نبذة عن القسم

القسم عندنا جامد جدا وهو في نظري من أحسن الأقسام ,لكن مشكلته في الأشاعات والكلام الي بيدور بين الطلبة عنه و محدش منهم بيبقي عارف ان الي بيقوله عكس كده تماما,انا برضه كنت بسمع كلااااااااااااااام كتير اوي عنه وان محدش بينجح فيه,لكن بعد ما دخلت اكتشفت ان كل الي بيتقال عنه ما هو الا كلام في الهوا,وطلع قسم جامد جدا والنجاح فيه سهل مش صعب ومستقبله في الوظايف مضمون,والقسم بتعانا مستقل بنفسه لا هو في حرم الكلية ولا في الملحق,لينا مبني لوحدينا وبس وعندنا كل حاجة سواء مدرجات و قاعات الرسم والمعامل وقاعات الأمتحانات والكافيتريا وكله كله.
بالنسبة للمواد
for 1st year
Aeronautics
Structure
physics
computer & programing
production technology
drawing machinesfor
2nd year
Fluid Mechanics
Electrical Engineering
Gas Dynamics
Aviation Legislations
System Dynamicsfor
3rd year
Incompressible Aerodynamics
Flight Mechanics and Control
Partial Differenrial Equations
Boundary Layer
Propulsion Jet Enginesfor
4th year
Aircraft Structural Design
Airplane Propulsion Systems
Digital Control and Applications
Rocket Propulsion Systems
Aerospace Guidance and Control Systems
مميزات القسم
نبدأ بالمميزات وهي العدد القلييل الي بيتيح فرصة كبيرة جدا علي الطلبة علي الأستيعاب بسهولة
المستقبل الوظيفي المضمون سواء في شركة مصر للطيران او الشركة العربية للتصنيع او مصانع الأنتاج الحربي وغيره من شركات الطيران الأخري الخاصة وأشهرها شركة الشروق وهيئة الأستشعار عن بعد......يعني من الأخر ليلة
ميزة أخري وهي مهمة جدا
ان خريج طيران بيقدر يشتغل مكان مهندس ميكانيكا بدون اي معوقات
قسمنا هو القسم الوحيد في مصر كلها
غير معهد امبابة طبعا بس هما طيران وبس
لكن احنا طيران وفضاء
وهما عندهم تخصص واحد او اتنين
لكن احنا عندنا خمس تخصصات وهم:
Aerodynamics
وهو عامل زي عمارة يعني بيصمم الطيارة او الصاروخ او القمر الصناعي وهكذا
Structure
وهو عامل زي مدني يعني بيبني الطيارة وهيكلها وجميع اجزائها
Propulsion & Engines
وهو صيانة المحركات وهو اكبر التخصصات انتشارا وطلبا
Control & stability
التحكم في وسائل التحكم بالطائرات وباقي الأجهزة الأخري والتحكم بوسائل التحكم الي في الهيكل نفسه
Space
وهواختصاص الفضاء والأقمار الصناعية والصواريخ
اما عن عيوب القسم
النسبة للطلبة الي بيدخلوا القسم ده هما حاجة من اتنين(اما عارف عن القسم وبيحبوا جدا يعني داخلوه بمزاجه ومش عشان المجموع)فالطلبة دي مستواها بيبقي كويس جدا في القسم وعلي مدار الأربع سنين,لكن المشكلة في النوعية التانية وهما(المحولين من جامعات اخري ودول برضه فيهم بيبقي جاي عشان القسم مخصوص او جاي وعامل حسابه انه يسقط اول سنة بحيث انه يدخل اي قسم هو عايزه في الكلية عشان هما اول ما بيجوا مش بيبقي مسموح لهم غير بأقسام قليلة منهم قسمنا) وهو ده السبب الي بيخلي الطلبة تقول ان القسم صعب ومحدش بيعدي منه.
لكن لو انت بتحب القسم وحبيت مواده
فانت تأكد انك هاتكون من الأوائل عليه
بالنسبة لعدد الطلبة في اولي
,في الكشوفات هما 100 لكن بتصفصف علي من 50 الي 60 طالب في المحاضرة,لسنة تانية هما 40 طالب لأن زي ما قولت قبل كده ان ناس كتير(الي جايين من جامعات تانية) بتسقط نفسها عشان تحولووبيستمر العدد 40 لسنة تالتة ورابعة.
مميزات طالب هندسة طيران والفضاء القاهرة عن معهد امبابة
زي ما قولت قبل كده احنا طيران وفضاء هما طيران بس
احنا عندنا 5 تخصصات هما 1 او 2 بس
تقريبا معظم دكاترتهم من عندنا
احنا كلية وجامعة حكومية هما معهد:
وفكر انت كده اما يبقي اتنين مقدمين علي وظيفة واحد من معهد والتاني من جامعة القاهرة,يعني بالعقل كده هايختاروا مين؟
وسواء كده او كده هما عددهم 140 واحنا عند التخرج 40 ,فان في فرص وظايف كتيير قوي تكفينا كلنا سواء في شركات الطيران او في المصانع الحربية
وممكن برضه ان احنا وهما نروح كلنا ندخل الأكاديمية الحربية 6 شهور ونبقي مهندسين في الطيران الحربي وهايبقي في وظايف فاضية كمان وهناك اصلا عدد المهندسين قليل جدا جدا جدا عشان كده هما بيموتوا علي مهندسين طيران ,من الخر سواء هما معاهم عقد عمل او لأ فان اصلا فرص التوظييف كتيييير قوي.
والمرتبات كله زي بعضه مفيش اتنين لسه مقدمين جدد في وظيفة وواحد ياخد اكتر من التاني
بس الي انا عارفه ان المرتبات في اي شركة او مصنع حربي او حتي في الجيش بعد الأكاديمية بيبقي مرتبات كويسة جدا

