|
الدروس الخصوصية والمدرسين المفتريين
انا سمعت تعليقات هنا من ناس كتير ان المدرسين بيدوا دروس بالاف الجنيهات وفى الصحافة والبرامج حتى فى الافلام والمسلسلات طيب انا اسف لو هطول عليكم شوية وهنشوف موضوع الدروس ده اللى المدرسين المفتريين مش مكفايهم وعاوزين فلوس زيادة
اولا كلامى على محافظات الاقاليم سواء بحرى او قبلى لانى بصراحه ماعرفش الوضع فى القاهرة وماعتقدش برضه ان هو بيختلف كتير كل محافظات بحرى وقبلى بتنقسم لمدن وقرى اولا : المدن :- نسبة المدرسين اللى بتتكلموا عليهم وبياخدوا الاف الجنيهات مابتعدوش على اصابع اليد وبيبقوا معروفين بالاسم الاهالى والمعلمين عارفينهم و90 % من معلمين المدن اللى بيدوا دروس بيروحوا البيوت ولو مش عارفين يعنى ايه تروح بيت هقولك يعنى تلف على رجلك طول النهار , يعنى تقف قدام الباب مستنى يفتحولك , ممكن تلاقيهم بيتغدوا ولا بيسحموا الواد واستناه بقه لما يجيلك , يعنى ولى الامر يديك الفلوس وهو بيقولك حار ونار فى جسمك , يعنى ولى الامر قاعد بيسمع بتشرح ازاى للولد ولو ماشرحتش بالطريقه اللى على مزاجه يدخل ويدى نصائحه العبقرية اللى غايبه عنك ولازم تستقبلها بابتسامه كبيره ولو اخرت عشر دقايق يحسسك ان البيت فيه اجتماعات لرئاسة الوزراء ولازم تظبط مواعيدك, ولو الولد نقص درجه فى امتحان الشهر يبقى العيب من المدرس الفاشل علشان ابنهم زى الفل , وبخلاف ان الولد عارف انك جاى بفلوسهم وشوف بقى بيعمل ايه . طيب وعائد الدروس دى نحسبها بسرعه مع بعض /المدرس بيرجع من شغله 2.5 او 3 عصرا والدرس بياخد ساعه وطبعا زى ماحنا عارفين معظم المدرسين بيتنقلوا موتورجل او بعجلة ( دراجه ) او بموتوسكل ( دراجة بخارية ) واللى ربنا كرمة اوى بعربيه بتكح تراب بتقعد عند الميكانيكى اكتر مابتقعد تحت بيتهم يعنى المشوار من درس لدرس بياخد من ربع لنصف ساعه يعنى مدرس البيوت يوم مايقول انا اديت ويرجع بيته 12 بالليل بيدى خمس او ست دروس وفى محافظات الاقاليم الحساب بالشهر مش بالساعه يعنى اجمالى متوسط الشهر من 300 الى 700 جنيه واليمموت نفسه 1000 جنيه بعد ذل وقرف ومرمته فى عز الحر وفى المطرة وفى التراب ثانيا مدرس الارياف : فى الارياف قليل اللى بيدى فى بيوت انما الاولاد بيروحلهم البيت وطبعا هتقولوا ده عايش بقه بس ماتعرفوش ان الطالب بيدفع من 5 جنيه الى 10 جنيه وربع الطلبه ببلاش علشان قرايبه وبهدله لبيته وازعاج وبخلاف عيون الناس حواليه اللى مسكاه حسد وهو برضه متوسط داخله مايعديش 500 جنيه هى دى الدروس متوسطها 500 جنيه بخلاف الاهانة والمرمته ولف الشوارع ولا مندوبين المبيعات والمدرس يطلع من بيته 7 صباحا يروح 12 بالليل ومرتبه بدروسه بيخلصوا مايكملوش نص الشهر ياريت بقه لو واحد قابل مهندس ولا دكتور ولا اى حد بيعلق على الدروس يطلب منه طلب نبدل الاماكن وهناخد نص مرتبه ويدرس هو ويدى دروس ويورينى هيعمل ايه اسف على الاطاله مرة تانيه بس كان لازم اوضح موضوع الدروس اللى بقه لبانه على لسان كل الناس ولو فيه حد عنده تعديل او شايفنى قولت حاجه غير اللى بيحصل يتفضل يقول |
بارك الله فيك
|
الله ينور عليك نقلت الواقع كما هو
|
نسيت ان فيه مدرسين لا بيروحوا بيوت ولا الطلاب بياخدوا دروس عندهم فى بيوتهم .. عايشين على مرتبهم فقط .. أى والله على مرتبهم فقط ..
