مفيش مفيش(هتتحذف امتى)
 

مفيش مفيش مفيش ..زهقت انا من الكلمة دى
انا تقريبا بسمعها بمعدل10 مرات لو خرجت برة البيت او لو حد جالنا
انما فى البيت مش بسمعها ممكن اه اسمع اخويا كالمعتاد يسال ماما (هو مفيش نسكافية؟؟)
لكن مفيش بقى اللى انا اقصدها دى حاجة تانية ....انا اقصد مفيش بتاعة اليأس والاحباط

1_ لما تتكلم مع حد كبير فى السن
رجال: (مفيش شباب بتتحمل المسؤلية شباب اليومين دول فافى)
سيدات: ( مفيش بنات بتتحمل المسؤلية بنات اليومين دول بيتدلعوا)
2_ فى الجامعة اكتر حاجة اسمعها من البنات :(دة مفيش احترام خالص)
3_يتكلموا عن التعليم (دة مفيش تعليم فى مصر التعليم كلة حفظ الولد والبنت بمجرد لما يخلصوا السنة ينسوا اللى درسوة على طول)
4_ الاكل (مفيش بركة فى الاكل..مفيش اكل مش ملوث ...مفيش مية نظيفة)
5_الوقت (مفيش بركة فى اليوم اليوم بيجرى بسرعة)
6_ الصحة (مفيش حد مش تعبان)
7_ لو سمعوا عن حادثة "سرقة او قتل او ما شابة" (مفيش امان دلوقتى دة الواحد بيخاف ينزل الشارع خلاص بقينا فى غابة)


مفيش حد عندة ضمير
مفيش اخلاص
مفيش غير العزلة عن الناس
مفيش رحمة بين الناس
مفيش شغل
مفيش اعلام هادف
مفيش دين ولا ايمان
مفيش طيبة
مفيش حاجة اسمها صداقة كلها مصالح
مفيش مصداقية فى اى شئ
مفيش حاجة من غير واسطة
مفيش فلوس فى مصر
مفيش غير الغربة
مفيش حاجة حلوة فى مصر

انا كنت قرأت شعر عامية لشاعرة(مش متذكرة اسمها ) كانت بتتكلم عن مفيش بردو
وحتى لما افتح اى صفحة ويب اى موضوع اجد لغة اليأس فى كلامنا
كفااااية مفيش ... اومال اية اللى فية؟؟

على رأى اخويا الصغير : طب طالما كل حاجة بقت وحشة كدة اومال احنا عايشين لية؟؟؟؟ مفيش حيااااة

لية بنعمم كل حاجة
واحد اتعرض للخيانة من اى جهة ؟؟ ........ دة مفيش اخلاص ويظل تعاملة مع الباقيين على هذا الاساس
واحد مر بأزمة مالية ؟؟؟......... مفيش خير فى مصر الواحد زهق امتى اهج منها
واحد اختلف مع شخص ؟؟؟؟........ دة مفيش حب ومودة بين الناس
لية مناخدش كل تصرف يصدر من اى شخص بحسن نية لية بنسئ الظن دايما

تستمر مفيش وتدخل حياتنا بكل سهولة ونحن نرحب بها
مجرد اما تقابلنا اول المصاعب او اى صعوبات عامة نستسلم ويسيطر اليأس على الناس

طب الناس اللى بتحارب فى فلسطين والعراق لية مش سيطر اليأس عليهم وقالوا(مفيش فايدة واستسلموا) بالعكس دول عندهم امل وما شاء الله بيقاوموا رغم كل المتاعب
احنا فى سيناء لية مستسلمناش وقولنا (مفيش فايدة مفيش امل وسيبنا ارضنا تضيع ) ما احنا حاربنا وقاومنا اهو ورجعنا ارضنا
"مفيش فايدة سعد زعلول" لية بناخد الجملة دى ونقولها فى كل كلامنا فى حين ان سعد زغلول لم ييأس وقاوم

مش كل حاجة بقت وحشة كدة كفاااااااية
كفاية نخلى الجزء الحلو يغمر يغمر الى ان يختفى والجزء الوحش يطفو يطفو الى ان يصبح هو الظاهر لنا
نفسى اما نضحك نضحك بنفس مش نضحك ونقول يااااه مفيش حاجة بتفرح دلوقتى لما هو مفيش بتضحك لية ؟؟

انا بحمد ربنا انى بجد عندنا فى العيلة مفيش ناس كدة بس اوقات بيغلب عليهم اليأس ودول الطلبة بتوع العيلة وخاصة (هندسة عين شمس) يقولوا (مفيش رحمة بالطلبة) ووووودة بيقولوه فى ايام الامتحانات بس :D:D
انما فى العام لأ عن جد عمرى ما صادفت ولاقيت حد من العيلة بيقول مفيش ويأس بالعكس انا شايفة عندهم امل وتفاءل ومش معقدين الحياة .... لكن الناس الاغراب الجيران الصحاب تتعامل معاهم يقولوا مفيييش
لا كفاية خلاص خليتوا الدنيا لونها اسودة خالص ....مفيش ابيض كلة بلاك بلاك بلاك
ولية مش بنصبر على البلاء ...لية مش بنقول قدر الله وما شاء فعل ....
حتى لو مفيش....احنا نخلى فى ....فى رحمة ومودة وطيبة واخلاص وكل حاجة حلوة

ومصر بقى
نفسى مرة مسمعش الجملة السائدة حاليا(مفيييييش حاجة حلوة فى مصر)
ازاى مفيش؟؟؟ ....... علشان الشغل والاقتصاد خلاص هنكره مصر
صحيح فى شوية اعتراضات على القيادة وتطبيق الحكم ببس دة ميمنعش ان فى حاجة اسمها امل
وثم لازم اننا يكون عندنا يقين ان مفيش حاجة بتيجى بالساهل لازم نتعب

ياريت الامل يكون عندنا بيقين مش امل زائف
لية هنقعد الدنيا مع ان هى سهلة وابسط من كدة بكتير
ولية ندى لليأس مكانة بينا
امتى هتتحذف مفييش من القاموس
هو انا كلامى صح ..... ولا هو فعلا مفيش مفيش
انا عارفة ان الموضوع شامل حاجات كتير
بس اانا اتكلمت من وجهة نظرى
ممكن الكلام مش مترتب (وفى عامية على فصحى على انجلش بس معلش انا كنت بذاكر من يومين كدة مادة مصطلحات كلها انجلش وحااجات غريبة كدة مش دة موضوعنا المهم:D:D)

تفتكروا فى حل لمفيش دى؟؟ ولا مفيش حل

الحل فيا و فيكى و فينا كلنا لو قدرنا نغير نفسنا اكيد باذن الله هتتغير مافيش و يبقى فى

مع ان صراحة فى حاجات من مافيش اللى انتى ذاكراها يا قلبى انا حاسة بيها

اهدى يا بنتى اعصابك مش كده بصراحة انتى عندك حق وكمان فى كلمة تانى بتضايقنى (معلشى؟)
عمرنا ما ينصلح حالنا الالو شطبنا من قا موس حيا تنا الكلمتين دول

فعلا الحل بيبدأ بينا احنا الاول
بس تعملى اية لو انتى بدأتى بنفسك ومع ذلك بردو هتلاقى اللى حوليكى مش بيتغيروا ؟؟؟
بس اكيد هنغير مفيش دى باردتنا

منورانى يا جميل وحشااااانى كتييير ربنا معاكى يارب :)
ههههه بردو مفيش "انا اتنرفزت خالص انا هااااادى اهو:D"
بتحبى تعاندى حاضر يا نونا انا صابرة عليكى بس لحد اما انتى تمتحنى وانا كمان امتحن :p
منورة يا نونا
على فكرة قبل ما انسى ماما بتقولك اية اخبار المقالب معاكى :p

انا هادى اهو :D
بس بصراحة انا حكاية اليأس والاحباط اللى احيانا بتسيطر على البعض دة بتنرفزنى جدا
واكيد حالنا مش هينصلح الا لو حذفنا مفيش
ومعلشى ؟؟؟؟ مالها؟؟؟

بس بجد مش مصدقة نفسى فينك يا بنتى بقالى كتير مش شوفتك
ربنا معاكى يارب هانت خلاص يا جميل :)
تورتينى ياااااا قمر:)
:D اكييييد
جزاك الله خيرا

اقتباس:

انا طالعة لمامتى وبابتى :D

طيب اشك

والله يا استاذه ايتش
الحل فى كلمة انا
دى بيقول العيب فى دا ودا ودا
وبينسى نفسه

بس والله هى حلوة
والعيب مش فيها
بس فى اللى فيها


شكراً يا فندمز على التوبيك
وننتظز مواضيعك
زى القبض زى اول الشهر فقط ههه

ده كولو مفيش طب كمفيش رد

هو من حيث ما فيش
فما عدشى فيه خالص
الا من رجم ربى
فى امان الله

لا مش او ى كدا الدنيا حلوة بردو
ومهما طال الليل وغمق اوى دا معناه ان الصبح قرب
زى ماقلتى نصبر واللى مافيش هيباه فيه ان شاء الله
تقبلى مرورى

اولا احب انى اشكرك عللى الموضوع ثانيا الياس بقى جزء لا يتجا من حياتنا والحمد لله