بسم الله الرحمن الرحيم
محدش سال نفسه ليه كل الناس بيقولوا ان كليه علوم صعبه ؟ هل شعب مصر كله غبي ومفيهوش حد يقدر يغوشها ؟

الاجابه ع السوال ده مش هقولها بس هسيبكوا تجاوبوا انتم بعد متقروا الموضوع

.................................................. .................................................. .................................................. ......


تعد كليه علوم من افضل الكليات ف الخارج اما بالداخل - مصر المحروسه - فلا تسوي جناح بعوضه
فبالخارج تصنف كليه علوم الاولى على كل الكليات وذلك يعكس مدى التاخر الذى نعانى منه :(
وانا بجد لما عرفت انى داخل كليه علوم سمعت كلام يشرح القلب اللى قالى " حول تجارة يا بني وممتعبش نفسك و اللى قالى ليه كده حرام عليك ...... الخ "
انا اخدت الكلمتين دول من هنا وحطيط ف دماغي انى هفشل علطول
بعد ما دخلت الكليه لقيت نفسي بدرس كميا وفيزيا ورياضه ...كدا يعني
يعني مواد الواحد درسها قبل كدهبس بدراسه سطحيه ومفيش الا مادتين بس لسا اول مرة اخدهم الجيوفيزياء والجيولوجيا وتقريبا عندي فكرة عنهم
المهم يا حضرات افتكرت كل الكلام اللى اتقالى عنها وربطه باللى موجود وشايفه لقيته مينتميش ليه ابدا
يعني مثلا الكميا باخد فيها عضويه وفيزيائيه وغير عضويه
الفيزيائيه باخد فيها قوانين الغازات وبعد كده السوائل والمحاليل يعني كلام اهبل
ونفس الكلام ف الرياضه
والللى فيها تشغيل مخ شويه هيا الفيزيا كنت باخد فيها كهرومغناطيسه وخصائص ماده
وخصائص ماده دي عباره عن رياضه 2 بتاعت الثانوي يعني الدفع والتصادم كده يعني
والكهربيه والمغناطيسيه عبارة عن مبادى الكهربيه والمجال الكهربي





الحقيقه انا مذاكرتش الترم الاول بس شديت حيلي ف الامتحانات بس ده طبعا مينفعش لازم المذاكرة الجد المتوسطه الضعيفه المهم المذاكرة

ونسيت اقول حاجه مهمه ان نظام الكليات عامتا يختلف عن المدارس يعني انتا ف ثانوى المعلومه بتيجي لحد عندك .... لكن ف الكليه والله كنا بنجرى ورا المعلومه ويا عالم بنلحقها ولا لا
يعني من الاخر هتغش تجارة هتتعب لانك ف كليه وهتغش طب هتتعب لانك ف كليه


.................................................. .................................................. .................................................. ......



وبعد كده نفسى كل واحد يعقل الكلام اللى قولتوا ويقولي هل كليه علوم رخمه زي مالناس بتقول ولا مفيش حاجه سهله ف الكليه عامتا ولكل مجتهد نصيب ؟؟؟؟







احمد بالفرقه الاولى جيوفيزياء علوم عين شمس

لا والله كلية علوم مش رخمة .. وانا لو مكنتش جبت مجموع هندسة كنت هخش حاسبات او علوم ..

شكرا على الموضوع يا جيوفيزيكال ..

