بوابة الثانوية العامة المصرية - انا نفسي اتعلم صح.............

بوابة الثانوية العامة المصرية (https://www.thanwya.com/vb/index.php)

- أرشيف المنتدى (https://www.thanwya.com/vb/forumdisplay.php?f=513)

- - انا نفسي اتعلم صح............. (https://www.thanwya.com/vb/showthread.php?t=344673)

انا نفسي اتعلم صح.............

بسم الله الرحمن الرحيم

دايماً لما تيجي تفتح التلفزيون
و تشوف حد بيتكلم علي التعليم في مصر
"ده نظام فاشل"
لو سألت طالب عن رأيه في نظام التعليم
"ده نظام فاشل"
حتي بعض المدرسين بيقولوا
"ده نظام فاشل"
و كذلك اغلب المرشحين للرئاسة عندهم برامج لتطوير التعليم لان
"ده نظام فاشل"
ولان
"ده نظام فاشل"
لازم هيكون لكل واحد دليل وسبب علي ان
"ده نظام فاشل"
وتصور لنظام تعليم جديد يطلع عالم من ثانوية عامة ....
ده مقتبس من كلام لبنت في كندا انهت الشهادة الابتدائية

اقتباس:

حفل تخرجى فى المرحلة الإبتدائية بكندا .
بسم الله الرحمن الرحيم
إنتهت السنة الدراسية على خير ،وفى نهاية العام الدراسى قامت إدارة المدرسة بعمل حفل تخرج للصف الخامس الإبتدائى .. والدراسة قبل الجامعية فى ولاية إونتاريو بكندا تنقسم إلى ثلاث مراحل الإبتدائى ,يبدأ من الصف الأول حتى الخامس ،والمتوسك ويبدأ من (الصف السادس حتى الثامن ) ،والثانوى ويبدأ من الصف التاسع حتى الثانى عشر. وفى نهاية كل مرحلة يعملوا حفلات تخرج للصف الخامس والثامن والثانى عشر .
وكانت المفاجئة السعيدة والسارة لى ولأسرتى أن تم إختيارى بإجماع مدرسين الصف الخامس الخمسة بأن أقوم مع زميل آخر بتقديم فقرات الحفل . وقالت لى مدرسة الرياضيات على هذا الخبر قبل الحفل بيومين ،ومصدقتش وكنت فرحانه فقالت لى كل المدرسين إختاروكى أنت وزميلك جوفان يا سلمى .وبدأت مدرسة اللغة الإنجليزية فى تدريبنا على الإلقاء وكيفية قراءة المكتوب لتقديم فقرات الحفل .وكان الورق مكتوب بترتيب الفقرات وبأسماء المدرسين وزملائى الذين سيكرمون كل حسب ترتيبه لكى لا يحدث خطأ .وأعطتنا نسخة من الورق معنا فى البيت لكى نتدرب عليها . ثم مرة أخرى فى المكتبة وبميكروفون كبروفة أخيرة قبل الحفلة
ثم جاء موعد الحفل وبدات مراسمه بدخولنا قاعة المسرح واحدا بعد الآخر .ثم المدرسين ،ثم ذهبت للمسرح وإتخذت مكانى مع زميلى وبدأنا بتقديم الفقرات . وكان ضمن فقرات الحفل . كلمات متفرقة لكل من مديرة المدرسة ،وعضو البرلمان الكندى عن المنطقة التى بها المدرسة ،ومدرسين الصف الخامس ، وإحدى زميلاتى بالفصل كنائبة عن التلاميذ
وكانت الكلمات كلها تتحدث عن تقرير وكشف حساب قدمته مديرة المدرسة لأولياء الأمور عن المقررات الدراسية الى درسناها هذا العام ،وعن الأنشطة الرياضية والحفلات والرحلات التى قمنا بها . ثم تحدث عضو البرلمان عن أهمية التعليم لمستقبلنا ومستقبل كندا ،وكيف نوظف التعليم فى خدمة المجتمع وإحتياجات الناس
ثم المدرسين ،تحدثوا عن دور الحلم ومحاولة تحقيقة لبناء الشخصية المجتهدة والقادرة على مواجهة التحديات فى المستقبل ، وضرورة الثقة بالنفس والتحلى بالشجاعة فى حياتنا . وعن عدم نسيان مدرستنا فى المستقبل
