بوابة الثانوية العامة المصرية - مذكرة فينوس فى الجغرافيا

اقتباس:

المشاركة الأصلية كتبت بواسطة loveforever2oo5 (المشاركة 5976943)

انا بحس ان مدير القسم فيه استقصاد
لأعمال الاستاذ محمود مش عارف ليه
حتى زمايلنا لاحظوا ذلك
الرجا التفسير فكل اعمالنا خالصة
لله ونرجو تقبلها
ففي قسم الأحياء لا يوجد ذلك
والتعامل بيننا كأخوة مع اننا لم نلتقي
الرجا من مشرفي الاقسام التعامل مع
المدرسين بطريقة افضل حتى يستفيد
الطلاب وذلك ا نبغيه..

يعني ايه في استقصاد لاعمال الاستاذ محمود ؟ انا مدير القسم يا استاذ وفيه قوانين للقسم حضرتك ممكن تطلع عليها وتشوفها وبعدين انت رديت علي نفسك وبتقول ان في قسم الاحياء ما نعرفش بعض واحنا هنا برضه ما بنعرفش بعض يبقي ازاي فيه استقصاد لعضو معين من الاعضاء ؟ وبعدين قوانين القسم والمنتدي مثبتة وموجودة في اعلي كل صفحات التاريخ والجغرافيا والاقتصاد للمرحلة الثانوية و بتقول ان ما فيش ارقام هاتف ولا صفحات فيس بوك ولا اعلان لمنتديات تانية وانا باخاطب العضو في رسالة خاصة وباكتب سبب الحذف عند تعديل الموضوع علشان صاحب الموضوع يفهم .....
احنا مش في مدرسة يا استاذنا علشان هنستقصد بعض علشان الدروس ولا التلاميذ ولا نفضل مدرس علي التاني علشان مصلحة شخصية او مادية .
تقدر تقولي حضرتك ايه المصلحة او المقابل اللي هيعود علي انا كمشرف من الاعضاء ؟
انا اكاد اكون المشرف الوحيد اللي مش مسجل رقم الهاتف الخاص به في المنتدي وايه رايك ان صاحب الموضوع اللي حضرتك كاتب المشاركة في موضوعه وبتتهمني ان مستقصده طلب مني رقم الهاتف الخاص بي لسهولة التواصل بينا وانا لم ارد عليه حتي لا تكون هناك اتصالات شخصية بيني وبين اي عضو من الاعضاء لانهم كلهم عندي واحد ويكون التواصل من خلال المنتدي والرسائل الخاصة فقط ..
وايه رايك ان صاحب الموضوع في رده علي طلبي منه ان يرفع اعماله علي موقع رفع اخر رد عليا بطريقة غير لائقة عندما طلب مني ان اسئله عن طريقة التحميل من الموقع بدلا من ان اقول ان الموضوع سيحذف مع انا كثير من االاعضاء اشتكوا من صعوبة التحميل من الموقع الا انني تجاوزت ونسيت اسلوبه في الكلام وحريص علي تنسيق اعماله يا تري حضرتك تسمي ده استقصاد ؟ لو انه مستقصده فعلا زي ما حضرتك بتقول كنت وقفت عضويته وحذفت اعماله ردا علي طريقة كلامه مع مشرف القسم اللي هو غالبا اكير منه سننا واقدم منه في التربية والتعليم .
وللعلم الاستاذ titus اللي حضرتك بتقول ان مدير القسم مستقصده اتهمه الاستاذ احمد زهانة بانه بيسرق اعماله وكان الكلام ده يوم 22 اغسطس الجاري وانا قمت بنقل الموضوع الي الارشيف وفي رده عليا في رساله خاصة موجودة حتي الان في بريدي الخاص طلبت منه ان يحذف عنوان صفحته علي الفيس بوك من التوقيع فحذفها هو بنفسه لانني كمشرف ليس من صلاحياتي تعديل توقيع العضو وبعدين اشوف النهاردة الاستاذ الفاضل كاتب في توقيعه ان المشرف حذف رقم تليفونه وصفحته علي الفيس بوك وانه بينسحب من المنتدي .
تقدر حضرتك تقولي ازاي نبقي مدرسين واباء وبنطلب من اولادنا الصدق في الحديث وعدم الكذب والاستاذ بيكذب علي ويقول ان المشرف علي القسم عمل كذا وكذا والله هو حر في نفسه وفي اعماله ينشرها او يحتفظ بيها لنفسه لان المنتدي ليس موقع اعلانات هو موقع تعليمي مجاني فقط وليس سنتر للدروس الخصوصية
حتي الاشراف علي صفحات المنتدي هو اشراف مجاني بمعني اننا لا نتقاضي اي اجر واقسم بالله انني احيانا اسهر للساعة الواحدة والثانية صباحا انظم المواضيع حتي تكون سهلة وواضحة وميسرة للكل وعندي مدرسة زي حضرتك الصبح وعندي شغلي بعد المدرسة ولا ابتغي الا الاجر من الله سبحانه وتعالي ثم رضا الاعضاء عن عملي ثم ان كل الاعضاء متفاهمين لعملنا واذا غضب لسبب ما سرعان ما يتراجع عن غضبه عندما اشرح له الموضوع ويلتزم بقوانينا المنتدي .
انا قصدت ان يكون ردي بالعامية حتي تصل الرسالة للجميع شكرا علي كل حال