سمع هس...سكت المعلمون
 

اولا وقبل كل شيء افهموا اني لا أريد اهانة اي معلم لأني ببساطة....معلم
ثانيا : حد يقدر ينكر ان الاضراب بصورته دي جعلت المعلم في مواجهة الجتمع ككل؟ ولو استمر ستزيد المواجهة
ثم حد يقدر ينكر ان الغالبية العظمى من المعلمين بدءوا بالفعل اعطاء دروس خصوصية رغم مشاركتهم في الاضراب...لا ده كمان بيطلع فصله ياخد اسماء الاولاد بتوع الدرس ولو طالب سأله :طيب ناخد جدول المدرسة يااستاذ يقوله جدول ايه يابني احنا في اضراب
حد يفهمني يا جماعة بالله عليكم - بس يفهمني بالراحة - هتعرف تقف قدام ربنا يوم القيامة تتثنى وتنفرد بكلامك عن حقوق المعلم وكرامته لو سألك : ابن الغلابة اللي في فصلك معلمتوش ليه؟....طيب اللي اخذ درس قادر يدفع ومعاه يقبضك طيب الفقير اللي ممعهوش يعمل ايه؟....هو عشان ممعهوش مايلزموش؟!!!!
انا شاركت مع مدرستي في اضراب أول يوم ثم اشتغلنا عادي بعد كده...و منا اتنين تلاتة كملوا الاضراب و هم والله مظبطين الدروس الخصوصية...تفتكروا هل ده سلوك محترم؟
انا قلت لزملائي ممكن نكمل الاضراب لاخر السنة لو عاوزين بس بشرط: نشتغل مجموعات مدرسية بعد المواعيد الرسمية مجانا...طبعا قالوا لا بلاها اضراب
طيب بالله عليكم مش كدة نبقى واقعين ف المحظور...تعالوا نشتغل مجموعات مجانية وانا معاكم في الاضراب لاخر السنة
ندرس لـ اللي ممعاهوش....مش نمشي بمبدأ اللي ممعاهوش ميلزموش...بتاع العوالم ولا مؤاخذة

جزاك الله خيرا .... المطالبة بالحقوق مشروعة ونسأل الله أن يوفقنا لنصرة ديننا ووطننا في هذا الوقت
وأن يوفق الحكومة لتلبية مطالب الشعب

ايه ده ياعم مديح؟؟؟انت ذوق جدا ومؤدب خالص...انا خايف عليك من ردود اخوانا اياهم لأنهم مايطيقوش حد يرد باحترام ولا يقول كلمة الحق...ياريت كلهم زيك

احسن كلام سمعتة من ساعة فتنة الاضراب . اكثر الله من امثالك

تصدق بالله يابو يوسف ..انا فرحان ان فيه ناس بتفهم زيك بدءوا يظهروا في المنتدى ده

أولاً: إيه العنوان ده عوالم مين اللي بتتكلم؟؟
ثانياً: المعلم المضرب عامل إضراب عشان مرتبه مش مكفيه .. عايز يبطل دروس ويكتفي بمرتبه فقط يبقي يبطل دروس إزاي الأول؟؟؟ وياكل منين يا عالم ياللي بتفهم؟؟ خلي مرتبه محترم الأول وبعدين حاسبه ... مش تحاسبه الأول وبعدين ترفع مرتبه.
أبسطهااااااااااااااااالك: الناس تتوضي الأول وبعدين تصلي، مش تصلي وبعدين تتوضي. المرتب المحترم للمعلم هو وضوءه ، وتجريم الدروس هي صلاته.

حقك....هو انا اتكلمت في ده؟؟؟
انا مختلف في الطريقة والتوقيت...يعني لو الحكومة قالت جدول زمني لتحقيق المطالب ماشي...مش لازم كله على رأس الميت...طيب انت مش معايا انه مهما كان مينفعش الحكاية تيجي على راس العيال التلامذة؟؟
الطريقة غلط ياخوانا ...الهدف كويس والغاية نبيلة لكن لا تبرر الوسيلة

يا مدام جيجي...الدروس لا هي عيب ولا حرام مادام الواحد بيعمل اللي عليه في الفصل...العيب اننا نحرم الفصل من الشرح عشان نوفر تعبنا للدروس
ولا انتي مش معايا؟