هل خريج طيران بيقدر يشتغل مكان مهندس ميكانيكا بدون اي معوقات؟
قسم طيران غير ميكانيكا خالص ده حاجة وده حاجة اه ممكن المواد تكون متشابهة كأسم لكن المحتوي غير تماما واحنا بندرس الحاجات اللي هتفيدنا في دراسة الطيران وبالنسبة للشغل متعدش الاماكن اللي ممكن تشتغل فيها لانك هتتعب ده حتى شركات البترول بتتطلبنا كمهندسين طيران
وخد بالك من طيران غير مهندسين ميكانيكا

ايه الكورسات اللى بياخدوها لانى سمعت انهم مش بيشتغلو غير اما ياخدو شوية كورسات الاول؟
كورسات عادية وهاتخدها خلال الدراسة بتاعتك او بعد ما تخلص براحتك زي المات لاب وده اختياري اخدناه في اجازة نص السنة وفيه كمان الهاند اوف ده اللي انا اعرفه حتى الان وياسيدي لو ع الكورسات انت هتلاقي نفسك عايز تروح عشان تعرف اكتر
المشكلة ان الناس بتعد تقول طيران وحش وصعب انا مش عارف اعمل ايه ؟

(انت طالب في هندسة ومافيش ولا قسم سهل في الكلية دي كله زي بعضه ده لو واخدها من حيث السهولة والصعوبة , بص هي بتفرق في الميول بتاعتك ومجهودك جوا القسم يعني اللي حاسس نفسك فيه ادخله ولو حابب طيران ادخل وانت متطمن ومتقلقش القسم مش صعب ولا اي حاجة من الكلام ده ... أما بقى بالنسبة لـــ "وحش " هسيبك انت اللي تقول لما تدخل ان شاء الله وانا من وجه نظري القسم متعة تانية
بالنسبة للرسم في القسم
انا من عشاق حاجة اسمها الرسم الهندسي ... والرسم ده حاجة كدة هدية من الكلية ليك عشان تزود درجاتك ... وعشان اكون صريح معاك الرسم السنة دي مش حابه اوي اللي هو عادي بس ميزته انك عارف بترسم ايه مش زي اعدادي بترسم وخلاص الدكتور هايقولك انت بترسم ايه والجزء ده ليه أتعمل كدة لان الرسم ليه محاضرة مستقلة بيه يعني الشرح مش في السيكشن زي اعدادي لأ ده ليه محاضرة خاصة بيه ساعة ونص بيتشرحلك في الجزء اللي هترسمه في السيكشن يعني من الاخر انسى مشكلة الرسم
بالنسبة للشغل و المرتبات
اما المرتبات ( في المصانع الحربية ) متقلقش وزي ما اتقال في التوبيك بتبدا قليلة بس بعد كدة بتزيد زيادات جامدة بس كام مش عايز افتي وبلاش تفكر في المرتبات لان كله ارزاق على الله لو انت حابب طيران اتاكد انك هتتخطف خطف
اعمل ايه لو ما لقيتش شغل في طيران؟
ماتخفش ان شاء الله مش هاتضيق معاك لان دلوقتي مصر بتعمل زي ورش لعمرة الطيارات غير شركات الطيران الخاصة ومصر للطيران وشركات البترول والمصانع الحربية وفيه حاجة سمعتها ( ان ممكن نشتغل في بناء العمارات مع مدني بس مش اي عمارات ناطحات السحاب ) يعني ان شاء الله لا مفر من شغل طيران ماتقلقش ... اما التدريب الصيفي مش شرط يكون شركات طيران اللي تدرب فيها ممكن تدرب في شركات البترول والتدريبات بتنزل في الكلية في القسم انه فيه تدريب في المكان كذا وبعدها تلاقي تدريب في مكان تاني وتالت

