بوابة الثانوية العامة المصرية - ردًا على إبراهيم عيسى و فلوباتير ومعاهم شوب ديموقراطية وعلمانية والمكسرات ليبرالية

مقال ساخر..بالبلدي كده برضه .

أسمع الفيديو بتركيز شديد "الأول" وبعدين تابع "التعليق"

-الأستاذ إبراهيم عيسى يستضيف "القس فلوباتير" بتقول مين؟!
بقولك" القس فلوباتير .. أنت أطرش ومبتشوفش ولا أيه؟!
لا يا عم بشوف..بس قولي الله يبارك لك يا أبني هو"قس" دي رتبة فى الجيش ولا دكتور فى جامعة ولا رجل سياسي؟
أنت شكلك تايه يا عم ولا أيه.."قس" يعني رجل دين نصراني..
أها..رجل دين نصراني..وبيتكلم فى السياسة؟! يالا الهول !!!

راحت فين العلمانية والليبرالية؟ فين فصل السياسة عن الدين؟ وليه جايب رجل دين بيتكلم عن السياسة؟!
هما دايماً كده العلمانيين والليراليين لما بيكون الواحد منهم جعان تلقيه بياكل "صنم العلمانية والليبرالية والديمقراطية" حلال للقس انه يتكلم فى السياسة..وحرام على الشيخ انه يتكلم فى السياسة...طول عمري بحب الناس اللي عندها مبدأ .

2- بدأ الحوار من الأستاذ إبراهيم عيسى وهو يرمي و"بيلقح" وبيقول "وكأن الأقباط لم يظهروا اليوم فى الأحزاب السياسية" وطبعاً عايز يقول ان السلفيين ظهروا فاجئة فى الأحزاب السياسية

وأقول: يا عم إبراهيم أنت تقصد أيه بكلمة الأقباط؟ أكيد بتقصد بيها النصارى..طيب هل المسلمين مكنوش مشاركين فى الاحزاب السياسية قبل كده؟ ولا كان كل المشاركين فى الأحزاب نصارى فقط؟
طيب بلاش دي..خد دي بقى..والآاخوان المسلمون دول جنس ملتهم أيه؟ نصارى متخفيين؟ دول مسلمين وليهم باع طويل فى السياسة من قبل ما تتولد يا أستاذ إبراهيم..ولا أيش قولك؟!
طيب بلاش دي..كلنا نتفق على إن جهاز أمن الدولة السابق كان جهاز فاسد فى نظام فاسد..صح ولا أيه يا عم إبراهيم؟!
طيب الجهاز الفاسد ده بقى كان مين شغله الشاغل؟ كان جهاز أمن الدولة بيخلص - تقريباً – ربع كهرباء السد العالي على مين؟! كان بيخلصها على " السلفيين " طيب هل الجهاز الفاسد كان هيمنع ويحجر على اراء ناس فاسدين؟! لا ابداً ودي تيجي؟! يبقى إزاى أنت بتتطالب بظهور السلفيين فى حين انهم الزبون الدائم فى المعتقلات؟!

3- قررررب قرررب قرررررب بدأ المزاد العلني للاساءة ))للنصارى المنضمين للأحزاب الإسلامية(( قرب قرب قرب..قبل ما يعقل يا جدعان:
القس فلوباتير يوصفهم: البسطاء من الاقباط..السذج وبيقول ان ده" وصف حلو"...يا حلو أنت يا حلو.
عم إبراهيم عيسى:فقراء داخلين سذج كمان؟ داخل تقيل اوى .......بصراحة أتقل منك ما شوفت

