مميزات وعيوب كل قسم من اقسام كلية السياحة والفنادق
 

فيما يلى مميزات وعيوب كل قسم فى كلية السياحة والفنادق :

اولا : قسم الارشاد السياحى
مميزاته : 1- دراسته شيقه وجميلة خصوصا للى بيحب التاريخ واللغات

2- التدريب الصيفى عبارة عن رحلات علمية الى الاماكن السياحية والاثرية وده شىْ ممتع

3- المرتب عالى ( لا يقل عن 3000 جنية شهريا )

4- ينضم خريج قسم الارشاد الى نقابة المرشدين السياحيين عند تخرجه وبياخد الرخصة كمان لما بيتخرج علطول

عيوبه : 1- لازم يبقى معاك على الاقل لغتين او تلاتة ويكون من بينهم الانجليزى بالاضافة الى اللغة المصرية القديمة ( الهيروغليفية ) وده شىْ شاق جدا ولازم كل اللغات دى تجيدها اجادة تامة وخصوصا الانجليزى .

2- خريج الارشاد مينفعش يشتغل خارج مصر لان كل دراسته مقتصره على الارشاد السياحى المصرى والاثار والتاريخ المصرى .

3- وظيفة المرشد السياحى وظيفة مرهقة الى حد ما .

4- فى مشكلة يعاصرها المرشدين الآن وهى ان السياح عادة ما بيجيبوا مرشدين سياحيين من بلادهم

5- كثرة المرشدين السياحيين فى اللغات المشهورة والشائعة والسهلة الى حد ما زى الانجليزى ( 6700 مرشد ) والفرنساوى ( 2050 مرشد ) والالمانى ( 1630 مرشد ) والايطالى ( 940 مرشد )

ثانيا : قسم الدراسات السياحية
مميزاته : 1- دراسته سهله وشيقة وسهل تجيب فيه تقدير .

2- متاح له وظائف كثيرة فى مصر وخارج مصر وخاصة الامارات فى شركات السياحة والطيران وممكن يشتغل فى الفنادق ( فى الحجز او الريسيبشن فقط ) وممكن فى الضيافة الجوية .

3- المرتب عالى الى حد ما خارج مصر يعنى مثلا , موظف فى شركة سياحة فى دبى بياخد لا يقل عن 2000 درهم ولو فى شركة طيران المرتبات عالية جدا .

عيوبه : 1- لازم عشان تتوظف يكون معاك لغتين على الاقل ولازم icdl ولو عايز تشتغل فى حجز الطيران لازم شهادة اماديوس او جاليليو

2- فى شوية واسطة بتحصل فى بعض شركات الطيران ولكن مش كلها

3- التدريب الصيفى صعب شوية بمعنى انك صعب لما تلاقى شركة سياحة تتدرب فيها ولكن بتتدبر ساعتها

4- المرتب منخفض فى مصر وخصوصا فى شركات السياحة لانه مش هيزيد عن 1000 جنية تقريبا وممكن اقل كمان ولكن بالعمولات ممكن تظبط نفسك ولكن فى شركات الطيران المرتبات بتبقى اعلى طبعا ومش هتقل عن 1000 جنية وبيبقى ليك امتيازات كتير

ثالثا : قسم الدراسات الفندقية
مميزاته : 1- دراسته سهله وسهل تجيب تقدير فيها .

2- متاح لهم وظائف كتيرة جدا فى مصر وخارج مصر فى جميع وظائف الفنادق والمطاعم وفى القرى السياحية

3- كفاية الانجليزى عشان تتوظف ولو معاك لغة كمان يبقى تمام

عيوبه : 1- مبيعدوش فى البيت طول الدراسة بالكلية بمعنى انك من بداية سنة اولى بتدرس فى العام الدراسى وفى اجازة الصيف بتتدرب فى فنادق او مطاعم شهرين على الاقل ولكن كل ده بيظبطك بعد التخرج

2- من الحرام طبعا انك تشتغل فى فندق وتقدم الخمر والمشروبات الكحولية ودع عيب من عيوب الفنادق الخمس النجوم

متشكرين يا باشا تقبل مرورى وننتظر المزيد

صح فعلا ف كلامك
بس مفيش اي شغل سهل
لازم الواحد يتعب عشان يلاقي ف المقابل حاجه احسن ومستوى احسن

ربنا يوفق طلبة جميع الاقسام بكلية السياحة ويلاقوا شغل فى احسن مكان وباحسن مرتب ان شاء الله

طيب اية احسن قسم فيهم؟؟؟؟؟ وياريت بياخد من كام

لو سمحت بالنسبة للحجاب في الدراسات السياحية هل بتثار في الشغل يعني شركات الطيران والسياحة بتشترط في موضوع الطرحة

احسن قسم ده انتي اللي تحدديه
الكلية كلها مجموعها واحد التخصص حسب الانترفيو ورغبتك :)

لا شركات السياحة عادي وبالنسبة لشركات الطيران بعضها بيشترط في وظيفة المضيفات فقط
و ان شاء الله خير ماتقلقيش

ان شاء الله والف شكر لحضرتك

تحت امرك في اي وقت

شكرا لك .......

الحقيقة هوا شغل السياحة عموما ممتع ومجزى فى نفس الوقت
وبالنسبة للغات هيا الحقيقة بقت المفروض ان اى خريج المفروض يكون معاه لغات
على اساس يقدر يشتغل .
وربنا يوفق الجميع