هتاخد ايه…؟؟؟



هتاخد ايه يا ريس لما تندفن

هتاخد ايه معاك غير الكفـن

***

تاخد نفوذك سلطتك

يوم الحساب

تاخد وزارة ترشدك

ايه الجواب

تاخد حراسة تحرسك

تمنع عذاب

هتاخد ايه غير متر بس

من الوطن

هتاخد ايه يا ريس لما تندفن

هتاخد ايه معاك غير الكفـن

***

تاخد ملابس تُستُرَك

أحدث موديل

ومكيفاتك تنعشك

اليوم طويل

وكرسي فخم يريحك

مالهوش مثيل

وعطور باريس تعطرك

بدل العفن

هتاخد ايه يا ريس لما تندفن

هتاخد ايه معاك غير الكفـن

***

تاخد طباخ يأكلك

أحلى الأكلات

وبنت حلوة تقدملك

فاكهة وشربات

طيارة جامبو تمررك

فوق الصراط

حاجات عليه تخطفك

إن ربي أذن

هتاخد ايه يا ريس لما تندفن

هتاخد ايه معاك غير الكفـن

***

وتلاقي هناك أصحابك

قديم جديد

وتلاقي كل أتباعك

لازم أكيد

وبص شوف أولادك

عنك بعيد

والكل يومها أعداءك

وبينطحن

هتاخد ايه يا ريس لما تندفن

هتاخد ايه معاك غير الكفـن

***

تاخد ذنب شعب بدلت حاله

وافتقر

تاخد ذنب أب موت عياله

وانتحر

تاخد ذنب فرد زودت ماله

واحتكر

تاخد ذنب كدب بعتونا بيه

من غير تمن

هتاخد ايه يا ريس لما تندفن

هتاخد ايه معاك غير الكفـن

***

تاخد ذنب اللي ماتوا

مالقوش علاج

وتاخد ذنب اللي زنت

م الإحتياج

وتاخد ذنب اللي قتل

ومعاه إفراج

وتاخد ذنب اللي إتبرأ

بس إتسجن

هتاخد ايه يا ريس لما تندفن

هتاخد ايه معاك غير الكفـن

***

شوف كمّ الخمور اللي إتشرب

بس في زمانك

وكمّ الفساد اللي إرتكب

وانت في مكانك

وكمّ من شبابنا وإنضرب

وبإيد رجالك

وكمّ من أبائنا واتسحب

باسم الوطن

هتاخد ايه يا ريس لما تندفن

هتاخد ايه معاك غير الكفـن

***

وكمّ من شهيد استشهد

واحنا في سلام

وفي كل مرة يتردد

نفس الكلام

يطلع وزيرك ويندد

إحنا في وئام…!!!

وغازنا يبقى مكافأة

وخيرنا يتشحَن

هتاخد ايه يا ريس لما تندفن

هتاخد ايه معاك غير الكفـن

***

اسمع ياريس مِني

وكلامي ده أخر

ارجع بسرعة لربك

قبل ما تتاخر

محدش راح يفيدك

صدقنى في الأخر

إلا كتاب في إيدك

وأعمال بتتوزَن

هتاخد ايه يا ريس لما تندفن

هتاخد ايه معاك غير الكفـن

***



مما راق لي