الغلط فى مين؟
 

دايما بحاول ابعد فكرة الياس عنى وكمان برجع اى غلط ليه ومابحاولش اغلط غير نفسى وبس وبقول ان الغلط مش فى الناس ولا فى الزمن لكن الغلط فيا انا حاولت كتير افضل كده لما حاليا تعبت من الناس اللى حوالينا بجد وفقدت المصداقية فى كل الناس وحسيت انى بظلم نفسى بزيادة انا كان عندى احلام كتير نفسى احققها وكان عندى فكرة جميله عن البشر وكل ده بيتمحى مع الوقت يعنى انا المفروض انى عايزة اكون دكتورة زمان كنت عايزة ابقى دكتورة عشان ابقى جراحة ويمكن احلامى كانت بتوصلنى انى ممكن احاول واقضى حياتى علم عشان اكون عميدة للكلية وبعدين وزيرة عشان اقدر اعمل انجازات واغير نظام التعليم وابقى عملت حاجة فى حياتى وكمان كنت فاهمة البشر قلوبهم مليانة مودة وتسامح لكن فقت على الحاجات دى

هكون دكتورة مش هعمل حاجة غير انى ازود عدد الدكاترة الكبير ده واحد ولو حاربت وتعبت طول حياتى مش هوصل لحاجة لان الناس بعمى قلوبها بقت تمنع اى حد يساعدها وكل الناس شايفين نفسهم صح وبصراحة فى التاريخ المصرى اى عالم او اى حد حب يعمل ابحاث ماقدرش يكمل وينفع بلده وكمان فقت على اننا من دول العالم التالت وان مصر الكيان الكبير اللى كان فى دماغى بقت دولة ضعيفة وان ناسها اللى كنت فاكراهم احسن ناس بيتصارعوا وكل حد بيدور على مصلحته بعد كل ده حاليا حتى لوربنا كرمنى ودخلت الطب مش هفرح ولاهزعل بس عشان افرح ماما وبابا لكن انا نفسى محبطة

عشان كده عايزة اسال العيب فى مين؟
فينا؟
فى غيرنا؟
فى الزمن؟
فى حكامنا؟
فى العالم العربى؟

طب وايه الحل؟

الغلط فى كل واحد فينا

بس كلمة بسيطة

اليأس عمره ما كان حل

"الأمل هو المشحع الأول الذي يدفعنا إلى الأمام ,فهو الذي يردد في أسماعنا دائما الخير في الغد"

بصى يا سارة انتى عندك حق فى كل الكلام اللى قولتيه ده العيب مش فيكى ولا حاجة العيب فى المجتمع اللى احنا عايشين فيه اللى كل واحد فيه بيقى عايز يمشى جنب الحيطة وميعملش اى انجاز فى حياته العيب فى المجتمع اللى كل واحد فيه بقى منافق وبيدور على مصلحته حتى لو كان فى طريقه هيأذى حد تانى العيب فى المجتمع اللى الفساد والتخلف والركود انتشر فيه وبقى عامل زى الوباء اللى ملوش علاج
انا كان عندى احلام كتير جدا بس شوية شوية بدأت تروح وتختفى منى بس اللى مصبرنى ان طول ما احنا بنؤمن بربنا وواثقين فى رحمته اكيد هيبقى فيه أمل

عندك حق وشكرا على مرورك

كلامك صح بس نفسى الايمان ده يكون فى قلوب كل الناس

سأل سليمان عليه السلام نملة :

كم تأكلين في السنة؟؟؟؟

فأجابت النملة : ثلاث حبات
...
فأخذها ووضعها في علبة .. ووضع معها ثلاث حبات

ومرت السنة ..... ونظر سيدنا سليمان فوجدها قد أكلت حبة ونصف

فقال لها : كيف ذلك

قالت : عندما كنت حرّة طليقة كنت أعلم أن الله تعالى لن ينساني يوماً .. لكن بعد أن وضعتني في العلبة خشيت أن تنساني

فوفرت من أكلي للعام القادم

( ومامن دابة في الأرض ولا في السماء إلا على الله رزقها )

يا سبحان الله أضعف المخلوقات .. أصدقنا حسن ظن بالله

الحل
عليكم أنفسكم لا نيأس ولانقنط وان نعمل ونحرص على الطاعة والكتاب والسنة والثبات على الحق وحسن الخلق وووووو.....ومننساش ان الدنيا قصيييييييييرة ودار بلااااء ومحن
والدعااااااء وزى ما قولتى قبل كده نغير من أنفسنا ومنيأسش من محاولة تغيير اللى حوالينا حتى لوكانت امكانياتنا بسيطه بكده فيه حل وسيطل الفجر قريبا وكمان توقيعى فيه حل
ربنا يوفقنا ويهدينا ويشف صدورنا ويصلح حال أمتنا
امين

