بوابة الثانوية العامة المصرية - عوكل محتار ..هاينتخب مين

بسم الله الرحمن الرحيم

جلست اتابع الاخبار شوفت الدمار وخراب الديار وارتفاع الاسعار فى الطماطم والخيار وتصريحات الكبار بالسلام والاستقرار ولما تعبت من الافكار قلت اخرج اقعد على قهوة عوكل فى الشارع السياسى .وعلى القهوة سمعت عوكل واصحابه يتحدثون فى ضوء خافت وفى ظلام دامس و بصوت هامس عن الانتخابات.

اخذ عوكل رشفه من كوب الشاى بتاع التموين الاصلى بعد ما تلفت يمين وشمال وقال: لما باسمع سيرة الانتخابات بافتكر قوات مكافحة الناخبين وتدور برأسى الحملة الشعبيه الوطنيه المهلبيه للتصدى للناخبين الخائنين للوطن... العملاء الذين لعب الشيطان اللعين برأسهم وتوهموا أنهم بلغوا سن الرشد وصدقوا تصريحات السيده الفاضلة نزيهة التى لا نسمع بها الا فى ايام الانتخابات.
ونظر عوكل وراءه وقال : الغلابه افتكروا ان من حقهم يختاروا واحد منهم يعبر عنهم ويحمل همومهم ويدافع عن مصالحهم ونسيوا إن الحكومة عامله على راحتهم ومش عاوزه تتعبهم بالتفكير فى الاختيار واتخاذ القرار وبتقوم هى بالواجب وبتسهر الليالى الطوال فى التفكيرفى انجح الوسائل القوميه لمنع المتعطشين للحريه من الاقتراب من اللجان الانتخابيه فتتعب حكومتنا المسكينة اياديها الطويلة فى تسويد البطاقات الانتخابيه وتقفيل محاضرالفرز فى اللجان العموميه ووكيلك ربنا .
واضاف عوكل فى حيره : الواحد محتار بين الليل والنهار والنور والظلام والكافيار والخيار.. مش عارف انتخب مين ؟ رد واحد منهم وقال كل واحد مننا يختار قبل الدعايه والاعلان وزحمة المولد والمهرجان وضجيج الصولجان والخوف من الانس والجان .
رد الواد شفيق وقال انا هانتخب الوطنى طبعا .. دى عاوزه كلام ؟ فقال له عوكل طيب ليه الوطنى يافالح ؟ قال الحزب الخبره صاحب الكوادر ورجال الاعمال ... والمصالح وكروت التوصيه والتأشيرات اياها الى بالوان الطيف... والمنجهه والمهلبيه تعبنا يا اخى من الفول والطعميه ... واراضى الدولة الواسعه... و العلاج على نفقة الدولة ...واكياس الدم ... والساحل الشمالى ومارينا وشرم .
والعباره انت نا سى العباره ياعوكل ؟ الى نال فيها الشهاده ودخل الجنه بسببها 1000 مصرى مره واحده . مين فى مصر يقدر يدخل الجنه 1000واحد مره واحده؟ ولا البطالة حد يلاقى احلى من البطالة والقعده فى البيت بين الاهل والاصحاب من غير شغل ولا وجع دماغ . ولا القروض الى بالهبل .

رد واحد شباب قاعد بعيد من العيال بتوع الانتخابات الخبره الى همه... وقال انا هانتخب واحد من المستقلين مش عارف مستقلين عن مين ولا يمكن يقصدوا مستقيلين من الشغل بهوات يعنى ولا يقصدوا مستقلين سياره ولا عباره ولاحتى حماره... سأله عوكل ليه المستقلين ياناصح ؟ قاله علشان افضفض معاهم واحس إنى ضد الحكومة ومعاها ... ونفع واستنفع... وبعدين بعد ماننجح ندخل الحزب ونتبغدد عليهم وتبقى بجميله... وعلشان كمان الكباب والكوفته الى بيوزعوه بيصرفوا كتير والله وكله بيسترزق.... موسم بقه .

رد خيشه الرومانسى و قال الواحد افضل حاجه يخش على الاحزاب...... رد الواد عوكل الخبيث وقاله طيب ليه الاحزاب يارومانسى ؟ رد خيشه وقال احلى حاجه المعارضه بالقانون.... بتصريح من الحكومة ....طبعا انتم مش عارفين ان الحكومة بتاعتنا قلبها ابيض اد ايه ؟ تصدقوا انها بتعطى الاحزاب فلوس علشان يعارضوها فيه طيبه اكتر من كده ؟ دا غير الهدوء والمقرات الفاضيه الهاديه بعيد عن الزحمه ووجع الدماغ . الواحد يهرب من دوشة العيال وامهم ويروح هناك... يعيش مع نفسه شويه . الهدوء ياجماعه احلى حاجه صدقونى.... ولا المؤتمرات و القاعات المتكيفه فى الصيف يعنى تعارض براحتك ولا حد يقولك اى حاجه ولا حتى حد يسمعك .

طلب واحد من اياهم من عوكل الاذن.... واحد شكله كده من الجماعة بتوع الله واكبر ولله الحمد وحسبنا الله ونعم الوكيل اكيد كلكم عرفتوهم مين ....... ربنا يجعل كلامنا خفيف عليهم وقال الانتخابات دى شهاده وانا مش ممكن هاشهد زور ابدا . انا هانتخب واحد مننا عايش معانا من زمان ...واحد عارفين اصله وفصله...... بيشرب ميه من الحنفيه .... واحد بيدور على مصلحتنا قبل مصلحته هو . واحد عاوز يصلح فى البلد ويتمنى الخير للقريب والبعيد. واحد من الناس بتوع شنط رمضان وكفالة الايتام والصلاه باليل والناس نيام . واحد من الناس بتوع ربنا ولا إرهاب ولا كباب ولا عنده زحمه على الابواب واحد من الناس الى بيعاملونا زى الاصحاب. واحد بعيد عن الفخفخه والمنظره.... واحد بيقعد معانا على المصطبه.... بيروح المجلس يطالب بحقوقنا وبيدخل علينا بيوتنا .
رد عوكل وقال انا فهمت الان انا هانتخب مين........ولم يكمل عوكل كلامه حتى دخل القهوه واحد من الناس التانيين بلع عوكل ريقه وغير الكلام فى الحال وبدأ يمجد فى السلطان .

:022yb4:منقول :022yb4: