بوابة الثانوية العامة المصرية - لــــو هبقــــــى رئـــيس للمــــصريـيـن

منقول ... للشاعـــر /عثمان بحور
~~~~~~~~~~~~~~~~~~
قصيدة لو هبقى رئيس للمصريين
~~~~~~~~~~~~~~~~~~

. لو هابقى رئيس للمصريين
راح أعيد الأمن فى غمضة عين
والحد الأدنى يكون ألفين
ونعيش فى رخاء فى غضون شهرين
وراح أبنى مصانع للعاطلين
ومدارس حلوة تعلم دين
وفى شقة هدية للعروسين
وسرير ودولاب مع أنبوبتين
واللحمة تمنها يعود ريالين
والبيضة البلدى يدوب قرشين
ولكل شهيد هاديله مترين
جنب الحلفاء هنا فى العالمين
ولكل جريح هاديله قرشين
ويسافر برَّه ويرجع زين
والكورة هترجع كده فى الحين
واعمل إستاد تانى للمجانين
ومافيش أتوبيس هتشوفه العين
فيه راكب واقف ولا إتنين
وما فيش طوابير كده ع البنزين
ولا أزمة عيش ولا فيش كيروسين
وان كنت أنا راجل زفت الطين
إتفضلوا عندكم الميادين
إختاروا المرسى واخوه حمدين
أو موسى وعبده وناس تانيين
وإوعوا تحاكمونى مع الفاسدين
علشان كداب وحلفت يمين
علشان ما افتنش على الملاعين
واعمل عيَّان زى التعابين
وأجيب الديب واديله ملايين
والقاضى يغيب وياخد له سنين
والفوضى تزيد كده فى الميادين
والصحرا تكون تنك البنزين
والدنيا تئيد والفاعل سين
وتشوفوا تعالب كده واعظين
وتعودوا راكعين وتقولوا آسفين
ولا يوم من أيام زفت الطين
خليكوا واعيين وكمان عاقلين
دى بلدنا فى حاجة للفاهمين
وادعوا يا صابرين رب العالمين
ينصركم دايماً ع الفاسدين .