لأ عفواً إسمحلي ...
أولا: هذا أنسب وقت للإضراب ... لماذا ؟ أشرحلك: نحن الآن في بداية الدراسة والمعلمين مضربين والوزير ومستشاريه يكذبون ويسفهووووووون في وسائل الإعلام هؤلاء المعلمين ولم يستجيبوا إلا مرغمين. فما تخيلك لو أن هذا الإضراب تم في إجازة الصيف؟؟ من كان سيلتفت لهم؟؟؟ لاااااااااا أحد. مع العلم أن المعلمين أنذروا الوزير والرأي العام قبلها بشهر أو أكثر ولكنهم استخفوا بهم ... أليس كذلك؟؟؟ لم يكن الإضراب مفاجئاً. الكره في ملعب رئيس الوزراء والتأخير عنده ولا يتحمل المعلمون أي توابع له. إقالة الوزير الكذاب تتم بمكالمة تلفون وإمضاء بالقلم تتم في عشرة ثواني علي الأكثر ... ولكن المجلس العسكري و عصام شرف ووزيره يراهنون علي آخر ثانية ونحن لها إن شاء الله. نحن في بداية العام وتعويض الطلاب مازال سهلاً الآن. ولكن لو كان المعلمون قد أجلوا إضربهم لوقت الإمتحانات مثلاً فتخيل حجم الكارثة. تخيل كم من الإمتحانات سيعاد طبعها وتخيل إحباط الطالب المذاكر وتخيل كم سيصرف ولي الأمر لأباطرة الدروس الخصوصية في إعادة المراجعات ( علي فكره: هؤلاء الأباطرة لايحتاجوا المرتب ولا يشاركوا في الإضرابات لأن وقتهم لا يسمح ).
إذن لا الإضراب في الإجازه مؤثر والإضراب وقت الإمتحانات كارثة. وهذا هو الوقت الوحيد المناسب للإضراب وهذا توفيق من الله عز وجل.
ثانياً: التلامذة من الممكن تعويضهم لو استجاب رئيس الوزراء مبكراً أذكرك أن العام الماضي تأجلت الدراسة إسبوعين وتم تعويض التلامذة. الكره الآن في ملعب عصام شرف والذي أظن أنه لن يستمر هو أيضاً في مكانه طويلاً.

سيدى الفاضل
أولا : محدش يقدر يشغل حد غصب عنه عشان المجتمع يبقى ضدنا
ثانياً : معتقدش اننا عملنا حاجة تغض ربنا ومش عاوزين ندخل من ناحية الدين لأن ربنا مش بيحب الظلم ولا الساكت على الظلم
ثالثا: بالنسبة للتوقيت احنا وقفنا فى رمضان فى الصيام فى الحر محدش عبرنا وكأن الناس دى مش آدميين
اكتر من مرة قبل الدراسة ومحدش عبرنا
نعمل ايه اكتر من كده نسكت على حقنا وخلاص
اشمعنا دلوقتى الرأى العام وأولياء الأمور والحكومة قامت على رجل واعتبرتها ازمة واحنا سبب المشكلة
كانوا فين من أول وقفة وشافو المطالب وكانت امامهم الوقت الكافى
اخى العزيز : انت لو فكرت شوية هتلاقى زمايلك المعلمين مغلطوش ولو أنهينا الاضراب هيتقاعسوا عن وجود حل ومش هيتخذوا قرار فى أى حاجة وانت عارف الكلام بتاعهم
ثم الدراسة بقلها سنتين مش منتظمة ومحدش من الطلبة كانت بتروح
اشمعنى الداخلية بعد الثورة على طول اخذوا حقهم وكمان بيتحايلوا عليها عشان يشتغلو
بالله عليك الأمن ولا التعليم تعيش آمن الأول وبعدين تتعلم صح ولا ايه
وغيرهم كتير
احنا المعلمين كانت آخر فئة تعمل اضراب بعد لما شوفنا ان مرتباتنا اقل مرتب فى الدولة
فكر فى الكلام كويس وبلاش لغة الرأى العام اللى قبل الثورة يأثر عليك زى خطاب مبارك
وشكرا

المعلمون المضربون فى معاناة يومية وخصوصا فى الابتدائى لانهم اكثر فئة لصيقة بالمجتمع واولياء الامور
واكيد الذين يتكلمون لاما يكونوا مدرسين ثانوى والطلبة لاتذهب الى المدرسة لاما يكونوا اضراب جزئى ولم تدخل فى صراع مع المجتمع
المجتمع اصبح يلعننا ليل نهار
ويوميا ندخل فى مهاترات طويلة بسبب الاضراب مع المجتمع
ويكاد يخرجونا من الدين والملة والوطنية والانسانية بسبب اضرابنا
مينفعش نغمض عينينا عن المجتمع

يا اخواني بالله عليكم كفاية اضراب