الآية خطأ أختي

( وما من دابةً في الأرض إلا على اللهِ رزقُها ويعلمُ مستقرها ومستودعها گلٌ في گتابٍ مبين )


وچزيتِ خيراً =)

بصي يادكتورة سارة الكلام اللي انتي قولتيه ده مااقدرش اقولك انه مش حقيقي المشكلة ان واحنا صغيرين كنا فاكرين الحياة جميلة والناس طيبين والمصرين دول اجدع ناس ومصر ام الدنياو الكلام الحلو اللي طول عمرنا بنسمعه وكنا بنصدقه لما كبرنا شوفنا الواقع الحقيقي الناس مش كلهم طيبين ولا حاجة بل بالعكس الضربة بتجيلك من اقرب الناس ليكي انا فعلا بتمر عليا مواقف بحس ياه قد كدة كنت مخدوعة بس في نفس الوقت في ناس كويسين جدا اكتر حتي مما نتخيل بس قليلين مصر اوك بلد الحضارة وليها 7000 سنة ومش عارفة ايه طيب وبعدين احنا فين دلوقتي ولا حاجة اللي بيحصل في مصر ده طبيعي بعد الثورات الغير منظمة واحنا اه عملنا ثورة واسقطنا الرئيس وعملنا انجاز عظيم بس بعد كدة كله طمع في السلطة وعايز يفرض هو رايه علينا ده عيب الثورة اللي مالهاش قائد في ثورة 1952 كان عبد الناصر هو القائد وهو المسئول قدام الشعب وهو اللي اتحمل المسئولية بس ان شاء الله الرئيس اللي جاي ايان كان هو مين هيبقي هو المسئول
اما موضوع الطب والاحلام والانجازات انا عايزة اقولك ان حال الناس وحال البلد يخليكي تتمسكي بحلمك اكتر صدقني لان احنا لازم نكون الشمعة الصغيرة اللي مش باينة وسط الظلام اللي احنا فيه لو كلنا قررنا ننجح ونطور بلدنا بادينا ومش نستني حد فعلا البلد عتبقي احسن ده كلام حقيقي مش مجرد كلام حلو وخلاص
انا قررت اني ان شاء الله هنجح بنجاحات عظيمة وهبهر العالم كله ليه يبقي عندنا د.زويل واحد بس ود. مجدي يعقوب واحد ود. ابراهيم الفقي الله يرحمه واحد بس احنا ليه مانبقاش زيهم وعلي فكرة ظروفهم كانت اصعب بكتير من ظروفنا والفترة اللي كانوا فيها قدنا كانت مصر حالها اصعب من كدة بكتير من استعمار وحروب اما الناس بقي فدول الذات لازم تنجحي علشان تخلصي ثأرك منهم بمعني أصح انا كدة وكدة هنجح وانتوا مش فارقين معايا اصلا انا مش فاضيلكم وفي وسط الناجحين هتلاقي ناس محترمين كتير يحبوكي ويحترموكي
خلاص بقي مفيش يأس دلوقتي احنا عايزين نبقي مبهرين يعني مفيش وقت لليأس ومعلش بقي طولت عليكي

دى العلماء بيسموها الاحلام الوردية الاحلاما للى بيتمناها المراهق عشان هو شايف الحياة حلوة وجميلة وسهلة وشوية حاجات بسيطة ويقدر يعمل كللللللل ده وهو مش عارف ان فيه ناس زيه واحسن منه بكتير س هو شايف بس انه هو الشخص الوحيد اللى هيغير ويكسر الثابت
ولما بقى يكبر شوية اللاحلام الوردية دى بتبقى سودة لانه بيشوف كل حاجة مكنش شايفها وبيتعب فى الحالة دى وبيندم وليه ويجيب الغلط على ده او على ده ويطلع نفسه برئ مع انه فيه ناس كتير زيه كده او يمكن كلها
العيب مش فينا العيب فى القدر وبس

شكرا على ردودكم وبجد انتوا فهمتوا اللى عايزة اقوله لانى من صغرى واخدة الدنيا جد وان كل احلامى هاتتحقق لكن اتصدمت فى الناس وفى الاحوال بس طالما لسه فى ناس كويسين لازم اشتغل بجد عشانهم

شكرا على التصحيح بس اصلا انا نقلت الكلام كله عشان عجبنى مش انا اللى كتبته

مآشي ، بس ي ريت تععدليهآ لأن ده قرآن ، چزيتِ خيراً =)

انا حاولت اعدلها بس مش عارفة ازاى

عارفه مشكلتك ايه انك عايز الدنيا تبقى بصورة مثالية ودا صعب