هندسة برمجيات جامعة حلوان ولا الجامعة البريطانية؟
 

انا ناوى ادخل حاسبات ومعلوات قسم هندسة برمجيات ايه الاحسن ادخل حلوان ولا الجامعة البريطانيىة bue ؟
انا جايب 99.4% ف ثانوية عامة

الجامعة البريطانية .

ممكن اعرف السبب. يعنى هو حضرتك روحت حلوان ولقتها مش حلوة؟

BUE for sure :D

هندسة عين شمس مثلا ولا هندسة الجامعة الأمريكية ؟ :cool:

أكيد الجامعات الخاصة مستواها أعلى بكتير وخصوصا في الكليات المحتاجة معامل وتجهيزات زي الهندسة والصيدلة والحاسبات , إنما لو حاجة أدبية مش هتفرق كتير

تجهيز معامل الحاسبات في الجامعة الحكومية مستواه معروف ... :rolleyes:

طب بيقولوا ان الشركات الكبيرة زي ميكروسوفت بتشوف الي عامل احسن مشاريع تخرج فالجامعات الحكومية عشان يشتغلوا عندها.
الكلام دة بيحصل ف الجامعات الخاصة؟؟

انا في هندسة برمجيات حلوان ,, بخصوص المعامل ممكن تيجي بنفسك تشوف في يوم و في المستقبل حتى لو المعمل ما عجبكش بتطلب تغير المعمل اللي هتحضر فيه -لانك بتدفع مصاريف في القسم- ,, المشكلة الاساسية عندنا ممكن تكون في بعض الدكاترة مش في المعامل ,, لو عندك سؤال معين , انا موجود .

طب مستوى التعليم كويس؟؟

والاعداد قليلة ولا كتير؟ وبالنسبة ل حوار ان الشركات الكبرى زى ميكروسوفت بتشوف احسن مشروع تخرج دة صح؟؟

بالنسبة للتعليم فيه مميزات زي ان معظم الكتب مش بتاعت الدكاترة بتوعنا , و عيوب كتير زي ان في دكاترة ما بيشرحوش و في دكاترة غريبي الاطوار و ساعات ما بيدخلوش المحاضرات و ساعات بيتأخروا , بس في دكاترة تانيين كويسين جداً و معظم المعيدين كويسين ,,
بالنسبة للعدد في القسم قليل جداً من 16-25 ع حسب المادة ,,
ما اقدرش اقارن لك بين القسم و bue الا من حيث المدرجات و المباني و هم احسن فيها , عموما حاول تروح الاتنين بنفسك و اسأل ناس في الاتنين و شوف هترتاح لايه اكتر .
بالنسبة لحوار مايكروسوفت ما اعرفش حاجة عنه ! .

شكرا على الرد
انا عارف ان الامكانيات ف الجامعة البريطانية احسن لكن بعد التخرج انهى شهادة احسن ومعترف بيها وكدة

أكيد الجامعة البريطانية ده سؤال ..!

بص ياخى الجامعة البريطانية هتدفع فلوس كتير لكن هتاخد شهادة معتمدة من مصر و بريطانيا و اللى بدورها معتمدة من المجلس الهندسى البريطانى اللى بدور معتمد من كل اوربا اللى بدورة انت كدا معتمد مهندس برمجيات من المجلس الهندسى البريطانى و بكدا انت معتمد من مصر و من بريطانيا و معتمد فى اوربا انك مهندس برمجيات و دة هيسهل عليك حاجات كتير لو حبيت تشتغل برة مصر فى اوربا مثلا

يعنى ف مصر مش بيفضلوا خريج الجامعة الحكومية؟

البريطانية افضل لأن اي خاص افضل من اي حكومي , مصر بتعترف بالاتنين بس انا لو صاحب شركة هاخد خريج الجامعة البريطانية وهشوف كفاءته لأن الكفاءة اهم حاجة ما يمكن تكون خريج الجامعة الامريكية ومش عندك كفاءة وخريج جامعة الزقازيق (زيي كدا) وراجل مالكش حل , مادام الشهادة معتمدة ومعترف بيها يبقا سيبك من حتة مين الافضل والاسوأ لأنها نغمة متعبة ومالهاش لازمة .
ربنا يوفقك