ثم بدأنا فى تقديم جوائز للمتفوقين فى كل المجالات –فى الرياضيات ،والعلوم والأنشطة واللغات ،ومساعدة الزملاء ،و جائزة منهم تعطى للمواطن الأول فى الفصل ،وهو أكثر الطلبة مساعدة لزملاءه وللمدرسين . ثم جوائز التفوق الدراسى للفصل كله . ثم حفلة فى المكتبة للتلاميذ واولياء الأمور
وقبل بداية الحفل جلس عضو البرلمان مع تلاميذ الصف الرابع على الأرض وسالهم عن ماذا درسوا هذا العام ،وإيه المشاكل اللى قابلتهم فى الدراسة ، وهل المدرسين كويسين ولا لا ؟ وهل بيفهموا منهم بسهولة ولا لا ؟ وسال بعض أولياء الأمور هل أنتم راضين عن المدرسة ومستواها ولا لا؟
وكانت الحفلة قبل نهاية العام الدراسى بإسبوع ،ومع ذلك ذهبنا إلى المدرسة حتى آخر يوم فى المدرسة ،لكن كنا بنلعب ،وبنساعد الأطفال اللى فى الحضانه . وفى اليوم قبل الآخير عملوا لنا زى حفلة امام تلاميذ المدرسة كلها مرة تانية واعطونا جوائز على كل الأنشطة والمهارات والتفوق
كان نصيبى منها كبير ،و أحسن جائزة لى كانت عبارة عن فيزا بمبلغ مالى من استاذى مدرس العلوم لأشترى بها كُتب وقصص من مكتبة خارجية . وذلك لأنى كنت أحسن تلميذة فى الفصل باتقدم فى الدراسة بسرعة ،وملتزمة وأساعد فى تجميل ونظافة الفصل .
وفى اليوم الأخير – وقفوا كل تلاميذ المدرسة والحضانة مع المدرسين والمديرة والعاملين بالمدرسة على جانبى طرقة الفصول ومررنا من بينهم وسلمنا عليهم واحد واحد ، سلام وداع للمدرسة على أنغام موسيقية
وعدد الشهادات التى حصلت عليها سبع شهادات . ما بين شهادات تفوق دراسى ورياضى وفنى .
- و والحمد لله درجاتى فى الشهادة الختامية للصف الخامس عبارة عن (إمتياز ) فى الرياضة والعلوم والفرنساوى والدراسات الإجتماعية ،و(جيد جدا) فى اللغة الإنجليزية .
وعن نظام حساب الدرجات بيكون على أكثر من حاجة . على الحضور والغياب والتأخير طول العام .. وعن المسئولية ،والنظام ، وعمل الواجب المدرسى فى المدرسة وفى البيت .والإعتماد على النفس .الإقدام والشجاعة ،وإتباع النظم والقواعد داخل المدرسة ، والإنتباه للدرس والتفاعل مع المدرس داخل الحصة الدراسية . ثم بعد ذلك درجات الإجابات فى الإختبارات والإمتحانات طول العام .
- والدراسة كانت تعتمد فى كثير منها وخاصة فى العلوم والدراسات الإجتماعية على البحث فى الإنترنت عن الموضوعات التى ندرسها .
.يعنى بإختصار كده علشان يقيموا التلميذ ويعطوه درجاته اللى يستحقها بيعصروه ويخلوه يتقدم غصب عنه فى كل الحاجات اللى قلتها قبل كده . وعلشان كده بيطلع فاهم وفاكر اللى درسه ،وعنده ثقة فى نفسه
ويقدر يعتمد على نفسه فى عمل أى بحث عن الموضوع اللى يطلبوه منه فى المدرسة على الإنترنت ،وتصبح بينه وبين الإنترنت صداقة ... كل ده ومعاهم كل الأنشطة الرياضية والترفيهية والحفلات طول السنة وفى كل مناسبة فيها إحتفال للمسلمين أو المسيحيين أو اعياد السنة الهندية أو الصينية ..
وعلى فكرة التعليم هنا مش صعب زى مصر ،فى مصر أكتر وأصعب ولا فى أبحاث ولا أى حاجة على الإنترنت ... أتمنى أن يتغير وضع التعليم والمدارس فى مصر بعد الثورة للأحسن ،ويكون زى كندا ..