مش قولتلكم بموت انا فى أصحاب المبادىء..علشان فى مجموعة من "الاقباط-النصاري" إنضموا للأحزاب الإسلامية..بقولوا عليهم "سذج" و"فقراء" و"داخلين" - مش عارف بصراحة داخلين على فين بس المهم انهم داخلين – سبحان الله ..
-وعندك أتنين شوب "ديمقراطية " للأستاذ إبراهيم عيسى ولقس فلوباتير وصلحه .. أيوووووه جاااااااى .
راحت فين الديمقراطية يا أستاذ إبراهيم ؟ خلاص ضاعت؟ أختفت؟ ملهاش لزمة؟
لمجرد أن حد يختلف يا قس فلوباتير..حتى ولو كانوا من نفس دينك..تقول عليهم سذج؟ أنصح حضرتك بشرب كوب ديمقراطية على غيار الريق..بالشفا إن شاء الله
لمجرد أن هما أختلفوا معك يا أستاذ إبراهيم عيسى يبقوا "فقراء "؟! هو الفقرعيب ولا أيه؟ السياسة للأغنياء فقط؟! ولا حضرتك بالعامية كده"بتلقح" وبتقول أنهم اخدوا "فلوس" علشان ينضموا للأحزاب الإسلامية؟ قول قول متخافش..طيب والله شكلك عايز تقول كده أنا فاهمك ...
-.وده طبعاً على أساس إن "السلفيين و الآخوان" كانوا بيروحوا الموالد وبيفرقوا فلوس ولحمة..واخد بالك ؟
- وكمان "السلفيين والآخوان" هما اللى كانوا بيبيعوا "خط موبينيل" بجنيه واحد وعليه كام ألف دقيقة هدية فى مقابل أنك تديله صورة البطاقة؟!
- على أساس أن "السلفيين والآخوان" كانوا عاملين إعلان فى الجرائد الرسمية بمئات الآلاف علشان حملة((هركب الحنطور وهقول"لاء"لتعديل الدستور))..وأديكم ركبتوا الحنطور وتم تعديل الدستور..وكمان "أعلان" فيه شوية ممثلين على سياسيين على مش عارف مين..وأتكلف كام مليون بس مش كتير.
آآآآه منكم يا سلفيين يا شريرين أنتم والآخوان المسلمون

4- وبعد كده القس فلوباتير بيقول" أن الأقباط المنضمين للأحزاب"الديكورية"مثل "حزب النور" وتلهث علشان تعمل تحالفات معها..الأتنين أتعودوا يكونوا ديكورات"....... تحسوا كده أن القس فلوباتير كلامة هندسي ومايل على فنون سئيلة
-تاني يا حضرة القس؟! تاني؟ بتشتم وتستهزء بناس أقباط علشان أنضموا لحزب إسلامي؟ الله يرحمك يا ديمقراطية .. فين الإحترام؟!
طيب لما أنتوا بتاندوا بدولة مدنية بمرجعية علمانية ليبرالية..ولسه ممسكتوش البلد وبتعاملوا "المخالفين" لرأيكم بالشكل ده..طيب يا ترى لو مسكتوا البلد..هتعملوا أيه فى اللى يخالفكم ؟!! (( من محمود داود إلى القس فلوباتير والأستاذ إبراهيم عيسى..نشكركم على حسن تعاونكم معنا وإظهار الوجه الحقيقي لكل من ينادي بالدولة المدنية بمرجعية علمانية أو ليبرالية )) .
وبعدين لما هما"احزاب ديكوريه" وأنضم ليهم" ناس ديكور" طيب شايل همهم ليه؟ خايف منهم ليه؟ معملتش زيهم ليه؟ مكلف نفسك وطالع تشتم فيهم ليه؟ يا حضرة القس دول شوية ديكورات لا راحت ولا جات....صحتك بالدنيا يا حضرة القس.

5- بيتسائل القس فلوباتير عن الأستاذ" رفيق حبيب" المستشار السياسي لحزب "الحرية والعدالة التابع للاخوان المسلمون" وبيقول علاقتة هتكون ماشية إزاى مع حزب الآخوان..وبيسأل((يعني أيه مرجعية دينية لحزب سياسي)) ونفسه حد يجاوبه..وكمان بيقول فى أحزاب دينية معروف إنها دينية وكانت بتحكم فى فرنسا مثل"الحزب الديمقراطي المسيحي" وصلحوا له وقالوا انها فى "ألمانيا" ..

وأقول: والله عفارم عليك يا حضرة القس أنك ضربت مثال بدولة دينية ولكنها متقدمة..وبغض النظر عن ديانتها إلا إنها دولة إسمها دولة دينية..وأنا أضرب لكم مثال برضة بـ"تركيا" ما شاء الله بتتقدم بسرعة الصاروخ بفضل الله ثم "رجب الآخواني" يبقي لما تعترضوا على إن الدولة يمسكها حزب ديني..ده إسمه " طخه بس متعورهوش يا أبوي" هبقى أشرحهلكم أول لما أعرف معناه إن شاء الله.
ومعاك بقى"محمود داود" محقق أحلام الشباب وهحققلك حلمك وهعرفك يعني أيه دولة مدنية بمرجعية إسلامية..

