بوابة الثانوية العامة المصرية

بصي منصحكيش بالأحياء في المستوي الرفيع ... لأنك لما هتدرسي الأحياء هتعرفي إنها عاوزة شغل جامد وبتتنسي بسرعة وحاجات كده
كده قدامك عربي وإنجليزي ... لو إنتي في مدرسة لغات أنصحك خدي إنجليزي هيبقي سهل بالنسبالك ... ولو إنتي مش كويسة أوي في الإنجليزي يبقي تاخدي عربي
العربي والإنجليزي كل واحد فيه ميزة وعيب ....

- العربي:
ميزته إن نص الإمتحان بيبقي سؤالين بلاغة مضمونين بيعتمدوا علي فهمك للشعر وتذوقك ليه ... يعني هيحطلك أبيات لأي شاعر ويسألك عن فكرتهم وكده .. وهيجيبلك كلمتين في الأبيات تعربيهم بس سهلين جدا .. يعني حاجات من النحو العادي ( خبر - مضاف إليه - بدل ) الكلام ده
عيبه بقي إن نصه التاني أسئلة خاصة بدروس قراءة المفروض تذاكريها ... للأسف هم حوالي 14 درس قراءة بس الدرس الواحد صغير جدا وسهل وأسئلته محدودة وممكن ياخد منك في مذاكرته ساعة بالكتير ... يعني ال 14 درس دول يعملوا 6 دروس مثلا من العربي العادي

الإنجليزي:
- ميزته إن الجرامر أغلبه هو نفس الجرامر المقرر عليكم أصلا .. يعني مش هتتعبي كتير في الجرامر، وعندك 3 وحدات عن مواضيع مختلفة بتذاكريهم وبيسألك عليهم
عيبه بقي ... إنك بتكتبي براجراف عن موضوع هيطلبه منك في 20 سطر تقريبا يعني حوالي صفحة وشوية ... ودي بالنسبالي حاجة صعبة ، أنا الحمد لله كويس جدا في الإنجليزي وكلماته وكده وسهل أكتب البراجراف بس مشكلتي كلها في الأفكار ، يعني مش سهل تحضر في ذهني الأفكار اللي هكتبها عن الموضوع ...

عشان كده لو إنتي تجريبي أو لغات أنصحك تاخدي الإنجليزي هيبقي سهل معاكي ... ولو إنتي عربي أنصحك تاخدي العربي بس تذاكريه قبل الإمتحانات بشهر مثلا عشان تلحقي تذاكري دروس القراءة بتاعته وتضمنيه ... علي فكرة أنا معايا عربي السنة دي وشايف إنه سهل جدا بس كان محتاج إني أذاكره قبلها بفترة، لأن مشكلتنا كلنا إننا بنسيب المستوي الرفيع لحد آخر لحظة
عموما السنة الجاية هتكوني سألتي المدرسين بتوعك وهتقدري تحددي بالظبط ... وكمان تقدري تغيريه في أي وقت لحد شهر 1
ربنا معاكم جميعا
Haitham