شفيق ولا مرسى؟
 

ف الاول كده يا جماعه قبل اى حاجه بتمنى من الاداره مش تحذف الموضوع لان الموضوع ده نصايح مش غرضه حاجه وخصوصا لاصحابى وزملائى فى الثانويه ال ربنا يعلم بيها دى والله ماحنا عارفين هنعمل ايه



بسم الله الرحمن الرحيم



يارب تكونو بخير ومايكنش حد زعلان من حد ولا مضايق من حاجه

الصلاه والسلام على افضل خلق الله سيدنا محمد صل الله عليه وسلم

فى الاول كده قولوا الدعاء ده علشان ربنا يبارك لينا كلنا
اللهم وفقنا فى تحبه وترضاه لنا فأنت على كل شئ قدير والهمنا الفهم والحفظ والتركيز يارزاق

ادخل فى الموضوع بقى

دلوقتى كنت بتصفح القسم لقيت واحد داخل يقول Don't waste ur time طيب جميل والله دخلت الموضوع لقيته بينصح الناس وفل يعنى بعدها فى الردود الاقى شفيق وناس بتشتم وحاجات مش تمام


طيب مش هقول حاجه انا اصلا مش ليه فى السياسه اوى


بص ياسيدى انت كطالب ثانويه عامه يخصك ايه دلوقتى فى الموضوع ده ؟؟؟ هيجى يقولك مرسى ذاكر مثلا ولا يقولك لو دخلت الامتحانات وجبت درجات زفت هشغلك ولا شفيق هيعمل كده برده ؟ ؟ ؟ ماترد يا صديقى ؟


طيب ماعلينا ناقصلك اسبوع على الامتحانات جاى تقولى انتخابات ياشيخ هتضيع عمرك كله علشان انتخابات مش ليك اصلا كلام فيها دلوقتى ولا اصلا فى حد فى السن ده يكون ليه فى الكلام ده ليه تضيع مستقبلك بقى يا اخ ف حاجه زى دى مش كفايه السنه خلصت من غير مافى حد يفتح كتاب واكيد الامتحانات مش هترحم حد زى 2007 و 2008 علشان ينزل التنسيق !

هنفترض انك مهتم بالموضوع ده طيب ياسيدى مانت فى انتخابات الثانويه العامه الورقه بتاعت الامتحان هتختار مننا مين هيبقى مهندس ومين محاسب ومين دكتور ومين ومين وغيره طيب ماتعمل بقى دعايه لنفسك وتذاكر مع الكتاب وتخلص نفسك من كده بقى وتدخل الامتحانات وتجيب نتيحه غله وتبقى انت كده ال فوزت بالانتخابات مش هما والناس هتعترف بيك بعد كده ولا هيجى يقولك لا ده كان مع شفيق او مرسى لازم نحترمه !!! ولا انا غطان ؟

وبعدين انا ملاحظ البلد كلها بقت تتكلم فى السياسه وخصوصا بتاع الثانوى طيب ماتجرى ياعم انت وهو تذاكرلك كلمتين ينفعوك ويفرحو امك وابوك بقى بذمتك انت وهو لما شفيق هيكسب مامتك هتفرح ولا لما انت تنجح مامتك هتفرح ؟ ؟ ؟ ؟؟ ؟ ومين ال مامتك هتفتكره بعد الايام انت ولا سى مرسى ؟


تعال هنا انت وهى جاى تضيع عمرك بعد كل الزهق والتعب بتاع السنتين دول علشان شويه ايام مالكش انت فيها اصلا وتقولى سيبك من الامتحانات !!! طيب ماهى الامتحانات دى هى ال هتضمن انك تعيش فى البلد وتخليها تبقى مستقره ومش فيها مصالح زى دلوقتى ماتركز ياعم انت وهو بقى



معلشى انا اتكلمت عاميه علشان الكلام يأثر فيكو مع ان يعنى معظم الكلام مش تمام بس ياله مش مشكله سامحونى على كده


اقولك على حاجه اخير انت وهو

الوقت بيجرى واحنا مش فاضيين للانتخابات دا حتى مش فاضيين للثانويه ياتلحق يامتلحق غير كده مافيش حد هيفتكرك فى البلد دى وال يكسب مش يخصك دلوقتى مين يكسب مش هيعملك حاجه دلوقتى لما تخلص وتعرف مستقبلك رايح فين ومين ال هيقف قصادك يبقى تتكلم لكن مايصحش انك تتكلم دلوقتى ف حاجه من دى وخصوصا ف ايام زى دى كلنا محتاجين ننام بدرى ونشرب اللبن ونقوم الصبح نذاكر كلمتين فايقين ومركزين غير كده هتضيع نفسك ومش هتستفاد من حاجه



