فاكرين يعني ايه كلمه مصري؟
 

تعالوا معانا نشوف صفات المصري الاصيل و ندي للعالم درس في الرجوله و الاحترام .
المصري بجد هو اللي لو عمل حاجه حلوه يبعت لجاره طبق يدوقه . و هو نفسه اللي لو لقي الدنيا تمطر يجري يخبط عليك و يقولك ((لم الغسيل)) , و هو كمان اللي لو شم حاجه عندك بتتحرق يجري يطمن عليك لتكون اتخنقت , و برضو هو اللي لو سمع صوت زعيق وخناق عندك يجي يصالح ,
المصري برضو هو اللي لو لقي خناقه في الشارع يقف يحوش و يصلح مش يتفرج عليها , وهو نفسه اللي لو لقي حد بيغرق يجري و ينط في الميه حتي لو هايغرق معاه , وهو لو اتفرط منك كيس برتقال في الشارع يقف يلم معاك ,
المصري يا ناس هو اللي لو حس انك مزنوق يعملك ((جمعيه )) ويخليك تقبض الاول , وهو نفسه اللي يقف معاك في الاحزان و تلاقي الف عين باكيه عليك و في الافراح تلاقي زغاريت وزينه من حواليك , وهو برضو اللي لم لك فلوس من الركاب لو مرتبك اتسرق منك في الاتوبيس رغم انه ما يعرفكش و هو اللي لو لقاك في المواصله وكان يعرفك يحلفلك ميت يمين انه يدفع لك الاجره حتي لو مفيش في جيبه غير جنيه واحد .
المصري يا عالم اللي يقعد معاك ع الفطار في رمضان ويشتري لولادك بالونات في العيد ويقف جنبك وانت بتدبح الاضحيه , ويبارك لك لما ابنك ينجح وكمان يساعدك علشان تلاقيله شغل .
المصري هو اللي يجيي يقولك تجيب كشاكيل واقلام بالجمله علشان توفر المصاريف .
ياريت تكونوا عرفتوا كويس ابو قلب طيب و حنين اللي عمره ما هزته الدنيا ولا قصرت فيه ولا في اخلاقه وطبعا هو ((المصري))

يا سلام
يا ريت نرجع نشوف الحاجات دي مرة تانية ونتعود علي رؤيتها باستمرار وتكون هي دي طبيعة المصري .
ما تزال بداخلنا هذه الأشياء , والمطلوب هو تنميتها مرة أخري والحث عليها وابرازها في كل مكان .
شكراً علي هذا الموضوع .

شكرا علي رسم الصورة الجميلة الاصيلة للمصري

موضــــــــــــوع جمـــــــــيل ..
لكن الاجمل اننا نحس فعلااااا بالكلام دة على ارض الواقع..
جزاكم الله خيرااااااااا .. وجعله في ميزان حسناتكـــــــــــــــــم ..

بجد الكلام مكتوب من القلب
عشان كده دخل القلب
ويارب يرجع المصرى زى ماكان
والله تبقى الدنيا اجمل واجمل
بو قلب طيب و حنين اللي عمره ما هزته الدنيا ولا قصرت فيه ولا في اخلاقه وطبعا هو ((المصري))
تسلم ع التوبيك الجميل مع انه بالنسبه ليا مش مجرد توبيك ده ---------[/color]

المصرى أطيب انسان فى الدنيا . بس الظروف بتتحكم فيه .