فكرتك و فكرتي
مطلبه و شكوتها
نقدر نجمعهم في شكل نظام تعليمي كامل يناسب مصر
دلوقت
ايه هي السلبيات و المساويء في نظام التعليم الحالي؟؟
ايه هي الحاجات اللي تود انك تلغيها من نظام التعليم الحالي؟؟
ايه هي الحاجات اللي تود انك تدخلنا لنظام التعليم الحالي؟؟
ماهو تصورك العام لنظام التعليم في مصر؟؟

انتظر تفاعلكم.....

انا حقول ع حاجة بحسها ومش عارف في حد زيي ولا لأ .. أنا بحس ان المدرسين بيخلوني أذاكر عشان الامتحان.. بحس كأن التعليم ما لوش أي لازمة إلا الامتحان

اولا انت فكرتنى بطريقة دراستى لغاية المرحله الاعدادية كنت بدرس فمدرسة خاصة والمدير كانت حياته كلها ففرنسا يعنى الادارة عندنا كانت اجنبية شوية
لما اتخرجت منها وروحت للحكومى فمرحله الثانوي مش قادرة اقولك كنت كاره حياتى ازاى
من نظام تعليميى لادارة المدرسة للطلبة لكل حاجه
وحسيت بجد انى كنت عايشة فعالم وروحت لعالم تانى خالص

وفعلا اوحش حاجه فنظام التعليم بتاعنا اننا بنذاكر عشان الامتحانات وبس ومافيش اى ثقافة ولا اى حاجه
ودى مشكلة بجد وعشان كده احنا نظام تعليميى فاشل ماهو ايه لزمة اننا بنتعلم بقا

موضوع جميل يا احمد
تحياااااااااااتى

اقتباس:

المشاركة الأصلية كتبت بواسطة just l0rd (المشاركة 3722010)

فعلاً
و ده معناه ان التعليم فقد مغزاه بشكل كامل
بقيت بتعلم عشان منهج و امتحان مش عشان مادة علمية
و ده اغلبه لان المنهج مبقاش يتيج للطالم امكانية انه يفهم و لكتر الحشو اللي فيه
و شكراً لمرورك

اقتباس:

المشاركة الأصلية كتبت بواسطة nour eleman (المشاركة 3722086)

بصراحة يعنى انا اتكسفت من كلامـ البنت !!

المشكلة عندنا فـ الطلاب مش النظامـ ! لان النظامـ اتغير من كامـ سنة و بقى فيه ملف انجاز و ابحاث ع النت و مع ذلك عشان مايعطلوش وقتهمـ و خلاص بقى المذاكرة واكلة نفسها بيروحوا لسايبر عشان يعملهمـ النشاط سواء كان بحث او لوحة مثلا ..
مش كل حاجة تنفع في امريكا تنفع هنا في مصر و ده طبعاً تخلف من اللي فكر يطبق النظام ده في مصر
مايعرفوش اهمية الحاجات دى انها بتخليهمـ واخدين الدرس بشكل اوسع و فاهمينه من جميع جوانبه ..

نمسكـ الاسئلة اللى تحت ..

