أعلي مستوي !
 

السلام عليكم جميعاً،

أنا بتمني أوصل لمراحل أعلي ف المذاكرة، الحمدلله رب العالمين الواحد بيذاكر أول بأول وبيخلص إللي عليا ودي أنا شايفها أهم حاجة، لكن أنا حاسس إن عندي الأفضل..وعايز أحل أكتر وأدوس أكتر، أنا متوسط عدد ساعات المذاكرة ف اليوم العادي بيكون من 6 - 9 ساعات، والأيام إللي فيها دروس بيكون ف حدود 4 - 5 ساعات، أنا نفسي بجد أولاًً أصحي بدري جداً وأشتغل وده هيديلي وقت أكتر ف يومي بس بجد مبقدرش أقوم الساعة 7 مثلاً عشان بكون قبلها سهران بخلص حاجة معينة ورايا. حد مجرب ممكن يقولي أعمل إيه؟

من رايي العبره مش بعدد ساعات المذاكره
العبره بمدي تحصيلك حتي لو في فتره قليله
خد كفايتك من النوم وراحتك وانت تقوم من النوم فايق وفي اعلي مستوي من التركيز
بالتدريج هتلاقي نفسك اتعودت وتلاقي نفسك تركيزك بيزيد ونشاطك بيزيد وبتذاكر مده اطول بتركيز عالي
بس اهم حاجه تاخد كفايتك من النوم والراحه

شكراً لمشاركتك وإهتمامك :)

الواحد بالليل بيكون تركيزه أعلي وقاعد علي الكتاب بتقل أكبر رغم إني من الساعة 9 أو 10 بتبدي عيني تقولي ريحني، لكن بالليل طبعاً مفيش إني أقوم كل شوية عشان أعمل حاجة أو آكل أو أي نشاط يومي جديد، وده بيعملي إرهاق إن بيخليني أسهر

علمياً -بيقولو انا مجربتش:d- إنه الصبح طبعاً اللى تركيزه اعلى

فلو إنت شايف إنه أعلى تركيز ليك وقت السهر
فده عشان انت مجربتش وقت الفجر

3 ساعات الفجر بس ممكن تغنيك عن ال6 او ال8 ساعات اللى انت بتذاكرهم بقية اليوم

والحكاية ي كنت بجربها ايام امتحاناتي
في مواد كنت بفتحها الفجر وبخلصها قبل الامتحان على طول عادي متستغربش :d
طبعاً مش في الثانوية عشان متقلدنيش :d
وأهم حاجة تكون حاطط لنفسك هدف مش وقت
يعني عايز النهاردة اخلص فصل مش تقول عايز اذاكر 5 ساعات
زي ما قالت الاء العبرة باللى اتذاكر مش بالعدد

اعتقد ان الفترة من الساعة 3 الليل ل 10 الصبح احسن فترة للمذاكرة والتركيز فيها بيكون عالى اوى

وزى ما قالت الاء بالظبط المستوى الاعلى مش بيجى من كتر الساعات

فيه ناس كتير اوى كانوا صحابى كانوا بيذاكروا اكتر من 12 و 14 ساعة فى اليوم ومافيش اى نتيجة للاسف

انا من وجهة نظرى انك تركز فى ال 6 ساعات اعلى تركيز وانت مستواك هايرتفع لوحده

وربنا معاك يارب