده فترات طويلة فاتعلمت كتير في الصيانة بعد كده أنا كان عندي حب إستطلاع أخدت فترة بقي أتعلم في النت وكده وبقيت أعمل منتديات وأعمل مواقع وبعدها بفترة قعدت علي الهاكر بس معرفتش أتعمق فيه بعد كده دخلت علي الصيانة تاني وبقيت متابع للبرامج لحد موصلت لمرحلة الفوتوشوب لأني بموت فيه وبموت في التصميم بقيت أصمم أو علي قد ما أقدر أتعلم إزاي أصمم فحاولت بتاع 3 سنين أتعلم من مواقع عربية بس مجابتش معايا أكتر من الاساسيات فملقتش غير حل واحد المواقع الاجنبي بس أنا معنديش مهارة في اللغة في الوقت ده إني أقرا شرح تصميم كامل بالانجليزي فرحت منزل الوافي الذهبي للترجمة وبرنامج pronunciation بتاع LongMan بتاع النطق وبقيت شغال عليهم أترجم وأنفذ لمدة سنة ( السنة اللي كنت مأجل فيها ) بقيت دلوقتي الحمد لله بعرف أتابع من غير ترجمة خالص وده التصميم اللي أنا شغال عليه في الوقت اللي أنا بكتب فيه الرد ده http://psd.tutsplus.com/tutorials/te...d-text-part-i/ حبقي أوريكوا النتيجة وأدعولي ربنا يوفقني وعلي فكرة أنا كان نفسي أطلع مبرمج أي لغة مش حتفرق بس لقيت أنها بتاخد وقت طويل والغلطة فيها بتأبيده فملقتش غير التصميم لأنو هو أكتر حاجة تخليك متميز عن غيرك لأن مفيش تصميمين شبه بعض عشان كده إن شاء الله في المخطط بإذن الله إني أخد كورس إنجليزي أثناء الكلية وبعد كده أخلص إختبارات الـ ICDL وبعد كده اخد دورة برمجة أو تصميم أدعولي بالتوفيق |
اقتباس:
عايز رأي بصراحة انا كنت قرأت الجرء الأول وكنت بتقول انك نفسك تدخل هندسة وانك مش هتحب الا اللي تتجوزها مباديء حلو صح بس هي راحت فين المباديء دي؟؟!!هل سنة بحالهم ممكن تغير مبادئك معلش بس انت كلامك متناقض انا شايفة انك مينفعش تستمر في العلاقة دي لان خلي بالك انك ليك 3 اخوات بنات(ربنا يخليهملك)وزي انت ما بتحبهم وبتخاف عليهم لازم برده تخاف ع اي واحدة تانيه والا مش ترضاه عليهم اكيد مترضهوش ع اي بنت تانية وانت ف سن مشاعرك فيه متغيرة يعني مش سن حقيقي انك تقرر انك تحب ياريت تراجع نفسك بالتوفيق |
طيب أعمل ايه يعني علي إفتراض صحة كلامك وإني مشاعري متغيرة أنا دلوقتي معرفش مكلمهاش وزي ما قلت عمري متعديت حدودي معاها ومش عايز حد يرد ويقولي إنتا في سن المراهقة لأني عارف يعني ايه سن المراهقة وعارف إمتا أكون بضحك علي نفسي وإمتا لا
|
طيب ماشي انا سحبت راي بدل هو مضايقك
انت حر في تصرفاتك !!! |
على فكره الموضوع جميل خلينى معاك وانك فعلا بتحبها ومتاكد من حبك ليها هل انت متاكد من حبها ليك
ولو متاكد هل واثق انها مش هتتغير لما تعدى سن المراهقه حاول تفكر كويس ومستنيه ردك انا اولى حقوق ربنا يوفقك |
اقتباس:
بحس من ناحيته حاجه لكن في حالتك أنا متأكد إن رأيك كله علي مصلحتي علشان كد أنا مضايقتش اقتباس:
|
انت ممكن تكون متاكد من شعورك
بس متعرفش شعورها ايه هى لسه صغيرة وهى برده فى فترة مراهقة وانا قريت قصتك كلها وشكرا ليك |
| جميع الأوقات بتوقيت GMT +2. الساعة الآن 12:29 AM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.