بوابة الثانوية العامة المصرية - رمضان السنة دي .. هغيّر حياتي !!

بوابة الثانوية العامة المصرية (https://www.thanwya.com/vb/index.php)

- رمضان كريم (https://www.thanwya.com/vb/forumdisplay.php?f=68)

- - رمضان السنة دي .. هغيّر حياتي !! (https://www.thanwya.com/vb/showthread.php?t=235410)

رمضان السنة دي .. هغيّر حياتي !!

رمضان السنة دي .. هغيّر حياتي !!

http://4.bp.blogspot.com/_6Z2mTiXdSp...20/ramadan.jpg

فكرت في العبارة دي قبل كدة ؟!

طيب تخيل معايا كدة انك لسة بتتولد من جديد دلوقتي حالاً ..

إيه العيوب اللي نفسك تصلحها في نفسك ؟!

وإيه أكثر ذنب بتعمله حاسس بقرف منه جداً ونفسك ترتاح منه ؟!

وإيه أكثر حاجة حلوة كان نفسك تعملها زمان بس لسة معملتهاش لغاية دلوقتي ؟!

إيه رأيك من رمضان السنة دي نبتدي صفحة جديدة في حياتنا ؟!

يعني مثلاً واحد مكانش بيصلي في المسجد خالص ..

واحدة دايماً صوتها بيعلى على مامتها ، وترجع تندم جداً بعد كدة .. وبرضو مبتبطلش !!

واحدة لسة ملبستش الحجاب لغاية دلوقتي .. ونفسها تذوق حلاوة الستر وتحس بجد انها مش رخيصة ..

واحد بيدخن بقاله سنين .. ونفسه في اللحظة اللي يبطل فيها السجاير ..

واحد نفسه يبطل نظر في الحرام ..

واحد نفسه يبطل يسمع أغاني ..

واحدة نفسها تذوق حلاوة بر الأهل وصلة الرحم ..

نفسنا نعمل حاجات كثير .. مش كدة ؟!

طيب ما تيجي نخلي شعارنا من الآن :

رمضان السنة دي .. هغيّر حياتي !!

عايزين نتغير بجد بقى ..

عايزين نبتدي بداية جديدة مع ربنا ..

كل واحد فينا يفكر إيه اللي نفسه يعمله ، وإيه اللي لازم يغيره

ويحط في دماغه إنه بعد رمضان هيبقى إنسان جديد ..

سبحان الله ..

أنا جربت الحكاية دي رمضان السنة اللي فاتت ..

عملت حاجة كان نفسي أعملها من زماااااااان ..

حاجة عمري ما عملتها قبل كدة ..

وفعلاً قررت إني أعملها في رمضان .. وعقدت العزم على كدة من قبلها بشهرين تقريباً ..

ورغم صعوبة الظروف ورغم وجود أشياء كان ممكن تمنعني أو تعوقني عما أردت ..

إلا إني قدرت بفضل الله وعملتها مع بدايات رمضان ..

ورب الكعبة حسيت بعدها بلذة وحلاوة ما أظنني أحسستها من قبل ..

وربنا عز وجل فتح علي بفتوحات لم أكن أتخيلها .. وأراني من البُشريات ما أراح به قلبي ..!!

وحياتي كلها اتغيرت 180 درجة من بعدها ..

فعلاً رمضان السنة اللي فاتت كان نقلة كبيرة في حياتي بفضل الله ..

وفعلاً رمضان غيّر لي حياتي ..

- - - - - - - - - - - -

طيب احنا بنقول الكلام ده ليه من دلوقتي ؟!

علشان لازم تكون النية دي في قلوبنا من دلوقتي ، ولازم ربنا يرى في قلوبنا صدق وعزم حقيقي ..

ممكن واحد مننا يموت بُكرة .. أو بعده !!

فلو مكانش عنده النية إنه يتغير ويتوب هيموت على حاله الآن للأسف : (

لكن لو كانت عنده النية من دلوقتي لكنه مات قبل رمضان .. فبإذن الله ربنا يكتب له الأجر ..

- - - - - - - - -

الأصل في أي عمل : عدم التسويف ..

يعني الأصل إني لما أحب أعمل حاجة تقربني من ربنا إني أعملها على طول من غير تسويف ..

لكن أحياناً بتكون الهمة ضعيفة ..

فلعلنا لما نعقد النية على التغيير من الآن ، وربنا عز وجل يلاقي في قلوبنا صدق وإخلاص ، لعله يفتح لنا أبواب رحمته وفضله ويُصلح قلوبنا ويعيننا على أنفسنا ..

فتكون أولى خطوات التغيير هي العزم والنية بإذن الله ..

وليكن شعارنا من الآن :

رمضان السنة دي .. هغيّر حياتي !!

نقلا عن الاخت :عزتي في إسلامي

من منتدى احلى حياة فى طاعة الله .

يعود علينا بالخير

مشاركة من الاخت صاحبة الموضوع:

اقتباس:

المشاركة الأصلية كتبت بواسطة عزتي في إسلامي (المشاركة 6656)

فيه نقطة مهمة جداً لازم ناخد بالنا منها ..

