بوابة الثانوية العامة المصرية - الخطوات والاوراق المطلوبة لاستخراج تصريح سفر

نقلا عن أحد المواقع
إليكم خطوات
استخراج تصريح السفر
مع العلم أنه في حالة أنه مكتوب في بطاقتك معلم او موظف
يجب أن تأخذ موافقة جهة العمل على السفر
إلا فلا مشكلة
اذهب قبل السفر بيومين أو ثلاث لاستخراج التصريح

اقتباس:

السلام عليكم.. انا حشرح لكم بالتفصيل الممل إن شاء الله كيفية استخراج تصريح سفر(سياحة) لمن ادى الخدة العسكرية.
بسم الله الرحمن الرحيم..
اولا تصحى بدرى الساعة 7 صباحا وتصلى الصبح وبعد ما تصلى الصبح تاخد باسبورك وصورة منه وطبعا جواه حيبقى موجود التأشير صورها صورة برضو.. وشهادة الجيش وصورة منها و معاك تقريبا 50 جنيه وتتوكل على الله حتروح القسم الى انت تابع ليه حتطلب منه نموذج 102 وتقولو علشان انا عايز اطلع تصريح السفر. حيديك نموذج 102 ويقولك صوره صورتين حتصورهم ب 1 جنبيه وحيسألك على شهادة الجيش علشان يشوف انت عليك استدعاء ولا لأ. وبعدين حيملالك النموذج بعد ما يسألك انت حتسافر فين. وبعد كدة حيديك النموذج والشهادة (اوعى تنساها معاه) واتأكد ان فى ختم موجود على المنوذج وإلا حترجع تانى الوقت(10دقايق). وبعدين تتوكل على الله وتاخد معاك النموذج وتروح على المديرية (مديرية الامن) وحتسأل على مكان تاخد منه نموذج 14 حتدخل تلاقى عسكرى وتقولو عايز نموذج 14 وحدفع 1 جنيه وبعدين تاخد نموذج 14 وطبعا نموذج 102 وتدخل عند عسكرى تانى تسجلهم وتختمهم (الاتنين) الوقت (10 دقايق) وبعدين تتوكل على الله وتروح منطقة التجنيد اللى انت تابع ليها. معاك ايه بقى ؟؟ 1- شهادة الجيش الاصل + صورة منها
2- الباسبور والتأشيرة + صورة من الباسبور والتأشيرة
3- نموذج 102 مختوم من القسم ومختوم من المديرية + صورة منه
4- نموذج 14 مختوم من المديرية + صوره منه
5- البطاقة طبعا + صورها منها

*ملحوظة ما تخدش موبايلك معاك علشان حيخدوه منك على البوابة وحتقف طابور مكون من 50 فرد وانت طالع برضو حتقف نفس الطابور علشان تستلم التيلفون.( لو مفتح اخلع بالطريقة) انا خلعت :)
أول ما حتدخل حتسأل العسكرى اللى واقف فى وشك حيوصفلك فين المكان بالظبط. حتلاقى حتة طابور بقى انسى تقريبا 70 واحد طبعا حتبصلهم كدة وتضحك.. وحتعدى من جنبهم عارف ليه؟؟؟ علشان الناس دى واقفة تصور. (وانت بالفعل مصور ورقك)
حتدخل على شباك فيه العسكرى اللى حياخد من الورق وتقولو انا مخلص جيش.. (علشان فى شباك للى ما دخلوش جيش وفى شباك للى دخلو جيش.. والشباك بتاع اللى دخلو جيش تقريبا بيبقى فاضى. وتقولو ان انت مصور ورقك كله. حيطلب منك تقف طابور طويل اوى علشان تاخد منهم نموذج كدة (والله انا مش عارف بتاع ايه) كل اللى عليك تفكك من الطابور وتقف جنب الشباك وتزاول الناس لحد ما تتصاحب على العسكرى اللى بيعمل النماذج حيروح هو قايلك انت مواليد كام حتقولو كذا حيقولك هات مبلغ كذا اللى هو من ال 50 جنيه اللى معاك (انا دفعت 9 جنيه) وفى ناس دفعت 12 حسب مواليدك بس انت طبعا معاك فلوس زيادة علشان لو طلبو ما تنساش انت نازل ب 50 جنيه من البيت.
المهم حتاخد منه النموج ده وتروح جرى تشترى دوسيه فاضى من الكانتين ب1 جنيه.. وترجع للعسكرى اللى انت قلتله انك مصور الورق (فى شباك اللى مخلصين جيش) وحتديلو النسخ (شهادة الجيش- البطاقة-التأشيرة-الباسبور-نموذج 14- نموذج 102) + (اصل شهادة الجيش) وما تنساش تاخد شهادة الجيش تانى. حيقولك اتفضل استريح. " حتلاقى نفسك اعدت تحت المظلات اللى انت اعد فيها لما روحت تسلم نفسك للجيش. حتروح قايم بسرعة علشان ما تفتكرش اليوم الابيض ده"
روح بقى اشربلك حاجة ساقعة من الكانتين علشان انت حتستنى من 30 دقيقة ل 45 دقيقة مش أكتر..بس خليك جنب الشباك. علشان بينادو عليك لما التصريح بيخلص.. وبتاخد التصريح بيبقى شبه شهادة الجيش اللى حد ما.. ( وما تنساش تاخد منه شهادة الجيش.) بس كدة يا سيدى..

وانت طالع بقى حتلاقى الناس اللى كانت واقفة بتسلم موبايلاتها لسة واقفه هههههههههههه والناس اللى جت قبلك بساعة وطالعا معاك حتقف الطابور ده برضو علشان تستلم موبايلها.. ههههه فما تاخدش الموبيال احساٌ.. قشطة .؟؟

طبعا ولا محتاج تذاكر طيران ولا محتاج حجز فندق ولا محتاج أى حاجة..
ان شاء الله اللى انا قلت عليه بس هو اللى مطلوب.
والحمد لله. وتروح وتيجى بالسلامة..

بالتوفيقـ