أرجو الرد و ابداء الرأى من الجميع
 

دلوقتى أنا جيبت 92.5% علمى رياضة و فى الأول كان نفسى فى هندسة و لو حتى أقاليم بس طبعا بعد ما شوفت المجاميع و التنسيق , طلع ان كده هندسة مستحيلة
بس أنا الحمد لله راضى باللى كاتبهولى ربنا
و أنا سمعت من يومين كده خبر ان عدد الطلاب اللى هيتقبلوا فى الجامعات هيزيد بنسبة 5% يعنى هيتم اضافة 20 ألف طالب لمواجهة الارتفاع الجنونى فى المجاميع

فأنا دلوقتى عايز أسأل أربع أسئلة أرجو الرد عنها :

1-هل خبر زيادة القبول 5% ده صح؟ و هل ده هيأثر على تنسيق علمى رياضة و الا لأ ؟

2-هل هندسة ممكن يفضل فيها أماكن لطلبة المرحلة الثانية من التنسيق و الا لأ ؟, و هل لسه فى أمل انى ألحق و الا لأ (مش هزعل جاوبو بصراحة) ؟

3-هل فى نسبة أمل انى ألحق حاسبات و معلومات عين شمس (93.6% السنة اللى فاتت) ؟ أو حلوان (93.2% السنة اللى فاتت) ؟

4-ايه الكليات الكويسة اللى ليها شغل محترم و دراستها حلوة بعد هندسة و حاسبات ؟ , يعنى تجارة انجليش كويسة أو تربية مثلأ (فى تانى)؟

فيين الردود يا جماعة , أنا حاسس انى بكلم نفسى

الخبر ده ماعتقدش انه صح وهو كلام للتهدئة فقط بسبب ارتفاع المجاميع السنة دى
وبصراحة من غير زعل كده هندسة واى كلية قمة عمرها ما نزلت ولا ح تنزل مرحلة تانية اى سنة وخصوصا السنة دى برده عشان ارتفاع المجاميع وبالتالى معلش انت مش ح يجيلك هندسة و حاول تفكر فى كليات تانية
عموما مفيش شغل حلو بعد التخرج حتى لطلبة هندسة الا بعد الكورسات و الوسايط
بصراحة انا معرفش ايه مجالات عمل تجارة انجلش بس لو انت سالت ولقيتها مناسبة لك توكل على الله بس تربية ما انصحكش بيها عشان مافيش تعيينات حاليا فى الوزارة و عشان تشتغل لازم تدى دروس واحنا عارفين القصص دى
بس رايى ما تياسش وتوكل على الله تجارة انجلش

أولا أحب أشكر حضرتك على انك كلمتنى بصراحة

مصدر الخبر جريدة الجمهورية و مواقع كتيير غيرها , ده غير ان ده جيه فى الأخبار فى التليفيزيون

ملحوظة: فى كليات قمة بتنزل للمرحلة التانية فى التنسيق زى حاسبات و معلومات (راجع الحد الأدنى للقبول بالجامعات السنة اللى فاتت هتلاقى كل كليات حاسبات و معلومات مرحلة ثانية و واخده من 93% و الحد الأدنى للقبول بالمرحلة الأولى كان من 93.9%)

و شكرا على التوضيح بالنسبة لكلية التربية

و عامة أنا شايف لغاية دلوقتى ان الأنسب ليا هى تجارة انجليش خصوصا ان الانجليش عندى أحسن حاجة

لكن برده عندى أمل انى ألحق حاسبات و معلومات و لو حتى أقاليم لأن مجموعى قريب جدا من مجموعها يعنى الفرق بينى و بينها 0.5% (بالنسبة اللسنة اللى فاتت) و ان كان الخبر ده صحيح (أعتقد انه صحيح) يبقى لسه الأمل موجود

و برضو لو لقدر الله مجتليش حاسبات
هكون راضى برضو باللى كاتبهولى ربنا