بالنسبة للناس اللي شايفة القسم مستحيل و صعب و الشغل في قليل

اول ما دخلنا القسم السنة دى كنا بنقول زيك كدة

لحد ما معيدين القسم عملولنا يوم ال
UDC

كلمونا عن ان قسمنا ان شاء الله هيكون من ضمن الأقسام العالمية اللى هتخش فى
AIAA

و دى اكبر منظمة فى العالم عن علماء الفيزياء و الطيران و الفضاء

و فى اليوم دة المعيدين حكولنا عن معجزات اتعملت فى قسمنا

انت سمعت قبل كدة عن اول طيارة تصميم و تنفيذ مصرى اسرع من الصوت و مش بتتشاف على الرادادر

و دى الوحيدة فى الشرق الأوسط

و اللى عاملها رئيس القسم عندنا
و بتخدم دلوقتى فى الجيش المصرى

بجد اليوم دة المعيدين اللى هم قالولك مفيش شغل فى مجال الطيران فى مصر

هم هم قالوا ان ال
AIAA
لو بقت فى قسمنا مش هنحتاج اننا نشتغل اصلاً فى مصر احنا هنشتغل برة بمجرد ما نقدم على الشغل مغ
AIAA

يابنى قسم طيران لما تشوفه من جوة غير خالص لما تشوفه من برة

عموماً لو انت حابب حاجة و درست فيها اكيد هتتفوق

انما لو مش مقتنع بيها حاول تلاقى الحاجة اللى بتحبها عشان متجيش فى يوم تندم

بالنسبة للتقدير
الفسم كل سنة بياخد من مقبول

و ممكن لو العدد مش كبير بياخد اللى معاه مادتين

و كالعادة العدد مش بيبقى كبير أوى

أذن فالقسم بيقبل من مقبول بمادتين

بالنسبة للبنات
انا شايفه ان طالما انتى دخلتى هندسه من الاول فأى قسم فيها ينفع للبنات لان ببساطه كل الاقسام عباره عن شيويه مواد
وكل قسم بيتخصص بس شيويه عن الباقى .....فأنتى اول حاجه لازم تشوفى المواد اللى تحبى تدرسيها وتشتغلى فيها بعد كده والموضوع ده هيسهل عليكى جدا لما تيجى تعملى تنسيق الاقسام ان شاء الله

نيجى بقى لقسم طيران
القسم اصلا جاى من ميكانيكا لاننا بندرس ميكانيكا الطيارات والمحركات وبندرس تصميم
لكن الاساس هى الميكانكا لان فى مصر لغايه دلوقتى احنا بنشتغل فى الصيانه والتجميع لكن لسه التصميم
فعشان كده لازم تعرفى من الاول ان الشغل المتاح ليكى هو فى ميكانيكا الطيران ما لم يجد جديد....اما بالنسبه انك تلاقى شغل فى شركات الطيران كبنت فانا لما رحت المطار لقيت بنات
شغاله عادى (مكانوش كتير) بس كان فى ......وحكايه الشغل دى بوجه عام بتتغير مع الزمن
وفى شركات طيران بتشغل البنات فى المكاتب اوفى الجزء الغير تنفيذى


ولو فى حاجه تانيه انا مردتش عليها اسألى وانا ان شاء الله هحاول افيدك

بالتوفيق