انا بحب كلية علوم والله

لا لو سمحتوا محدش يغلط فى كليتى حببتى انا لو ماكنتش دخلت كليه العلوم كنت برده اتمنى انى ادخل كليه العلوم
واللى اقدر اقوله يا جماعه انى فى 3 كليه العلوم قسم النبات والكيمياء جامعه المنصوره
فعلا بناخد مناهج على اعلى مستوى من الروعه والجمال فى فرعى النبات والكيمياء
مواد فى متسوى جميع الطلاب والحمد لله انا شايفه ان المرهق فى الكليه هى المعامل واوقاتها المتاخره
انما على المواد فهى الحمد لله سهله جدا ومن مزاكره متوسطه الحمد لله الواحد بيجيب تقدير كويس كمان
اما على مستقبل الكليه ففى كليه العلوم جامعه المنصوره وضعت خطه لتوظيف خريجى الكليه وتوعيتهم على اماكن العمل المطلوبين فيها
اما بالنسبالى فهيكون الوضع مختلف ففى كليتى امكانيه تحضير دراسات عليه كدبلومه
وبعدها ان شاء الله هاكون قادره على فتح معمل للتحاليل الطبيه والبيلوجيه
يعنى ياجماعه بطلوا احباط فى طلبه الجامعه حراااااااااااااااااام عليكوا
ساره النبوى

يعنى ياجماعه بطلوا احباط فى طلبه الجامعه حراااااااااااااااااام عليكوا
ساره النبوى

هههههه.. معلش بقى استحملوا ..

والراجل بيدافع عن الكلية

<div align="center">كلية علوم احلى واجمل كلية فى الوجود

وفعلا زى مانت قولت يا احمد مش واخدة مكانتها فى مصر

بره فى امريكا مثلا مش بيدخلها غير امريكى الاصل دليل على اهميتها

واهمية الى بيخرجوا منها كفاية انى الى بيخرج منها هيكون عالم (دا المفروض :( ).


بجد الكلية سهلة بس بشرط تبعد عن الكلام الى هتسمعه وانت فيها او قبل ما تدخلها :ph34r:

المشكلة فى مصر بصفة عامة انها بتعتمد على مجموعك مش على دماغك وميولك

فى كندا مثلا لو انت عايز تدخل طب ومجموعك مش يدخلك طب

بيعملولك اختبار بيشوفوك لو انت فعلا ينفع تدخل طب بيدخلوك

احكيلكم حكايتى مع علوم

وانا صغيرة كان نفسى ادخل علوم بس فى البيت رفضوا قالولى لا لازم تبقى دكتورة :lol: :(

او تدخلى صيدلة وبعدين بصراحة دخلوا حكاية صيدلة فى دماغى ونسيت علوم

بس الحمد لله مجموعى دخلنى علوم :lol:

وطبعا زى اى حد داخل علوم سمعت كلام احبطنى جامد جدا :ph34r:

الى قال هتقضى السنة سنتين على الاقل وحاجات تانية كتير

ربنا يعدى الترم الاول ده على خير

بس بجد باذن الله ناوية من الترم التانى بنظام تانى خالص

خلاص اتعلمت كتييييييييير وفعلا مفيش حد بيتعلم ببلاش

ادعولى

اسفة طولت عليكم</div>

شكرا للردود
والحمد لله يا اميرة انك دخلتي الكليه اللى انتى عايزاها !!!
وربنا يوفقك ويوفق كل مجتهد ف علوم او اى كليه تانيه
ويارب يعدى الترم ده على خير

فعلا عندك حق

كليه علوم تعتبر من اهم الكليات في مصر

بس انا عن نفسي كنت الحق علوم رياضه من بدري بس حبيت اكتر هندسه زراعيه

بس معرفش هي راحه نفسيه لهندسه زراعيه و لا هو نصيب

بس اللي اعرفه اني بحب هندسه زراعيه اوي

و على فكره هي ما تقلش صعوبه عن علوم

بس الحكايه مش حكايه صعوبه ما كل الكيلت صعبه

الحكايه حكايه تفكير الناس

طب قولي كليه زي كليه زراعه دي ... انا شايفه انها اهم كليه في مصر

باعتبار ان احنا اساسا بلد زراعي

ايه اللي يخليه تبقى بشكل ده

ده طلبة زراعه بيمشوا في الشارع يتداروا خايفين حد يسالهم انتم في ايه

انا لما دخلت هندسه زراعيه كان الناس كلهم بيتريقوا عليا ويقولولي زراعه ما لقتيش الا زراعه

بس انا هندسه زراعيه و بعدين مالها زراعه

دي حتى دراستها حلوه اوي و مجالاتها كتير

بس تفكير الناس بقى

.........

