ادخل وقول رايك
 

ضياع وقت وارهاق ميزانية

ظهور مايسمى بالدروس الخصوصية دلالة قوية على تردى التعليم بالمدارس الى ادنى المستويات وغياب الضمير والصراع الشديد على المادة وباى شكل يتم الحصول عليها حتى ولو كان على حساب التعليم والمبادئ والقيم الأخلاقية وانتشار قانون الغاب فلو كل مدرس عامل ضميرة صح ما احتاجنا للدروس الخصوصية ولكن الكثير جعل التدريس فرصة للثراء السريع فالمدرس اليوم اصبح مثله مثل تاجر المخدرات اعذرونى فى التشبيه فأنا ممن انكووا بنار الدروس الخصوصية والتى كنت لم اتصور فى يوم من الأيام تدخل بيتى لأنى مؤمن تماما بأن التعليم هو مثلث ذو 3 اضلاع الطالب +المدرس+ادارة التعليم وكل لايعمل على الوجه الصحيح ولاسيما فى بلدنا ولذا وصلنا لهذا الأنحطاط وسنصل لأكثر منه ان لم نتقى الله جميعا ويعمل كل منا بكل ماأوتى من ضمير حى وصدق مع الله واذا صلح العقل صلح باقى أعضاء الجسم فمابالكم والعقل خربان يزور ويلفق للوصول لمبتغاه وهذه هى النتيجة الطبيعية
وشكرا من اخ صادق مع نفسه ياليت الجميع يتصارحوا مع انفسهم اذا ارادنا يوما الحياة الكريمة والتقدم والرقى حتى على الأقل مواجهة أعداؤنا ومحاربتهم بنفس السلاح وهو سلاح العلم وكا قال على بن ابى طالب رضى الله عنه وارضاه العلم يحمينا اما المال فنحن نحميه اتمنى ان تكون رسالتى وصلت للجميع وفهمها وعزم على العمل بها
وشكرا

مع احترامي الشديد لأراءكم جميعا الا اني لا أتفق معكم
حضرتكم بتقولوا المدرس في المدرسة ما بيقومش بوجبه علي أكمل وجه ازاي يقوم بوجبه علي أكمل وجه في حصة لا تتعدي 45 دقيقة في فصل به مستويات مختلفة من الطلبة
ومن جهة ثانية انا شخصيا مبعرفش اركز في وجود مجموعة كبيرة من الطلبة لذلك لا أحصل علي القدر الكافي من المعلومات في الفصل لذلك بأجد ان الدروس الخصوصية انسب وسيلة للحصول علي جميع المعلومات
ومن جهة ثالثة ان الدروس الخصوصية اهدار للمال بما ان مدرس الدوس الخصوصية يبذل مجهود و شغل اذا لابد من مقابل لهذا العمل .
و من جهة رابعة ان هو مضيعة للوقت بالعكس اذا حاولنا ان احنا نستغل وقت الدرس صح هنعرف نستفيد كتير و مش هيبقي مضيعة للوقت .
دي وجهة نظري من جهة الدروس الخصوصية وعلي كل حال اختلاف الاراء لا يفسد للود قضية . واحنا جميعا بنستفيد من اراء بعض وشكرا جزيرا لكم

الدروس الخصوصية نظام فاشل في نظري انه بيعلم الطالب الكسل و بيجمد دماغه
لانه بيستني الشرح من استاذه بدل مايحاول يفهمه من مدرسه في الفصل او يفهمه لوحدع
رأيي ان انا افضل مدرس لنفسي و محدش هايفهم حد حاجة الا ماهو نفسه يحاول يفهمها لوحده
لو بأيدي مكنتش حجزت دروس خالص في ثانوية عامة لكن حكم القوي............
لو اتلغت الدروس الخصوصية تماماً هايظهر الطلبة الموهوبين و الاذكياء في المدارس و هايكون التعليم نظامه احسن

والله اوقات كتير بحسها زى ماتكون سرقة كدا بس بصراحة مقدرش انكر انى بستفيد منها كتييييييير بغض النظر بقى انها تضييع للوقت والمال والكلام دا

بص حقولك رايي بصراحة
هي الحقيقة سبب برمجة مخ الطلبة علي الحفظ وطريقة معينة فلمذاكرة ولما تختلف فالامتحان الطلبة تموت
مقصدش كل المدرسين ولكن فعلا اللي اتعود عليها مخه بيقفل وعمره ما بيعرف يذاكر حاجة لوحده ابدا ولا حتي يفكر
مبداه بيبقي هو كده وخلاص ذاكر الورق واحفظه واطرشه فالامتحان تبقي من الاوائل
انا مش مقتنعة بيها لبدا ابدا وعمري مااخدتها
ولكن اكيد في مدرسين بيشغلوا عيالهم وبيعلموهم عشان العلم مش عشان الامتحان
ولم اقابل منهده النوعية سوي بس 2
كل ده بعيدا عن الفلوس
تقبلوا رايي وفكروا فيه فانا اعني ما اقوله

انا بصراحه عمري ماخدت دروس
و في اولى ثانوي اخدت في اللغات فقط (انجلش - فرينش) كتأسيس للسنين الي بعدها
بس بصراحه مينفعش في الثانويه العامه مناخدش دروس
المدرسين اتعودوا ان محدش بيحضر و برضو عمري ما سمعت عن طالب في اخر 3 سنين و كان ثانويه عامه و مأخدش دروس و جاب مجموع عالي
ممكن كان زمان بيحصل كده بس صدقوني دلوقتي حتى لو هتحضر المدرسه لازم الدرس معاها
حكايه الميزانيه دي بقى فكل واحد و على قد جيبه محدش غصب حد ياخد دروس الي ربنا فاتحها عليه ياخد و اديها تدريب و اكيد هتيجي بفايده لان ربنا مبيضيعش تعب حد

تقبلوا رأيي

شكرا لتفاعلكم جميعا معنا والتواصل المستمر بينا

ارهاق وتعب بس لابد منه
لان ببساطه انت مش هتروح غيرك هيروح ويجيب اعلى منك فى المجموع
فلكل بيروح
امال لو مافيش حد راح هيبقى المجموع على مستوى الجميع
بس للاسف كله بيروح
الدورس لابد منها :(

فى غياب دور المدرسه دلوقتى مش ادامنا غيرها
رغم انها فعلا برمجه للدماغ
بس احنا نظام التعليم عندنا كده
مفيش فيه اى ابداع او اظهار للقدرات والفروق بين الطلبه
وكله بيحفظ ويسمع وخلاص
مش عارفه ليه مش بنرجع للمدرسه قيمتها زى قبل كده؟
ميرسى على التوبيك

على فكرة الدروس الخصوصية ضرورية جدا ومحدش يقول غير كدا لانو هيبقى واثق ومتاكد انها ضرورية هى اه ارهاق وفلوس كتير وحاجات تانية كتير طبعا بس الطلاب محتاجنها المدرسين فى المدرسة مش بيشرحو حاجة ولا بيفهمو الطالب بيقولو مهم بيفهمو فى الدرس فلازم يبقى فى دروس خصوصية لانهابتساعدنا بغض النظر بقى عن ارهاق او لا وهى دى الحقيقة المدرسة بقت خلاص بنروحها لترفية