بمنتهي البساطة: هي دولة يحكمها شخص عادي جداً وليس له أى صفة دينية..وهذه الدولة لابد وان يكون لها مرجعية ومرجعيتها هى العقيدة الإسلامية بمعني إن هذه الدولة لا تُشرع قوانين تتنافى مع الشريعة الإسلامية..مثلاً"تقنين تصنيع الخمر والدعارة" يضايقك فى حاجة لما نمنعهم يا حضرة القس؟ مثلاً يتم تحريم"الربا" أعتقد أن الدولة مش هتحرم الربا وميكونش فى بديل ..ولا حضرتك نسيت يا حضرة القس النص اللى فى شريعتك فى سفر "التثنية" الذى يقول:
[ Dt:23:19 ]-[ لا تقرض اخاك بربا ربا فضة او ربا طعام او ربا شيء ما مما يقرض بربا. ]
[ Dt:23:20 ]-[ للاجنبي تقرض بربا ولكن لاخيك لا تقرض بربا لكي يباركك الرب الهك في كل ما تمتد اليه يدك في الارض التي انت داخل اليها لتمتلكها ]

النص يحرم الربا على القروض الداخلية بين الاخوة..ويبيح"الربا"مع الأجانب..بغض النظر عن هذه التفرقة إلا إنه حرم الربا داخلياً..وكذلك الدولة ذات المدنية ذات المرجعية الإسلامية هتحرم الربا داخل مصر لإن المفروض إن كلنا"أخوة"زى ما بتعتقد ولا عندك رأي تاني يا حضرة القس؟
أما موقف الدولة المدنية ذات المرجعية الإسلامية من القروض الخارجية..فأعتقد إننا دايماً "بناخد" مش بنعطي" جميل أوي..لما بقى الدولة ذات المرجعية الإسلامية دي ترجع لينا كرامتنا وتخلينا"منستلفش من دولة آخرى" وتخلينا نوقف على رجلينا ونعتمد على نفسنا..نقولها أنتي دولة وحشة؟ يبقى كده أمامك حالة من أثنين:
1- أما ان حضرتك عايز الربا داخل مصر وبهذا تخالف شريعتك.
2-أو إنك ستتجنب مخالفة شريعتك وتقول يوجد ربا على القروض الداخلية..ولكن ياريت متنساش إننا دايماً"بناخد وبنستلف" يعنى الربا هيضرنا إحنا..وبكده برضة يبقى حضرتك عايز الدولة تستلف طول عمرها ونفضل مديونيين.
وكمان!!! مينفعش نكره حد على طاعة وعبادة الله..لإن مش هينفع أغصب واحد إنه يصلي أو يصوم ومش هينفع أغصبه على أى عبادة يعملها..لان هناك سلطة الإرشاد و الوعظ بالحكمة والموعظة الحسنة وليس بالإكراه والأجبار.
لكن لازم يحترم تشريع هذه الدولة مثل التشريع فى الأمور القانونية والتجارية والجرائم والعقوبات..زي أي دولة لازم يكون فيها إجبار على إحترام التشريع والقانون .
**عارف..أنا والله عارف هتقولي طيب "الحدود" مالها الحدود ؟! مرعبة صح؟ بتخوف ؟ بتخلي الواحدق قلبه يدق "بوم بوم بوم" طيب متشكرين..وهو المطلوب أثباتة..
مهو لازم طبعاً يكون القانون رادع لكل المواطنين..ولا حضراتكم عايزين قانون"اطبطب وأدلع..يا يقولي انا أتغيرت معاه؟" وصدقوني لو فى واحد سرق" وأتقطعت أيده" والله الناس هتعيش فى أمن وأمان وكله هيفكر مليون مره قبل ما يسرق..وبعدين ليه محسسنا أن بلدنا كلها "شوية حرامية" على "شوية زواني" على "شوية خمورجية" وكلها خايفة من الحدود ؟
**أكيد حد هيقولي ..أووووه يا ربي .. ((تقطيع أيده؟!)) أوف عليك يا متوحش .. طيب وهو ليه حضرتك "رحيم ومتواضع ومتعاطف" مع "الحرامي المجرم" ولا تتعاطف مع" المواطن الغلبان المجني عليه"؟! أفرض الراجل ده سرق فلوس شخص مواطن غلبان بيجري على أكل عيشه ؟! نقول معلش منقطعش أيد الحرامي ونسجنه فقط؟!
طيب لما تسجنه وتمنع عنه نور ربنا لمدة (6) سنين مثلاً وتبعده عن أهله وعن أطفاله..أهون؟ ولا "تقطع أيده " ويكون عبره لمن يعتبر وفى وسط أهله وفى وسط الناس ويكون عايش علشان الناس يأخذوا العظة من اللي حصله؟!
وبالمناسبة"مش أى حد يسرق تقطع أيده" لابد من توافر عدة شروط لسنا بصدد ذكرها الآن .

6- يتعجب القس فلوباتير ويقول ((أنا بكلم الاقباط اللي دخلوا والاحزاب التي كانت ليبرالية وهى أحزاب تقيلة وتاريخية وتلهث الآن للتحالف مع الأحزاب الإسلامية))....يا صلاة الزين يا صلاة الزين..

أقول: أشكرك يا حضرة القس فلوباتير على حسن تعاونكم معنا..بإنك أظهرت إن "الأحزاب الليرالية التاريخية التقيلة " بتلهث الآن خلف الأحزاب الإسلامية ..ليه يا تري ؟ لإن "الأحزاب الليبرالية التاريخية التقيلة" لقت أن الإسلاميين أقرب للحكم والسلطة...قوم أيه بقى؟!! راحت الاحزاب الليرالبية التقيلة التاريخية تتخلى عن مبادئها فى سبيل إنهم ميطلعوش من المولد بلا حمص...
هكذا هي الليرالبية والعلمانية يا عزيزي ..لا ثوابت..لا مبادىء..لا إحترام..لا قيم ..لا أخلاق..أديني سُلطة وانا أحبك يا فناناس
طيب ولنفرض بقى إن "حزب ليبرالي وتاريخي وتقيل" مسك الحكم فى البلد...وتم تخييره إنه يخضع لتوجيهات الغرب أو يعلنوا الحرب الإعلامية عليه..يا ترى الحزب الليبرالي هيعمل أيه؟! هيدوس على المواطنين ويتخلي عن مبادئه- كالعادة- وأهم شىء الحكم.

7- تاني مرة كلاكيت..يقول القس فلوباتير((إن الأقباط اللى اشتركوا فى الأحزاب الإسلامية وجدوا إن الأحزاب الإسلامية هتوصل للحكم..فقالوا: أه بس التيار الديني هو اللى طالع ويلا نتشعلق فيه لإنهم ملحوش الحزب الوطني..وكمان علشان يعرفوا ياكلوا عيش))ويرد الأستاذ إبراهيم((تحليل يُنظر إليه بإهتمام))

بالله عليكم يا جماعة قولوا للأحزاب الإسلامية متدوسش"فرامل" أحسن الناس الأقباط السذج اللى متشعلقين دول يتشقلبوا على وشهم ويزحفوا على ودانهم .
أقول: ليه يا حضرة القس بتتعمد الإساءة لمواطنين أقباط من دينك لمجرد انهم خالفوك فى الرأي؟ وتحسس المشاهدين إنهم ناس ولا ليهم فى البطيخ وماشيين"على حسب الريح ما تودي الريح وياها انا ماشي ولا برجلي؟" ليه حضرتك تقول عليهم" متشعلقين" ولا كإنهم راكبين ميكروباص وخايفين يدفعوا الأجرة..يعني اللى يتفق معاك يا حضرة القس " هيتقعده جوا العربية" واللى ينضم للأحزاب الإسلامية هيبقى متشعلق؟!....... عمو عمو ممكن اخد لفة؟!
وكمان حضرتك بتقول " أن الأقباط اللى اشتركوا فى الأحزاب الإسلامية ملحقوش يشتركوا فى الحزب الوطني قالوا نشترك مع الأحزاب الإسلامية وخلاص؟" يا حِلاوة !!! من المعروف ان جملة"الحزب الوطني" بقت تهمة وشبهه وبتعطي معنى"الخيانة" فليه حضرتك بتحاول ترميهم بالخيانة؟! يعنى حضرتك عايز تقول إن الأقباط دول" فله من الفلول؟"..
وكمان "علشان ياكلوا عيش ينضموا للأحزاب الإسلامية؟" هو حد قال لحضرتك إن حزب النور فاتح "طابونة- فُرنة عيش"

