|
رســــــــاله لطـــــــــــــلاب ثالثه ثانـــــــــــــــــوى قبل دخول السنه الدراسيه
رسالة من واحد صاحبى خلص ثالثة ثانوى يفيد بها الطلاب الجدد اولا السلام عليكم و رحمة الله و بركاته دي رسالتي لكل اللي رايحين 3 ثانوي ان شاء الله و خاصة بعد ما قريت آخر رسالة ع الصفحة ، عشان - ف رأيي - رسالة مش واقعية يا ريت حضرتك تنشرها ع البيدج من غير اسمي .. الحمدلله خلصت 3 ثانوي و ربنا كرمني فوق ما اتخيل ، و جبت 99.39% علمي علوم ، الحمدلله .. رسالتي بقى : ف 3 ثانوي في 3 حاجات لازم تهتموا بيهم ، الجانب النفسي ، المذاكرة ، علاقتك مع ربنا .. بالنسبة للجانب النفسي : 3 ثانوي مش فارقة كتير عن باقي السنين غير انها : - سنة اطول شوية و عايزة نفس طويل حبتين ، في ناس بيبقوا داخلين جد اوي يقفلوا الفيس و يرموا الموبايل و يعيشوا ف معسكر ، لو عملتوا كدا هتنفجروا و مش هتكملوا ، خليكم طبيعين ، ذاكروا فترة معينة و خدوا راحة ف نص اليوم مثلا .. بس متبقاش اكتر من المذاكرة اكيد - تاني حاجة : الضغط و التوتر اللي هتكونوا فيه بسبب المدرسين و الاهل و العيلة وعيلة العيلة مع احترامي لكل دول ، لو اهلكم من النوع اللي بيضغط اكتر او عايزين يشوفوكم كذا (اي مهنة) متفكروش ف كلامهم كتير عشان هيزود التوتر و الرعب ، ذاكروا و اعملوا كل اللي تقدروا عليه و متفكروش انكم عايزين تدخلوا الكلية الفلانية ، ده بيزود الضغط عليكم اكتر ، متقارنوش نفسكم بحد المذاكرة : - من اكبر الغلطات الل صحابي وقعوا فيها السنة دي انهم خدوا عند اكتر من مدرس ف نفس المادة ! حاولوا بقدر الامكان تاخدوا ف كل مادة مدرس واحد عشان تلاقوا وقت تذاكروا .. زي ما الشرح مهم المذاكرة كمان اهم - موضوع هذاكر مع اصحابي ده موضوع غير واقعي بالمرة - شباب او بنات - هتعدوا بالساعة و الساعتين ف سطر و باقي الوقت اكل و رغي و اسأل مجرب - حاولوا بقدر الامكان تنظموا وقتكم ، لو مش بتروحوا مدرسة ممكن تخلوا ايام فيها درسين ، المهم يبقي عندك يومين اجازة ف الاسبوع تذاكروا و تلموا الي وراكم . - امتحانات المدرسين بتاعت الشهر و الامتحانات الكبيرة بتبقى مهمة جدا و هى دي اللي بتعرفكم مستواكم الحقيقي . - حاولوا متغيبوش كتير عن حصص المدرسين و بالذات الحصص الاساسية ، الغياب يبقى لضرورة قصوى ، الا لو متأكدين ان الحصة مالهاش لازمة - حلوا اسئلة كتاب الوزارة - صحيح فيها اسئلة عقيمة ، بس ساعات بيجيبوا شبهها - اول بأول . - المواد اللي كلها ارقام - زي الفيزيا و الرياضة .. الخ - اهم حاجه فيها الحل ، حلوا كتير اوي ع قد ما تقدروا ، و بلاش تعقدوا نفسكم ، ابدأوا بتدريبات ليها حلول ، جربوا تحلوا و بعد كدا شوفوا الحلول و افهموها - نصوص العربي الحفظ تتحفظ اول بأول عشان لما بتتكوم بيبقى صعب حفظها - صعب مش مستحيل بس بتختلف من قدرات طالب للتاني - - ركزوا ع امتحانات ثانوية عامة للسنين اللي فاتت ، بيجيبوا