|
مصر هتختار طعمها
سلام عليكم اقتباس:
الموضوع مش باللغة العربية الفصحى على فكرة على دقات الثامنة صباحا استيقظ مفزوعا لأجد نفسى مستلقيا على فراشى شىء ما يدور امام عينى .. لم استغرق وقتا طويلا لكى ادرك بأنها " المروحة بعد استيقاظى من نوم عميق .. وبعد اداء صلاة الصبح المفروضة التى يغفل الكثيرون عنها جلست فى حجرتى .. شىء امام عينى يؤرقنى .. ألا وهو ريموت التلفاز هممت بالضغط عليه .. فوجدت ان مصر بتختار طعمها.. وعلى طريقة ابراهيم نصر ... ما تيجى نشوف فى الوقت اللى كانت مصر بتختار طعمها برعاية شيبسى كان فى حاجات كتيرة بتحصل حوالينا فى بلدنا ام الدنيا مصر " وردة كل عصر" وبرغم ان ناس كتيرة شاركت فى الاختيار دا منهم اللى اختار بطعم البطيخ .. ومنهم الى اختار بطعم المكرونة " بالصلصة طبعا " وحاجات غريبة كدا بس الغريب فى الامر ان وسط الاختيارات دى كلها كان فى ايدين خفية بتختار بطعم مختلف وغريب فى نفس الوقت ..الاختيار دا شد انتباهى لانه كان ليه مذاق خاص خلونا نتعرف على الطعم مع بعض بعد اطمئنانى على مستقبل مصر المحصور فى كيفية اختيار طعمها.. نزلت للشارع كى اشاهد المنظر بنفسى لقيت الزبالة منتشرة فى كل مكان ومصادر التلوث كتيرة .. ولما سألت واحد وقولتله " هى ليه الناس مش بتتكلم عن التلوث دا قاللى " الناس مش فاضية .. الناس بتختار طعمها دلوقت فجال فى خاطرى " حلوة خاطرى دى " ان اختيار الطعم مهمة قومية .. وبما انى مخترتش طعمى لسة يبقا انا خاين للوطن .. وقولت انى هفكر فى اختيار طعمى مع المصريين بعد اللى حصل دا . روحت لاحد المصالح الحكومية لقيت الرشوة منتشرة فى فى كل مكان .. كنوع من انواع الكوسة .. مشكلتى مع الكوسة انى مش بعرف اقور.. علشان كدا مش بستخدمها سألت واحد كان واقف قولتله " ليه الناس مش بتتكلم عن الرشوة وسايباها كدا" قاللى " الناس مش فاضية .. الناس بتختار طعمها " .. فى الوقت دا كانت الناس بدأت تختار بطعم السمك .. ونا لسة مفكرتش اختار طعمى .. ودم الوطنية بدأ يغلى فى عروقى .. وقررت انى هختار طعمى .. لانى زى منتو عارفين وطنى من طراز خاص فى الوقت دا بدأ التحذيرات تنزل فى التليفزيون ان اى حد يختار طعمه " يلحق يبعت قبل أخر يوليو " بعد ما خلصت مصلحتى فى المصلحة الحكومية .. ووقوفى فى طابور اوله عند رمسيس وأخره عند الدائرى نزلت الشارع لقيت فى ناس كتير متجمعة .. شايف الراجل اللى هناك دا .. أيون اللى شايل ابنه على ايده دا .. ماسك فى ايده التانية صورة مكتوب عليها " كلنا خالد سعيد " وفوجئت ان الناس دى مختارتش طعمها .. وانهم بيطالبو بحق الشهيد هنا اصابتنى حالة من الحيرة الشديدة .. الناس دى وطنيين وف نفس الوقت مش بيختارو طعمهم والناس التانيين وطنيين وبيختارو طعمهم ومش عارف امشى مع مين فى الوقت دا كان فى ناس كتير اختارت طعمها .. طعم الملوخية ..وبطعم الطعمية ونا لسة محتار اختار الطعم بتاعى .. واللا اطالب بحق مصر وفى حين ما كانت الناس بتختار طعمها .. جيت قضية رجائى سلطان .. ومحمد صلاح .. وقضايا فساد فى كل مكان..حوادث هنا .. ومشاكل هناك .. والناس لسة بتختار طعمها فى الوقت دا يوليو كان قرب يخلص وبرغم المشاكل الكتيرة اللى بتحصل لينا .. شيبسى قدرت تحسم الموقف.. ونقذتنى من الحيرة اللى انا فيها لما روحت وفتحت التليفزيون لقيت حاجة غريبة " افرحو يا مصريين .. الله يا صيادين.. مصر اختارت جمبررىىىىىىىىىىى" وهتافات من هنا وهناك ..يتبين منها كما لو أن مصر فاازت بكأس العالم مع ان اصغر مشكلة فى مصر اهم من كأس العالم .. زى مثلا ازمة رغيف العيش " ادام الله ذكره " اتضحلى ان الناس مخترتش طعم جمبرى وان الناس مصممة انها تختار طعم الحشيش .. اللى أذهب عقلهم .. وخلاهم ميفكروش فى حاجة . بسبب التخدير اللى عايشين فيه فيا ترى شيبسى هتقدر تنزلنا طعم جديد يفوقنا من اللى احنا فيه..هتخلينا نعرف مطالبنا الحقيقية وحقوقنا .. واللا هتكتفى بالجمبرى انا متابع الخطة ولو حصل تغيير مش هبخل عليكم .. لأن اختيار الطعم واجب وطنى يحتم على كل واحد فينا انه يختار طعمه بس تحذير " الحق ابعت قبل أخر يوليو " دمتم فى رعاية الله بقلمى/ محمود طه |