والإستاذ إبراهيم يرد ويقوله(( تحليل ينظر إليه بإهتمام)).. أنا من رأيى يا أستاذ إبراهيم إنه "تحليل يُنظر إليه بالميكرسكوب فى عيادة تحاليل..علشان نشوف نسبة الديدان وهل المريض عنده بلهارسيا ولا أيه النظام.
يا أستاذ إبراهيم: هو اللى يرمي الناس بالباطل ويقول عليهم" سذج و ماشين حسب الريح وعايزين يتشعلقوا وياكلوا عيش" ده إسمه تحليل ينظر إليه؟! لا حول ولا قوة إلا بالله ... ثبت عقلي يارب.
نهاره مش فايت اللى يخالف رأي علماني أو ليبرالي .. يتهموه بالخيانة والسذاجة والحاجات لامؤخذة يعني الغريبة يعني شاذة .

8-وطبعاً لازم ينوب الأستاذ ((أحمد سميح)) من"التقطيع" جانب وقال (( إنه كان بيتحاور مع "قبطي" صعيدي عن التعديلات الدستورية..والقبطي قاله انه مع المادة الثانية من الدستور..ويرد "الأستاذ إبراهيم عسى" الشريعة الإسلامية هتضمن له تطبيق الشريعة المسيحية))... وربنا انا ما فاهم حاجة..هو أتوبيس كام بيودي على فين؟!

وكمان بيقول((في أقباط سلفيين)) ويرد الأستاذ إبراهيم عيسى((معظم الأقباط سلفيين)) ويعلق الأستاذ"أحمد سميح" (( لو الأقباط لابسين جلبيه بيضه كان أختلف الوضع )).......أهلاً بكم فى الفقرة الكوميديه فى قناة التحرير

-فمن الواضح أن لما القس فلوباتير قال كلمة"الأقباط" فأخذوها بالمعني الأصطلاحي وهو((الأقباط هم المسيحيين)) ولكن فى الواقع ان معني كلمة" أقباط" هو " مصري" فيوجد مسلم قبطي ويوجد نصراني قبطي..
- برضة لما نيجي نقول " سلفيين" هتبقى بالمعني الأصطلاحي والمراد به " المسلمين" فإزاي يعني هيكون فى" قبطي سلفي" بالمعني الأصطلاحي" مسيحي مسلم" ..انا كل اللى أعرفه عن النوع ده واحد كان بيغني وبيقول((انا عايش ومش عايش)) هو حضرتك اللى مألف الأغنية دى يا أستاذ سميح ؟!
- وبرضه الأستاذ"احمد سميح" بيقول(( لو الأقباط ويشير للقس فلوباتير لبسوا جلبيه بيضه كان أختلف الوضع))
يا سلام على الفكر العالي المتفتح الثقافية العالية..يعني لو القس فلوباتير لبس جلبيه بيضه وعلشان هو عنده"لحية" بقي سلفي..ولو لبس جلبيه السوده مع اللحيه"هيرجع تاني قس" طيب يا تري لو القس فلوباتير لبس جلبيه"خضره" هتقول عليه صوفي؟

يا نهار أبيض!!! معقولة هو ده مستواكم العلمي والثقافي؟! هو ده مستوى العلمانيين والليبراليين؟! كل فهمكم عن السلفيين إنهم " عندهم لحية وبيلبسوا جلبييه بيضه"؟ ! طيب لما أنتوا مش عارفين يعني أيه سلفية ولا عارفين مين هما السلفيين..بتتكلموا عنهم ليه؟!
ولا أقولك..أتكلموا براحتكم" الصراخ على قدر الألم !" وبصراحة أحنا محتاجين نضحك الايام دي شوية علشان القاعدة تبقى حلوة.

-9 وأختتم الأستاذ إبراهيم عيسى (( أكتشفنا أن الأقباط والليبراليين اللى انضموا للأحزاب الإسلامية إننا كنا فاكرين إنهم "مضحوك عليهم" وفى الآخر طلعوا"إنتهازيين" أو بين البنين )) ....عالم شريرين أوي أصحاب الأحزاب الإسلامية.