علوم بجد مظلومة اوى
انا بقى دخلتها عشان ملحقتش حاسبات وعشان هيا قريبة منى
بس بجد مظلومة الكلية مش صعبة بجد
وزى مقولت معظمها حجات اخدنها قبل كدة
بس هيا متعبة ومتعبة اوى
بهدلة من الاخر
بس انا حاليا طموحى
اما ادخل القسم علوم الحاسب
او اخد الدبلومة ودة اللى بابا وماما عايزينة
كفاية اوى كدة مستقبل كويس بس انا اشد حيلى بس

طب كويس ان اللى هنا فى علوم اصلا بصوا انا عايزه ادخل علوم بس خايفه منها بردو طب قولولى هوا صعب فعلا انى اجيب حتى مقبول وايه

اصعب السنين فى علوم وممكن فعلا اخد اول سنه بتقدير فى علوم وبعدين احول صيدله ولاا دا هجص

أنا سمعت نفس الكلام عند دخولى هذه الكلية التى أحبها أكثر من كل شئ،
والحمد لله أننى عندمـا إلتحقت بهذه الكلية كانت هذه رغبتى عن كل حب، ولم أشرب الكأس وتحديت الآخرين، لدرجة أننى أول ما دخلت هذه الكلية صممت لوحة جميلة معلقة فى الكلية إلى الآن شعــــارها (ابتســـــم أنت فى كلية العلوم)، والآن انتهيت من دراسة رســــالة الماجستير ، ويارب عقبال الدكتوراة. :rolleyes: :rolleyes: :rolleyes: :rolleyes: :rolleyes: :rolleyes:
(عاشق كلية العلوم = محمد الدادمونى) :D :D :D :D :D :D
--------------------------------------

وانا كمان لما كنت ف الثانوية كتبت 16 رغبة علوم وفعلا جاتلى واتخرجت بجيد جدا كل سنة علشان انا كنت بحبها اوى
ودايما انا بقول ان كليه العلوم بفتح المخ بتخليه يفهم حاجات كتير
وكمان انا على وشك مناقشة الماجستير

صعبة ومبتطلعش منها حاجة

حد يصححلي معلوماتي لو غلط

ياريت يا جماعه لو فيه حد هنا فى كليه علوم الاسكندريه فى سنه اولى او تانيه يكتب ايميله وانا هضيفه لانى بجد فى سنه اولى وفيه حاجات كتيره اوى تايهه منى خالص ومحتاجه اعرفها و معرفش حد استفسر منه عن اى حاجه خالص ياريت لو فيه حد يرد بسسسسرعه

كلية العلوم دي كلية المستقبل كل طالب لو فهمها كويس وعرفها يبقى عرف انه امتلك المستقبل
المستقبل للبحث العلمي خريجي كلية علوم دول ليهم الفضل ع الناس التانية ف المجالات التانية
اولى علوم جامعة اسكندرية

فعلا الناس هنا فى مصر واخدين فكرة وحشة اوى عن كلية علوم بس انا من رايى انها من اهم الكليات لانها فيها كل حاجة عن العلم ممكن الواحد يعرفها يعنى مش متخصصة فى حاجة واحدة بس زى مثلا صيدلة متخصصة فى دراسة الادوية وتركيبها وكل ده انا كان نفسى من وانا صغيرة انى ادخل كلية علوم بس اهلى كانوا عاوزين يدخلونى صيدلة بس الحمد لله ربنا اراد انى ادخل كلية علوم وانا مبسوطة اوى انى دخلتها انا سنة اولى كلية علوم جامعة حلوان يا ريت لو فى حد هنا من الكلية يا ريت يقولى لانى ماليش اصحاب هناك ونفسى يبقى ليه اصحاب