استفسار
 

ألف مبروك يا باشمهندسة دعاء ,, مبدأياً الكلية دراستها كلها انجلش فى انجلش يعني لو مستواكي ضعيف فيه لازم تاخدي كورس انجلش عشان الكتب كبيرة ومافيهاش كلمة عربي دي حاجة الحاجة التانية لازم تكوني فاهمة بدائيات الكمبيوتر عشان تعرفى تكملي على فهمك دا ,, انصحك الفترة دي تظبطي نفسك فى اللغة عشان مش تواجهي اي صعوبات فى الكلية واما تدخلي سنة اولى هتعرفى ايه الكورسات المهمة ودي انتي هتحدديها بعد سنة اولى هتعرفى ايه الاشياء اللذيذة اللى لاقية نفسك فيها وحاسة انك هتقدري تكملي وتتميزي فيها . تقبلي مروري

مؤمن الغمري , حاسبات ومعلومات الزقازيق

العفو على ايه , لو عاوزة تسألي ف أي حاجة انا موجود سواء هنا او عالفيس

معاكي مصطفى حاسبات عين شمس
أولا مبروك :)
ثانيا : احنا اه دراستنا كلها إنجلش بس مع الوقت هتتعودي وتفهمي :) بس طبعا لو عايزة تحسني نفسك في اللغة ممكن تاخدي كورس .... إنما الدراسة نفسها مش محتاجة :)
و بخصوص كورسات البرمجة اللي بره وكده لو كنت فاكرة إن الدراسة لغات برمجة وكده أحب أقولك لا :)
أنت بتدرسي مثلا OOP أو Image Processing أو .... أو ... أو .... إلخ إلخ وبعدين بتطبقيهم بأي لغة إنما الكورسات بره اللي بيقولك على Syntax اللغة وبس
مثال للتوضيح
زمان لما دخلتي المدرسة كان معاكي قلم وكنتي بتتعلمي الكتابة صح
تخيلي كده إن لغات البرمجة دي كأنها القلم
يعني لغات البرمجة دي هي الأداة
أنت لما دخلت المدرسة اتعلمتي الكتابة مش اتعلمتي استخدام القلم
يعني أنت بتتخرجي من الكلية دي ك Computer Scientist مش ك Programmer
ولو مش فاهمة كلامي ده هتفهميه إن شاء الله لما تبدأ الدراسة في الكلية :)
ومبروك :)

وانا كمان ناوي حاسبات و معلومات و انا جايب 94.27

المهم مش تخلوا الناس تغير رأيكم عنها لأن الناس مش فاهمين حاجة ولا عارفين ,, ولو اخدنا على كلامهم مش هنعيش اصلاً . وبكرة هتثبتوا ليهم ان هما كانوا غلطانين ,, ألف مبروك يا عبده

ربنا معاكي ان شاء الله .. الكلية جميلة جدا وان شاء الله هتعجبك

بالنسبة لموضوع الكورسات .. انا رايي الشخصي انك متعتمديش عليها اوي .. حاولي تبدأي تتعلمي مع نفسك وتسالي اللي حوليكي وتستفيدي منهم
وهتلاقي بالذات في مجال الكلية شرح كتير لاي حاجة انت محتاجها على النت
مبدأيا ممكن حد يدخل الكلية مش عارف اي حاجة عن الكمبيوتر ... وده بيحصل فعلا .. بس كل ما يبقى عندك خلفية عن اي موضوع ليه علاقة بالكمبيوتر بيبقى افضل
من رأي ان المفروض الطلبة في سنة اولى يكونوا بيعرفوا يستخدموا الword , power point كويس .. يعني لو عاوزيين يعلموا عليه حاجة هيعرفوا .. ممكن يبقى في خلفية عن الaccess برده .. عموما المفروض الحاجات دي بتتاخد في سنة اولى .. المشكلة ان فعلا في ناس مبتعرفش تستخدم الحاجات دي والكلية لما بتديها بتفترض ان الناس عارفها فتقولها على السريع كدة وبتمتحن فيها
كمان ياريت تبدئي تقري عن البرمجة بصفة عامة بحيث تبقي عارفة الاساسيات .. يعني مجرد بداية كدة .. هتفرق معاكي جدا
طبعا غالبا في الكلية هتلاقي ناس من الدفعات اللي اكبر بيعملوا سشن للدفعة الجديدة عشان يعلموهم الاساسيات دي .. فمهم جدا تتابعي اخبار الكلية ومتكسليش انك تحضري اي حاجة
حاولي تهتمي بالجزء العملي اللي بتخديه جدا ولو حسيتي انه صغير حاولي انت تكملي لوحدك وتعرفي اكتر عنه .. لان الكلية عمرها ما هتديكي الحاجة كاملة هية بس بتفتح ليكي ابواب
اعرفي ان العملي غالبا ما بيبقى مبني على بعضه فبلاش تخليه يتراكم ذاكري اول باول ... اهم حاجة أســــالي كتنييير
اسالي اي حد ممكن يفيدك سواء المعيد الدكتور او حد من الدفعة اللي اكبر منك او حتى حد من الدفعة معاكي
غالبا بتلاقي في الدفعة ناس معدية وتحسي انها المفروض تتخرج من الكلية خلاص .. وناس لسة معندهاش كمبيوتر في بيتها .. حاولي تستفيدي من الناس اللي في الاول وساعدي الناس التانية :)

بالنسبة لكورس انجليزي .. هوة كويس انه يبقى عندك لغة بالذات لما تتخرجي وتشغلي .. بس مش هتفرق في دراسة الكلية

كفاية كدة حاسة اني طولت عليكي :) .. لو عندك اسالة قوليلي وانا اجاوبك احسن ^_^
وربنا معاكم في التنسيق ان شاء الله

مبروك عليكى يا دعاء بس انا عايز اسال هو انتى جبتى كام اصلى انا جبت 92.8 ممكن الحق حاسبات اسيوط

هتلحق ان شاء الله بس لو لحقت هيبقا عالحركرك , ادعي ربنا .

انا جبت 94.2%