كلاكيت تاني مرة للاستاذ"إبراهيم عيسى" يغلط ويتهم الأقباط والليبراليين الذين إختاروا "بحريتهم" الإنضمام للأحزاب الإسلامية لإنها أكثر تنظيماً وإستقرار..وقال عليهم كان مضحوك عليهم أو انتهازيين..او بين البنينين... المهم انهم ناس بغلط وملهمش حق وخلاص..وسلم لى على النخبة يا إبراهيم باشا.

10 – ضحكنا شوية..تعالوا نتكلم جد بقى:
* هو حضرتك ليه يا أستاذ إبراهيم دايماً لابس قميص"بأستيك" رغم إنها موضه قديمة وعدى عليها وقت طويل؟!
هتقول دى حرية شخصية ؟ برضه اللى بيطلق لحيتة واللي بتلبس نقاب عندها حرية شخصية.
هتقول بتقلد اجدادك وأستاذتك فى الفكر اللى بتتبعه؟ نفس النظام السلفيين بيطلقوا لحيتهم بيقلدوا أستاذ البشرية ومُعلمهم سيدنا وسيدك محمد عليه الصلاة والسلام..فإن كانوا الذين يرتدون "القميص أبو أستك" أسلافك..فالرسول وصحابته والتابعين هم أسلافنا

* الحلقة دي أتعملت مخصوص لتفتيت الشعب المصري..الناس دي ضد الأستقرار..الناس دي ضد الوحدة الوطنية بين"المسلم والنصراني" كل الحلقة دي أتعملت علشان((الأقباط إنضموا لحزب إسلامي)) طيب وفيها أيه؟ أيه المشكلة؟ أنت المفروض تفرح إن في "حرية" وحصل إنصهار ودمج بين المسلمين والنصاري لدرجة إن بقى في حزب بيضم مسلمين وأقباط..لكن اللى يفرح هو اللى بيحب البلد وعايز الإستقرار .. واللى يزعل من كده..يبقى عايز سياسة"فرق تسد" وعايز يكون الأقباط متقوقعين ومتحزبين ولا ينصهروا ويندمجوا مع المسلمين...علشان تزيد الفتن والوقيعة بين المسلمين والنصارى..وألحقينا يا"طنط أمريكا" ويتم تقسيم مصر...تفتكروا دي تكون الثورة المضادة؟ ... اتركوا مصر تسير فى سلام يا من تدعون حب الوطن.

*الأستاذ أحمد سميح متضايق إن فى قبطي قال انا مع المادة الثانية من الدستور..طيب بالله عليك أنت مش مكسوف من نفسك لما نصراني يقول كده وأنت بتقول عكس كده؟! يعني النصراني عرف إن الشريعة الإسلامية هتحافظ عليه أنت متضايق من كده؟وأيه اللى يضايقك لما يكون المسلمين والنصارى عايشين فى بلد واحدة وبيراعوا شعور بعض وبيحترموا الدولة ودستورها اللى فيه المادة الثانية من الدستور...مش عاجبكم الإستقرار؟!

3 هذه هي العلمانية والليبرالية يا عزيزي(( لا مبادىء , لا أخلاق ولا قيم , لا إحترام لوجهات النظر المخالفة , الإستهزاء بالمخالف , النظر للمخالف على إنه جاهل وساذج , ضد الإستقرار و وحدة الوطن بين المسلمين والنصارى))
4 لما الناس دي لسه ممسكتش الحكم وبتعامل "المخالفين"بالشكل ده..طيب لك أن تتخيل إنهم لو وصلوا للحكم..إزاي هيعاملوا "المعارضين"؟!! سؤال ينتظر إجابة
وفى النهاية أتوجه بخالص الشكر للقس"فلوباتير" والأستاذ إبراهيم عيسى " والأستاذ أحمد سميح على حسن تعاونهم معنا وإظهار الوجه الحقيقي لليبرالية والعلمانية.

صحيح هو مين اللى هيحاسب على شوب الديموقراطية والعلمانية والمكسرات ليبرالية
اللى اندلق على نفوخهم دة </STRONG> :d