السلبيات ف التعليمـ دلوقتى :

ان فى مواد احنا بندرسها و ممكن يكون 75% من الطلاب بيذاكروها و هما مش فاهمين فيها حاجة !! زى مثلاً الفيزياء انا فاكرة ان فصلى تلاتة اربعه كان بيكره الفيزيا دى جداًً جداً لانها مادة فهمـ و هما اتعودوا يا عينى يحفظوا بسس و طبعاً دخلوا ادبى ..
لانها مادة فهم مش مستعدين لدراستها......ربما فعلاً لان المواد زي دي لازم يبدأ المدرسين في البداية انهم يعملوا جذب للطلاب ليهما بتناول بعض موضوعاتها الشيقة و الممتعة للدراسة عشان يحب الطالب دراستها و ميحسش بملل منها او تبقي تقيلة عليه ........طبعاً ده في مصر تييييييت للصبح
الطلاب دى المفروض لما يدروسوا الفيزيا يدرسوها من جميع جوانبها بحيث ناخد العملى معاها و نخلى المدرسين يحببوهمـ فيها

حاجة تانى ان فى مواد بندرسها من رأيى مالهاش لازمة زى مثلاً الاقتصاد مع الاحصا !! ايه اللى جاب الاقتصاد اللى هى مادة ادبية 100% مع الاحصا و دى بيدسوها اساساً بتوع علمى و كلها رياضة !
اكيد ..... ايه لزمة الرياضيات لادبي تانية ثانوي؟؟ ايه لزمة المادة الادبي؟؟؟ هيقولولي ثقافة؟؟؟ امال الانترنت ده ايه؟؟ احنا مش هنضحك علي نفسنا بكلمتين كده
و حاجة تالتة : شرح المدرسين .. بحيث انه لازمـ يبقى شرح وافى جداً عشان حتى نقضى ع الدروس الخصوصية .
الدروس الخصوصية نتيجة مش سبب و الاولي علاج السبب و هو المدرسة.....متي يكون راتب المدرس حاجة محترمة و كلية المدرسين كلية محترمة الدروس الخصوصية هتقل كتير و المدرسين هيشوفوا شغلهم بضمير
فى حاجات كانت ف دماغى تانية بس نستهمـ لما افترهمـ هاكتبهمـ ..

الحاجات اللى عايزة تتلغى :

أكيد الحاجات اللى فوق + حاجات تانية أولهمـ

يتلغى نظامـ الامتحانات اللى احنا بنمتحنه دلوقتى يعنى زى ما قالت البنت الدرجة بتتعمل على عمل الواجب و الانتباه ف الدرس و التفاعل ف الحصة و .. الخ و ف الاخر درجة الامتحان نفسه .. لان دا هايخلينا نروح المدرسة بالغصب و مع الشرح الكويس للمدرسين يمكن نقضى ع الدروس الخصوصية و لو بنسبة 50%
انا اختلف معاكي في دي.....مصر هنا صعب اني اقول اخلي درجة علي المدرس برضه لان دي مبتبقاش كويسة لان لسه في دروس خصوصية و المدرس ممكن يتحكم في الطالب و يفضل حد عن حد عشان الدروس و كده
فدي ممكن تتطبق في مراحل متقدمة مش دلوقت خالص
أما الحاجات اللى عايزاها تدخل ف التعليمـ :

انهمـ يهتموا بالاطفال أكتر حاجة يعنى المرحلة الابتدائية عشان الابداع بيبقى ف الطفل من و هوا صغير و لازمـ يكتشفوا ابداعاته .. انا فاكرة المس بتاعت الانجلش كانتف بريطانيا ف بتحكيلنا عن التعليمـ هناكـ فقالت انهمـ اكتر مرحلة بيهتموا بيها الطفل و بيخلوهيبدع و يكتشفوا ابداعه و يخلوا مجاله ف العمل لما يكبر هوا المجال دا
كان في واحد صاحبي اقترح فكرة اسمها بطاقة المواهب و دي بطاقة بيطلعوها للطالب من حضانة و كل سنة بيكتبوا مجال تميز الطالب و تعليق علي المجال ده و بتستمر معاه لغاية ما يخلص التعليم الثانوي
و بتساعدة في الكليات لما ييجي يقدم فيها يعني
اااه ايدى وجعتنى :d

تصورى للتعليمـ :

كلمتى المعتادة ( عادى !! ) :d

بجد موضوع جميل و بيطرح فكرة مهمة جداً جداً

و منتظرة آراء الاعضاء و أكيد آراء حضرتكـ :)

