خايف يجئ اليوم واكرهك يا مصر
 

انا معلم مصرى مسيحى مطحون ومتبهدل وبلف النهار كله بالدراجة على البيوت زى بتاع اللبن ودخلى من الدروس حوالى 1000 الف جنيه ولما قامت الثورة فرحت جدا وقولت لازم نغير ونتغير للافضل ونجيب مسئولين محترمين مستقلين بيحبوا مصر والمصريين ولما مراتى سالتنى الثورة حلوة ولا وحشة قولتلها حلوة بس بشرط يبعد عنها هواة السلطة والسيطرة ولكن بعد ما نجحوا الاخوان باغلبية فى انتخابات نقابة الصيادلة وبعدين انتخابات نقابة المعلمين واول قرار ياخدوه يكون فى صالح بقائهم وضد مصلحة المعلم الغلبان ويعملوا فيها وطنيين زى ما كان الحزب الوطنى بيعمل صدقونى لو انتخابات الشعب والشورى هتجيب الاخوان برده بنفس سياستهم فانا اتمنى انى اعيش فى اى بلد تانى غير البلد اللى حكامها بيحبوا نفسهم مش شعبهم اللى اختارهم

انت عندك حق انك تخاف .. بس امتى تخاف لما الاخوان يمسكوا في الكرسي .. اي كرسي وميردوش يسبوه
ساعتها فقط نتأكد انهم بقوا حزب وطنى .. ولان مش لازم اي حزب في الدولة يكون مكتس في كل المجالات لضمان العطاء
وادينا معاك انشوف الاخوان هيعملوا ايه وخلينا نفرض النية الحسنة معاهم الاول .. وخصوصا انهم هيحولوا يقدموا خدمات علشان يثبتوا انهم الاجدر والانفع للناس .. ودع الايام تتحدث
وتقبل مروري

طايب وايه رايك فى تصريحهم عن الاضراب

لا إكره براحتك
لان تقريباً الكل ساخط
وناقم

حقك والله ...... اذا كان احنا المسلمين وخايفين منهم
بس عايزة اقول لحضرتك حاجة انت مش لوحدك ولا تفكر ان انت مسيحى ومحدش هيبقى معاك ... المصريين الحقيقييين لما بيساعدوا بعض مش بيسأل الاول انت دينك ايه ولا ملتك ايه ....... اقسم بالله انا مدرستى المدرسين المسيحيين اللى فيها هما اللى بيراعوا ضميرهم فى الشغل وبيشتغلوا بما يرضى الله ومحبوبين جدا من كل اللى فى المدرسة ....... لتانى مرة حضرتك لو الاخوان عكوا الدنيا معاكوا اوعوا تقولوا انكوا هتسيبوا البلد دى بلدكم زى ما هى بلدنا بالظبط ولو انتوا حبيتوا تسيبوها احنا مش هنسيبكم ابدا .... وهنقف معاكم ضدهم

بااااااااااااااااااااااااااااس خلاص سفيان هيكلم –من الاخر-
اللي خايف يروح ماذا تنتظرون البنوك اعلنت رفضها تطبيق الحد الاقصى اللي هوه 000-25جنيه الاطباء عملوا الاضراب ونجح ووزيرهم عبرهم سوزان هانم بتحضر لمهرجان –البراءه للجميع –واحنا فضحنا الوزير ومساعديه –ولاد السهتانه –وبيسيحوا ان احنا بناخد اعلى حوافزفي مصر المنهوبه – على العموم انا بقى صعيدي ودماغي جزمه قديمه وهضرب حتى لو هضرب – اخر نصيحه للمدرسين اشرب بيريل الرجوله مش بالساهل

عليه النعمة إنته راجل لذيذ

أنا مش معاك فى دى !!
 

بعد اذنك أنا مش موافق على كلمة (معلم مصرى مسيحى ) أو (معلم مصرى مسلم )

أنا كنت طالب فى جامعة عين شمس و كان هناك دكتورة راهبة و دكتور مسلم متدين , هما الاثنين دول اللى كان ليهم طبع خاص ( تواضع و جنتله فى المعاملة مع الطلاب و استحالة انهم يلغوا محاضرة ) و كان فيه دكتره مسيحيين و مسلمين غيرهم وكانوا على العكس تماما . أنا عايز أقول ان :

المصرى المتدين بيظهر على سلوكه سواء كان مسيحى أو مسلم :
ربنا سبحانه و تعالى يمدح الفئة الأمينة و يوضح أيضا ان هناك فئة غير أمينة فى أهل الكتاب ( نصارى أو يهود ) :

وَمِنْ أَهْلِ الْكِتَابِ مَنْ إِن تَأْمَنْهُ بِقِنطَارٍ يُؤَدِّهِ إِلَيْكَ وَمِنْهُم مَّنْ إِن تَأْمَنْهُ بِدِينَارٍ لاَّ يُؤَدِّهِ إِلَيْكَ إِلاَّ مَا دُمْتَ عَلَيْهِ قَآئِماً ذَلِكَ بِأَنَّهُمْ قَالُواْ لَيْسَ عَلَيْنَا فِي الأُمِّيِّينَ سَبِيلٌ وَيَقُولُونَ عَلَى اللّهِ الْكَذِبَ وَهُمْ يَعْلَمُونَ [آل عمران : 75]

لا تنسى أن هناك تاريخ عظيم يحمله الاخوان للمسيحيين و أنهم يلتقون جنبا الى جنب فى أهداف كثيرة من أجل
مصلحة البلاد ومن أجل الشعب المصرى كله

شكرا لكل واحد رد عليا وصبرنى على الهم اللى انا فيه