إعدادى صيدلة المنصورة
 

أى حد فى إعدادى صيدلة المنصورة و راح الكلية النهاردة يقول إيه رأيه فى الكلية و المحاضرات
و إيه رأيكوا فى محاضرة الحيوان ؟؟

انا رحت النهارده الصبح الكليه وكان يوم لذيذ بس مشكلته بقى كان العدد كبير اوى والجو كان نار والوكيل جه يقول هو كمان التكييف هيدور الهواء وانفلونزا خنازير وبتاع يعنى تقريباً جايبينه زينه كده علشان الجوده دى وخلاص

وبالنسبه لمحاضره الحيوان انا كنت داخل شايل هم مشكله اللغه بقى وانى مش هفهم ولا كلمه والحوار ده بس الحمد لله الدكتور بسط لنا المحاضره وترجم لنا الكلمات الصعبه والواحد عرفله كام كلمه كده زى parasites والكلام ده

بس يا رب بقى يبقى فعلاً بعد كده الاعداد تبقى قليله والمشكله انى فى المجموعه ج ودى تقريباً 600 واحد يعنى تقريباً هنقعد فوق بعض برده:022yb4:

والاسر بقى اللى كل شويه يمسكوا الميكروفون لما وجعوا دماغنا بنفس الكلام هو هواه وكل واحد يدخل يقول نجيب البالطو والادوات والكلام ده من عنده وان هو اللى بيجيب انضف حاجه وكل واحد يقولى هات من حته

بالمناسبه انتوا هتجيبوا البالطو و الادوات والقاموس دول من عند مين ولو فى حد جابهم يا ريت يقول جابهم منين ونظامهم ايه فى ناس قالولى على واحد اسمه هشام مديكال و لما طلعت من المدرج لقيت واحد قاعد كده اللى هم بتوع مكتبه doctors دول اللى وزعوا علينا الجدول الالوان المتظبط ده وقالى على الحاجات اللى معاه وحسسنى انهم اخر حاجه فى السوق برده فانا متلخبط اجيب كل حاجه من عند مين يا ريت تعرفونا

تحياتى

لو سمحت لو كنت كتبت حاجة من محاضرة الحيوان تكتبها هنا فى رسالة لانى كنت قاعدة ورا ومش شايفة حاجة ومكتبتش حاجة بالإنجلش كتبت عربى بس
معلشى هنتعبك شوية لو مش هينفع مفيش مشكلة

اليوم النهاردة كان لذيذ جدا

هو كان متعب فى الاول لانى مش متعودة اصحى بدرى كدا :angry2: الاجازه انتهت بقى:blush: وكمان مش كنت عارفه حد فى اعدادى :(

واكتر محاضرة عجبتنى محاضرة الحيوان انا فهمتها ع الرغم من انى كنت فاكرها صعبة لكن طلعت كويسة اوووووى:o


واكتر حاجة ضايقتنى كلام الاسر الكتير :(


وبالنسبة للادوات انا جبتها من مركز النيل :( لان ليا اختى خريجة 2009 وهيه كانت بتجيبها من هناك :av4056bb7jp3:

وبالنسبة للادراج اللى عايزها بتتحجز من رعاية الطلبة تقريبا :romarioxp6:


وبالنسبة للمحاضرة بتاع الحيوان لو حد عايزها مفيش مشكلة انا كتبتها كلها :romarioxp6:

لو فى اى استفسار عند حد ياريت يقوله وكلنا نحاول نساعد بعضنا :angry2:

وياريت لو حد فى اعدادى يدخل الموضوع عشان يبقى ساحة نقاش للى فى اعدادى بس :(

انا زميلكو ف الكليه ب ف اولى
عديت اعدادى دى الحمد لله
نصيحه: ركزو مع اتحاد الطلبه السنادى...مظبطينكو اوى اوى
الادوات ياريت تشتروها منهم هى اغلى شويه بس احسن بجد والخامات كويسه
بالنسبه للزحمه والحر والذى منه كل ده هينتهى كمان اسبوعين كده ولا حاجه لما الكورسات تشتغل هتلاقو اللى بياخدو كورسات ( عددهم كبير على فكره) مش بيحضرو محاضرات زى النبات والتحليليه والمدرج بيبقى فاضى ساعتها
اللغه امرها سهل واول ما تجيبو الورق م المكتبات ( فى مكتبه اسمها paper هاتو منها ) هتلاقو الموضوع صعب شويه بس بالتدريج واستخدام القاموس كله هيبقى فل الفل

مين بيديكو حيوان السنادى؟؟ د/سيد ولا د/ محمد النجار؟؟؟

طب لو سمحتى يادكتورة ياسمينة أنا عاوزة محاضرة الحيوان لانى كنت جاية متأخرة وواقفة وصايمة ومش شايفة حاجة خالص بس كنت فاهمة كلام الدكتور الى حد ما وكمان كنت تعبانة شوية

أنا بقى حصلي موقف مش ظريف خالص:frown:
كان في جداول من اللي بيوزعوها مواعيد المحضرات غلط (متأخرة ساعة)
و أنا بقى مشيت عليه فمحضرتش محاضرة الحيوان
محضرتش غير شرح عملي النبات
فياريت لو حد عنده المحاضرة يجبهالي

انا رأيي ان هيه جامعه وسخه معلش يعني وكان يوم زي الزفت و د سيد ده مفهمناش انا واصحابي منه حاجه بالعكس احنا فهمنا النبات اكتر

