منح مقدمة من الحكومة اليابانية للدراسة فى الجامعات اليابانية
 

منح مقدمة من الحكومة اليابانية للدراسة فى الجامعات اليابانية

التعامل مع السفاره اليابانيه اكثر من رائع

انا كنت من ضمن المعلمين المتقدمين للمنحه اللى بتنزل للمعلمين فى شهر 2
و الحمد لله تم اختيارى من قبل الوزارة و السفاره للسفر لدوله اليابان و منتظر موافقه الحكومه اليابانيه

و علشان كدة هحاول انقل لحضراتكم اللى حصل ليا من الاول للاخر

اولا تم التقديم فى شهر 2 لادارة المنح بالوزارة
ثانيا تم عقد مقابله شخصيه باللغه الانجليزيه بحضور مستشار المادة و مستشار اللغه الانجليزيه
و كانت الاسئله فى مجملها معروفه
قدم نفسك ما الذى تعرفه عن النظام التعليم اليابانى
كيف تؤدى دورك بالفصل
ما الذى تعرفه عن تكنولوجيا النانو ( باعتبار انى معلم علوم )

تم اختيار حوالى 10 من المتقديمن من معلمى مواد العلوم و التربيه الرياضيه و الرياضيات

تم كتابه ابلكيشن فى الوزارة و كان فيه خطا وقعت فيه ادارة المنح انهم طلبوا مننا شهادة صحيه و بالفعل عملناها بس مكنتش المطلوبه من السفاره لان فيه ورق حضرتك هتعملها فى مستشفى عادة خاصه مش حكوميه و دى نقطه مهمه جدا

تم اختيار 9 معلمين لدخول امتحان اللغه الانجليزيه و اليابانيه

الامتحان كان لمدة ساعتين لكل لغه ساعه

اللغه اليابانيه عادة بتقدم ورقه الامتحان فاضيه

و اللغه الانجليزيه امتحانها بسيط مبنى على قواعد و براجرافات و قوتك فى اللغه مش هتساعدك بقدر ذكائك لان فيها تركات كثيرة

بعد كدة تم تحديد 3 اشخاص لعمل مقابله مع ثلاث اشخاص

واحد مصرى و اثنين يابانيين

حضرتك بتخش بيتكلم معاك فى الاتى
قدم نفسك فى دقيقه
لماذا اخترت اليايان
ايه اللى هتعمله لما ترجع
ايه تصورك فى التعامل مع ***يات و شخصيات مختلفه و ثقافات متعددة

لو كان فيه حاجه حابب تقولها

يسالك عن اى عقبات لتكمله النحه لان الدراسه بتبدا فى بعض الجامعات فى 9 و التانيه فى 10

ف النهايه تم اختيار العبد لله كمرشح من السفاره و امر السفر النهائى لسه متحددش اتمنى دعواتكم


الحياه هناك رائعه لانى مشرفى فى راسهل الماجستير قعد هناك 12 سنه يدرس قى كليه طب لوساكا و نقل ليا بعض نواحى حياتهم

الحياه غاليه هتاخد مبلغ من المال ممكن تحوش منه جزء بسيط و لو سافرت معاك الاسره هتعش على الاد جدا و بخنقه

اتمنى انى اكون بينت جزء من اللى مريت به على مدى 10 ايام مدة الاختبارات و المقابلات

حضرتك انا لا اتحدث اللغه اليابانيه
هو الامتحان اللى هتمتحنه بيكون عالمى و بيتم فى نفس التوقيت على مستوى العالم
و فيه دول تعتبر اللغه اليابانيه لغه ثانيه زى الانجليزى عندنا و بالتالى هو بيحط لغته كاختبار على مستوى العالم
و هو عارف ان فيه دول مش بتتحدث بيها
و بالتالى حضرتك بتسيب الورقه فاضيه و همه بيقدرو دة و مبيكونش عائق ليك فى استكمال المنحه لانك بتروح هناك بتاخد فتره تتعلم لغه يابانيه
ملحوظه كان معايا معلم علوم عالى جدا فى اللغه الانجليزيه و للاسف بعد ما سلم الورقه طلب من الملاحظه اليابانيه ورقه حل الاسئله اليابانيه و اللى هى فى الاصل عارفه انه ميعرفش بس فهلوه المصريين و بيتهالى اللى عمله دة هو اللى اقصاه

المنحه دى كل سنه بيتم الاعلان عنها فى شهر 2 او 1
و بيحصل فيها الخطوات اللى قلت لحضرتكم عليه

امتحان اللغه الانجليزيه بيقس مدى زكائك فى اللغه و معرفتك بمصطلحاتها
مفيش اختبار استماع زى التويفل بس جرامر و مصطلحات و برجرافات

اتمنى من حضرتكم التقدم للمنحه دى
لان مجرد دخولك وسط الناس دى و شوفك لطريقه تعاملهم بتكسبك خبره

و نقطه مهمه المنحه مش فلوس لان زى ما قولت قليله ممكن تحوش اه بس مش كتير
المهم فى المنحه انك تتعلم و تكتسب خبرات فى بلد رائعه

تحياتى و اعتذر عن الاطاله

ما هى شروط المنحة للمعلمين؟

هو ان السن ميتعداش 35 عند السفر بس

ببالتوفيق للجميع