ياريت اشوف الردود والاداره مش تمسح الموضوع بعد اذنكم :d

بسم الله الرحمن الرحيم الاجابة توفيق عكاشة ^^

هههههههههههههههههههههههههههههههه لا الفراعين ^_^

على فكرة اللي هينتخب أحمد شفيق يبقى انسان غبي وملوش ف التفكير على الإطلاق
مفيش حرية شخصية دلوقتي .. الوقت راهن جداً و محتاج تكاتف من الجميع ضد 30 سنة ذل جديدة
احنا نعرف ناخد حقنا من الإخوان لكن من الفلول لازم شهداء ومعندناش استعداد لشهداء تاني

بص يابشمهندس ف الاول كده انت كل واحد ليه حريه يعبر بيها على مزاجه بس ياسيدى التحرير عندك اهو مفتوح من كل النواحى والشرطه كده كده واقعه مش محتاجين وقت وهو مش هيكون لسه قعد على الكرسى بعد شهر ياعم لقيته مبارك التانى قوله عندك بلدى هتضيع منى وانزل التحرير تانى ولا انا غلطان ! سواء مرسى او شفيق بقى انا مش بشجع حد

حاجه كمان يا باشا مافيش حد بياخد حقه من الاخوان :d ابدا ابدا ابدا هاتلى مثال يقولى كده واصدقك وانا عندى مثالى للفلول انك تعرف تاخد حقك تالت ومتلت وترميهم فى السجون زى دلوقتى

ياجماعه بصوا اولا امتحاناتكم الاعلام مش هيبقى مهتم بيها اوي فلو جت صعبه متحلموش يحذفولكم منها حاجه زي السنه ال فاتت لأنّ كله هيبقى مشغول بمحاكمة مبارك وانتخابات الاعاده فلازم تركزوا كويس اوي وتذاكروا كويس وربنا يوفقكم جميعاً يارب
اما بالنسبة للتوبيك يا اخ بص ببساطه كدا
لو شفيق مسك البلد حتى لو طلعت الاول ع الجمهورية مستقبلك مش مضمون
السياسه دي عشان مستقبلنا احن الشباب دلوقتي وانا حاسس كمان انك بتقول ان لو شفيق فاز مامتك هتفرح؟؟ دا ع اساس ان شفيق دا حد كويس مثلا يعني وانا مش واخد بالي؟
هي حاجه مهمه جدااااا احن مش بناخدها عشان سياسه وخلاص بس بردو فرص عمل ومستقبل وكدا
الموضوع مش مجرد انك تدخل كليه كويسه وخلاص مانا ف هندسه بس مش عارف هتخرج اشتغل ايه لو اتخرجت يعني
الموضوع موضوع دم شهدا ضاع
موضوع ثورة قضوا عليها وانهوها وضحكوا علينا فيها
الموضوع موضوع كرامه
الموضوع اني بجد محروق اوي
بس بجد الموضوع اكبر بكتيييير من انك تقول ان السياسه دي مش هتفيدك في حاجه لأنّ بجد لو جه رئيس كويس ممكن تدخل اقل كليه وتشتغل ولو جه رئيس سيء ممكن تدخل احسن كليه ومتشتغلش
انا مبقولش انكم تهتموا بالسياسه وتنسوا الدراسه لا طبعا وعمري ما قولت كدا
بس لما يكون الموضوع يخص دم شهدا راح وانتهى فمينفعش يتناقش بالبساطه دي ف توبيك زي دا عذرا يعني

انا معاك فى الكلام ده يااحمد انت والباش مهندس محمد انا عاررفة ومتابعة السياسة وبذاكر بردو يعنى بحاول مضيعش الوقت علشان استفاد من الاتنين الزمن اتغير وكل واحد من حقه التعبير عن رايه والاهتمام باحوال البلد الاخوان عملو مؤتمر المصالحة الوطنية وهيقدمو كل التنازلات وصدقووووووووونى المرة دى بجد لازم نتفق منرجعش الظلم تانى ده مستقبلنا ياججماعة نفسى ادخل الكلية وانا عندى امل ياااااااااااااارب هون علينا الايام دى.

و الحاجة الوحيدة المستحيل تحصل اني انتخب اخوان
اعذروني فانا لا انتخب المنافقين

و لو عايزين تفهموا كلامي اقروا حوار د.مرسي في المصري اليوم في 25\11\2010

انا مقاطع اصلا متقلقش ^_^

الاخوان مش منافقين الكل كان منافق بس انتو علشان مش قابلين الاخوان بتتلككولهم على اى حاجة الكل غلط مش الاخوان بس وبعدين عملوا مؤتمر مصالحة امبارح وقالوا انهم موافقين على كل حاجة وهيكتبو ورق بكدة .كفايااااااااكو ظلم بقى.

اه مانا عرفت وتابعت المؤتمر شوية وبعدين اتفرجت ع الدكتور محمد مرسي مع محمود سعد



والبلتاجي بيقول انهم كانوا بيحاولوا يخلوا المؤتمر فيه دكتور ابو الفتوح والسيد حمدين صباحي بس تخلفوا لظروف شخصية

وانا متفائل ان شاء الله لعل يكون ال حصل دا عشان كل الاتجااهات والتيارات المصرية تتوحد لأول مره ف حياتها ياااااااااااارب لعل الداعي خير