وهي : إن رمضان في حد ذاته مش ساحر .. هيلمس قلبك بعصا سحرية فهتتغير !!

يعني مش ممكن واحد يكون نايم في العسل وقلبه سرحان ، ويقعد يمنّي نفسه إن رمضان هيغيره !!

مستحيييييييييييييل

يبقى عمره ما هيتغير ..!

" إن الله لا يُغيرُ ما بقوم حتى يُغيرُوا ما بأنفسهم "

لكن الفكرة ان رمضان شهر مختلف عن غيره .. وفيه مميزات مش ممكن تلاقيها متجمعة تاني بعد كدة ..

يكفي ان رمضان بتكون شياطين الجن مُصفدة فيه ( محبوسة ومُقيدة ) ..

يعني مش هيبقى أمامنا غير شياطين الإنس بس ..

( ربنا يعيننا عليهم ويحفظنا من شرورهم ) ..

إضافة إلى أن شهر رمضان ، شهر بترتفع فيه الإيمانيات بشكل رهيب ولله الحمد ، حتى في قلب أي مسلم عادي مننا ..

لأن رمضان شهر كدة تحس فيه إن الهواء والجو بيشع روح إيمانية جميلة من حولك ..

غير أن رمضان بيتميز بحاجة تانية مش موجودة تقريباً في شهر كامل غيره .. وهي جماعية الطاعة ..

يعني في رمضان تلاقي اللي حواليك كلهم ماسكين المصحف بيقرأوا قرآن ..

الناس كلها بتفطر في نفس الوقت ..

الناس كلها بتتسحر في نفس الوقت تقريباً وبتقعد تستغفر بالليل في نفس الوقت برضو ..

تروح المسجد تلاقي - اللهم بارك - عدد رهيب من المسلمين واقفين يصلوا التراويح جنب بعض ..

رمضان فعلاً جو تاني خااااالص ..

جو يعينك على أنك تتغير و تتوب بأمر الله ..

المهم يكون عندنا الرغبة والنية الحقيقية لكدة ؟؟

ورمضان فرصتنا الحقيقية دلوقتي :

1 - شياطين الجن محبوسة .

2 - جو إيماني رهيب وإحساس جميل في قلبك .

3 - الناس كلها حواليك بتعبد ربنا معاك .

يعني لو ملحقتش قلبك وهو صافي في الوقت ده ، ربما متقدرش تلحقه بعد كدة !

....................................

طيب .. خلاص

تعالوا ننسى الماضي .. ونتكلم عن الحاضر والمستقبل إن شاء الله ..

دلوقتي احنا اتفقنا ان شعارنا من الآن هو :

رمضان السنة دي هغير حياتي ( إن شاء الله )

واتفقنا ان التغيير ده ممكن يتم بشكلين مختلفين :

1 - إما أني أتوقف تماما عن معصية معينة كنت بعملها .

2 - أو أني أعمل طاعة جديدة عمري ما عملتها قبل كدة ، أتقرب بيها إلى الله ..

بشرط استمراري على هذا الحال ( يعني مش تغيير مؤقت خلال رمضان وبس ) ..

طيب .. احنا مش هنتكلم في النقطة الأولى ( ترك معصية بعينها ) حتى لا نجاهر بالمعاصي التي سترها الله علينا ..

خلينا في النقطة الثانية ..

هتغير بإني أبتدي أعمل طاعة جديدة وأداوم عليها إن شاء الله ..

يا ترى إيه هي الطاعة الجديدة اللي مكنتش بتعملها قبل كدة ( أو مش منتظم فيها ) .. وناوي انك تلتزم بيها بجد ابتداءً من رمضان إن شاء الله ؟!!

أخبرنا ... لعل كلامك يأثر فينا ويذكرنا بطاعات غائبة عن أذهاننا ..

وربما كلامك ده يخلي واحد تاني يعزم وينوي إنه يقلدك إن شاء الله ..

فتنال أجرك وأجر كل من يتبعك إن شاء الله ..

ان شاء الله ناوية اتعود على المواظبة على قيام الليل فى وقت السحر
بأن أضبط منبهى قبل الفجر بساعة أقسمها أول ربع ساعة قراءة قرآن والربع ساعة الثانية صلاة تهجد والربع ساعة الثالثة دعاء
والرابعة استغفار (فاكون من المستغفرين بالاسحار )
ربنا يعينني على ذلك وطبعا مالا يدرك كله لا يترك كله ومن أراد المزيد فما عند الله خيرا له

ا

جزاكم الله خيرا على الموضوع الرائع

ما شاء الله قوة إلا بالله ، ممتـــاز جداً جداً ، ربنا يُبارك فيكم ، واللهِ مُؤثر جداً هذا المقال ، اللهُّمَّ اجْعلْنا ممَّنْ يسْتمعون القول فيَتَّبعُونَ أحْسَنَهُ أولئِكَ الذين هَداهُمُ الله وأولئِكَ همْ أولوا الألباب سوة الزمر

جزاكِ اللهُ خيراً