شبهها دايما ، و متركزوش ع اسئلة الجرايد . الصلاة : لو مش مواظبين ع الصلاة واظبوا عليها ، الجأوا لربنا و متتكسفوش ، لو عمرك ما صليت صلي دلوقتي ، مرة ف مرة هتواظب لوحدك و تحس بالذنب لو مصليتش ، لو اي انسان عمره ما ركعها و صلى لمدة اسبوع من غير ما يقطع هتبقى الصلاة بالنسبة له عبادة و عادة مش قادر يبطلها - صلاة الفجر طبعا مهمة و يا بخته اللي يقدر يقوم الفجر - الدعاء ، ادعوا و ماتكسلوش ، ادعوا دايما بإن ربنا يرزقكم مجموع الكلية اللي تقدروا تمشوا فيها - قراءة القرآن ، مش معنى ان رمضان خلص اننا نركن المصحف ع جمب ، الحمدلله كنت بقرا كل يوم ، ساعاتىمن ع المصحف و ساعات من ع الموبايل ان شا الله 5 آيات بس ، حاولوا تقروا كل يوم بعد اي صلاة مثلا ، المهم ميعديش 3 ايام من غير قرآن - وقت النسيان ف الامتحانات او اللخبطة ادعوا ربنا ، مش لازم دعاء معين ، قولوا اللي يجي ع بالكم . |
شكرااااا اوووووى على نصايح حضرتك وافادتنى كتير جزاك الله خيرا
|
جزاك الله كل خيرا
نصائح رائعة |
موضوع رائع جدا
بس انا كنت عايزة اسأل سؤال ... هو انا لازم يبقي عندي ايام فاضية؟؟ اصل انا معنديش ولا يوم فاضي بس كل الايام درس واحد ما عدا يومين عندي فيهم درسين والمسافة بين البيت والسنتر لا تتعدي ربع ساعة وانا كنت بقول لو صحيت بدري هذاكر و بعدين اروح الدرس عادي ايه رأيك (اسأل صاحبك يعني :d ولو تعرف انت قولي)؟ |
جزاك الله كل خير =)
|
اقتباس:
عادى جدا لو فيها درس او درسين بس انتى تحاولى تذاكرى اليومين دول على قد ماتقدرى والدرس بياخد ساعتين مش مشكلة |
شكرأ جزيلا لحضرتك بس ممكن تقولنا كنت بتذاكر الانجليزى الفيزياء ازاى وهل كتاب الامتحان فى الفيزياء ينفع ا ع ت م د عليه فى المذاكرة ولا لأ
|
اقتباس:
ربنا يقوينا بقي :d |
ايه هيا الملخصات الكويسة اللى بتنصحونا بيها ؟
|
عقدتى مع الانجلش ازليه لانها ماده مهما زاكرت فيها برضو درجتى فيها بتبقى مش كويسه ودلوقتى انا ثانويه عامه .. وخايف يحصل زى كل سنه واتسوح فى الماده دى .. وكنت عاوز اسألك كام سؤال كدة ويا ريت تجاوبنى.
. * ايه افضل الطرق لمذاكره الانجليزى ؟ * افضل الكتب الخارجيه فى الماده ؟ *بالنسبه لتعدد الكتب الخارجيه فى الماده دى ؟ :كنت عاوز اسأل سؤال تانى .. دلوقتى قدامى فرصه انى اخد درسين فى الانجليزى .. فمتردد اعمل كدة ولا لا ؟ . يا ريت تجاوبنى لان خلاص الوقت بيعدى :) |
كلامك حكممم
|
كلام حلو آوى ومفيد جزاك الله خيرا ^_^
|
موضوع رائع :) شكراااااااااااااااااااااااااااا
|
انا الحمد لله جبت نفس المجموع ده
فعلا كل كلمة عنده حق فيها انا بأكد وبشدة على النصايح دي وفعلا ده كان منهجي ف تالتة ثانوي ربنا يوفقكو |
انا جبت 98.5 % الحمد لله ^_^ .. لو محتاجين اي مساعدة انا تحت امركم :)
|
| جميع الأوقات بتوقيت GMT +2. الساعة الآن 04:14 PM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.