ايه ده يا جماعه هو كلكوا حضرتوا شرح النبات بدون تقسيم ولا ايه انا لقيتها مجموعه ا وانا مجموعتى ج وانا الصراحه كنت جبت جاز ساعتها ومكنتش حاسس بنفسى قمت مروح

بالنسبه للمحاضره انا نقلت الكلمات اللى شفتها غريبه بس علشان لما تنزل بعد كده ابقى فاهم الكلام والكلام ده كله هينزل فى ورق بعد كده ما تقلقوش


تحياتى

بيدينا حيوان د / سيد طنطاوى اول ساعه وبعدها تانى ساعه هندسه وراثيه د / شريف عابدين

يعنى نشترى من اتحاد الطلبه ولا مركز النيل:(

وفى ملحوظه بسيطه هو اتحاد الطلاب اللى بتقول عليه اللى هو تبع مكتبه doctors لانى شفت على الجدول اللى هم اديهولنا تحت رعايه اتحاد طلاب كليه الصيدله بالاشتراك مع مكتبه doctors دى وحاجات كده ؟

وهو الورق بتاع اللغه ده بيبقى موجود فى المكتبه حالياً ولا بعد كده ونروح نقوله عايزين ايه هناك والقاموس نجيب اللى بيقولوا عليه القاموس الصيدلى البسيط ده ولا نجيب القاموس الطبى نفسه من هشام ميديكال؟


تحياتى

لو سمحتم ياجماعة فى حد منكم في جروب (أ)

لو سمحتوا هوه السكاشن الاسبوع الجاى هيبدا بالمظلل ولا غير المظلل وياريت حد يعرفنى بنفسه فى جروب ج لانى مش عارفه حد برده وماشيه اضحك وخلاص من كتر التوهان اللى انا فيه وانا كان بالمرة مش فهمت حاجه خالص وزعلان اوى على الرغم انى اللى اخت اكبر منى فى الكليه وبتطمنى نوعا ما بس انا خايفه وقلقانه مووووووووووووووووت

السكاشن الإسبوع الجاي هتبدأ بغير المظلل وعلى فكرة يا جماعه سكاشن الفيزيا والحيوان هتبقى في كلية علوم وسكشن النبات هيكون في صيدله القديمه والكيميا في المبنى بتاعنا عادي(المبنى الجديد)

ومتهيألي النهارده كان الوضع أحسن شويه ومش حاسين بالتوهان زي امبارح
محاضره الكيميا الفيزيائيه للدكتورة فوزية كانت حلوة أوي وشرحها بسيط خالص
ومحاضرة اللغه بردو كانت معقوله والكتاب هينزل الإسبوع الجاي وهنشتريه من تجارة وعلى فكرة محدش يعتمد على الورق في اللغه والكتاب هيبقى مصدر المذاكرة الأساسي وحاولوا تحضروها عشان مش تتكتبوا غياب وكده وفي حاجات بيقولها الدكتور في المحاضرة مش بتتكتب في الورق عشان يميز اللي حضر من اللي محضرش

بس أنا سمعت ان الجدول بيتغير كل فترة بس مش عارفه الكلام ده صح ولا غلط
ياريت اللي يعرف يقول يا دكاترة

تحياتي:)

انا محمد معاكوا فى مجموعه ج وعلى ايه القلق ده كله ده الكليه لذيذه جداً وتشجع على الدراسه بس مشكله التوهان دى عاديه جداً كلنا بنحس بيها علشان نظام الجامعه والكلام ده لسه جديد علينا مش متعودين عليه بس المجموعه بتاعتنا ضايعه خالص يعنى خدنا ساعتين اول الاسبوع ودول ميتحسبوشعلشان كله دخل يعرفنا بنفسه و يوم الاحد والاتنين ضايعين اول اسبوع علشان مفيش سكاشن وكمان يوم التلات اجازه 6 اكتوبر يعنى مش عارف المحاضرات اللى هتروح علينا يوم التلات دى نقضيها مع المجموعات التانيه اللى عليهم نفس المحاضرات فى ايام تانيه وانا كمان فى يوم السبت خلصت كلمه العميد وروحت علشان مكنش فى المجموعه ج مع ان فى ناس حضروا علشان كان اول يوم وكله كان مع بعضه فانا مش عارف نظامنا ايه الوقتى

وعلى فكره يا جماعه الجدول بتاع اتحاد الطلبه اللى هو بالالوان وعليه من ورا مكتبه doctors ده الجدول ده غلط هو وبتاع اسره الحياه الصغير انما الجدول الصح اللى هو مكتوب عليه من ورا اسره شباب مصر وحتى هتلاحظوها فى فرق التوقيت اللى فوق فى الجداول الغلط يعنى مثلاً دوروا فى الجدول بتاع اتحاد الطلبه ده وبتاع اسره شباب مصر فى نفس الوقت على لغه انجليزيه محاضره ( ا ) اللى هى يوم الاحد هتلاقوها فى جدول اسره شباب مصر بتبدا الساعه 2 لحد الساعه 6 وفى الجداول الغلط هتلاقوها بتبدا الساعه 3 لحد الساعه 7 ونص:d

وده راجع لغلط حساب التوقيت فى الجداول الغلط من فوق يعنى المفروض كل شرطه بنص ساعه لكن هتلاقوها فى الطباعه تقريباً النص ساعه ضمت على الساعه والمواعيد اتلخبطت يعنى


تحياتى