انا كان ليا تخيل كامل لنظام تعليم جديد في مصر
هبقي اعرضه بعد الناس ما تتكلم و هعرف الاراء
و بإذن الله نقدمه كبحث تعليمي و نناقشه مع سيادة الوزير املاً في تغيير اي شيء
شكراً لمرورك اسعدني يا نور الايمان

اقتباس:

المشاركة الأصلية كتبت بواسطة samar saad (المشاركة 3722137)

اولا انت فكرتنى بطريقة دراستى لغاية المرحله الاعدادية كنت بدرس فمدرسة خاصة والمدير كانت حياته كلها ففرنسا يعنى الادارة عندنا كانت اجنبية شوية
لما اتخرجت منها وروحت للحكومى فمرحله الثانوي مش قادرة اقولك كنت كاره حياتى ازاى
:d
من نظام تعليميى لادارة المدرسة للطلبة لكل حاجه
وحسيت بجد انى كنت عايشة فعالم وروحت لعالم تانى خالص

وفعلا اوحش حاجه فنظام التعليم بتاعنا اننا بنذاكر عشان الامتحانات وبس ومافيش اى ثقافة ولا اى حاجه
بالظبط ....بمعني ان التعليم فقد مغزاه باتجاهه للدراسة من اجل امتحان لا من اجل مادة علمية
ودى مشكلة بجد وعشان كده احنا نظام تعليميى فاشل ماهو ايه لزمة اننا بنتعلم بقا
يعني التعليم مش الوسيلة الوحيدة اللي يحقق بيها الانسان علمه حتي لو حابب يكون عالم....لكنه وسيلة !!
موضوع جميل يا احمد
تحياااااااااااتى

تحياتي ليكي يا سمر
و شكرأ لمرورك

اقتباس:

ايوة كده صح

اقتباس:

يا ريت حضرتك تكرمي وتعرضيه .. شكرا

اقتباس:

المشاركة الأصلية كتبت بواسطة the coder (المشاركة 3725815)

مش كل حاجة تنفع في امريكا تنفع هنا في مصر و ده طبعاً تخلف من اللي فكر يطبق النظام ده في مصر

برده مانستاهينش بقدرات المصريين .. ممكن مصر تطلع علماء أحسن من أمريكا آلاف المرات !

هو ممكن البرادعى يطبق الحاجات اللى شافها ف أميريكا و بكدا على ما أعتقد ممكن نكون استفدنا منه شوية :frown:

لانها مادة فهم مش مستعدين لدراستها......ربما فعلاً لان المواد زي دي لازم يبدأ المدرسين في البداية انهم يعملوا جذب للطلاب ليهما بتناول بعض موضوعاتها الشيقة و الممتعة للدراسة عشان يحب الطالب دراستها و ميحسش بملل منها او تبقي تقيلة عليه ........طبعاً ده في مصر تييييييت للصبح

:d:d:d
لا و الله احنا مدرسة الانجلش طبقت النظام دا بحيث انها خليتنا نحب اللغة نفسها مش المادة .. يعنى خليتنا نتكلمـ انجليزى كتير ف الحصة و مفيش كلامـ عربى خالص و عملتلنا مسرحيات بالنجلش و مثلناها و طريقتها عملت نجاح و قالتلنا انها اكتشفت مواهب ف الفصل كتير بحيث ان صحبتى بتعرف تمثل جداً ما شاء الله و واحدة تانية كانت بتعرف ترسمـ و رسمتلنا واجهة المسرحية و تالتة لبقة ف الكلامـ و انا كان علىّ الاخراج عشان تعرفوا انى موهوبة من صغرى :d:d:d
و بكدا خلتنا ماننساش الدرس ابداً و ف نفس الوقت اكتشفت مواهبنا كلنا .