يشرفني اكون اول ارد على الموضوع التحفة ده
الف شكـــــــــــــــــــــــر |
:d مستنيه طعم البطيخ لحد دلوقتى ويوليوا خلص اهو :p يبقى اكيد هايعملوا حاجه فى انتظار طعم مصر شكرا لحضرتك ع الموضوع وتقبل مرورى |
عودُ أحمد
موضوع رائع تعجز كلماتى أن تصف ما أشعر به من روعة وجمال هذا الحديث وطريقة الطرح الرائعة مصر فعلاً تحتاج لحملة شديدة عشان تصحى لازم مصر تختار بس مش طعمها لا تختار مستقبلها وعشان تختار لازم تكون واعية الأول بس تفتكروا ده يكون إزاى ؟ بجد مش عارفة تقبل تحياتى وألف حمد الله على السلامة وغير التوقيع بقى بلاش closed 4 ever |
جزاك الله كل خير
شكرا علي الموضوع |
وردة كل عصر...........ربنا يخليكي ليا يا مصر
|
جزاك الله خير استاذ محمود وياريت جميعا ننتبه لدورنا وان لازم كل منا يبدأ بنفسه حتى يحدث التغيير
وفقك الله دائما وجعلك نبراس لمن لايرى ولمن لا يريد ان يرى |
جزاك الله خيراا
|
اكيد مصر بطعم الكووووسة هههههه
وشكرا على الموضوع الحلوووو |
شكرا علي الموضوع الجميل
وحمد لله علي السلامة وتقبل تحياتي الحارة |
كويس يابشمهندس ان احنا فى البلد دى ومكتوب لنا ان احنا نصحى كل يوم الصبح "الاعمار بيد الله" الحقيقة ان هناك ايدين خفية فى البلد كلنا يعلمها يابشمهندس ولكن حصل حالة من التغييب للعقل لدى الشباب غياب الوعى لديهم فاقل مثال فى منتداانا هنا نجد المجاملات والمواضيع ال..... وايضا الردود واللى مش عاجبه :stickjo4: يامحمود لو انت لاحظت ان اى مصيبة بتحصل فى بلدنا هنا تلاقى فى نفس اليوم حاجة حصلت تلهى الشعب مثلا كقضية مرتضى وشوبير المشكلة ان شبابنا بطل يفكر بطل يناقش زى مايكونوا استسلموا للامر الواقع مش عارفين مشاكلهم فين ولا عارفين ايه اللى بيدور حواليهم وايه اللى بيتم من وراهم محمود بلااش تقلب عليا المواجع الله يخليك انا لو اتكلمت وفتحت فى الكلااااام مش هخلص النهاردة بس انا بستأذنك انى اضيف لينكين لموضعين عسى ان اعضاء البوابه يقراوهم ويشوفوا ايه اللى بيحصل وايه اللى بيتم العيب عيب مين؟ العيب عيب مين 2 ( بنظرة جديدة) معلش يامحمود انا بستغل التوبيك بتاعك بالمناسبة ده اول موضوع فى البوابه اشوفه من يوم مارجعت للبوابة يكون كويس ويكون هادف شكرا يامحمود بجد انك رجعتنى للعصر الذهبى للبوابة |
اقتباس:
اقتباس:
شكرا على المرور دمت فى رعاية الله اقتباس:
لا مهو خلاص البطيخ هيبقا فى المشمش ان شاء الله :d طعم مصر .. تصدقى ينفع اسم كتاب :d شكرا على المرور دمتم فى رعاية الله اقتباس:
اقتباس:
شكرا على مجاملة حضرتك ياريت فعلا نفوق والا هننزل من فوق لتحت ازاى نفوق .. سهلة كل واحد يعرف حقه ويسعى اليه ويطالب بيه .. وهى دى البدايةان شاء الله هغيره لو قررت انى استمر شكرا على المرور دمتم فى رعاية الله |
الف شكر على الموضوع الرائع
تسلم ايديك |
اقتباس:
هتستمر ان شاء الله يابشمهندس |
وحشتني كتاباتك الجميلة والله يا محمود
انت المفروض تشتغل في الاهرام ولا في الجمهورية اسلوبك روعة بجد :d وبخصوص مصر ختختار طعمها ... يؤسفني إنك موصلتش في المعاد ازاي تسيب قضية مهمة زي دي ومتشاركش فيها ازاي متخترش طعمك (حتى لو مش حيختاروه اصلاً) الناس قالك صوتنا مبيوصلش في انتخابات المسؤولين ممكن يوصل في طعم الشيبسي :d |
| جميع الأوقات بتوقيت GMT +2. الساعة الآن 08:35 AM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.