|
اقتباس:
كلنا عارفين ان فيه كتير مش بيدوا دروس بس انا هنا بتكلم على الدروس وقد ايه فيها قرف ومعظم المعلمين بيتمنوا مرتب عادل ويسيبوا الدروس وقرفها واهانتها لان كل الناس فاكره ان المدرس اللى بيدى دروس بيدها فى التكييف فى فيلته والطلاب قدام الباب طوابيرو فى الشهراقل مدرس بياخد منها الاف الجنيهات |
الله يخرب بيت الدروس
والله العظيم انا نفسى وأمنية حياتى انىىأقضى الشهر مستور |
صدقت
انا لا اعطى دروس وابنائى بياخدوا ب500جنية دروس فى الشهر |
اقتباس:
مين الي قالك ان المدرس في الارياف ميعديش ال 500 جنيه؟؟؟؟ احنا عندنا اقل مدرس بياخد 50 الف في الشهر وده كمان احنا الي بنروحله البيت انما لو هو الي بيروح البيت للطالب بياخد حوالي 400 جنيه في الشهر (ده من طالب واحد) او 5000 للسنة كلها يندفعوا في اول السنة عندنا المجموعة الخاصة بيكون فيها بالكتير 8 وكل طالب ب 100 ودي مجموعة واحده ما بالك بقي المجموعات الخاصة والعامة؟؟؟؟ لا بصراحه مدرس الثانوي الي ليه سمعه كويسة ومشهور جدا بياخد مرتب يساوي مرتبات 20 دكتور الكلام الي بتقوله ده مش واقعي خالص مع احترامي لحضرتك |
اقتباس:
والله المدرسين مش متبهدلين ولا حاجة ده كل مدرس عنده ييجي 4 سكرتيرات وهو عليه يشرح وبس واحنا الي بنروحله لحد عنده يعني احنا الي كرامتنا مهدرة مش هو |
لطالبة الثانوى Єlkatkota Єmy
كم مدرس عنده الكلام ده هل كل المدرسين اللى عندك فى المدرسه عندهم الكلام ده طبعا لا اقوللك انتى بتاخدى عند المدرس المشهو ر فى المدينه عندك وهما بالكتير 3 فى كل ماده والباقين بيلفو على المجموعات ودايخين السبع دوخات مع انهم ممكن يكونو اشطر من المشهورين ولكنها ارزاق |
للطالبة ايمى لو بنت داخله ثانوية عامه وسألتك تاخدى عند مين وانتى واقفه هتقوليلها على اسماء مدرسين معينين وهو ده قصدى انهم موجودين بس يتعدوا على الصوابع وانتى نفسك هتلاقى فى قرايبك كتير جدا مدرسين لان مافيش عائلة تقريبا مافيهاش مدرسين ياترى بيدوا دروس بكام
بصى اللى بتتكلمى عليهم عدد محدود وهما دول اللى الكل ماسك فيهم وبيقول الدروس بالاف انما انا بتكلم على غالبيه المدرسين |
الله ينور عليك نقلت الواقع كما هو
|
كلام مش صحيح انا اعيش في احدي المدن في ريف الغربيه المدرس اللي تعبان دخله لا يقل عن 3 الاف جنيه الدرس في المجموعه العاديه ب25 جنيه المجموعه فيها 20 الي 30 طالب يعني المجموعه بتعمل 800 جنيه في اربع او ثلاث مجموعات غير المخصوص هذا للمدرس التعبان ام الاسماء المعروفه انا اعرف مدرس اصغر مني بثلاث سنين ودخله الشهري عشرين الف جنيه ام المدرس في المواد الغير اساسيه ممكن يعمل الف بسهوله هذا في ريف احدي محافظات الوجه البحري
|
ياجماعه انا مش عايش فى الريف بس شغال فى الريف زى كتير بيسافروا وبيدفعوا نص مرتباتهم مواصلات وشايف زملائى اللى من الريف بيدوا دروس ازاى وتانى حاجه انا مدرس ابتدائى وشكرا على التوضيح منكم
|
اقتباس:
نحسبها سوا طالب بيدفع 5000 جنيه لكل مادة فى السنة يبقى لو معاه 5 مواد يكلف اهله فى سنة واحده 25000 جنيه ياترى ابوه بيدخله كام عشان يصرف دروس على عيل واحد 25000 جنيه وفين حق باقى اخواته ومصاريف اكل وشرب ولبس وعلاج وووووووووووووووو انتى بتتكلمى على طبقة متوسطة انقرضت فى مصر بعد الأزمة المالية وانهيار البورصة المصريية اللى يكلف على دروس ابنه فى سنة واحده 25000 جنيه يعنى يكلفه فى سنتين 50000 جنيه ولسه عيل فى ثانوى بياخد مصروفه ياترى انهى موظف اللى يقدر يصرف على ابنه كده بيدخله كام فى السنة ؟ |
| جميع الأوقات بتوقيت GMT +2. الساعة الآن 10:40 PM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.