اكيد ..... ايه لزمة الرياضيات لادبي تانية ثانوي؟؟ ايه لزمة المادة الادبي؟؟؟ هيقولولي ثقافة؟؟؟ امال الانترنت ده ايه؟؟ احنا مش هنضحك علي نفسنا بكلمتين كده

مش ثقافة .. انا بقول ان لازمة الرياضيات لأدبى انها فقط بتمنع مخ اللى داخلين ادبى من انهمـ يحصلهمـ جمود فكرى بحيث ان كل نظامهمـ هايبقى حفظ × حفظ و مفيش مادة تشغل المخ خالص !
انا بس عاملة على مصلحتهمـ ;)
أما موضوع الانترنت فـ مش كــل البيوت فـ مصر عندها نت .. فـ هما مش معتمدين عليه بسبب الموضوع دا .

الدروس الخصوصية نتيجة مش سبب و الاولي علاج السبب و هو المدرسة.....متي يكون راتب المدرس حاجة محترمة و كلية المدرسين كلية محترمة الدروس الخصوصية هتقل كتير و المدرسين هيشوفوا شغلهم بضمير

أكيد طبعاً .

انا اختلف معاكي في دي.....مصر هنا صعب اني اقول اخلي درجة علي المدرس برضه لان دي مبتبقاش كويسة لان لسه في دروس خصوصية و المدرس ممكن يتحكم في الطالب و يفضل حد عن حد عشان الدروس و كده
فدي ممكن تتطبق في مراحل متقدمة مش دلوقت خالص

ااه ما أنا كان قصدى انها تتعمل لما نكون خلاص بقى الدروس الخصوصية شيه اتلغت .

كان في واحد صاحبي اقترح فكرة اسمها بطاقة المواهب و دي بطاقة بيطلعوها للطالب من حضانة و كل سنة بيكتبوا مجال تميز الطالب و تعليق علي المجال ده و بتستمر معاه لغاية ما يخلص التعليم الثانوي
و بتساعدة في الكليات لما ييجي يقدم فيها يعني

مـــــا شاء الله اقتراح ممتاز بجد و ياريت يتطبق :)

الشكر لله .. موضوع حضرتكـ هوا اللى اسعدنى جداً بصراحة

بالتوفيق :)

اقتباس:

المشاركة الأصلية كتبت بواسطة just l0rd (المشاركة 3726043)

ايوة كده صح

يا ريت حضرتك تكرمي وتعرضيه .. شكرا

حاضر بإذن الله هعرضه في الموضوع بس قدام شوية لما احس بتفاعل يعني .........

اقتباس:

يعني مش عايز اتكلم عن البرادعي
و انا مش بستقل ابداً بقدرات المصريين
لاني عارف ان المضريين دول عقول واعدة
لان الشعب البسيط نفسه بيقدر يصرف امورة بطريقة مذهلة و بيبتكر افكار بسيطة بتسير حياته
بالاضافة ان العقول العالية فيها كتير لكن كانوا محبوسين الفترة اللي فاتت دي في نظام همه علي الفلوس و بس
و ربنا يوعدنا جميعاً يارب

اقتباس:

طيعاً مقدرش استبعد تطبيق النظام بشكل صحيح
لكن دي حالة من كام حالة حضرتك؟؟؟ اعتقد نسبة لا تذكر
لما يكون في مدرس بيشرب سجاير مع التلاميذ بتوعه في الفصل متظرة انه يعمل كده؟؟
مستحيل طبعاً

اقتباس:

حتي لو كده
متبقاش مضافة للمجموع
ازاي اضيف مادة مش تبع التحصص في المجموع؟؟
ازاي انا احاسب واحد داخل هندسة علي مادة الفلسفة ولا علم النفس؟؟
في اسئلة منطقية ملهاش اجابة لكن موجودة
و ده بقي اللي مضايقني بصراحة
و نظل في دوامة النظام السابق
مشكلنتا اننا مش قادرين نكسر الجمود الفكري بتاعنا
مش قادرين نفكر بشكل جديد
اتحبسنا في نطاق النمطية و الروتين
اتمني فعلاً اننا نشوف التغيير قريب
و شكراً لعودتك للموضوع :d

اقتباس:

حاضر بإذن الله هعرضه في الموضوع بس قدام شوية لما احس بتفاعل يعني .........

ان شاء الله